MEIKANDAR INSTITUTE &
SPIRITUAL SCHOOL OF LEARNING

chulinks.in

Home



This part of web page is available as android app

* We need to pay for the server
* For operation we need funds
* Cosider helping us
* Support us by making a donation
* Donation allows us to work for you
* Donate via Paypal  

    திருநாவுக்கரசு சுவாமிகள் அருளிச்செய்த
    தேவாரப் பதிகங்கள்
    ஆறாம் திருமுறை முதற் பகுதி
    பாடல்கள் ( 1 - 508 )

    6.001 கோயில் (1-10)
    6.002 கோயில் (11-21)
    6.003 திருவீரட்டானம் (22-32)
    6.004 திருவதிகைவீரட்டானம் (33-43)
    6.005 திருவீரட்டானம் (44-53)
    6.006 திருவதிகைவீரட்டானம் (54-63)
    6.007 திருவீரட்டானம் (64-75)
    6.008 திருக்காளத்தி (76-86)
    6.009 திருஆமாத்தூர் (87-96)
    6.010 திருப்பந்தணைநல்லூர் (97-103)
    6.011 திருப்புன்கூர் - திருநீடூர் (107-116)
    6.012 திருக்கழிப்பாலை (117-126)
    6.013 திருப்புறம்பயம் (127-136)
    6.014 திருநல்லூர் (137-147)
    6.015 திருக்கருகாவூர் (148-158)
    6.016 திருவிடைமருது (159-168)
    6.017 திருவிடைமருது (169-178)
    6.018 திருப்பூவணம் (179-189)
    6.019 திருவாலவாய் (190-200)
    6.020 திருநள்ளாறு (201-210)
    6.021 திருவாக்கூர் (211-220)
    6.022 திருநாகைக்காரோணம் (221-231)
    6.023 திருமறைக்காடு (232-241)
    6.024 திருவாரூர் (242-251)
    6.025 திருவாரூர் (252-262)
    6.026 திருவாரூர் (263-268)
    6.027 திருவாரூர் (269-278)
    6.028 திருவாரூர் (279-289)
    6.029 திருவாரூர் (290-299)
    6.030 திருவாரூர் (300-309)
    6.031 திருவாரூர் (310-319)
    6.032 திருவாரூர் (320-329)
    6.033 திருவாரூர் (330-339)
    6.034 திருவாரூர் (340-349)
    6.035 திருவெண்காடு (350-359)
    6.036 திருப்பழனம் (360-369)
    6.037 திருவையாறு (370-379)
    6.038 திருவையாறு (380-390)
    6.039 திருமழபாடி (391-400)
    6.040 திருமழபாடி (401-407)
    6.041 திருநெய்த்தானம் (408-417)
    6.042 திருநெய்த்தானம் (418-427)
    6.043 திருப்பூந்துருத்தி (428-437)
    6.044 திருச்சோற்றுத்துறை (438-447)
    6.045 திருவொற்றியூர் (448-457)
    6.046 திருஆவடுதுறை (458-468)
    6.047 திருஆவடுதுறை (469-478)
    6.048 திருவலிவலம் (479-488)
    6.049 திருக்கோகரணம் (489-498)
    6.050 திருவீழிமிழலை (499-508)
    6.051 திருவீழிமிழலை (509-519)
    6.052 திருவீழிமிழலை (520-529)
    6.053 திருவீழிமிழலை (530-540)
    6.054 திருப்புள்ளிருக்குவேளூர் (541-550)
    6.055 திருக்கயிலாயம் (551-561)
    6.056 திருக்கயிலாயம் (562-571)
    6.057 திருக்கயிலாயத்திருமலை (572-580)
    6.058 திருவலம்புரம் (581-590)
    6.059 திருவெண்ணி (591 -600)
    6.060 திருக்கற்குடி (601-610)
    6.061 திருக்கன்றாப்பூர் (611-619)
    6.062 திருவானைக்கா (620-629)
    6.063 திருவானைக்கா (630-639)
    6.064 திருவேகம்பம் (640-650)
    6.065 திருவேகம்பம் (651-660)
    6.066 திருநாகேச்சரம் (661-670)
    6.067 திருக்கீழ்வேளூர் (671-680)
    6.068 திருமுதுகுன்றம் (681-690)
    6.069 திருப்பள்ளியின்முக்கூடல் (691 -700)
    6.070 க்ஷேத்திரக்கோவை (701-711)
    6.071 திருஅடைவு (712-722)
    6.072 திருவலஞ்சுழி (723)
    6.073 திருவலஞ்சுழி-திருக்கொட்டையூர் (724-733)
    6.074 திருநாரையூர் (734-743)
    6.075 திருக்குடந்தைக்கீழ்க்கோட்டம் (744-754)
    6.076 திருப்புத்தூர் (755-764)
    6.077 திருவாய்மூர் (765-774)
    6.078 திருவாலங்காடு (775-784)
    6.079 திருத்தலையாலங்காடு (785-794)
    6.080 திருமாற்பேறு (795-804)
    6.081 திருக்கோடிகா (805-812)
    6.082 திருச்சாய்க்காடு (813-822)
    6.083 திருப்பாசூர் (823-832)
    6.084 திருச்செங்காட்டங்குடி (833-842)
    6.085 திருமுண்டீச்சரம் (843-851)
    6.086 திருவாலம்பொழில் (852-860)
    6.087 திருச்சிவபுரம் (861-868)
    6.088 திருவோமாம்புலியூர் (869-877)
    6.089 திருவின்னம்பர் (878-887)
    6.090 திருக்கஞ்சனூர் (888-897)
    6.091 திருவெறும்பியூர் (898-907)
    6.092 திருக்கழுக்குன்றம் (908-909)
    6.093 பலவகைத் - திருத்தாண்டகம் (910-919)
    6.094 நின்ற - திருத்தாண்டகம் (920-929)
    6.095 தனி - திருத்தாண்டகம் (930-939)
    6.096 தனி - திருத்தாண்டகம் (940-950)
    6.097 திருவினாத் - திருத்தாண்டகம் (951-961)
    6.098 திருமறுமாற்றத்-திருத்தாண்டகம் (962-971)
    6.099 திருப்புகலூர் (972-981)

    6. 01 கோயில் - பெரியதிருத்தாண்டகம்


    திருச்சிற்றம்பலம்

    1 அரியானை அந்தணர்தஞ் சிந்தை யானை
    அருமறையி னகத்தானை அணுவை யார்க்குந்
    தெரியாத தத்துவனைத் தேனைப் பாலைத்
    திகழொளியைத் தேவர்கள்தங் கோனை மற்றைக்
    கரியானை நான்முகனைக் கனலைக் காற்றைக்
    கனைகடலைக் குலவரையைக் கலந்து நின்ற
    பெரியானைப் பெரும்பற்றப் புலியூ ரானைப்
    பேசாத நாளெல்லாம் பிறவா நாளே. 6.1.1
    2 கற்றானைக் கங்கைவார் சடையான் றன்னைக்
    காவிரிசூழ் வலஞ்சுழியுங் கருதி னானை
    அற்றார்க்கும் அலந்தார்க்கும் அருள்செய் வானை
    ஆரூரும் புகுவானை அறிந்தோ மன்றே
    மற்றாருந் தன்னொப்பா ரில்லா தானை
    வானவர்க ளெப்பொழுதும் வணங்கி யேத்தப்
    பெற்றானைப் பெரும்பற்றப் புலியூ ரானைப்
    பேசாத நாளெல்லாம் பிறவா நாளே. 6.1.2
    3 கருமானின் உரியதளே உடையா வீக்கிக்
    கனைகழல்கள் கலந்தொலிப்ப அனல்கை யேந்தி
    வருமானத் திரள்தோள்கள் மட்டித் தாட
    வளர்மதியஞ் சடைக்கணிந்து மானேர் நோக்கி
    அருமான வாண்முகத்தா ளமர்ந்து காண
    அமரர்கணம் முடிவணங்க ஆடு கின்ற
    பெருமானைப் பெரும்பற்றப் புலியூ ரானைப்
    பேசாத நாளெல்லாம் பிறவா நாளே. 6.1.3
    4 அருந்தவர்கள் தொழுதேத்தும் அப்பன் றன்னை
    அமரர்கள்தம் பெருமானை அரனை மூவா
    மருந்தமரர்க் கருள்புரிந்த மைந்தன் றன்னை
    மறிகடலுங் குலவரையும் மண்ணும் விண்ணுந்
    திருந்தொளிய தாரகையுந் திசைக ளெட்டுந்
    திரிசுடர்கள் ஓரிரண்டும் பிறவு மாய
    பெருந்தகையைப் பெரும்பற்றப் புலியூ ரானைப்
    பேசாத நாளெல்லாம் பிறவா நாளே. 6.1.4
    5 அருந்துணையை அடியார்தம் அல்லல் தீர்க்கும்
    அருமருந்தை அகல்ஞாலத் தகத்துள் தோன்றி
    வருந்துணையுஞ் சுற்றமும் பற்றும் விட்டு
    வான்புலன்கள் அகத்தடக்கி மடவா ரோடும்
    பொருந்தணைமேல் வரும்பயனைப் போக மாற்றிப்
    பொதுநீக்கித் தனைநினைய வல்லோர்க் கென்றும்
    பெருந்துணையைப் பெரும்பற்றப் புலியூ ரானைப்
    பேசாத நாளெல்லாம் பிறவா நாளே. 6.1.5
    6 கரும்பமரும் மொழிமடவாள் பங்கன் றன்னைக்
    கனவயிரக் குன்றனைய காட்சி யானை
    அரும்பமரும் பூங்கொன்றைத் தாரான் றன்னை
    அருமறையோ டாறங்க மாயி னானைச்
    சுரும்பமருங் கடிபொழில்கள் சூழ்தென் னாரூர்ச்
    சுடர்க்கொழுந்தைத் துளக்கில்லா விளக்கை மிக்க
    பெரும்பொருளைப் பெரும்பற்றப் புலியூ ரானைப்
    பேசாத நாளெல்லாம் பிறவா நாளே. 6.1.6
    7 வரும்பயனை எழுநரம்பி னோசை யானை
    வரைசிலையா வானவர்கள் முயன்ற வாளி
    அரும்பயஞ்செ யவுணர்புர மெரியக் கோத்த
    அம்மானை அலைகடல்நஞ் சயின்றான் றன்னைச்
    சுரும்பமருங் குழல்மடவார் கடைக்கண் நோக்கிற்
    துளங்காத சிந்தையராய்த் துறந்தோ ருள்ளப்
    பெரும்பயனைப் பெரும்பற்றப் புலியூ ரானைப்
    பேசாத நாளெல்லாம் பிறவா நாளே. 6.1.7
    8 காரானை ஈருரிவைப் போர்வை யானைக்
    காமருபூங் கச்சியே கம்பன் றன்னை
    ஆரேனு மடியவர்கட் கணியான் றன்னை
    அமரர்களுக் கறிவரிய அளவி லானைப்
    பாரோரும் விண்ணோரும் பணிய நட்டம்
    பயில்கின்ற பரஞ்சுடரைப் பரனை எண்ணில்
    பேரானைப் பெரும்பற்றப் புலியூ ரானைப்
    பேசாத நாளெல்லாம் பிறவா நாளே. 6.1.8
    9 முற்றாத பால்மதியஞ் சூடினானை
    மூவுலகுந் தானாய முதல்வன் றன்னைச்
    செற்றார்கள் புரமூன்றுஞ் செற்றான் றன்னைத்
    திகழொளியை மரகதத்தைத் தேனைப் பாலைக்
    குற்றாலத் தமர்ந்துறையுங் குழகன் றன்னைக்
    கூத்தாட வல்லானைக் கோனை ஞானம்
    பெற்றானைப் பெரும்பற்றப் புலியூ ரானைப்
    பேசாத நாளெல்லாம் பிறவா நாளே. 6.1.9
    10 காரொளிய திருமேனிச் செங்கண் மாலுங்
    கடிக்கமலத் திருந்தயனுங் காணா வண்ணஞ்
    சீரொளிய தழற்பிழம்பாய் நின்ற தொல்லைத்
    திகழொளியைச் சிந்தைதனை மயக்கந் தீர்க்கும்
    ஏரொளியை இருநிலனும் விசும்பும் விண்ணும்
    ஏழுலகுங் கடந்தண்டத் தப்பால் நின்ற
    பேரொளியைப் பெரும்பற்றப் புலியூ ரானைப்
    பேசாத நாளெல்லாம் பிறவா நாளே. 6.1.10

    திருச்சிற்றம்பலம்


    6. 02 கோயில் - புக்கதிருத்தாண்டகம்



    திருச்சிற்றம்பலம்

    11 மங்குல் மதிதவழும் மாட வீதி
    மயிலாப்பி லுள்ளார் மருக லுள்ளார்
    கொங்கிற் கொடுமுடியார் குற்றா லத்தார்
    குடமூக்கி லுள்ளார்போய்க் கொள்ளம் பூதூர்த்
    தங்கு மிடமறியார் சால நாளார்
    தரும புரத்துள்ளார் தக்க ளூரார்
    பொங்குவெண் ணீறணிந்து பூதஞ் சூழப்
    புலியூர்ச்சிற் றம்பலமே புக்கார் தாமே. 6.2.1
    12 நாக மரைக்கசைத்த நம்ப ரிந்நாள்
    நனிபள்ளி யுள்ளார்போய் நல்லூர்த் தங்கிப்
    பாகப் பொழுதெல்லாம் பாசூர்த் தங்கிப்
    பரிதி நியமத்தார் பன்னி ருநாள்
    வேதமும் வேள்விப் புகையு மோவா
    விரிநீர் மிழலை எழுநாள் தங்கிப்
    போகமும் பொய்யாப் பொருளு மானார்
    புலியூர்ச்சிற் றம்பலமே புக்கார் தாமே. 6.2.2
    13 துறங்காட்டி யெல்லாம் விரித்தார் போலுந்
    தூமதியும் பாம்பு முடையார் போலும்
    மறங்காட்டி மும்மதிலு மெய்தார் போலும்
    மந்திரமுந் தந்திரமுந் தாமே போலும்
    அறங்காட்டி அந்தணர்க்கன் றால நீழல்
    அறமருளிச் செய்த அரனா ரிந்நாள்
    புறங்காட் டெரியாடிப் பூதஞ் சூழப்
    புலியூர்ச்சிற் றம்பலமே புக்கார் தாமே. 6.2.3
    14 வாரேறு வனமுலையாள் பாக மாக
    மழுவாள்கை யேந்தி மயானத் தாடிச்
    சீரேறு தண்வயல்சூழ் ஓத வேலித்
    திருவாஞ்சி யத்தார் திருநள் ளாற்றார்
    காரேறு கண்டத்தார் காமற் காய்ந்த
    கண்விளங்கு நெற்றியார் கடல்நஞ் சுண்டார்
    போரேறு தாமேறிப் பூதஞ் சூழப்
    புலியூர்ச்சிற் றம்பலமே புக்கார் தாமே. 6.2.4
    15 காரார் கமழ்கொன்றைக் கண்ணி சூடிக்
    கபாலங்கை யேந்திக் கணங்கள் பாட
    ஊரா ரிடும்பிச்சை கொண்டு ழலும்
    உத்தம ராய்நின்ற ஒருவ னார்தாஞ்
    சீரார் கழல்வணங்குந் தேவ தேவர்
    திருவாரூர்த் திருமூலத் தான மேயார்
    போரார் விடையேறிப் பூதஞ் சூழப்
    புலியூர்ச்சிற் றம்பலமே புக்கார் தாமே. 6.2.5
    16 காதார் குழையினர் கட்டங் கத்தார்
    கயிலாய மாமலையார் காரோ ணத்தார்
    மூதாயர் மூதாதை யில்லார் போலும்
    முதலு மிறுதியுந் தாமே போலும்
    மாதாய மாதர் மகிழ வன்று
    மன்மதவேள் தன்னுடலங் காய்ந்தா ரிந்நாட்
    போதார் சடைதாழப் பூதஞ் சூழப்
    புலியூர்ச்சிற் றம்பலமே புக்கார் தாமே. 6.2.6
    17 இறந்தார்க்கு மென்றும் இறவா தார்க்கும்
    இமையவர்க்கும் ஏகமாய் நின்று சென்று
    பிறந்தார்க்கு மென்றும் பிறவா தார்க்கும்
    பெரியான்றன் பெருமையே பேச நின்று
    மறந்தார் மனத்தென்றும் மருவார் போலும்
    மறைக்காட் டுறையும் மழுவாட் செல்வர்
    புறந்தாழ் சடைதாழப் பூதஞ் சூழப்
    புலியூர்ச்சிற் றம்பலமே புக்கார் தாமே. 6.2.7
    18 குலாவெண் டலைமாலை யென்பு பூண்டு
    குளிர்கொன்றைத் தாரணிந்து கொல்லே றேறிக்
    கலாவெங் களிற்றுரிவைப் போர்வை மூடிக்
    கையோ டனலேந்திக் காடு றைவார்
    நிலாவெண் மதியுரிஞ்ச நீண்ட மாடம்
    நிறைவயல்சூழ் நெய்த்தான மேய செல்வர்
    புலால்வெண் டலையேந்திப் பூதஞ் சூழப்
    புலியூர்ச்சிற் றம்பலமே புக்கார் தாமே. 6.2.8
    19 சந்தித்த கோவணத்தர் வெண்ணூல் மார்பர்
    சங்கரனைக் கண்டீரோ கண்டோ மிந்நாள்
    பந்தித்த வெள்விடையைப் பாய வேறிப்
    படுதலையி லென்கொலோ ஏந்திக் கொண்டு
    வந்திங்கென் வெள்வளையுந் தாமு மெல்லாம்
    மணியாரூர் நின்றந்தி கொள்ளக் கொள்ளப்
    பொன்றி மணிவிளக்குப் பூதம் பற்றப்
    புலியூர்ச்சிற் றம்பலமே புக்கார் தாமே. 6.2.9
    20 பாதங்கள் நல்லார் பரவி யேத்தப்
    பத்திமையாற் பணிசெய்யுந் தொண்டர் தங்கள்
    ஏதங்கள் தீர இருந்தார் போலும்
    எழுபிறப்பும் ஆளுடைய ஈச னார்தாம்
    வேதங்க ளோதியோர் வீணை யேந்தி
    விடையொன்று தாமேறி வேத கீதர்
    பூதங்கள் சூழப் புலித்தோல் வீக்கிப்
    புலியூர்ச்சிற் றம்பலமே புக்கார் தாமே. 6.2.10
    21 பட்டுடுத்துத் தோல்போர்த்துப் பாம்பொன் றார்த்துப்
    பகவனார் பாரிடங்கள் சூழ நட்டஞ்
    சிட்டராய்த் தீயேந்திச் செல்வார் தம்மைத்
    தில்லைச்சிற் றம்பலத்தே கண்டோ மிந்நாள்
    விட்டிலங்கு சூலமே வெண்ணூ லுண்டே
    ஓதுவதும் வேதமே வீணை யுண்டே
    கட்டங்கங் கையதே சென்று காணீர்
    கறைசேர் மிடற்றெங் கபாலி யார்க்கே. 6.2.11

    திருச்சிற்றம்பலம்


    6. 03 திருவீரட்டானம் - ஏழைத்திருத்தாண்டகம்



    திருச்சிற்றம்பலம்

    22 வெறிவிரவு கூவிளநற் றொங்க லானை
    வீரட்டத் தானைவெள் ளேற்றி னானைப்
    பொறியரவி னானைப்புள் ளூர்தி யானைப்
    பொன்னிறத்தி னானைப் புகழ்தக் கானை
    அறிதற் கரியசீ ரம்மான் றன்னை
    அதியரைய மங்கை அமர்ந்தான் றன்னை
    எறிகெடிலத் தானை இறைவன் றன்னை
    ஏழையே னான்பண் டிகழ்ந்த வாறே. 6.3.1
    23 வெள்ளிக்குன் றன்ன விடையான் றன்னை
    வில்வலான் வில்வட்டங் காய்ந்தான் றன்னைப்
    புள்ளி வரிநாகம் பூண்டான் றன்னைப்
    பொன்பிதிர்ந் தன்ன சடையான் றன்னை
    வள்ளி வளைத்தோள் முதல்வன் றன்னை
    வாரா வுலகருள வல்லான் றன்னை
    எள்க இடுபிச்சை ஏற்பான் றன்னை
    ஏழையே னான்பண் டிகழ்ந்த வாறே. 6.3.2
    24 முந்தி யுலகம் படைத்தான் றன்னை
    மூவா முதலாய மூர்த்தி தன்னைச்
    சந்தவெண் டிங்கள் அணிந்தான் றன்னைத்
    தவநெறிகள் சாதிக்க வல்லான் றன்னைச்
    சிந்தையில் தீர்வினையைத் தேனைப் பாலைச்
    செழுங்கெடில வீரட்ட மேவி னானை
    எந்தை பெருமானை ஈசன் றன்னை
    ஏழையே னான்பண் டிகழ்ந்த வாறே. 6.3.3
    25 மந்திரமும் மறைப்பொருளு மானான் றன்னை
    மதியமும் ஞாயிறுங் காற்றுந் தீயும்
    அந்தரமு மலைகடலு மானான் றன்னை
    அதியரைய மங்கை அமர்ந்தான் றன்னைக்
    கந்தருவஞ் செய்திருவர் கழல்கை கூப்பிக்
    கடிமலர்கள் பலதூவிக் காலை மாலை
    இந்திரனும் வானவருந் தொழச்செல் வானை
    ஏழையே னான்பண் டிகழ்ந்த வாறே. 6.3.4
    26 ஒருபிறப்பி லானடியை உணர்ந்துங் காணார்
    உயர்கதிக்கு வழிதேடிப் போக மாட்டார்
    வருபிறப்பொன் றுணராது மாசு பூசி
    வழிகாணா தவர்போல்வார் மனத்த னாகி
    அருபிறப்பை அறுப்பிக்கும் அதிகை யூரன்
    அம்மான்றன் அடியிணையே அணைந்து வாழா
    திருபிறப்பும் வெறுவியராய் இருந்தார் சொற்கேட்
    டேழையே னான்பண் டிகழ்ந்த வாறே. 6.3.5
    27 ஆறேற்க வல்ல சடையான் றன்னை
    அஞ்சனம் போலு மிடற்றான் றன்னைக்
    கூறேற்கக் கூறமர வல்லான் றன்னைக்
    கோல்வளைக்கை மாதராள் பாகன் றன்னை
    நீறேற்கப் பூசும் அகலத் தானை
    நின்மலன் றன்னை நிமலன் றன்னை
    ஏறேற்க ஏறுமா வல்லான் றன்னை
    ஏழையே னான்பண் டிகழ்ந்த வாறே. 6.3.6
    28 குண்டாக்க னாயுழன்று கையி லுண்டு
    குவிமுலையார் தம்முன்னே நாண மின்றி
    உண்டி யுகந்தமணே நின்றார் சொற்கேட்
    டுடனாகி யுழிதந்தேன் உணர்வொன் றின்றி
    வண்டுலவு கொன்றையங் கண்ணி யானை
    வானவர்க ளேத்தப் படுவான் றன்னை
    எண்டிசைக்கு மூர்த்தியாய் நின்றான் றன்னை
    ஏழையே னான்பண் டிகழ்ந்த வாறே. 6.3.7
    29 உறிமுடித்த குண்டிகைதங் கையிற் றூக்கி
    ஊத்தைவாய்ச் சமணர்க்கோர் குண்டாக் கனாய்க்
    கறிவிரவு நெய்சோறு கையி லுண்டு
    கண்டார்க்குப் பொல்லாத காட்சி யானேன்
    மறிதிரைநீர்ப் பவ்வநஞ் சுண்டான் றன்னை
    மறித்தொருகால் வல்வினையேன் நினைக்க மாட்டேன்
    எறிகெடில நாடர் பெருமான் றன்னை
    ஏழையே னான்பண் டிகழ்ந்த வாறே. 6.3.8
    30 நிறைவார்ந்த நீர்மையாய் நின்றான் றன்னை
    நெற்றிமேற் கண்ணொன் றுடையான் றன்னை
    மறையானை மாசொன் றிலாதான் றன்னை
    வானவர்மேல் மலரடியை வைத்தான் றன்னைக்
    கறையானைக் காதார் குழையான் றன்னைக்
    கட்டங்க மேந்திய கையி னானை
    இறையானை எந்தை பெருமான் றன்னை
    ஏழையே னான்பண் டிகழ்ந்த வாறே. 6.3.9
    31 தொல்லைவான் சூழ்வினைகள் சூழப் போந்து
    தூற்றியே னாற்றியேன் சுடராய் நின்று
    வல்லையே இடர்தீர்த்திங் கடிமை கொண்ட
    வானவர்க்குந் தானவர்க்கும் பெருமான் றன்னைக்
    கொல்லைவாய்க் குருந்தொசித்துக் குழலு மூதுங்
    கோவலனும் நான்முகனுங் கூடி யெங்கும்
    எல்லைகாண் பரியானை எம்மான் றன்னை
    ஏழையே னான்பண் டிகழ்ந்த வாறே. 6.3.10
    32 முலைமறைக்கப் பட்டுநீ ராடப் பெண்கள்
    முறைமுறையால் நந்தெய்வ மென்று தீண்டித்
    தலைபறிக்குந் தன்மையர்க ளாகி நின்று
    தவமேயென் றவஞ்செய்து தக்க தோரார்
    மலைமறிக்கச் சென்ற இலங்கைக் கோனை
    மதனழியச் செற்றசே வடியி னானை
    இலைமறித்த கொன்றையந் தாரான் றன்னை
    ஏழையே னான்பண் டிகழ்ந்த வாறே. 6.3.11

    திருச்சிற்றம்பலம்


    6. 04 திருவதிகைவீரட்டானம் - அடையாளத்திருத்தாண்டகம்



    திருச்சிற்றம்பலம்

    33 சந்திரனை மாகங்கைத் திரையால் மோதச்
    சடாமகுடத் திருத்துமே சாம வேதக்
    கந்தருவம் விரும்புமே கபால மேந்து
    கையனே மெய்யனே கனக மேனிப்
    பந்தணவு மெல்விரலாள் பாக னாமே
    பசுவேறு மேபரம யோகி யாமே
    ஐந்தலைய மாசுணங்கொண் டரையார்க் கும்மே
    அவனாகில் அதிகைவீ ரட்ட னாமே. 6.4.1
    34 ஏறேறி யேழுலகும் உழிதர் வானே
    இமையவர்கள் தொழுதேத்த இருக்கின் றானே
    பாறேறு படுதலையிற் பலிகொள் வானே
    படவரவந் தடமார்பிற் பயில்வித் தானே
    நீறேறு செழும்பவளக் குன்றொப் பானே
    நெற்றிமேல் ஒற்றைக்கண் நிறைவித் தானே
    ஆறேறு சடைமுடிமேற் பிறைவைத் தானே
    அவனாகில் அதிகைவீ ரட்ட னாமே. 6.4.2
    35 முண்டத்திற் பொலிந்திலங்கு மேனி யானே
    முதலாகி நடுவாகி முடிவா னானே
    கண்டத்தில் வெண்மருப்பின் காறை யானே
    கதநாகங் கொண்டாடுங் காட்சி யானே
    பிண்டத்தின் இயற்கைக்கோர் பெற்றி யானே
    பெருநிலநீர் தீவளிஆ காச மாகி
    அண்டத்துக் கப்பாலாய் இப்பா லானே
    அவனாகில் அதிகைவீ ரட்ட னாமே. 6.4.3
    36 செய்யனே கரியனே கண்டம் பைங்கண்
    வெள்ளெயிற்றா டரவனே வினைகள் போக
    வெய்யனே தண்கொன்றை மிலைத்த சென்னிச்
    சடையனே விளங்குமழுச் சூல மேந்துங்
    கையனே காலங்கள் மூன்றா னானே
    கருப்புவிற் றனிக்கொடும்பூண் காமற் காய்ந்த
    ஐயனே பருத்துயர்ந்த ஆனேற் றானே
    அவனாகி லதிகைவீ ரட்ட னாமே. 6.4.4
    37 பாடுமே யொழியாமே நால்வே தமும்
    படர்சடைமேல் ஒளிதிகழப் பனிவெண் டிங்கள்
    சூடுமே அரைதிகழத் தோலும் பாம்புஞ்
    சுற்றுமே தொண்டைவாய் உமையோர் பாகங்
    கூடுமே குடமுழவம் வீணை தாளங்
    குறுநடைய சிறுபூதம் முழக்க மாக்கூத்
    தாடுமே அந்தடக்கை அனலேந் தும்மே
    அவனாகில் அதிகைவீ ரட்ட னாமே. 6.4.5
    38 ஒழித்திடுமே உள்குவார் உள்ளத் துள்ள
    உறுபிணியுஞ் செறுபகையும் ஒற்றைக் கண்ணால்
    விழித்திடுமே காமனையும் பொடியா வீழ
    வெள்ளப் புனற்கங்கை செஞ்சடைமேல்
    இழித்திடுமே ஏழுலகுந் தானா கும்மே
    இயங்குந் திரிபுரங்க ளோரம் பினால்
    அழித்திடுமே ஆதிமா தவத்து ளானே
    அவனாகில் அதிகைவீ ரட்ட னாமே. 6.4.6
    39 குழலோடு கொக்கரைகைத் தாளம் மொந்தை
    குறட்பூதம் முன்பாடத் தானா டும்மே
    கழலாடு திருவிரலாற் கரணஞ் செய்து
    கனவின்கண் திருவுருவந் தான்காட் டும்மே
    எழிலாருந் தோள்வீசி நடமா டும்மே
    ஈமப் புறங்காட்டில் ஏமந் தோறும்
    அழலாடு மேயட்ட மூர்த்தி யாமே
    அவனாகில் அதிகைவீ ரட்ட னாமே. 6.4.7
    40 மாலாகி மதமிக்க களிறு தன்னை
    வதைசெய்து மற்றதனின் உரிவை கொண்டு
    மேலாலுங் கீழாலுந் தோன்றா வண்ணம்
    வெம்புலால் கைகலக்க மெய்போர்த் தானே
    கோலாலம் படவரைநட் டரவு சுற்றிக்
    குரைகடலைத் திரையலறக் கடைந்து கொண்ட
    ஆலால முண்டிருண்ட கண்டத் தானே
    அவனாகில் அதிகைவீ ரட்ட னாமே. 6.4.8
    41 செம்பொனாற் செய்தழகு பெய்தாற் போலுஞ்
    செஞ்சடையெம் பெருமானே தெய்வ நாறும்
    வம்பினார் மலர்க்கூந்த லுமையாள் காதல்
    மணவாள னேவலங்கை மழுவா ளனே
    நம்பனே நான்மறைகள் தொழநின் றானே
    நடுங்காதார் புரமூன்றும் நடுங்கச் செற்ற
    அம்பனே அண்டகோ சரத்து ளானே
    அவனாகில் அதிகைவீ ரட்ட னாமே. 6.4.9
    42 எழுந்ததிரை நதித்துவலை நனைந்த திங்கள்
    இளநிலாத் திகழ்கின்ற வளர்ச டையனே
    கொழும்பவளச் செங்கனிவாய்க் காமக் கோட்டி
    கொங்கையிணை அமர்பொருது கோலங் கொண்ட
    தழும்புளவே வரைமார்பில் வெண்ணூ லுண்டே
    சாந்தமொடு சந்தனத்தின் அளறு தங்கி
    அழுந்தியசெந் திருவுருவில் வெண்ணீற் றானே
    அவனாகில் அதிகைவீ ரட்ட னாமே. 6.4.10
    43 நெடியானும் நான்முகனும் நேடிக் காணா
    நீண்டானே நேரொருவ ரில்லா தானே
    கொடியேறு கோலமா மணிகண் டனே
    கொல்வேங்கை அதளனே கோவ ணவனே
    பொடியேறு மேனியனே ஐயம் வேண்டிப்
    புவலோகந் திரியுமே புரிநூ லானே
    அடியாரை அமருலகம் ஆள்விக் கும்மே
    அவனாகில் அதிகைவீ ரட்ட னாமே. 6.4.11

    திருச்சிற்றம்பலம்


    6. 05 திருவீரட்டானம் - போற்றித்திருத்தாண்டகம்



    திருச்சிற்றம்பலம்

    44 எல்லாஞ் சிவனென்ன நின்றாய் போற்றி
    எரிசுடராய் நின்ற இறைவா போற்றி
    கொல்லார் மழுவாட் படையாய் போற்றி
    கொல்லுங் கூற்றொன்றை உதைத்தாய் போற்றி
    கல்லாதார் காட்சிக் கரியாய் போற்றி
    கற்றா ரிடும்பை களைவாய் போற்றி
    வில்லால் வியனரணம் எய்தாய் போற்றி
    வீரட்டங் காதல் விமலா போற்றி. 6.5.1
    45 பாட்டுக்கும் ஆட்டுக்கும் பண்பா போற்றி
    பல்லூழி யாய படைத்தாய் போற்றி
    ஓட்டகத்தே யூணா உகந்தாய் போற்றி
    உள்குவார் உள்ளத் துறைவாய் போற்றி
    காட்டகத்தே ஆடல் மகிழ்ந்தாய் போற்றி
    கார்மேக மன்ன மிடற்றாய் போற்றி
    ஆட்டுவதோர் நாகம் அசைத்தாய் போற்றி
    அலைகெடில வீரட்டத் தாள்வாய் போற்றி. 6.5.2
    46 முல்லையங் கண்ணி முடியாய் போற்றி
    முழுநீறு பூசிய மூர்த்தி போற்றி
    எல்லை நிறைந்த குணத்தாய் போற்றி
    ஏழ்நரம்பி னோசை படைத்தாய் போற்றி
    சில்லைச் சிரைத்தலையில் ஊணா போற்றி
    சென்றடைந்தார் தீவினைகள் தீர்ப்பாய் போற்றி
    தில்லைச்சிற் றம்பல மேயாய் போற்றி
    திருவீரட் டானத்தெஞ் செல்வா போற்றி. 6.5.3
    47 சாம்பர் அகலத் தணிந்தாய் போற்றி
    தவநெறிகள் சாதித்து நின்றாய் போற்றி
    கூம்பித் தொழுவார்தங் குற்றே வலைக்
    குறிக்கொண் டிருக்குங் குழகா போற்றி
    பாம்பும் மதியும் புனலுந் தம்மிற்
    பகைதீர்த் துடன்வைத்த பண்பா போற்றி
    ஆம்பல் மலர்கொண் டணிந்தாய் போற்றி
    அலைகெடில வீரட்டத் தாள்வாய் போற்றி. 6.5.4
    48 நீறேறு நீல மிடற்றாய் போற்றி
    நிழல்திகழும் வெண்மழுவாள் வைத்தாய் போற்றி
    கூறே றுமையொருபாற் கொண்டாய் போற்றி
    கோளரவம் ஆட்டுங் குழகா போற்றி
    ஆறேறு சென்னி யுடையாய் போற்றி
    அடியார்கட் காரமுத மானாய் போற்றி
    ஏறேற என்றும் உகப்பாய் போற்றி
    இருங்கெடில வீரட்டத் தெந்தாய் போற்றி. 6.5.5
    49 பாடுவார் பாட லுகப்பாய் போற்றி
    பழையாற்றுப் பட்டீச் சுரத்தாய் போற்றி
    வீடுவார் வீடருள வல்லாய் போற்றி
    வேழத் துரிவெருவப் போர்த்தாய் போற்றி
    நாடுவார் நாடற் கரியாய் போற்றி
    நாகம் அரைக்கசைத்த நம்பா போற்றி
    ஆடுமா னைந்தும் உகப்பாய் போற்றி
    அலைகெடில வீரட்டத் தாள்வாய் போற்றி. 6.5.6
    50 மண்டுளங்க ஆடல் மகிழ்ந்தாய் போற்றி
    மால்கடலு மால்விசும்பு மானாய் போற்றி
    விண்டுளங்க மும்மதிலும் எய்தாய் போற்றி
    வேழத் துரிமூடும் விகிர்தா போற்றி
    பண்டுளங்கப் பாடல் பயின்றாய் போற்றி
    பார்முழுது மாய பரமா போற்றி
    கண்டுளங்கக் காமனைமுன் காய்ந்தாய் போற்றி
    கார்க்கெடிலங் கொண்ட கபாலி போற்றி. 6.5.7
    51 வெஞ்சினவெள் ளேறூர்தி யுடையாய் போற்றி
    விரிசடைமேல் வெள்ளம் படைத்தாய் போற்றி
    துஞ்சாப் பலிதேருந் தோன்றால் போற்றி
    தொழுதகை துன்பந் துடைப்பாய் போற்றி
    நஞ்சொடுங்குங் கண்டத்து நாதா போற்றி
    நான்மறையோ டாறங்க மானாய் போற்றி
    அஞ்சொலாள் பாகம் அமர்ந்தாய் போற்றி
    அலைகெடில வீரட்டத் தாள்வாய் போற்றி. 6.5.8
    52 சிந்தையாய் நின்ற சிவனே போற்றி
    சீபர்ப்ப தஞ்சிந்தை செய்தாய் போற்றி
    புந்தியாய்ப் புண்டரிகத் துள்ளாய் போற்றி
    புண்ணியனே போற்றி புனிதா போற்றி
    சந்தியாய் நின்ற சதுரா போற்றி
    தத்துவனே போற்றியென் தாதாய் போற்றி
    அந்தியாய் நின்ற அரனே போற்றி
    அலைகெடில வீரட்டத் தாள்வாய் போற்றி. 6.5.9
    53 முக்கணா போற்றி முதல்வா போற்றி
    முருகவேள் தன்னைப் பயந்தாய் போற்றி
    தக்கணா போற்றி தருமா போற்றி
    தத்துவனே போற்றியென் தாதாய் போற்றி
    தொக்கணா வென்றிருவர் தோள்கை கூப்பத்
    துளங்கா தெரிசுடராய் நின்றாய் போற்றி
    எக்கண்ணுங் கண்ணிலேன் எந்தாய் போற்றி
    எறிகெடில வீரட்டத் தீசா போற்றி. 6.5.10

    திருச்சிற்றம்பலம்


    6. 06 திருவதிகைவீரட்டானம் - திருவடித்திருத்தாண்டகம்



    திருச்சிற்றம்பலம்

    54 அரவணையான் சிந்தித் தரற்றும்மடி
    அருமறையான் சென்னிக் கணியாமடி
    சரவணத்தான் கைதொழுது சாரும்மடி
    சார்ந்தார்கட் கெல்லாஞ் சரணாமடி
    பரவுவார் பாவம் பறைக்கும்மடி
    பதினெண் கணங்களும் பாடும்மடி
    திரைவிரவு தென்கெடில நாடன்னடி
    திருவீரட் டானத்தெஞ் செல்வனடி. 6.6.1
    55 கொடுவினையா ரென்றுங் குறுகாவடி
    குறைந்தடைந்தார் ஆழாமைக் காக்கும்மடி
    படுமுழவம் பாணி பயிற்றும்மடி
    பதைத்தெழுந்த வெங்கூற்றைப் பாய்ந்தவடி
    கடுமுரணே றூர்ந்தான் கழற்சேவடி
    கடல்வையங் காப்பான் கருதும்மடி
    நெடுமதியங் கண்ணி யணிந்தானடி
    நிறைகெடில வீரட்டம் நீங்காவடி. 6.6.2
    56 வைதெழுவார் காமம்பொய் போகாவடி
    வஞ்சவலைப் பாடொன் றில்லாவடி
    கைதொழுது நாமேத்திக் காணும்மடி
    கணக்கு வழக்கைக் கடந்தவடி
    நெய்தொழுது நாமேத்தி யாட்டும்மடி
    நீள்விசும்பை ஊடறுத்து நின்றவடி
    தெய்வப் புனற்கெடில நாடன்னடி
    திருவீரட் டானத்தெஞ் செல்வனடி. 6.6.3
    57 அரும்பித்த செஞ்ஞாயி றேய்க்கும்மடி
    அழகெழுத லாகா அருட்சேவடி
    சுரும்பித்த வண்டினங்கள் சூழ்ந்தவடி
    சோமனையுங் காலனையுங் காய்ந்தவடி
    பெரும்பித்தர் கூடிப் பிதற்றும்மடி
    பிழைத்தார் பிழைப்பறிய வல்லவடி
    திருந்துநீர்த் தென்கெடில நாடன்னடி
    திருவீரட் டானத்தெஞ் செல்வனடி. 6.6.4
    58 ஒருகாலத் தொன்றாகி நின்றவடி
    ஊழிதோ றூழி உயர்ந்தவடி
    பொருகழலும் பல்சிலம்பும் ஆர்க்கும்மடி
    புகழ்வார் புகழ்தகைய வல்லவடி
    இருநிலத்தார் இன்புற்றங் கேத்தும்மடி
    இன்புற்றார் இட்டபூ ஏறும்மடி
    திருவதிகைத் தென்கெடில நாடன்னடி
    திருவீரட் டானத்தெஞ் செல்வனடி. 6.6.5
    59 திருமகட்குச் செந்தா மரையாமடி
    சிறந்தவர்க்குத் தேனாய் விளைக்கும்மடி
    பொருளவர்க்குப் பொன்னுரையாய் நின்றவடி
    புகழ்வார் புகழ்தகைய வல்லவடி
    உருவிரண்டு மொன்றோடொன் றொவ்வாவடி
    உருவென் றுணரப் படாதவடி
    திருவதிகைத் தென்கெடில நாடன்னடி
    திருவீரட் டானத்தெஞ் செல்வனடி. 6.6.6
    60 உரைமாலை யெல்லா முடையவடி
    உரையால் உணரப் படாதவடி
    வரைமாதை வாடாமை வைக்கும்மடி
    வானவர்கள் தாம்வணங்கி வாழ்த்தும்மடி
    அரைமாத் திரையில் லடங்கும்மடி
    அகலம் அளக்கிற்பார் இல்லாவடி
    கரைமாங் கலிக்கெடில நாடன்னடி
    கமழ்வீரட் டானக் காபாலியடி. 6.6.7
    61 நறுமலராய் நாறு மலர்ச்சேவடி
    நடுவாய் உலகநா டாயவடி
    செறிகதிருந் திங்களுமாய் நின்றவடி
    தீத்திரளா யுள்ளே திகழ்ந்தவடி
    மறுமதியை மாசு கழுவும்மடி
    மந்திரமுந் தந்திரமு மாயவடி
    செறிகெடில நாடர் பெருமானடி
    திருவீரட் டானத்தெஞ் செல்வனடி. 6.6.8
    62 அணியனவுஞ் சேயனவு மல்லாவடி
    அடியார்கட் காரமுத மாயவடி
    பணிபவர்க்குப் பாங்காக வல்லவடி
    பற்றற்றார் பற்றும் பவளவடி
    மணியடி பொன்னடி மாண்பாமடி
    மருந்தாய்ப் பிணிதீர்க்க வல்லவடி
    தணிபாடு தண்கெடில நாடன்னடி
    தகைசார் வீரட்டத் தலைவனடி. 6.6.9
    63 அந்தாம ரைப்போ தலர்ந்தவடி
    அரக்கனையும் ஆற்றல் அழித்தவடி
    முந்தாகி முன்னே முளைத்தவடி
    முழங்கழலாய் நீண்டவெம் மூர்த்தியடி
    பந்தாடு மெல்விரலாள் பாகன்னடி
    பவளத் தடவரையே போல்வானடி
    வெந்தார் சுடலைநீ றாடும்மடி
    வீரட்டங் காதல் விமலனடி. 6.6.10

    இத்தலம் நடுநாட்டிலுள்ளது.
    சுவாமிபெயர் - திருவீரட்டேசுவரர்,
    தேவியார் - திருவதிகைநாயகியம்மை.

    திருச்சிற்றம்பலம்


    6. 07 திருவீரட்டானம் - காப்புத்திருத்தாண்டகம்



    திருச்சிற்றம்பலம்

    64 செல்வப் புனற்கெடில வீரட்டமுஞ்
    சிற்றேம மும்பெருந்தண் குற்றாலமுந்
    தில்லைச்சிற் றம்பலமுந் தென்கூடலுந்
    தென்னானைக் காவுஞ் சிராப்பள்ளியும்
    நல்லூருந் தேவன் குடிமருகலும்
    நல்லவர்கள் தொழுதேத்து நாரையூருங்
    கல்லலகு நெடும்புருவக் கபாலமேந்திக்
    கட்டங்கத் தோடுறைவார் காப்புக்களே. 6.7.1
    65 தீர்த்தப் புனற்கெடில வீரட்டமுந்
    திருக்கோவல் வீரட்டம் வெண்ணெய்நல்லூர்
    ஆர்த்தருவி வீழ்சுனைநீர் அண்ணாமலை
    அறையணி நல்லூரும் அரநெறியும்
    ஏத்துமின்கள் நீரேத்த நின்றஈசன்
    இடைமரு தின்னம்பர் ஏகம்பமும்
    கார்த்தயங்கு சோலைக் கயிலாயமுங்
    கண்ணுதலான் தன்னுடைய காப்புக்களே. 6.7.2
    66 சிறையார் புனற்கெடில வீரட்டமுந்
    திருப்பா திரிப்புலியூர் திருவாமாத்தூர்
    துறையார் வனமுனிக ளேத்தநின்ற
    சோற்றுத் துறைதுருத்தி நெய்த்தானமும்
    அறையார் புனலொழுகு காவிரிசூழ்
    ஐயாற் றமுதன் பழனம்நல்ல
    கறையார் பொழில்புடைசூழ் கானப்பேருங்
    கழுக்குன்றுந் தம்முடைய காப்புக்களே. 6.7.3
    67 திரையார் புனற்கெடில வீரட்டமுந்
    திருவாரூர் தேவூர் திருநெல்லிக்கா
    உரையார் தொழநின்ற ஒற்றியூரும்
    ஓத்தூரும் மாற்பேறும் மாந்துறையும்
    வரையா ரருவிசூழ் மாநதியும்
    மாகாளங் கேதாரம் மாமேருவுங்
    கரையார் புனலொழுகு காவிரிசூழ்
    கடம்பந் துறையுறைவார் காப்புக்களே. 6.7.4
    68 செழுநீர்ப் புனற்கெடில வீரட்டமுந்
    திரிபுராந் தகந்தென்னார் தேவீச்சரங்
    கொழுநீர் புடைசுழிக்குங் கோட்டுக்காவுங்
    குடமூக்குங் கோகரணங் கோலக்காவும்
    பழிநீர்மை யில்லாப் பனங்காட்டூரும்
    பனையூர் பயற்றூர் பராய்த்துறையுங்
    கழுநீர் மதுவிரியுங் காளிங்கமுங்
    கணபதீச் சரத்தார்தங் காப்புக்களே. 6.7.5
    69 தெய்வப் புனற்கெடில வீரட்டமுஞ்
    செழுந்தண் பிடவூருஞ் சென்றுநின்று
    பவ்வந் திரியும் பருப்பதமும்
    பறியலூர் வீரட்டம் பாவநாசம்
    மவ்வந் திரையும் மணிமுத்தமும்
    மறைக்காடும் வாய்மூர் வலஞ்சுழியுங்
    கவ்வை வரிவண்டு பண்ணேபாடுங்
    கழிப்பாலை தம்முடைய காப்புக்களே. 6.7.6
    70 தெண்ணீர்ப் புனற்கெடில வீரட்டமுஞ்
    சிக்காலி வல்லந் திருவேட்டியும்
    உண்ணீரார் ஏடகமும் ஊறல்அம்பர்
    உறையூர் நறையூர் அரணநல்லூர்
    விண்ணார் விடையான் விளமர்வெண்ணி
    மீயச்சூர் வீழி மிழலைமிக்க
    கண்ணார் நுதலார் கரபுரமுங்
    காபாலி யாரவர்தங் காப்புக்களே. 6.7.7
    71 தெள்ளும் புனற்கெடில வீரட்டமுந்
    திண்டீச் சரமுந் திருப்புகலூர்
    எள்ளும் படையான் இடைத்தானமும்
    ஏயீச் சரமுநல் லேமங்கூடல்
    கொள்ளு மிலயத்தார் கோடிகாவுங்
    குரங்கணில் முட்டமுங் குறும்பலாவுங்
    கள்ளருந்தத் தெள்ளியா ருள்கியேத்துங்
    காரோணந் தம்முடைய காப்புக்களே. 6.7.8
    72 சீரார் புனற்கெடில வீரட்டமுந்
    திருக்காட்டுப் பள்ளி திருவெண்காடும்
    பாரார் பரவுஞ்சீர்ப் பைஞ்ஞீலியும்
    பந்தணை நல்லூரும் பாசூர்நல்லம்
    நீரார் நிறைவயல்சூழ் நின்றியூரும்
    நெடுங்களமும் நெல்வெண்ணெய் நெல்வாயிலுங்
    காரார் கமழ்கொன்றைத் தாரார்க்கென்றுங்
    கடவூரில் வீரட்டங் காப்புக்களே. 6.7.9
    73 சிந்தும் புனற்கெடில வீரட்டமுந்
    திருவாஞ் சியமுந் திருநள்ளாறும்
    அந்தண் பொழில்புடைசூழ் அயோகந்தியும்
    ஆக்கூரு மாவூரு மான்பட்டியும்
    எந்தம் பெருமாற் கிடமாவது
    இடைச்சுரமும் எந்தை தலைச்சங்காடுங்
    கந்தங் கமழுங் கரவீரமுங்
    கடம்பூர்க் கரக்கோயில் காப்புக்களே. 6.7.10
    74 தேனார் புனற்கெடில வீரட்டமுந்
    திருச்செம்பொன் பள்ளிதிருப் பூவணமும்
    வானோர் வணங்கும் மணஞ்சேரியும்
    மதிலுஞ்சை மாகாளம் வாரணாசி
    ஏனோர்க ளேத்தும் வெகுளீச்சரம்
    இலங்கார் பருப்பதத்தோ டேணார்சோலைக்
    கானார் மயிலார் கருமாரியுங்
    கறைமிடற்றார் தம்முடைய காப்புக்களே. 6.7.11
    75 திருநீர்ப் புனற்கெடில வீரட்டமுந்
    திருவளப்பூர் தெற்கேறு சித்தவடம்
    வருநீர் வளம்பெருகு மானிருபமும்
    மயிலாப்பில் மன்னினார் மன்னியேத்தும்
    பெருநீர் வளர்சடையான் பேணிநின்ற
    பிரமபுரஞ் சுழியல் பெண்ணாகடங்
    கருநீல வண்டரற்றுங் காளத்தியுங்
    கயிலாயந் தம்முடைய காப்புக்களே. 6.7.12

    திருச்சிற்றம்பலம்


    6.8 திருக்காளத்தி - திருத்தாண்டகம்



    திருச்சிற்றம்பலம்

    76 விற்றூணொன் றில்லாத நல்கூர்ந் தான்காண்
    வியன்கச்சிக் கம்பன்காண் பிச்சை யல்லால்
    மற்றூணொன் றில்லாத மாசது ரன்காண்
    மயானத்து மைந்தன்காண் மாசொன் றில்லாப்
    பொற்றூண்காண் மாமணிநற் குன்றொப் பான்காண்
    பொய்யாது பொழிலேழுந் தாங்கி நின்ற
    கற்றூண்காண் காளத்தி காணப் பட்ட
    கணநாதன் காணவனென் கண்ணு ளானே. 6.8.1
    77 இடிப்பான்காண் என்வினையை ஏகம் பன்காண்
    எலும்பா பரணன்காண் எல்லாம் முன்னே
    முடிப்பான்காண் மூவுலகு மாயி னான்காண்
    முறைமையால் ஐம்புரியும் வழுவா வண்ணம்
    படித்தான் தலையறுத்த பாசு பதன்காண்
    பராய்த்துறையான் பழனம்பைஞ் ஞீலி யான்காண்
    கடித்தார் கமழ்கொன்றைக் கண்ணி யான்காண்
    காளத்தி யானவனென் கண்ணு ளானே. 6.8.2
    78 நாரணன்காண் நான்முகன்காண் நால்வே தன்காண்
    ஞானப் பெருங்கடற்கோர் நாவா யன்ன
    பூரணன்காண் புண்ணியன்காண் புராணன் றான்காண்
    புரிசடைமேற் புனலேற்ற புனிதன் றான்காண்
    சாரணன்காண் சந்திரன்காண் கதிரோன் றான்காண்
    தன்மைக்கண் தானேகாண் தக்கோர்க் கெல்லாங்
    காரணன்காண் காளத்தி காணப் பட்ட
    கணநாதன் காணவனென் கண்ணு ளானே. 6.8.3
    79 செற்றான்காண் என்வினையைத் தீயா டிகாண்
    திருவொற்றி யூரான்காண் சிந்தை செய்வார்க்
    குற்றான்காண் ஏகம்பம் மேவி னான்காண்
    உமையாள்நற் கொழுநன்காண் இமையோ ரேத்துஞ்
    சொற்றான்காண் சோற்றுத் துறையு ளான்காண்
    சுறாவேந்தன் ஏவலத்தை நீறா நோக்கக்
    கற்றான்காண் காளத்தி காணப் பட்ட
    கணநாதன் காணவனென் கண்ணு ளானே. 6.8.4
    80 மனத்தகத்தான் தலைமேலான் வாக்கி னுள்ளான்
    வாயாரத் தன்னடியே பாடுந் தொண்டர்
    இனத்தகத்தான் இமையவர்தஞ் சிரத்தின் மேலான்
    ஏழண்டத் தப்பாலான் இப்பாற் செம்பொன்
    புனத்தகத்தான் நறுங்கொன்றைப் போதி னுள்ளான்
    பொருப்பிடையான் நெருப்பிடையான் காற்றி னுள்ளான்
    கனத்தகத்தான் கயிலாயத் துச்சி யுள்ளான்
    காளத்தி யானவனென் கண்ணு ளானே. 6.8.5
    81 எல்லாம்முன் தோன்றாமே தோன்றி னான்காண்
    ஏகம்ப மேயான்காண் இமையோ ரேத்தப்
    பொல்லாப் புலனைந்தும் போக்கி னான்காண்
    புரிசடைமேற் பாய்கங்கை பூரித் தான்காண்
    நல்லவிடை மேற்கொண்டு நாகம் பூண்டு
    நளிர்சிரமொன் றேந்தியோர் நாணா யற்ற
    கல்லாடை மேற்கொண்ட காபா லிகாண்
    காளத்தி யானவனென் கண்ணு ளானே. 6.8.6
    82 கரியுருவு கண்டத்தெங் கண்ணு ளான்காண்
    கண்டன்காண் வண்டுண்ட கொன்றை யான்காண்
    எரிபவள வண்ணன்காண் ஏகம் பன்காண்
    எண்டிசையுந் தானாய குணத்தி னான்காண்
    திரிபுரங்கள் தீயிட்ட தீயா டிகாண்
    தீவினைகள் தீர்த்திடுமென் சிந்தை யான்காண்
    கரியுரிவை போர்த்துகந்த காபா லிகாண்
    காளத்தி யானவனென் கண்ணு ளானே. 6.8.7
    83 இல்லாடிச் சில்பலிசென் றேற்கின் றான்காண்
    இமையவர்கள் தொழுதிறைஞ்ச இருக்கின் றான்காண்
    வில்லாடி வேடனா யோடி னான்காண்
    வெண்ணூ லுஞ்சேர்ந்த அகலத் தான்காண்
    மல்லாடு திரள்தோள்மேல் மழுவா ளன்காண்
    மலைமகள்தன் மணாளன்காண் மகிழ்ந்து முன்னாள்
    கல்லாலின் கீழிருந்த காபா லிகான்
    காளத்தி யானவனென் கண்ணு ளானே. 6.8.8
    84 தேனப்பூ வண்டுண்ட கொன்றை யான்காண்
    திருவேகம் பத்தான்காண் தேனார்ந் துக்க
    ஞானப்பூங் கோதையாள் பாகத் தான்காண்
    நம்பன்காண் ஞானத் தொளியா னான்காண்
    வானப்பே ரூரு மறிய வோடி
    மட்டித்து நின்றான்காண் வண்டார் சோலைக்
    கானப்பே ரூரான்காண் கறைக்கண் டன்காண்
    காளத்தி யானவனென் கண்ணு ளானே. 6.8.9
    85 இறையவன்காண் ஏழுலகு மாயி னான்காண்
    ஏழ்கடலுஞ் சூழ்மலையு மாயி னான்காண்
    குறையுடையார் குற்றேவல் கொள்வான் றான்காண்
    குடமூக்கிற் கீழ்க்கோட்டம் மேவி னான்காண்
    மறையுடைய வானோர் பெருமான் றான்காண்
    மறைக்காட் டுறையும் மணிகண் டன்காண்
    கறையுடைய கண்டத்தெங் காபா லிகாண்
    காளத்தி யானவனென் கண்ணு ளானே. 6.8.10
    86 உண்ணா வருநஞ்ச முண்டான் றான்காண்
    ஊழித்தீ யன்னான்காண் உகப்பார் காணப்
    பண்ணாரப் பல்லியம் பாடி னான்காண்
    பயின்றநால் வேதத்தின் பண்பி னான்காண்
    அண்ணா மலையான்காண் அடியா ரீட்டம்
    அடியிணைகள் தொழுதேத்த அருளு வான்காண்
    கண்ணாரக் காண்பார்க்கோர் காட்சி யான்காண்
    காளத்தி யானவனென் கண்ணு ளானே. 6.8.11

    இத்தலம் தொண்டைநாட்டிலுள்ளது.
    சுவாமிபெயர் - காளத்திநாதர்,
    தேவியார் - ஞானப்பூங்கோதையாரம்மை.

    திருச்சிற்றம்பலம்


    6.9 திருஆமாத்தூர் - திருத்தாண்டகம்



    திருச்சிற்றம்பலம்

    87 வண்ணங்கள் தாம்பாடி வந்து நின்று
    வலிசெய்து வளைகவர்ந்தார் வகையால் நம்மைக்
    கண்ணம்பால் நின்றெய்து கனலப் பேசிக்
    கடியதோர் விடையேறிக் காபா லியார்
    சுண்ணங்கள் தாங்கொண்டு துதையப் பூசித்
    தோலுடுத்து நூல்பூண்டு தோன்றத் தோன்ற
    அண்ணலார் போகின்றார் வந்து காணீர்
    அழகியரே ஆமாத்தூர் ஐய னாரே. 6.9.1
    88 வெந்தார்வெண் பொடிப்பூசி வெள்ளை மாலை
    விரிசடைமேற் றாஞ்சூடி வீணை யேந்திக்
    கந்தாரந் தாமுரலாப் போகா நிற்கக்
    கறைசேர் மணிமிடாற்றீ ரூரே தென்றேன்
    நொந்தார்போல் வந்தென தில்லே புக்கு
    நுடங்கே ரிடைமடவாய் நம்மூர் கேட்கில்
    அந்தா மரைமலர்மேல் அளிவண் டியாழ்செய்
    ஆமாத்தூர் என்றடிகள் போயி னாரே. 6.9.2
    89 கட்டங்கந் தாமொன்று கையி லேந்திக்
    கடிய விடையேறிக் காபா லியார்
    இட்டங்கள் தாம்பேசி இல்லே புக்கு
    இடும்பலியும் இடக்கொள்ளார் போவா ரல்லர்
    பட்டிமையும் படிறுமே பேசா நின்றார்
    பார்ப்பாரைப் பரிசழிப்பார் போல்கின் றார்தாம்
    அட்டிய சில்பலியுங் கொள்ளார் விள்ளார்
    அழகியரே ஆமாத்தூர் ஐய னாரே. 6.9.3
    90 பசைந்தபல பூதத்தர் பாட லாடல்
    படநாகக் கச்சையர் பிச்சைக் கென்றங்
    கிசைந்ததோ ரியல்பினர் எரியின் மேனி
    இமையாமுக் கண்ணினர் நால்வே தத்தர்
    பிசைந்ததிரு நீற்றினர் பெண்ணோர் பாகம்
    பிரிவறியாப் பிஞ்ஞகனார் தெண்ணீர்க் கங்கை
    அசைந்த திருமுடியர் அங்கைத் தீயர்
    அழகியரே ஆமாத்தூர் ஐய னாரே. 6.9.4
    91 உருளுடைய தேர்புரவி யோடும் யானை
    ஒன்றாலுங் குறைவில்லை ஊர்தி வெள்ளே
    றிருளுடைய கண்டத்தர் செந்தீ வண்ணர்
    இமையவர்கள் தொழுதேத்தும் இறைவ னார்தாம்
    பொருளுடைய ரல்லர் இலரு மல்லர்
    புலித்தோ லுடையாகப் பூதஞ் சூழ
    அருளுடைய அங்கோதை மாலை மார்பர்
    அழகியரே ஆமாத்தூர் ஐய னாரே. 6.9.5
    92 வீறுடைய ஏறேறி நீறு பூசி
    வெண்தோடு பெய்திடங்கை வீணை யேந்திக்
    கூறுடைய மடவாளோர் பாகங் கொண்டு
    குழையாடக் கொடுகொட்டி கொட்டா வந்து
    பாறுடைய படுதலையோர் கையி லேந்திப்
    பலிகொள்வா ரல்லர் படிறே பேசி
    ஆறுடைய சடைமுடியெம் மடிகள் போலும்
    அழகியரே ஆமாத்தூர் ஐய னாரே. 6.9.6
    93 கையோர் கபாலத்தர் மானின் றோலர்
    கருத்துடையர் நிருத்தராய்க் காண்பார் முன்னே
    செய்ய திருமேனி வெண்ணீ றாடித்
    திகழ்புன் சடைமுடிமேல் திங்கள் சூடி
    மெய்யொரு பாகத் துமையை வைத்து
    மேவார் திரிபுரங்கள் வேவச் செய்து
    ஐயனார் போகின்றார் வந்து காணீர்
    அழகியரே ஆமாத்தூர் ஐய னாரே. 6.9.7
    94 ஒன்றாலுங் குறைவில்லை ஊர்தி வெள்ளே
    றொற்றியூர் உம்மூரே உணரக் கூறீர்
    நின்றுதான் என்செய்வீர் போவீ ராகில்
    நெற்றிமேற் கண்காட்டி நிறையுங் கொண்டீர்
    என்றுந்தான் இவ்வகையே இடர்செய் கின்றீர்
    இருக்குமூர் இனியறிந்தோம் ஏகம் பமோ
    அன்றித்தான் போகின்றீர் அடிக ளெம்மோ
    டழகியரே ஆமாத்தூர் ஐய னாரே. 6.9.8
    95 கல்லலகு தாங்கொண்டு காளத் தியார்
    கடியவிடை யேறிக் காணக் காண
    இல்லமே தாம்புகுதா இடுமின் பிச்சை
    என்றாருக் கெதிரெழுந்தேன் எங்குங் காணேன்
    சொல்லாதே போகின்றீர் உம்மூ ரேது
    துருத்தி பழனமோ நெய்த்தானமோ
    அல்லலே செய்தடிகள் போகின் றார்தாம்
    அழகியரே ஆமாத்தூர் ஐய னாரே. 6.9.9
    96 மழுங்கலா நீறாடும் மார்பர் போலும்
    மணிமிழலை மேய மணாளர் போலுங்
    கொழுங்குவளைக் கோதைக் கிறைவர் போலுங்
    கொடுகொட்டி தாள முடையார் போலுஞ்
    செழுங்கயி லாயத்தெஞ் செல்வர் போலுந்
    தென்னதிகை வீரட்டஞ் சேர்ந்தார் போலும்
    அழுங்கினார் ஐயுறவு தீர்ப்பார் போலும்
    அழகியரே ஆமாத்தூர் ஐய னாரே. 6.9.10

    இத்தலம் நடுநாட்டிலுள்ளது.
    சுவாமிபெயர் - ஆமாத்தீசுவரர்,
    தேவியார் - அழகியநாயகியம்மை.

    திருச்சிற்றம்பலம்


    6.10 திருப்பந்தணைநல்லூர் - திருத்தாண்டகம்



    திருச்சிற்றம்பலம்

    97 நோதங்க மில்லாதார் நாகம் பூண்டார்
    நூல்பூண்டார் நூல்மேலோ ராமை பூண்டார்
    பேய்தங்கு நீள்காட்டில் நட்ட மாடிப்
    பிறைசூடுஞ் சடைமேலோர் புனலுஞ் சூடி
    ஆதங்கு பைங்குழலாள் பாகங் கொண்டார்
    அனல்கொண்டார் அந்திவாய் வண்ணங் கொண்டார்
    பாதங்க நீறேற்றார் பைங்க ணேற்றார்
    பலியேற்றார் பந்தணை நல்லூ ராரே. 6.10.1
    98 காடலாற் கருதாதார் கடல்நஞ் சுண்டார்
    களிற்றுரிவை மெய்போர்த்தார் கலன தாக
    ஓடலாற் கருதாதார் ஒற்றி யூரார்
    உறுபிணியுஞ் செறுபகையு மொற்றைக் கண்ணாற்
    பீடுலாந் தனைசெய்வார் பிடவ மொந்தை
    குடமுழவங் கொடுகொட்டி குழலு மோங்கப்
    பாடலா ராடலார் பைங்க ணேற்றார்
    பலியேற்றார் பந்தணை நல்லூ ராரே. 6.10.2
    99 பூதப் படையுடையார் பொங்கு நூலார்
    புலித்தோ லுடையினார் போரேற் றினார்
    வேதத் தொழிலார் விரும்ப நின்றார்
    விரிசடைமேல் வெண்திங்கட் கண்ணி சூடி
    ஓதத் தொலிகடல்வாய் நஞ்ச முண்டார்
    உம்பரோ டம்பொன் னுலக மாண்டு
    பாதத் தொடுகழலார் பைங்க ணேற்றார்
    பலியேற்றார் பந்தணை நல்லூ ராரே. 6.10.3
    100 நீருலாஞ் சடைமுடிமேல் திங்க ளேற்றார்
    நெருப்பேற்றார் அங்கையில் நிறையு மேற்றார்
    ஊரெலாம் பலியேற்றார் அரவ மேற்றார்
    ஒலிகடல் வாய்நஞ்சம் மிடற்றி லேற்றார்
    வாருலா முலைமடவாள் பாக மேற்றார்
    மழுவேற்றார் மான்மறியோர் கையி லேற்றார்
    பாருலாம் புகழேற்றார் பைங்க ணேற்றார்
    பலியேற்றார் பந்தணை நல்லூ ராரே. 6.10.4
    101 தொண்டர் தொழுதேத்துஞ் சோதி யேற்றார்
    துளங்கா மணிமுடியார் தூய நீற்றார்
    இண்டைச் சடைமுடியார் ஈமஞ் சூழ்ந்த
    இடுபிணக்காட் டாடலா ரேமந் தோறும்
    அண்டத்துக் கப்புறத்தார் ஆதி யானார்
    அருக்கனா யாரழலாய் அடியார் மேலைப்
    பண்டை வினையறுப்பார் பைங்க ணேற்றார்
    பலியேற்றார் பந்தணை நல்லூ ராரே. 6.10.5
    102 கடமன்னு களியானை யுரிவை போர்த்தார்
    கானப்பேர் காதலார் காதல் செய்து
    மடமன்னு மடியார்தம் மனத்தி னுள்ளார்
    மானுரிதோள் மிசைத்தோளார் மங்கை காண
    நடமன்னி யாடுவார் நாகம் பூண்டார்
    நான்மறையோ டாறங்கம் நவின்ற நாவார்
    படமன்னு திருமுடியார் பைங்க ணேற்றார்
    பலியேற்றார் பந்தணை நல்லூ ராரே. 6.10.6
    103 முற்றா மதிச்சடையார் மூவ ரானார்
    மூவுலகு மேத்தும் முதல்வ ரானார்
    கற்றார் பரவுங் கழலார் திங்கள்
    கங்கையாள் காதலார் காம்பேய் தோளி
    பற்றாகும் பாகத்தார் பால்வெண் ணீற்றார்
    பான்மையா லூழி உலக மானார்
    பற்றார் மதிலெரித்தார் பைங்க ணேற்றார்
    பலியேற்றார் பந்தணை நல்லூ ராரே. 6.10.7
    104 கண்ணமரும் நெற்றியார் காட்டார் நாட்டார்
    கனமழுவாட் கொண்டதோர் கையார் சென்னிப்
    பெண்ணமருஞ் சடைமுடியார் பேரொன் றில்லார்
    பிறப்பிலார் இறப்பிலார் பிணியொன் றில்லார்
    மண்ணவரும் வானவரும் மற்றை யோரும்
    மறையவரும் வந்தெதிரே வணங்கி யேத்தப்
    பண்ணமரும் பாடலார் பைங்க ணேற்றார்
    பலியேற்றார் பந்தணை நல்லூ ராரே. 6.10.8
    105 ஏறேறி யேழுலகு மேத்த நின்றார்
    இமையவர்கள் எப்பொழுது மிறைஞ்ச நின்றார்
    நீறேறு மேனியார் நீல முண்டார்
    நெருப்புண்டார் அங்கை யனலு முண்டார்
    ஆறேறு சென்னியார் ஆனஞ் சாடி
    அனலுமிழும் ஐவா யரவு மார்த்தார்
    பாறேறு வெண்டலையார் பைங்க ணேற்றார்
    பலியேற்றார் பந்தணை நல்லூ ராரே. 6.10.9
    106 கல்லூர் கடிமதில்கள் மூன்று மெய்தார்
    காரோணங் காதலார் காதல் செய்து
    நல்லூரார் ஞானத்தார் ஞான மானார்
    நான்மறையோ டாறங்கம் நவின்ற நாவார்
    மல்லூர் மணிமலையின் மேலி ருந்து
    வாளரக்கர் கோன்றலையை மாளச் செற்றுப்
    பல்லூர் பலிதிரிவார் பைங்க ணேற்றார்
    பலியேற்றார் பந்தணை நல்லூ ராரே. 6.10.10

    இத்தலம் சோழநாட்டிலுள்ளது.
    சுவாமிபெயர் - பசுபதீசுவரர்,
    தேவியார் - காம்பன்னதோளியம்மை.

    திருச்சிற்றம்பலம்


    6.11 திருப்புன்கூர் - திருநீடூர் - திருத்தாண்டகம்



    திருச்சிற்றம்பலம்

    107 பிறவாதே தோன்றிய பெம்மான் றன்னைப்
    பேணாதார் அவர்தம்மைப் பேணா தானைத்
    துறவாதே கட்டறுத்த சோதி யானைத்
    தூநெறிக்குந் தூநெறியாய் நின்றான் றன்னைத்
    திறமாய எத்திசையுந் தானே யாகித்
    திருப்புன்கூர் மேவிய சிவலோ கனை
    நிறமா மொளியானை நீடூ ரானை
    நீதனே னென்னேநான் நினையா வாறே. 6.11.1
    108 பின்றானும் முன்றானு மானான் றன்னைப்
    பித்தர்க்குப் பித்தனாய் நின்றான் றன்னை
    நன்றாங் கறிந்தவர்க்குந் தானே யாகி
    நல்வினையுந் தீவினையு மானான் றன்னைச்
    சென்றோங்கி விண்ணளவுந் தீயா னானைத்
    திருப்புன்கூர் மேவிய சிவலோ கனை
    நின்றாய நீடூர் நிலாவி னானை
    நீதனே னென்னேநான் நினையா வாறே. 6.11.2
    109 இல்லானை எவ்விடத்தும் உள்ளான் றன்னை
    இனியநினை யாதார்க் கின்னா தானை
    வல்லானை வல்லடைந்தார்க் கருளும் வண்ணம்
    மாட்டாதார்க் கெத்திறத்தும் மாட்டா தானைச்
    செல்லாத செந்நெறிக்கே செல்விப் பானைத்
    திருப்புன்கூர் மேவிய சிவலோ கனை
    நெல்லால் விளைகழனி நீடூ ரானை
    நீதனே னென்னேநான் நினையா வாறே. 6.11.3
    110 கலைஞானங் கல்லாமே கற்பித் தானைக்
    கடுநரகஞ் சாராமே காப்பான் றன்னைப்
    பலவாய வேடங்கள் தானே யாகிப்
    பணிவார்கட் கங்கங்கே பற்றா னானைச்
    சிலையாற் புரமெரித்த தீயா டியைத்
    திருப்புன்கூர் மேவிய சிவலோ கனை
    நிலையார் மணிமாட நீடூ ரானை
    நீதனே னென்னேநான் நினையா வாறே. 6.11.4
    111 நோக்காதே எவ்வளவும் நோக்கி னானை
    நுணுகாதே யாதொன்றும் நுணுகி னானை
    ஆக்காதே யாதொன்று மாக்கி னானை
    அணுகாதா ரவர்தம்மை அணுகா தானைத்
    தேக்காதே தெண்கடல்நஞ் சுண்டான் றன்னைத்
    திருப்புன்கூர் மேவிய சிவலோ கனை
    நீக்காத பேரொளிசேர் நீடு ரானை
    நீதனே னென்னேநான் நினையா வாறே. 6.11.5
    112 பூணலாப் பூணானைப் பூசாச் சாந்த
    முடையானை முடைநாறும் புன்க லத்தில்
    ஊணலா வூணானை யொருவர் காணா
    உத்தமனை யொளிதிகழும் மேனி யானைச்
    சேணுலாஞ் செழும்பவளக் குன்றொப் பானைத்
    திருப்புன்கூர் மேவிய சிவலோ கனை
    நீணுலா மலர்க்கழனி நீடூ ரானை
    நீதனே னென்னேநான் நினையா வாறே. 6.11.6
    113 உரையார் பொருளுக் குலப்பி லானை
    ஒழியாமே எவ்வுயிரு மானான் றன்னைப்
    புரையாய்க் கனமாயாழ்ந் தாழா தானைப்
    புதியனவு மாய்மிகவும் பழையான் றன்னைத்
    திரையார் புனல்சேர் மகுடத் தானைத்
    திருப்புன்கூர் மேவிய சிவலோ கனை
    நிரையார் மணிமாட நீடூ ரானை
    நீதனே னென்னேநான் நினையா வாறே. 6.11.7
    114 கூரரவத் தணையானுங் குளிர்தண் பொய்கை
    மலரவனுங் கூடிச்சென் றறிய மாட்டார்
    ஆரொருவ ரவர்தன்மை யறிவார் தேவர்
    அறிவோமென் பார்க்கெல்லா மறிய லாகாச்
    சீரரவக் கழலானை நிழலார் சோலைத்
    திருப்புன்கூர் மேவிய சிவலோ கனை
    நீரரவத் தண்கழனி நீடூ ரானை
    நீதனே னென்னேநான் நினையா வாறே. 6.11.8
    115 கையெலாம் நெய்பாயக் கழுத்தே கிட்டக்
    கால்நிமிர்த்து நின்றுண்ணுங் கையர் சொன்ன
    பொய்யெலாம் மெய்யென்று கருதிப் புக்குப்
    புள்ளுவரா லகப்படா துய்யப் போந்தேன்
    செய்யெலாஞ் செழுங்கமலப் பழன வேலித்
    திருப்புன்கூர் மேவிய சிவலோ கனை
    நெய்தல்வாய்ப் புனற்படப்பை நீடூ ரானை
    நீதனே னென்னேநான் நினையா வாறே. 6.11.9
    116 இகழுமா றெங்ஙனே ஏழை நெஞ்சே
    இகழாது பரந்தொன்றாய் நின்றான் றன்னை
    நகழமால் வரைக்கீழிட் டரக்கர் கோனை
    நலனழித்து நன்கருளிச் செய்தான் றன்னைத்
    திகழுமா மதகரியி னுரிபோர்த் தானைத்
    திருப்புன்கூர் மேவிய சிவலோ கனை
    நிகழுமா வல்லானை நீடூ ரானை
    நீதனே னென்னேநான் நினையா வாறே. 6.11.10

    இத்தலங்கள் சோழநாட்டிலுள்ளன. திருப்புன்கூரில்,
    சுவாமிபெயர் - சிவலோகநாதர்,
    தேவியார் - சொக்கநாயகியம்மை.
    திருநீடூரில்,
    சுவாமிபெயர் - சோமநாதேசுவரர்,

    திருச்சிற்றம்பலம்


    6.12 திருக்கழிப்பாலை - திருத்தாண்டகம்



    திருச்சிற்றம்பலம்

    117 ஊனுடுத்தி யொன்பது வாசல் வைத்து
    ஒள்ளெலும்பு தூணா வுரோம மேய்ந்து
    தாமெடுத்த கூரை தவிரப் போவார்
    தயக்கம் பலபடைத்தார் தாம ரையினார்
    கானெடுத்து மாமயில்க ளாலுஞ் சோலைக்
    கழிப்பாலை மேய கபாலப் பனார்
    வானிடத்தை யூடறுத்து வல்லைச் செல்லும்
    வழிவைத்தார்க் கவ்வழியே போது நாமே. 6.12.1
    118 முறையார்ந்த மும்மதிலும் பொடியாச் செற்று
    முன்னுமாய்ப் பின்னுமாய் முக்க ணெந்தை
    பிறையார்ந்த சடைமுடிமேற் பாம்பு கங்கை
    பிணக்கந்தீர்த் துடன்வைத்தார் பெரிய நஞ்சுக்
    கறையார்ந்த மிடற்றடங்கக் கண்ட எந்தை
    கழிப்பாலை மேய கபாலப் பனார்
    மறையார்ந்த வாய்மொழியான் மாய யாக்கை
    வழிவைத்தார்க் கவ்வழியே போது நாமே. 6.12.2
    119 நெளிவுண்டாக் கருதாதே நிமலன் றன்னை
    நினைமின்கள் நித்தலும்நே ரிழையா ளாய
    ஒளிவண்டார் கருங்குழலி யுமையாள் தன்னை
    ஒருபாகத் தமர்ந்தடியா ருள்கி யேத்தக்
    களிவண்டார் கரும்பொழில்சூழ் கண்டல் வேலிக்
    கழிப்பாலை மேய கபாலப் பனார்
    வளியுண்டார் மாயக் குரம்பை நீங்க
    வழிவைத்தார்க் கவ்வழியே போது நாமே. 6.12.3
    120 பொடிநாறு மேனியர் பூதிப் பையர்
    புலித்தோலர் பொங்கரவர் பூண நூலர்
    அடிநாறு கமலத்தர் ஆரூ ராதி
    ஆனஞ்சு மாடுமா திரையி னார்தாங்
    கடிநாறு பூஞ்சோலை கமழ்ந்து நாறுங்
    கழிப்பாலை மேய கபாலப் பனார்
    மடிநாறு மேனியிம் மாயம் நீங்க
    வழிவைத்தார்க் கவ்வழியே போது நாமே. 6.12.4
    121 விண்ணானாய் விண்ணவர்கள் விரும்பி வந்து
    வேதத்தாய் கீதத்தாய் விரவி யெங்கும்
    எண்ணானாய் எழுத்தானாய் கடலே ழானாய்
    இறையானாய் எம்மிறையே யென்று நிற்குங்
    கண்ணானாய் காரானாய் பாரு மானாய்
    கழிப்பாலை யுள்ளுறையுங் கபாலப் பனார்
    மண்ணானாய் மாயக் குரம்பை நீங்க
    வழிவைத்தார்க் கவ்வழியே போது நாமே. 6.12.5
    122 விண்ணப்ப விச்சா தரர்க ளேத்த
    விரிகதிரோன் எரிசுடரான் விண்ணு மாகிப்
    பண்ணப்பன் பத்தர் மனத்து ளேயும்
    பசுபதி பாசுபதன் தேச மூர்த்தி
    கண்ணப்பன் கண்ணப்பக் கண்டு கந்தார்
    கழிப்பாலை மேய கபாலப் பனார்
    வண்ணப் பிணிமாய யாக்கை நீங்க
    வழிவைத்தார்க் கவ்வழியே போது நாமே. 6.12.6
    123 பிணம்புல்கு பீறற் குரம்பை மெய்யாப்
    பேதப் படுகின்ற பேதை மீர்காள்
    இணம்புல்கு சூலத்தர் நீல கண்டர்
    எண்டோ ளர் எண்ணிறைந்த குணத்தி னாலே
    கணம்புல்லன் கருத்துகந்தார் காஞ்சி யுள்ளார்
    கழிப்பாலை மேய கபாலப் பனார்
    மணம்புல்கு மாயக் குரம்பை நீங்க
    வழிவைத்தார்க் கவ்வழியே போது நாமே. 6.12.7
    124 இயல்பாய ஈசனை எந்தை தந்தை
    என்சிந்தை மேவி யுறைகின் றானை
    முயல்வானை மூர்த்தியைத் தீர்த்த மான
    தியம்பகன் திரிசூலத் தன்ன கையன்
    கயல்பாயுங் கண்டல்சூழ் வுண்ட வேலிக்
    கழிப்பாலை மேய கபாலப் பனார்
    மயலாய மாயக் குரம்பை நீங்க
    வழிவைத்தார்க் கவ்வழியே போது நாமே. 6.12.8
    125 செற்றதோர் மனமொழிந்து சிந்தை செய்து
    சிவமூர்த்தி யென்றெழுவார் சிந்தை யுள்ளால்
    உற்றதோர் நோய்களைந்திவ் வுலக மெல்லாங்
    காட்டுவான் உத்தமன்றா னோதா தெல்லாங்
    கற்றதோர் நூலினன் களிறு செற்றான்
    கழிப்பாலை மேய கபாலப் பனார்
    மற்றிதோர் மாயக் குரம்பை நீங்க
    வழிவைத்தார்க் கவ்வழியே போது நாமே. 6.12.9
    126 பொருதலங்கல் நீண்முடியான் போர ரக்கன்
    புட்பகந்தான் பொருப்பின்மீ தோடா தாக
    இருநிலங்கள் நடுக்கெய்த எடுத்தி டுதலும்
    ஏந்திழையாள் தான்வெருவ இறைவன் நோக்கிக்
    கரதலங்கள் கதிர்முடியா றஞ்சி னோடு
    கால்விரலா லூன்று கழிப்பா லையார்
    வருதலங்க மாயக் குரம்பை நீங்க
    வழிவைத்தார்க் கவ்வழியே போது நாமே. 6.12.10

    இத்தலம் சோழநாட்டிலுள்ளது.
    சுவாமிபெயர் - பால்வண்ணநாதர்,
    தேவியார் - வேதநாயகியம்மை.

    திருச்சிற்றம்பலம்


    6.13 திருப்புறம்பயம் - திருத்தாண்டகம்



    திருச்சிற்றம்பலம்

    127 கொடிமாட நீடெருவு கூடல் கோட்டூர்
    கொடுங்கோளூர் தண்வளவி கண்டி யூரும்
    நடமாடு நன்மருகல் வைகி நாளும்
    நலமாகு மொற்றியூ ரொற்றி யாகப்
    படுமாலை வண்டறையும் பழனம் பாசூர்
    பழையாறும் பாற்குளமுங் கைவிட் டிந்நாள்
    பொடியேறு மேனியராய்ப் பூதஞ் சூழப்
    புறம்பயம்நம் மூரென்று போயி னாரே. 6.13.1
    128 முற்றொருவர் போல முழுநீ றாடி
    முளைத்திங்கள் சூடிமுந் நூலும் பூண்டு
    ஒற்றொருவர் போல வுறங்கு வேன்கை
    ஒளிவளையை யொன்றொன்றா எண்ணு கின்றார்
    மற்றொருவ ரில்லைத் துணை யெனக்கு
    மால்கொண்டாற் போல மயங்கு வேற்குப்
    புற்றரவக் கச்சார்த்துப் பூதஞ் சூழப்
    புறம்பயம்நம் மூரென்று போயி னாரே. 6.13.2
    129 ஆகாத நஞ்சுண்ட அந்தி வண்ணர்
    ஐந்தலைய மாசுணங்கொண் டம்பொற் றோள்மேல்
    ஏகாச மாவிட்டோ டொன்றேந் திவந்
    திடுதிருவே பலியென்றார்க் கில்லே புக்கேன்
    பாகேதுங் கொள்ளார் பலியுங் கொள்ளார்
    பாவியேன் கண்ணுள்ளே பற்றி நோக்கிப்
    போகாத வேடத்தர் பூதஞ் சூழப்
    புறம்பயம்நம் மூரென்று போயி னாரே. 6.13.3
    130 பன்மலிந்த வெண்டலை கையி லேந்திப்
    பனிமுகில் போல்மேனிப் பவந்த நாதர்
    நென்மலிந்த நெய்த்தானஞ் சோற்றுத் துறை
    நியமந் துருத்தியும் நீடூர் பாச்சில்
    கன்மலிந் தோங்கு கழுநீர்க் குன்றங்
    கடனாகைக் காரோணங் கைவிட் டிந்நாள்
    பொன்மலிந்த கோதையருந் தாமு மெல்லாம்
    புறம்பயம்நம் மூரென்று போயி னாரே. 6.13.4
    131 செத்தவர்தந் தலைமாலை கையி லேந்திச்
    சிரமாலை சூடிச் சிவந்த மேனி
    மத்தகத்த யானை யுரிவை மூடி

    மடவா ளவளோடு மானொன் றேந்தி
    அத்தவத்த தேவர் அறுப தின்மர்
    ஆறுநூ றாயிரவர்க் காடல் காட்டிப்
    புத்தகங் கைக்கொண்டு புலித்தோல் வீக்கிப்
    புறம்பயம்நம் மூரென்று போயி னாரே. 6.13.5
    132 நஞ்சடைந்த கண்டத்தர் வெண்ணீ றாடி
    நல்ல புலியதள்மேல் நாகங் கட்டிப்
    பஞ்சடைந்த மெல்விரலாள் பாக மாகப்
    பராய்த்துறை யேனென்றோர் பவள வண்ணர்
    துஞ்சிடையே வந்து துடியுங் கொட்டத்
    துண்ணென் றெழுந்திருந்தேன் சொல்ல மாட்டேன்
    புன்சடையின் மேலோர் புனலுஞ் சூடிப்
    புறம்பயம்நம் மூரென்று போயி னாரே. 6.13.6
    133 மறியிலங்கு கையர் மழுவொன் றேந்தி
    மறைக்காட்டே னென்றோர் மழலை பேசிச்
    செறியிலங்கு திண்டோ ள்மேல் நீறு கொண்டு
    திருமுண்ட மாவிட்ட திலக நெற்றி
    நெறியிலங்கு கூந்தலார் பின்பின் சென்று
    நெடுங்கண் பனிசோர நின்று நோக்கிப்
    பொறியிலங்கு பாம்பார்த்துப் பூதஞ் சூழப்
    புறம்பயம்நம் மூரென்று போயி னாரே. 6.13.7
    134 நில்லாதே பல்லூரும் பலிகள் வேண்டி
    நிரைவளையார் பலிபெய்ய நிறையுங் கொண்டு
    கொல்லேறுங் கொக்கரையுங் கொடுகொட் டியுங்
    குடமூக்கி லங்கொழியக் குளிர்தண் பொய்கை
    நல்லாலை நல்லூரே தவிரே னென்று
    நறையூரிற் றாமுந் தவிர்வார் போலப்
    பொல்லாத வேடத்தர் பூதஞ் சூழப்
    புறம்பயம்நம் மூரென்று போயி னாரே. 6.13.8
    135 விரையேறு நீறணிந்தோ ராமை பூண்டு
    வெண்தோடு பெய்திடங்கை வீணை யேந்தித்
    திரையேறு சென்னிமேல் திங்கள் தன்னைத்
    திசைவிளங்க வைத்துகந்த செந்தீ வண்ணர்
    அரையேறு மேகலையாள் பாக மாக
    ஆரிடத்தி லாட லமர்ந்த ஐயன்
    புரையேறு தாமேறிப் பூதஞ் சூழப்
    புறம்பயம்நம் மூரென்று போயி னாரே. 6.13.9
    136 கோவாய இந்திரனுள் ளிட்டா ராகக்
    குமரனும் விக்கின விநாய கனும்
    பூவாய பீடத்து மேல யனும்
    பூமி யளந்தானும் போற்றி சைப்பப்
    பாவாய இன்னிசைகள் பாடி யாடிப்
    பாரிடமுந் தாமும் பரந்து பற்றிப்
    பூவார்ந்த கொன்றை பொறிவண் டார்க்கப்
    புறம்பயம்நம் மூரென்று போயி னாரே. 6.13.10

    இத்தலம் சோழநாட்டிலுள்ளது.
    சுவாமிபெயர் - சாட்சிவரதநாதர்,
    தேவியார் - கரும்பன்னசொல்லம்மை.

    திருச்சிற்றம்பலம்


    6.14 திருநல்லூர் - திருத்தாண்டகம்



    திருச்சிற்றம்பலம்

    137 நினைந்துருகும் அடியாரை நைய வைத்தார்
    நில்லாமே தீவினைகள் நீங்க வைத்தார்
    சினந்திருகு களிற்றுரிவைப் போர்வை வைத்தார்
    செழுமதியின் தளிர்வைத்தார் சிறந்து வானோர்
    இனந்துருவி மணிமகுடத் தேறத் துற்ற
    இனமலர்கள் போதவிழ்ந்து மதுவாய்ப் பில்கி
    நனைந்தனைய திருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.1
    138 பொன்னலத்த நறுங்கொன்றை சடைமேல் வைத்தார்
    புலியுரியின் அதள்வைத்தார் புனலும் வைத்தார்
    மன்னலத்த திரள்தோள்மேல் மழுவாள் வைத்தார்
    வார்காதிற் குழைவைத்தார் மதியும் வைத்தார்
    மின்னலத்த நுண்ணிடையாள் பாகம் வைத்தார்
    வேழத்தி னுரிவைத்தார் வெண்ணூல் வைத்தார்
    நன்னலத்த திருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.2
    139 தோடேறும் மலர்க்கொன்றை சடைமேல் வைத்தார்
    துன்னெருக்கின் வடம்வைத்தார் துவலை சிந்தப்
    பாடேறு படுதிரைக ளெறிய வைத்தார்
    பனிமத்த மலர்வைத்தார் பாம்பும் வைத்தார்
    சேடேறு திருநுதன்மேல் நாட்டம் வைத்தார்
    சிலைவைத்தார் மலைபெற்ற மகளை வைத்தார்
    நாடேறு திருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.3
    140 வில்லருளி வருபுருவத் தொருத்தி பாகம்
    பொருத்தாகி விரிசடைமே லருவி வைத்தார்
    கல்லருளி வரிசிலையா வைத்தார் ஊராக்
    கயிலாய மலைவைத்தார் கடவூர் வைத்தார்
    சொல்லருளி யறநால்வர்க் கறிய வைத்தார்
    சுடுசுடலைப் பொடிவைத்தார் துறவி வைத்தார்
    நல்லருளாற் றிருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.4
    141 விண்ணிரியுந் திரிபுரங்க ளெரிய வைத்தார்
    வினைதொழுவார்க் கறவைத்தார் துறவி வைத்தார்
    கண்ணெரியாற் காமனையும் பொடியா வைத்தார்
    கடிக்கமல மலர்வைத்தார் கயிலை வைத்தார்
    திண்ணெரியுந் தண்புனலு முடனே வைத்தார்
    திசைதொழுது மிசையமரர் திகழ்ந்து வாழ்த்தி
    நண்ணரிய திருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.5
    142 உற்றுலவு பிணியுலகத் தெழுமை வைத்தார்
    உயிர்வைத்தார் உயிர்செல்லுங் கதிகள் வைத்தார்
    மற்றமரர் கணம்வைத்தார் அமரர் காணா
    மறைவைத்தார் குறைமதியம் வளர வைத்தார்
    செற்றமலி யார்வமொடு காம லோபஞ்
    சிறவாத நெறிவைத்தார் துறவி வைத்தார்
    நற்றவர்சேர் திருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.6
    143 மாறுமலைந் தாரரண மெரிய வைத்தார்
    மணிமுடிமே லரவைத்தா ரணிகொள் மேனி
    நீறுமலிந் தெரியாடல் நிலவ வைத்தார்
    நெற்றிமேற் கண்வைத்தார் நிலையம் வைத்தார்
    ஆறுமலைந் தறுதிரைக ளெறிய வைத்தார்
    ஆர்வத்தா லடியமரர் பரவ வைத்தார்
    நாறுமலர்த் திருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.7
    144 குலங்கள்மிகும் அலைகடல்கள் ஞாலம் வைத்தார்
    குருமணிசே ரரவைத்தார் கோலம் வைத்தார்
    உலங்கிளரும் அரவத்தின் உச்சி வைத்தார்
    உண்டருளி விடம்வைத்தார் எண்டோ ள் வைத்தார்
    நிலங்கிளரும் புனல்கனலுள் அனிலம் வைத்தார்
    நிமிர்விசும்பின் மிசைவைத்தார் நினைந்தா ரிந்நாள்
    நலங்கிளருந் திருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.8
    145 சென்றுருளுங் கதிரிரண்டும் விசும்பில் வைத்தார்
    திசைபத்தும் இருநிலத்தில் திருந்த வைத்தார்
    நின்றருளி யடியமரர் வணங்க வைத்தார்
    நிறைதவமும் மறைபொருளும் நிலவ வைத்தார்
    கொன்றருளிக் கொடுங்கூற்றம் நடுங்கி யோடக்
    குரைகழற்சே வடிவைத்தார் விடையும் வைத்தார்
    நன்றருளுந் திருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.9
    146 பாம்புரிஞ்சி மதிகிடந்து திரைக ளேங்கப்
    பனிக்கொன்றை சடைவைத்தார் பணிசெய் வானோர்
    ஆம்பரிசு தமக்கெல்லாம் அருளும் வைத்தார்
    அடுசுடலைப் பொடிவைத்தார் அழகும் வைத்தார்
    ஓம்பரிய வல்வினைநோய் தீர வைத்தார்
    உமையையொரு பால்வைத்தார் உகந்து வானோர்
    நாம்பரவுந் திருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.10
    147 குலங்கிளரும் வருதிரைக ளேழும் வைத்தார்
    குருமணிசேர் மலைவைத்தார் மலையைக் கையால்
    உலங்கிளர எடுத்தவன்றோள் முடியும் நோவ
    ஒருவிரலா லுறவைத்தார் இறைவா வென்று
    புலம்புதலும் அருளொடுபோர் வாளும் வைத்தார்
    புகழ்வைத்தார் புரிந்தாளாக் கொள்ள வைத்தார்
    நலங்கிளருந் திருவடியென் றலைமேல் வைத்தார்
    நல்லூரெம் பெருமானார் நல்ல வாறே. 6.14.11

    இத்தலம் சோழநாட்டிலுள்ளது.
    சுவாமிபெயர் - பெரியாண்டேசுவரர்,
    தேவியார் - திரிபுரசுந்தரியம்மை.

    திருச்சிற்றம்பலம்


    6.15 திருக்கருகாவூர் - திருத்தாண்டகம்



    திருச்சிற்றம்பலம்

    148 குருகாம் வயிரமாங் கூறு நாளாங்
    கொள்ளுங் கிழமையாங் கோளே தானாம்
    பருகா அமுதமாம் பாலின் நெய்யாம்
    பழத்தின் இரதமாம் பாட்டிற் பண்ணாம்
    ஒருகா லுமையாளோர் பாக னுமாம்
    உள்நின்ற நாவிற் குரையா டியாங்
    கருவா யுலகுக்கு முன்னே தோன்றுங்
    கண்ணாங் கருகாவூ ரெந்தை தானே. 6.15.1
    149 வித்தாம் முளையாகும் வேரே தானாம்
    வேண்டு முருவமாம் விரும்பி நின்ற
    பத்தா மடியார்க்கோர் பாங்க னுமாம்
    பால்நிறமு மாம்பரஞ் சோதி தானாந்
    தொத்தா மமரர்கணஞ் சூழ்ந்து போற்றத்
    தோன்றாதென் னுள்ளத்தி னுள்ளே நின்ற
    கத்தாம் அடியேற்குக் காணா காட்டுங்
    கண்ணாங் கருகாவூ ரெந்தை தானே. 6.15.2
    150 பூத்தானாம் பூவின் நிறத்தா னுமாம்
    பூக்குளால் வாசமாய் மன்னி நின்ற
    கோத்தானாங் கோல்வளையாள் கூற னாகுங்
    கொண்ட சமயத்தார் தேவ னாகி
    ஏத்தாதார்க் கென்று மிடரே துன்பம்
    ஈவானா மென்னெஞ்சத் துள்ளே நின்று
    காத்தானாங் காலன் அடையா வண்ணங்
    கண்ணாங் கருகாவூ ரெந்தை தானே. 6.15.3
    151 இரவனாம் எல்லி நடமா டியாம்
    எண்டிசைக்குந் தேவனாம் என்னு ளானாம்
    அரவனாம் அல்லல் அறுப்பா னுமாம்
    ஆகாச மூர்த்தியாம் ஆனே றேறுங்
    குரவனாங் கூற்றை யுதைத்தான் றானாங்
    கூறாத வஞ்சக் குயலர்க் கென்றுங்
    கரவனாங் காட்சிக் கெளியா னுமாங்
    கண்ணாங் கருவூ ரெந்தை தானே. 6.15.4
    152 படைத்தானாம் பாரை யிடந்தா னாகும்
    பரிசொன் றறியாமை நின்றான் றானாம்
    உடைத்தானாம் ஒன்னார் புரங்கள் மூன்றும்
    ஒள்ளழலால் மூட்டி யொருக்கி நின்று
    அடைத்தானாஞ் சூலம் மழுவோர் நாகம்
    அசைத்தானாம் ஆனேறொன் றூர்ந்தா னாகுங்
    கடைத்தானாங் கள்ள மறிவார் நெஞ்சிற்
    கண்ணாங் கருகாவூ ரெந்தை தானே. 6.15.5
    153 மூலனாம் மூர்த்தியாம் முன்னே தானாம்
    மூவாத மேனிமுக் கண்ணி னானாஞ்
    சீலனாஞ் சேர்ந்தா ரிடர்கள் தீர்க்குஞ்
    செல்வனாஞ் செஞ்சுடர்க்கோர் சோதி தானாம்
    மாலனாம் மங்கையோர் பங்க னாகும்
    மன்றாடி யாம்வானோர் தங்கட் கெல்லாங்
    காலனாங் காலனைக் காய்ந்தா னாகுங்
    கண்ணாங் கருகாவூ ரெந்தை தானே. 6.15.6
    154 அரைசே ரரவனாம் ஆலத் தானாம்
    ஆதிரை நாளானாம் அண்ட வானோர்
    திரைசேர் திருமுடித் திங்க ளானாந்
    தீவினை நாசனென் சிந்தை யானாம்
    உரைசே ருலகத்தா ருள்ளா னுமாம்
    உமையாளோர் பாகனாம் ஓத வேலிக்
    கரைசேர் கடல்நஞ்சை யுண்டா னாகுங்
    கண்ணாங் கருகாவூ ரெந்தை தானே. 6.15.7
    155 துடியாந் துடியின் முழக்கந் தானாஞ்
    சொல்லுவார் சொல்லெல்லாஞ் சோதிப் பானாம்
    படிதானாம் பாவ மறுப்பா னாகும்
    பால்நீற்ற னாம்பரஞ் சோதி தானாங்
    கொடியானாங் கூற்றை யுதைத்தா னாகுங்
    கூறாத வஞ்சக் குயலர்க் கென்றுங்
    கடியானாங் காட்சிக் கரியா னாகுங்
    கண்ணாங் கருகாவூ ரெந்தை தானே. 6.15.8
    156 விட்டுருவங் கிளர்கின்ற சோதி யானாம்
    விண்ணவர்க்கும் அறியாத சூழ லானாம்
    பட்டுருவ மால்யானைத் தோல்கீண் டானாம்
    பலபலவும் பாணி பயின்றான் றானாம்
    எட்டுருவ மூர்த்தியாம் எண்தோ ளானாம்
    என்னுச்சி மேலானாம் எம்பி ரானாங்
    கட்டுருவங் கடியானைக் காய்ந்தா னாகுங்
    கண்ணாங் கருகாவூ ரெந்தை தானே. 6.15.9
    157 பொறுத்திருந்த புள்ளூர்வான் உள்ளா னாகி
    உள்ளிருந்தங் குள்நோய் களைவான் றானாய்ச்
    செறுத்திருந்த மும்மதில்கள் மூன்றும் வேவச்
    சிலைகுனியத் தீமூட்டுந் திண்மை யானாம்
    அறுத்திருந்த கையானாம் அந்தார் அல்லி
    இருந்தானை ஒருதலையைத் தெரிய நோக்கிக்
    கறுத்திருந்த கண்ட முடையான் போலுங்
    கண்ணாங் கருகாவூ ரெந்தை தானே. 6.15.10
    158 ஒறுத்தானாம் ஒன்னார் புரங்கள் மூன்றும்
    ஒள்ளழலை மாட்டி யுடனே வைத்து
    இறுத்தானாம் எண்ணான் முடிகள் பத்தும்
    இசைந்தானாம் இன்னிசைகள் கேட்டா னாகும்
    அறுத்தானாம் அஞ்சும் அடக்கி யங்கே
    ஆகாய மந்திரமு மானா னாகுங்
    கறுத்தானாங் காலனைக் காலால் வீழக்
    கண்ணாங் கருகாவூ ரெந்தை தானே. 6.15.11

    இத்தலம் சோழநாட்டிலுள்ளது.
    சுவாமிபெயர் - முல்லைவனேசுவரர்,
    தேவியார் - கரும்பனையாளம்மை.

    திருச்சிற்றம்பலம்


    6.16 திருவிடைமருது - திருத்தாண்டகம்



    திருச்சிற்றம்பலம்

    159 சூலப் படையுடையார் தாமே போலுஞ்
    சுடர்த்திங்கட் கண்ணி யுடையார் போலும்
    மாலை மகிழ்ந்தொருபால் வைத்தார் போலும்
    மந்திரமுந் தந்திரமு மானார் போலும்
    வேலைக் கடல்நஞ்ச முண்டார் போலும்
    மேல்வினைகள் தீர்க்கும் விகிர்தர் போலும்
    ஏலக் கமழ்குழலாள் பாகர் போலும்
    இடைமருது மேவிய ஈச னாரே. 6.16.1
    160 காரார் கமழ்கொன்றைக் கண்ணி போலுங்
    காரானை ஈருரிவை போர்த்தார் போலும்
    பாரார் பரவப் படுவார் போலும்
    பத்துப் பல்லூழி பரந்தார் போலுஞ்
    சீரால் வணங்கப் படுவார் போலுந்
    திசையனைத்து மாய்மற்று மானார் போலும்
    ஏரார் கமழ்குழலாள் பாகர் போலும்
    இடைமருது மேவிய ஈச னாரே. 6.16.2
    161 வேதங்கள் வேள்வி பயந்தார் போலும்
    விண்ணுலகு மண்ணுலகு மானார் போலும்
    பூதங்க ளாய புராணர் போலும்
    புகழ வளரொளியாய் நின்றார் போலும்
    பாதம் பரவப் படுவார் போலும்
    பத்தர் களுக்கின்பம் பயந்தார் போலும்
    ஏதங்க ளான கடிவார் போலும்
    இடைமருது மேவிய ஈச னாரே. 6.16.3
    162 திண்குணத்தார் தேவர் கணங்க ளேத்தித்
    திசைவணங்கச் சேவடியை வைத்தார் போலும்
    விண்குணத்தார் வேள்வி சிதைய நூறி
    வியன்கொண்டல் மேற்செல் விகிர்தர் போலும்
    பண்குணத்தார் பாடலோ டாட லோவாப்
    பரங்குன்ற மேய பரமர் போலும்
    எண்குணத்தார் எண்ணா யிரவர் போலும்
    இடைமருது மேவிய ஈச னாரே. 6.16.4
    163 ஊக முகிலுரிஞ்சு சோலை சூழ்ந்த
    உயர்பொழி லண்ணாவி லுறைகின் றாரும்
    பாகம் பணிமொழியாள் பாங்க ராகிப்
    படுவெண் டலையிற் பலிகொள் வாரும்
    மாகமடை மும்மதிலு மெய்தார் தாமு
    மணிபொழில் சூழாரூர் உறைகின் றாரும்
    ஏகம்ப மேயாரு மெல்லா மாவார்
    இடைமருது மேவிய ஈச னாரே. 6.16.5
    164 ஐயிரண்டும் ஆறொன்று மானார் போலும்
    அறுமூன்றும் நான்மூன்று மானார் போலுஞ்
    செய்வினைகள் நல்வினைக ளானார் போலுந்
    திசையனைத்து மாய்நிறைந்த செல்வர் போலுங்
    கொய்மலரங் கொன்றைச் சடையார் போலுங்
    கூத்தாட வல்ல குழகர் போலும்
    எய்யவந்த காமனையுங் காய்ந்தார் போலும்
    இடைமருது மேவிய ஈச னாரே. 6.16.6
    165 பிரியாத குணமுயிர்கட் கஞ்சோ டஞ்சாய்ப்
    பிரிவுடைய குணம்பேசிற் பத்தோ டொன்றாய்
    விரியாத குணமொருகால் நான்கே யென்பர்
    விரிவிலாக் குணநாட்டத் தாறே யென்பர்
    தெரிவாய குணமஞ்சுஞ் சமிதை யஞ்சும்
    பதமஞ்சுங் கதியஞ்சுஞ் செப்பி னாரும்
    எரியாய தாமரைமே லியங்கி னாரும்
    இடைமருது மேவிய ஈச னாரே. 6.16.7
    166 தோலிற் பொலிந்த வுடையார் போலுஞ்
    சுடர்வா யரவசைத்த சோதி போலும்
    ஆல மமுதாக வுண்டார் போலும்
    அடியார்கட் காரமுத மானார் போலுங்
    காலனையுங் காய்ந்த கழலார் போலுங்
    கயிலாயந் தம்மிடமாகக் கொண்டார் போலும்
    ஏலங் கமழ்குழலாள் பாகர் போலும்
    இடைமருது மேவிய ஈச னாரே. 6.16.8
    167 பைந்தளிர்க் கொன்றையந் தாரார் போலும்
    படைக்கணாள் பாக முடையார் போலும்
    அந்திவாய் வண்ணத் தழகர் போலும்
    மணிநீல கண்ட முடையார் போலும்
    வந்த வரவுஞ் செலவு மாகி
    மாறாதென் னுள்ளத் திருந்தார் போலும்
    எந்த மிடர்தீர்க்க வல்லார் போலும்
    இடைமருது மேவிய ஈச னாரே. 6.16.9
    168 கொன்றையங் கூவிள மாலை தன்னைக்
    குளிர்சடைமேல் வைத்துகந்த கொள்கை யாரும்
    நின்ற அனங்கனை நீறா நோக்கி
    நெருப்புருவ மாய்நின்ற நிமல னாரும்
    அன்றவ் வரக்கன் அலறி வீழ
    அருவரையைக் காலா லழுத்தி னாரும்
    என்று மிடுபிச்சை ஏற்றுண் பாரும்
    இடைமருது மேவிய ஈச னாரே. 6.16.10

    இத்தலம் சோழநாட்டிலுள்ளது.
    சுவாமிபெயர் - மருதீசர்,
    தேவியார் - நலமுலைநாயகியம்மை.

    திருச்சிற்றம்பலம்


    6.17 திருவிடைமருது - திருத்தாண்டகம்



    திருச்சிற்றம்பலம்

    169 ஆறு சடைக்கணிவர் அங்கைத் தீயர்
    அழகர் படையுடையர் அம்பொற் றோள்மேல்
    நீறு தடவந் திடப மேறி
    நித்தம் பலிகொள்வர் மொய்த்த பூதங்
    கூறுங் குணமுடையர் கோவ ணத்தர்
    கோடால வேடத்தர் கொள்கை சொல்லின்
    ஈறுந் நடுவு முதலு மாவார்
    இடைமருது மேவி யிடங்கொண் டாரே. 6.17.1
    170 மங்குல் மதிவைப்பர் வான நாடர்
    மடமா னிடமுடையர் மாத ராளைப்
    பங்கில் மிகவைப்பர் பால்போல் நீற்றர்
    பளிக்கு வடம்புனைவர் பாவ நாசர்
    சங்கு திரையுகளுஞ் சாய்க்கா டாள்வர்
    சரிதை பலவுடையர் தன்மை சொல்லின்
    எங்கும் பலிதிரிவர் என்னுள் நீங்கார்
    இடைமருது மேவி யிடங் கொண்டாரே. 6.17.2
    171 ஆல நிழலிருப்பர் ஆகா யத்தர்
    அருவரையி னுச்சியர் ஆணர் பெண்ணர்
    காலம் பலகழித்தார் கறைசேர் கண்டர்
    கருத்துக்குச் சேயார்தாங் காணா தார்க்குக்
    கோலம் பலவுடையர் கொல்லை யேற்றர்
    கொடுமழுவர் கோழம்ப மேய ஈசர்
    ஏல மணநாறும் ஈங்கோய் நீங்கார்
    இடைமருது மேவி யிடங்கொண் டாரே. 6.17.3
    172 தேசர் திறம்நினைவார் சிந்தை சேருஞ்
    செல்வர் திருவாரூ ரென்றும் உள்ளார்
    வாச மலரின்கண் மான்தோல் போர்ப்பர்
    மருவுங் கரியுரியர் வஞ்சக் கள்வர்
    நேசர் அடைந்தார்க் கடையா தார்க்கு
    நிட்டுரவர் கட்டங்கர் நினைவார்க் கென்றும்
    ஈசர் புனற்பொன்னித் தீர்த்தர் வாய்த்த
    இடைமருது மேவி யிடங்கொண் டாரே. 6.17.4
    173 கரப்பர் கரியமனக் கள்வர்க் குள்ளங்
    கரவாதே தந்நினைய கிற்பார் பாவந்
    துரப்பர் தொடுகடலின் நஞ்ச முண்பர்
    தூய மறைமொழியர் தீயா லொட்டி
    நிரப்பர் புரமூன்றும் நீறு செய்வர்
    நீள்சடையர் பாய்விடைகொண் டெங்கும் ஐயம்
    இரப்பர் எமையாள்வர் என்னுள் நீங்கார்
    இடைமருது மேவி யிடங்கொண் டாரே. 6.17.5
    174 கொடியா ரிடபத்தர் கூத்து மாடிக்
    குளிர்கொன்றை மேல்வைப்பர் கோல மார்ந்த
    பொடியாரு மேனியர் பூதிப் பையர்
    புலித்தோலர் பொங்கரவர் பூண நூலர்
    அடியார் குடியாவர் அந்த ணாளர்
    ஆகுதியின் மந்திரத்தார் அமரர் போற்ற
    இடியார் களிற்றுரியார் எவரும் போற்ற
    இடைமருது மேவி யிடங்கொண் டாரே. 6.17.6
    175 பச்சை நிறமுடையர் பாலர் சாலப்
    பழையர் பிழையெலாம் நீக்கி யாள்வர்
    கச்சைக் கதநாகம் பூண்ட தோளர்
    கலனொன்று கையேந்தி இல்லந் தோறும்
    பிச்சை கொளநுகர்வர் பெரியர் சாலப்
    பிறங்கு சடைமுடியர் பேணுந் தொண்டர்
    இச்சை மிகஅறிவர் என்று முள்ளார்
    இடைமருது மேவி யிடங்கொண் டாரே. 6.17.7
    176 காவார் சடைமுடியர் காரோ ணத்தர்
    கயிலாய மன்னினார் பன்னு மின்சொற்
    பாவார் பொருளாளர் வாளார் கண்ணி
    பயிலுந் திருவுருவம் பாக மேயார்
    பூவார் புனலணவு புன்கூர் வாழ்வர்
    புரமூன்று மொள்ளழலாக் காயத் தொட்ட
    ஏவார் சிலைமலையர் எங்குந் தாமே
    இடைமருது மேவி யிடங்கொண் டாரே. 6.17.8
    177 புரிந்தார் நடத்தின்கண் பூத நாதர்
    பொழிலாரூர் புக்குறைவர் போந்து தம்மிற்
    பிரிந்தா ரகல்வாய பேயுந் தாமும்
    பிரியா ரொருநாளும் பேணு காட்டில்
    எரிந்தா ரனலுகப்பர் ஏழிலோசை
    எவ்விடத்துந் தாமேயென் றேத்து வார்பால்
    இருந்தார் இமையவர்கள் போற்ற என்றும்
    இடைமருது மேவி யிடங்கொண் டாரே. 6.17.9
    178 விட்டிலங்கு மாமழுவர் வேலை நஞ்சர்
    விடங்கர் விரிபுனல்சூழ் வெண்காட் டுள்ளார்
    மட்டிலங்கு தார்மாலை மார்பில் நீற்றர்
    மழபாடி யுள்ளுறைவர் மாகா ளத்தர்
    சிட்டிலங்கு வல்லரக்கர் கோனை யன்று
    செழுமுடியுந் தோளைந்நான் கடரக் காலால்
    இட்டிரங்கி மற்றவனுக் கீந்தார் வென்றி
    இடைமருது மேவி யிடங்கொண் டாரே. 6.17.10

    திருச்சிற்றம்பலம்


    6.18 திருப்பூவணம் - திருத்தாண்டகம்



    திருச்சிற்றம்பலம்

    179 வடிவேறு திரிசூலந் தோன்றுந் தோன்றும்
    வளர்சடைமேல் இளமதியந் தோன்றுந் தோன்றுங்
    கடியேறு கமழ்கொன்றைக் கண்ணி தோன்றுங்
    காதில்வெண் குழைதோடு கலந்து தோன்றும்
    இடியேறு களிற்றுரிவைப் போர்வை தோன்றும்
    எழில்திகழுந் திருமுடியு மிலங்கித் தோன்றும்
    பொடியேறு திருமேனி பொலிந்து தோன்றும்
    பொழில்திகழும் பூவணத்தெம் புனித னார்க்கே. 6.18.1
    180 ஆணாகிப் பெண்ணாய வடிவு தோன்றும்
    அடியவர்கட் காரமுத மாகித் தோன்றும்
    ஊணாகி ஊர்திரிவா னாகித் தோன்றும்
    ஒற்றைவெண் பிறைதோன்றும் பற்றார் தம்மேற்
    சேணாக வரைவில்லா லெரித்தல் தோன்றுஞ்
    செத்தவர்தம் எலும்பினாற் செறியச் செய்த
    பூணாணும் அரைஞாணும் பொலிந்து தோன்றும்
    பொழில்திகழும் பூவணத்தெம் புனித னார்க்கே. 6.18.2
    181 கல்லாலின் நீழலிற் கலந்து தோன்றுங்
    கவின்மறையோர் நால்வர்க்கு நெறிக ளன்று
    சொல்லாகச் சொல்லியவா தோன்றுந் தோன்றுஞ்
    சூழரவு மான்மறியுந் தோன்றுந் தோன்றும்
    அல்லாத காலனைமுன் அடர்த்தல் தோன்றும்
    ஐவகையால் நினைவார்பால் அமர்ந்து தோன்றும்
    பொல்லாத புலாலெலும்பு பூணாய்த் தோன்றும்
    பொழில்திகழும் பூவணத்தெம் புனித னார்க்கே. 6.18.3
    182 படைமலிந்த மழுவாளு மானுந் தோன்றும்
    பன்னிரண்டு கண்ணுடைய பிள்ளை தோன்றும்
    நடைமலிந்த விடையோடு கொடியுந் தோன்றும்
    நான்மறையின் ஒலிதோன்றும் நயனந் தோன்றும்
    உடைமலிந்த கோவணமுங் கீளுந் தோன்று
    மூரல்வெண் சிரமாலை உலாவித் தோன்றும்
    புடைமலிந்த பூதத்தின் பொலிவு தோன்றும்
    பொழில்திகழும் பூவணத்தெம் புனித னார்க்கே. 6.18.4
    183 மயலாகுந் தன்னடியார்க் கருளுந் தோன்றும்
    மாசிலாப் புன்சடைமேல் மதியந் தோன்றும்
    இயல்பாக இடுபிச்சை ஏற்றல் தோன்றும்
    இருங்கடல்நஞ் சுண்டிருண்ட கண்டந் தோன்றுங்
    கயல்பாயக் கடுங்கலுழிக் கங்கை நங்கை
    ஆயிரமா முகத்தினொடு வானிற் றோன்றும்
    புயல்பாயச் சடைவிரித்த பொற்புத் தோன்றும்
    பொழில்திகழும் பூவணத்தெம் புனித னார்க்கே. 6.18.5
    184 பாராழி வட்டத்தார் பரவி யிட்ட
    பன்மலரும் நறும்புகையும் பரந்து தோன்றுஞ்
    சீராழித் தாமரையின் மலர்க ளன்ன
    திருந்தியமா நிறத்தசே வடிகள் தோன்றும்
    ஓராழித் தேருடைய இலங்கை வேந்தன்
    உடல்துணித்த இடர்பாவங் கெடுப்பித் தன்று
    போராழி முன்னீந்த பொற்புத் தோன்றும்
    பொழில்திகழும் பூவணத்தெம் புனித னார்க்கே. 6.18.6
    185 தன்னடியார்க் கருள்புரிந்த தகவு தோன்றுஞ்
    சதுர்முகனைத் தலையரிந்த தன்மை தோன்றும்
    மின்னனைய நுண்ணிடையாள் பாகந் தோன்றும்
    வேழத்தி னுரிவிரும்பிப் போர்த்தல் தோன்றுந்
    துன்னியசெஞ் சடைமேலோர் புனலும் பாம்புந்
    தூயமா மதியுடனே வைத்தல் தோன்றும்
    பொன்னனைய திருமேனி பொலிந்து தோன்றும்
    பொழில்திகழும் பூவணத்தெம் புனித னார்க்கே. 6.18.7
    186 செறிகழலுந் திருவடியுந் தோன்றுந் தோன்றும்
    திரிபுரத்தை எரிசெய்த சிலையுந் தோன்றும்
    நெறியதனை விரித்துரைத்த நேர்மை தோன்றும்
    நெற்றிமேல் கண்தோன்றும் பெற்றந் தோன்றும்
    மறுபிறவி யறுத்தருளும் வகையுந் தோன்றும்
    மலைமகளுஞ் சலமகளும் மலிந்து தோன்றும்
    பொறியரவும் இளமதியும் பொலிந்து தோன்றும்
    பொழில்திகழும் பூவணத்தெம் புனித னார்க்கே. 6.18.8
    187 அருப்போட்டு முலைமடவாள் பாகந் தோன்றும்
    அணிகிளரும் உருமென்ன அடர்க்குங் கேழல்
    மருப்போட்டு மணிவயிரக் கோவை தோன்றும்
    மணமலிந்த நடந்தோன்றும் மணியார் வைகைத்
    திருக்கோட்டில் நின்றதோர் திறமுந் தோன்றுஞ்
    செக்கர்வான் ஒளிமிக்குத் திகழ்ந்த சோதிப்
    பொருப்போட்டி நின்றதிண் புயமுந் தோன்றும்
    பொழில்திகழும் பூவணத்தெம் புனித னார்க்கே. 6.18.9
    188 ஆங்கணைந்த சண்டிக்கு மருளி யன்று
    தன்முடிமேல் அலர்மாலை யளித்தல் தோன்றும்
    பாங்கணைந்து பணிசெய்வார்க் கருளி யன்று
    பலபிறவி அறுத்தருளும் பரிசு தோன்றுங்
    கோங்கணைந்த கூவிளமும் மதமத் தமுங்
    குழற்கணிந்த கொள்கையொடு கோலந் தோன்றும்
    பூங்கணைவேள் உருவழித்த பொற்புத் தோன்றும்
    பொழில்திகழும் பூவணத்தெம் புனித னார்க்கே. 6.18.10
    189 ஆரொருவர் உள்குவார் உள்ளத் துள்ளே
    அவ்வுருவாய் நிற்கின்ற அருளுந் தோன்றும்
    வாருருவப் பூண்முலைநன் மங்கை தன்னை
    மகிழ்ந்தொருபால் வைத்துகந்த வடிவுந் தோன்றும்
    நீருருவக் கடலிலங்கை அரக்கர் கோனை
    நெறுநெறென அடர்த்திட்ட நிலையுந் தோன்றும்
    போருருவக் கூற்றுதைத்த பொற்புத் தோன்றும்
    பொழில்திகழும் பூவணத்தெம் புனித னார்க்கே. 6.18.11

    இத்தலம் பாண்டிநாட்டிலுள்ளது.
    சுவாமிபெயர் - பூவணநாதர்,
    தேவியார் - மின்னாம்பிகையம்மை.

    திருச்சிற்றம்பலம்


    6.19 திருவாலவாய் - திருத்தாண்டகம்



    திருச்சிற்றம்பலம்

    190 முளைத்தானை எல்லார்க்கும் முன்னே தோன்றி
    முதிருஞ் சடைமுடிமேல் முகிழ்வெண் டிங்கள்
    வளைத்தானை வல்லசுரர் புரங்கள் மூன்றும்
    வரைசிலையா வாசுகிமா நாணாக் கோத்துத்
    துளைத்தானைச் சுடுசரத்தாற் றுவள நீறாத்
    தூமுத்த வெண்முறுவல் உமையோ டாடித்
    திளைத்தானைத் தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.1
    191 விண்ணுலகின் மேலார்கள் மேலான் றன்னை
    மேலாடு புரமூன்றும் பொடிசெய் தானைப்
    பண்ணிலவு பைம்பொழில்சூழ் பழனத் தானைப்
    பசும்பொன்னின் நிறத்தானைப் பால்நீற் றானை
    உண்ணிலவு சடைக்கற்றைக் கங்கை யாளைக்
    கரந்துமையோ டுடனாகி யிருந்தான் றன்னைத்
    தெண்ணிலவு தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.2
    192 நீர்த்திரளை நீள்சடைமேல் நிறைவித் தானை
    நிலமருவி நீரோடக் கண்டான் றன்னைப்
    பாற்றிரளைப் பயின்றாட வல்லான் றன்னைப்
    பகைத்தெழுந்த வெங்கூற்றைப் பாய்ந்தான் றன்னைக்
    காற்றிரளாய் மேகத்தி னுள்ளே நின்று
    கடுங்குரலாய் இடிப்பானைக் கண்ணோர் நெற்றித்
    தீத்திரளைத் தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.3
    193 வானமிது வெல்லா முடையான் றன்னை
    வரியரவக் கச்சானை வன்பேய் சூழக்
    கானமதில் நடமாட வல்லான் றன்னைக்
    கடைக்கண்ணால் மங்கையுமை நோக்கா வென்மேல்
    ஊனமது வெல்லா மொழித்தான் றன்னை
    உணர்வாகி அடியேன துள்ளே நின்ற
    தேனமுதைத் தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.4
    194 ஊரானை உலகேழாய் நின்றான் றன்னை
    ஒற்றைவெண் பிறையானை உமையோ டென்றும்
    பேரானைப் பிறர்க்கென்று மரியான் றன்னைப்
    பிணக்காட்டில் நடமாடல் பேயோ டென்றும்
    ஆரானை அமரர்களுக் கமுதீந் தானை
    அருமறையான் நான்முகனு மாலும் போற்றுஞ்
    சீரானைத் தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.5
    195 மூவனை மூர்த்தியை மூவா மேனி
    உடையானை மூவுலகுந் தானே யெங்கும்
    பாவனைப் பாவ மறுப்பான் றன்னைப்
    படியெழுத லாகாத மங்கை யோடும்
    மேவனை விண்ணோர் நடுங்கக் கண்டு
    விரிகடலின் நஞ்சுண் டமுத மீந்த
    தேவனைத் தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.6
    196 துறந்தார்க்குத் தூநெறியாய் நின்றான் றன்னைத்
    துன்பந் துடைத்தாள வல்லான் றன்னை
    இறந்தார்க ளென்பே அணிந்தான் றன்னை
    எல்லி நடமாட வல்லான் றன்னை
    மறந்தார் மதின்மூன்று மாய்த்தான் றன்னை
    மற்றொரு பற்றில்லா அடியேற் கென்றுஞ்
    சிறந்தானைத் தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.7
    197 வாயானை மனத்தானை மனத்துள் நின்ற
    கருத்தானைக் கருத்தறிந்து முடிப்பான் றன்னைத்
    தூயானைத் தூவெள்ளை ஏற்றான் றன்னைச்
    சுடர்த்திங்கட் சடையானைத் தொடர்ந்து நின்றென்
    தாயானைத் தவமாய தன்மை யானைத்
    தலையாய தேவாதி தேவர்க் கென்றுஞ்
    சேயானைத் தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.8
    198 பகைச்சுடராய்ப் பாவ மறுப்பான் றன்னைப்
    பழியிலியாய் நஞ்சமுண் டமுதீந் தானை
    வகைச்சுடராய் வல்லசுரர் புரமட் டானை
    வளைவிலியா யெல்லார்க்கு மருள்செய் வானை
    மிகைச்சுடரை விண்ணவர்கண் மேலப் பாலை
    மேலாய தேவாதி தேவர்க் கென்றுந்
    திகைச்சுடரைத் தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.9
    199 மலையானை மாமேறு மன்னி னானை
    வளர்புன் சடையானை வானோர் தங்கள்
    தலையானை என்றலையின் உச்சி யென்றுந்
    தாபித் திருந்தானைத் தானே யெங்குந்
    துலையாக ஒருவரையு மில்லா தானைத்
    தோன்றாதார் மதின்மூன்றுந் துவள வெய்த
    சிலையானைத் தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.10
    200 தூர்த்தனைத் தோள்முடிபத் திறுத்தான் றன்னைத்
    தொன்னரம்பின் இன்னிசைகேட் டருள்செய் தானைப்
    பார்த்தனைப் பணிகண்டு பரிந்தான் றன்னைப்
    பரிந்தவற்குப் பாசுபத மீந்தான் றன்னை
    ஆத்தனை அடியேனுக் கன்பன் றன்னை
    அளவிலாப் பல்லூழி கண்டு நின்ற
    தீர்த்தனைத் தென்கூடற் றிருவா லவாய்ச்
    சிவனடியே சிந்திக்கப் பெற்றேன் நானே. 6.19.11

    திருச்சிற்றம்பலம்


    6.20 திருநள்ளாறு - திருத்தாண்டகம்



    திருச்சிற்றம்பலம்

    201 ஆதிக்கண் ணான்முகத்தி லொன்று சென்று
    அல்லாத சொல்லுரைக்கத் தன்கை வாளாற்
    சேதித்த திருவடியைச் செல்ல நல்ல
    சிவலோக நெறிவகுத்துக் காட்டு வானை
    மாதிமைய மாதோர்கூ றாயி னானை
    மாமலர்மே லயனோடு மாலுங் காணா
    நாதியை நம்பியை நள்ளாற் றானை
    நானடியேன் நினைக்கப்பெற் றுய்ந்த வாறே. 6.20.1
    202 படையானைப் பாசுபத வேடத் தானைப்
    பண்டனங்கற் பார்த்தானைப் பாவ மெல்லாம்
    அடையாமைக் காப்பானை அடியார் தங்கள்
    அருமருந்தை ஆவாவென் றருள்செய் வானைச்
    சடையானைச் சந்திரனைத் தரித்தான் றன்னைச்
    சங்கத்த முத்தனைய வெள்ளை யேற்றின்
    நடையானை நம்பியை நள்ளாற் றானை
    நானடியேன் நினைக்கப்பெற் றுய்ந்த வாறே. 6.20.2
    203 படவரவ மொன்றுகொண் டரையி லார்த்த
    பராபரனைப் பைஞ்ஞீலி மேவி னானை
    அடலரவம் பற்றிக் கடைந்த நஞ்சை
    அமுதாக உண்டானை ஆதி யானை
    மடலரவம் மன்னுபூங் கொன்றை யானை
    மாமணியை மாணிக்காய்க் காலன் றன்னை
    நடலரவஞ் செய்தானை நள்ளாற் றானை
    நானடியேன் நினைக்கப்பெற் றுய்ந்த வாறே. 6.20.3
    204 கட்டங்க மொன்றுதங் கையி லேந்திக்
    கங்கணமுங் காதில்விடு தோடு மிட்டுச்
    சுட்டங்கங் கொண்டு துதையப் பூசிச்
    சுந்தரனாய்ச் சூலங்கை யேந்தி னானைப்
    பட்டங்க மாலை நிறையச் சூடிப்
    பல்கணமுந் தாமும் பரந்த காட்டில்
    நட்டங்க மாடியை நள்ளாற் றானை
    நானடியேன் நினைக்கப்பெற் றுய்ந்த வாறே. 6.20.4
    205 உலர்ந்தார்தம் அங்கங்கொண் டுலக மெல்லாம்
    ஒருநொடியில் உழல்வானை உலப்பில் செல்வஞ்
    சிலந்திதனக் கருள்செய்த தேவ தேவைத்
    திருச்சிராப் பள்ளியெஞ் சிவலோ கனைக்
    கலந்தார்தம் மனத்தென்றுங் காதலானைக்
    கச்சியே கம்பனைக் கமழ்பூங் கொன்றை
    நலந்தாங்கு நம்பியை நள்ளாற் றானை
    நானடியேன் நினைக்கப்பெற் றுய்ந்த வாறே. 6.20.5
    206 குலங்கெடுத்துக் கோள்நீக்க வல்லான் றன்னைக்
    குலவரையன் மடப்பாவை இடப்பா லானை
    மலங்கெடுத்து மாதீர்த்தம் ஆட்டிக் கொண்ட
    மறையவனைப் பிறைதவழ்செஞ் சடையி னானைச்
    சலங்கெடுத்துத் தயாமூல தன்ம மென்னுந்
    தத்துவத்தின் வழிநின்று தாழ்ந்தோர்க் கெல்லாம்
    நலங்கொடுக்கும் நம்பியை நள்ளாற் றானை
    நானடியேன் நினைக்கப்பெற் றுய்ந்த வாறே. 6.20.6
    207 பூவிரியும் மலர்க்கொன்றைச் சடையி னானைப்
    புறம்பயத்தெம் பெருமானைப் புகலூ ரானை
    மாவிரியக் களிறுரித்த மைந்தன் றன்னை
    மறைக்காடும் வலிவலமும் மன்னி னானைத்
    தேவிரியத் திகழ்தக்கன் வேள்வி யெல்லாஞ்
    சிதைத்தானை உதைத்தவன்றன் சிரங்கொண் டானை
    நாவிரிய மறைநவின்ற நள்ளாற் றானை
    நானடியேன் நினைக்கப்பெற் றுய்ந்த வாறே. 6.20.7
    208 சொல்லானைச் சுடர்ப்பவளச் சோதி யானைத்
    தொல்லவுணர் புரமூன்று மெரியச் செற்ற
    வில்லானை எல்லார்க்கு மேலா னானை
    மெல்லியலாள் பாகனை வேதம் நான்குங்
    கல்லாலின் நீழற்கீழ் அறங்கண் டானைக்
    காளத்தி யானைக் கயிலை மேய
    நல்லானை நம்பியை நள்ளாற் றானை
    நானடியேன் நினைக்கப்பெற் றுய்ந்த வாறே. 6.20.8
    209 குன்றாத மாமுனிவன் சாபம் நீங்கக்
    குரைகழலாற் கூற்றுவனைக் குமைத்த கோனை
    அன்றாக அவுணர்புர மூன்றும் வேவ
    ஆரழல்வா யோட்டி யடர்வித் தானைச்
    சென்றாது வேண்டிற்றொன் றீவான் றன்னைச்
    சிவனேயெம் பெருமானென் றிருப்பார்க் கென்றும்
    நன்றாகும் நம்பியை நள்ளாற் றானை
    நானடியேன் நினைக்கப்பெற் றுய்ந்த வாறே. 6.20.9
    210 இறவாமே வரம்பெற்றே னென்று மிக்க
    இராவணனை இருபதுதோள் நெரிய வூன்றி
    உறவாகி இன்னிசைகேட் டிரங்கி மீண்டே
    உற்றபிணி தவிர்த்தருள வல்லான் றன்னை
    மறவாதார் மனத்தென்றும் மன்னி னானை
    மாமதியம் மலர்க்கொன்றை வன்னி மத்தம்
    நறவார்செஞ் சடையானை நள்ளாற் றானை
    நானடியேன் நினைக்கப்பெற் றுய்ந்த வாறே. 6.20.10

    திருச்சிற்றம்பலம்


    6.21 திருவாக்கூர் - திருத்தாண்டகம்



    திருச்சிற்றம்பலம்

    211 முடித்தா மரையணிந்த மூர்த்தி போலும்
    மூவுலகுந் தாமாகி நின்றார் போலுங்
    கடித்தா மரையேய்ந்த கண்ணார் போலுங்
    கல்லலகு பாணி பயின்றார் போலுங்
    கொடித்தா மரைக்காடே நாடுந் தொண்டர்
    குற்றேவல் தாமகிழ்ந்த குழகர்போலும்
    அடித்தா மரைமலர்மேல் வைத்தார் போலும்
    ஆக்கூரில் தான்றோன்றி யப்ப னாரே. 6.21.1
    212 ஓதிற் றொருநூலு மில்லை போலும்
    உணரப் படாதொன் றில்லை போலுங்
    காதிற்குழை யிலங்கப் பெய்தார் போலுங்
    கவலைப் பிறப்பிடும்பை காப்பார் போலும்
    வேதத்தோ டாறங்கஞ் சொன்னார் போலும்
    விடஞ்சூழ்ந் திருண்ட மிடற்றார் போலும்
    ஆதிக் களவாகி நின்றார் போலும்
    ஆக்கூரில் தான்றோன்றி யப்ப னாரே. 6.21.2
    213 மையார் மலர்க்கண்ணாள் பாகர் போலும்
    மணிநீல கண்ட முடையார் போலும்
    நெய்யார் திரிசூலங் கையார் போலும்
    நீறேறு தோளெட் டுடையார் போலும்
    வையார் மழுவாட் படையார் போலும்
    வளர்ஞாயி றன்ன ஒளியார் போலும்
    ஐவா யரவமொன் றார்த்தார் போலும்
    ஆக்கூரில் தான்றோன்றி யப்ப னாரே. 6.21.3
    214 வடிவிளங்கு வெண்மழுவாள் வல்லார் போலும்
    வஞ்சக் கருங்கடல்நஞ் சுண்டார் போலும்
    பொடிவிளங்கு முந்நூல்சேர் மார்பர் போலும்
    பூங்கங்கை தோய்ந்த சடையார் போலுங்
    கடிவிளங்கு கொன்றையந் தாரார் போலுங்
    கட்டங்க மேந்திய கையார் போலும்
    அடிவிளங்கு செம்பொற் கழலார் போலும்
    ஆக்கூரில் தான்றோன்றி யப்ப னாரே. 6.21.4
    215 ஏகாச மாம்புலித்தோல் பாம்பு தாழ
    இடுவெண் டலைகலனா ஏந்தி நாளும்
    மேகாசங் கட்டழித்த வெள்ளி மாலை
    புனலார் சடைமுடிமேற் புனைந்தார் போலும்
    மாகாச மாயவெண் ணீருந் தீயும்
    மதியும் மதிபிறந்த விண்ணும் மண்ணும்
    ஆகாச மென்றிவையு மானார் போலும்
    ஆக்கூரில் தான்றோன்றி யப்ப னாரே. 6.21.5
    216 மாதூரும் வாணெடுங்கண் செவ்வாய் மென்றோள்
    மலைமகளை மார்பத் தணைத்தார் போலும்
    மூதூர் முதுதிரைக ளானார் போலும்
    முதலு மிறுதியு மில்லார் போலுந்
    தீதூர நல்வினையாய் நின்றார் போலுந்
    திசையெட்டுந் தாமேயாஞ் செல்வர் போலும்
    ஆதிரை நாளாய் அமர்ந்தார் போலும்
    ஆக்கூரில் தான்றோன்றி யப்ப னாரே. 6.21.6
    217 மால்யானை மத்தகத்தைக் கீண்டார் போலும்
    மான்றோ லுடையா மகிழ்ந்தார் போலுங்
    கோலானைக் கோளழலாற் காய்ந்தார் போலுங்
    குழவிப்பிறை சடைமேல் வைத்தார் போலுங்
    காலனைக் காலாற் கடந்தார் போலுங்
    கயிலாயந் தம்மிடமாக் கொண்டார் போலும்
    ஆலானைந் தாட லுகப்பார் போலும்
    ஆக்கூரில் தான்றோன்றி யப்ப னாரே. 6.21.7
    218 கண்ணார்ந்த நெற்றி யுடையார் போலுங்
    காமனையுங் கண்ணழலாற் காய்ந்தார் போலும்
    உண்ணா அருநஞ்ச முண்டார் போலும்
    ஊழித்தீ யன்ன ஒளியார் போலும்
    எண்ணா யிரங்கோடி பேரார் போலும்
    ஏறேறிச் செல்லு மிறைவர் போலும்
    அண்ணாவும் ஆரூரும் மேயார் போலும்
    ஆக்கூரில் தான்றோன்றி யப்ப னாரே. 6.21.8
    219 கடியார் தளிர்கலந்த கொன்றை மாலை
    கதிர்போது தாதணிந்த கண்ணி போலும்
    நெடியானுஞ் சதுர்முகனுந் நேட நின்ற
    நீலநற் கண்டத் திறையார் போலும்
    படியேல் அழல்வண்ணஞ் செம்பொன் மேனி
    மணிவண்ணந் தம்வண்ண மாவார் போலும்
    அடியார் புகலிடம தானார் போலும்
    ஆக்கூரில் தான்றோன்றி யப்ப னாரே. 6.21.9
    220 திரையானுஞ் செந்தா மரைமே லானுந்
    தேர்ந்தவர்கள் தாந்தேடிக் காணார் நாணும்
    புரையா னெனப்படுவார் தாமே போலும்
    போரேறு தாமேறிச் செல்வார் போலுங்
    கரையா வரைவில்லே நாகம் நாணாக்
    காலத்தீ யன்ன கனலார் போலும்
    வரையார் மதிலெய்த வண்ணர் போலும்
    ஆக்கூரில் தான்றோன்றி யப்ப னாரே. 6.21.10

    இத்தலம் சோழநாட்டிலுள்ளது.
    சுவாமிபெயர் - சுயம்புநாதவீசுவரர்,
    தேவியார் - கட்கநேத்திராம்பிகை.

    திருச்சிற்றம்பலம்

    6.22 திருநாகைக்காரோணம் - திருத்தாண்டகம்



    திருச்சிற்றம்பலம்

    221 பாரார் பரவும் பழனத் தானைப்
    பருப்பதத் தானைப் பைஞ்ஞீலி யானை
    சீரார் செழும்பவளக் குன்றொப் பானைத்
    திகழுந் திருமுடிமேற் றிங்கள் சூடிப்
    பேரா யிரமுடைய பெம்மான் றன்னைப்
    பிறர்தன்னைக் காட்சிக் கரியான் றன்னைக்
    காரார் கடல்புடைசூழ் அந்தண் நாகைக்
    காரோணத் தெஞ்ஞான்றுங் காண லாமே. 6.22.1
    222 விண்ணோர் பெருமானை வீரட் டானை
    வெண்ணீறு மெய்க்கணிந்த மேனி யானைப்
    பெண்ணானை ஆணானைப் பேடி யானைப்
    பெரும்பெற்றத் தண்புலியூர் பேணி னானை
    அண்ணா மலையானை ஆனைந் தாடும்
    அணியாரூர் வீற்றிருந்த அம்மான் றன்னைக்
    கண்ணார் கடல்புடைசூழ் அந்தண் நாகைக்
    காரோணத் தெஞ்ஞான்றுங் காண லாமே. 6.22.2
    223 சிறையார் வரிவண்டு தேனே பாடுந்
    திருமறைக்காட் டெந்தை சிவலோ கனை
    மறையான்றன் வாய்மூருங் கீழ்வே ளூரும்
    வலிவலமுந் தேவூரும் மன்னி யங்கே
    உறைவானை உத்தமனை ஒற்றி யூரிற்
    பற்றியாள் கின்ற பரமன் றன்னைக்
    கறையார் கடல்புடைசூழ் அந்தண் நாகைக்
    காரோணத் தெஞ்ஞான்றுங் காண லாமே. 6.22.3
    224 அன்னமாம் பொய்கைசூழ் அம்ப ரானை
    ஆச்சிரா மன்னகரு மானைக் காவும்
    முன்னமே கோயிலாக் கொண்டான் றன்னை
    மூவுலகுந் தானாய மூர்த்தி தன்னைச்
    சின்னமாம் பன்மலர்க ளன்றே சூடிச்
    செஞ்சடைமேல் வெண்மதியஞ் சேர்த்தி னானைக்
    கன்னியம் புன்னைசூழ் அந்தண் நாகைக்
    காரோணத் தெஞ்ஞான்றுங் காண லாமே. 6.22.4
    225 நடையுடைய நல்லெருதொன் றூர்வான் றன்னை
    ஞானப் பெருங்கடலை நல்லூர் மேய
    படையுடைய மழுவாளொன் றேந்தி னானைப்
    பன்மையே பேசும் படிறன் றன்னை
    மடையிடையே வாளை யுகளும் பொய்கை
    மருகல்வாய்ச் சோதி மணிகண் டனைக்
    கடையுடைய நெடுமாட மோங்கு நாகைக்
    காரோணத் தெஞ்ஞான்றுங் காண லாமே. 6.22.5
    226 புலங்கொள்பூந் தேறல்வாய்ப் புகலிக் கோனைப்
    பூம்புகார்க் கற்பகத்தை புன்கூர் மேய
    அலங்கலங் கழனிசூழ் அணிநீர்க் கங்கை
    அவிர்சடைமேல் ஆதரித்த அம்மான் றன்னை
    இலங்கு தலைமாலை பாம்பு கொண்டே
    ஏகாச மிட்டியங்கும் ஈசன் றன்னைக்
    கலங்கற் கடல்புடைசூழ் அந்தண் நாகைக்
    காரோணத் தெஞ்ஞான்றுங் காண லாமே. 6.22.6
    227 பொன்மணியம் பூங்கொன்றை மாலை யானைப்
    புண்ணியனை வெண்ணீறு பூசி னானைச்
    சின்மணிய மூவிலைய சூலத் தானைத்
    தென்சிராப் பள்ளிச் சிவலோ கனை
    மன்மணியை வான்சுடலை யூராப் பேணி
    வல்லெருதொன் றேறும் மறைவல் லானைக்
    கன்மணிகள் வெண்டிரைசூழ் அந்தண் நாகைக்
    காரோணத் தெஞ்ஞான்றுங் காண லாமே. 6.22.7
    228 வெண்டலையும் வெண்மழுவு மேந்தி னானை
    விரிகோ வணமசைத்த வெண்ணீற் றானைப்
    புண்டலைய மால்யானை யுரிபோர்த் தானைப்
    புண்ணியனை வெண்ணீ றணிந்தான் றன்னை
    எண்டிசையு மெரியாட வல்லான் றன்னை
    ஏகம்ப மேயானை எம்மான் றன்னைக்
    கண்டலங் கழனிசூழ் அந்தண் நாகைக்
    காரோணத் தெஞ்ஞான்றுங் காண லாமே. 6.22.8
    229 சொல்லார்ந்த சோற்றுத் துறையான் றன்னைத்
    தொன்னரக நன்னெறியாற் றூர்ப்பான் றன்னை
    வில்லானை மீயச்சூர் மேவி னானை
    வேதியர்கள் நால்வர்க்கும் வேதஞ் சொல்லிப்
    பொல்லாதார் தம்மரண மூன்றும் பொன்றப்
    பொறியரவம் மார்பாரப் பூண்டான் றன்னைக்
    கல்லாலின் கீழானைக் கழிசூழ் நாகைக்
    காரோணத் தெஞ்ஞான்றுங் காண லாமே. 6.22.9
    230 மனைதுறந்த வல்லமணர் தங்கள் பொய்யும்
    மாண்புரைக்கும் மனக்குண்டர் தங்கள் பொய்யுஞ்
    சினைபொதிந்த சீவரத்தர் தங்கள் பொய்யும்
    மெய்யென்று கருதாதே போத நெஞ்சே
    பனையுரியைத் தன்னுடலிற் போர்த்த எந்தை
    அவன்பற்றே பற்றாகக் காணி னல்லாற்
    கனைகடலின் றென்கழிசூழ் அந்தண் நாகைக்
    காரோணத் தெஞ்ஞான்றுங் காண லாமே. 6.22.10
    231 நெடியானும் மலரவனும் நேடி யாங்கே
    நேருருவங் காணாமே சென்று நின்ற
    படியானைப் பாம்புரமே காத லானைப்
    பாம்பரையோ டார்த்த படிறன் றன்னைச்
    செடிநாறும் வெண்டலையிற் பிச்சைக் கென்று
    சென்றானை நின்றியூர் மேயான் றன்னைக்
    கடிநாறு பூஞ்சோலை அந்தண் நாகைக்
    காரோணத் தெஞ்ஞான்றுங் காண லாமே. 6.22.11

    திருச்சிற்றம்பலம்


    6.23 திருமறைக்காடு - திருத்தாண்டகம்



    திருச்சிற்றம்பலம்

    232 தூண்டு சுடரனைய சோதி கண்டாய்
    தொல்லமரர் சூளா மணிதான் கண்டாய்
    காண்டற் கரிய கடவுள் கண்டாய்
    கருதுவார்க் காற்ற எளியான் கண்டாய்
    வேண்டுவார் வேண்டுவதே ஈவான் கண்டாய்
    மெய்ந்நெறி கண்டாய் விரத மெல்லாம்
    மாண்ட மனத்தார் மனத்தான் கண்டாய்
    மறைக்காட் டுறையும் மணாளன் றானே. 6.23.1
    233 கைகிளரும் வீணை வலவன் கண்டாய்
    காபாலி கண்டாய் திகழுஞ் சோதி
    மெய்கிளரும் ஞான விளக்குக் கண்டாய்
    மெய்யடியார் உள்ளத்து வித்துக் கண்டாய்
    பைகிளரும் நாக மசைத்தான் கண்டாய்
    பராபரன் கண்டாய்பா சூரான் கண்டாய்
    வைகிளருங் கூர்வாட் படையான் கண்டாய்
    மறைக்காட் டுறையும் மணாளன் றானே. 6.23.2
    234 சிலந்திக் கருள்முன்னஞ் செய்தான் கண்டாய்
    திரிபுரங்கள் தீவாய்ப் படுத்தான் கண்டாய்
    நிலந்துக்க நீர்வளிதீ யானான் கண்டாய்
    நிரூபியாய் ரூபியுமாய் நின்றான் கண்டாய்
    சலந்துக்க சென்னிச் சடையான் கண்டாய்
    தாமரையான் செங்கண்மால் தானே கண்டாய்
    மலந்துக்க மால்விடையொன் றூர்ந்தான் கண்டாய்
    மறைக்காட் டுறையும் மணாளன் றானே. 6.23.3
    235 கள்ளி முதுகாட்டி லாடி கண்டாய்
    காலனையுங் காலாற் கடந்தான் கண்டாய்
    புள்ளி யுழைமானின் தோலான் கண்டாய்
    புலியுரிசே ராடைப் புனிதன் கண்டாய்
    வெள்ளி மிளிர்பிறைமேற் சூடி கண்டாய்
    வெண்ணீற்றான் கண்டாய்நஞ் செந்தின் மேய
    வள்ளி மணாளற்குத் தாதை கண்டாய்
    மறைக்காட் டுறையும் மணாளன் றானே. 6.23.4
    236 மூரி முழங்கொலிநீ ரானான் கண்டாய்
    முழுத்தழல்போல் மேனி முதல்வன் கண்டாய்
    ஏரி நிறைந்தனைய செல்வன் கண்டாய்
    இன்னடியார்க் கின்பம் விளைப்பான் கண்டாய்
    ஆரியன் கண்டாய் தமிழன் கண்டாய்
    அண்ணா மலையுறையு மண்ணல் கண்டாய்
    வாரி மதகளிறே போல்வான் கண்டாய்
    மறைக்காட் டுறையும் மணாளன் றானே. 6.23.5
    237 ஆடல் மால்யானை யுரித்தான் கண்டாய்
    அகத்தியான் பள்ளி யமர்ந்தான் கண்டாய்
    கோடியான் கண்டாய் குழகன் கண்டாய்
    குளிராரூர் கோயிலாக் கொண்டான் கண்டாய்
    நாடிய நன்பொருள்க ளானான் கண்டாய்
    நன்மையோ டிம்மைமற் றம்மை யெல்லாம்
    வாடிய வாட்டந் தவிர்ப்பான் கண்டாய்
    மறைக்காட் டுறையும் மணாளன் றானே. 6.23.6
    238 வேலைசேர் நஞ்ச மிடற்றான் கண்டாய்
    விண்தடவு பூங்கயிலை வெற்பன் கண்டாய்
    ஆலைசேர் வேள்வி யழித்தான் கண்டாய்
    அமரர்கள் தாமேத்து மண்ணல் கண்டாய்
    பால்நெய்சே ரானஞ்சு மாடி கண்டாய்
    பருப்பதத் தான்கண்டாய் பரவை மேனி
    மாலையோர் கூறுடைய மைந்தன் கண்டாய்
    மறைக்காட் டுறையும் மணாளன் றானே. 6.23.7
    239 அம்மை பயக்கும் அமிர்து கண்டாய்
    அந்தேன் தெளிகண்டாய் ஆக்கஞ் செய்திட்
    டிம்மை பயக்கு மிறைவன் கண்டாய்
    என்னெஞ்சே உன்னில் இனியான் கண்டாய்
    மெய்ம்மையே ஞான விளக்குக் கண்டாய்
    வெண்காடன் கண்டாய் வினைகள் போக
    மம்ம ரறுக்கு மருந்து கண்டாய்
    மறைக்காட் டுறையும் மணாளன் றானே. 6.23.8
    240 மூலநோய் தீர்க்கும் முதல்வன் கண்டாய்
    முத்தமிழும் நான்மறையு மானான் கண்டாய்
    ஆலின்கீழ் நால்வர்க் கறத்தான் கண்டாய்
    ஆதியு மந்தமு மானான் கண்டாய்
    பால விருத்தனு மானான் கண்டாய்
    பவளத் தடவரையே போல்வான் கண்டாய்
    மாலைசேர் கொன்றை மலிந்தான் கண்டாய்
    மறைக்காட் டுறையும் மணாளன் றானே. 6.23.9
    241 அயனவனும் மாலவனு மறியா வண்ணம்
    ஆரழலாய் நீண்டுகந்த அண்ணல் கண்டாய்
    துயரிலங்கை வேந்தன் துளங்க வன்று
    சோதிவிர லாலுற வைத்தான் கண்டாய்
    பெயரவற்குப் பேரருள்கள் செய்தான் கண்டாய்
    பேரும் பெரும்படையோ டீந்தான் கண்டாய்
    மயருறு வல்வினைநோய் தீர்ப்பான் கண்டாய்
    மறைக்காட் டுறையும் மணாலன் றானே. 6.23.10

    திருச்சிற்றம்பலம்


    6.24 திருவாரூர் - திருத்தாண்டகம்



    திருச்சிற்றம்பலம்

    242 கைம்மான மதகளிற்றி னுரிவை யான்காண்
    கறைக்கண்டன் காண்கண்ணார் நெற்றி யான்காண்
    அம்மான்காண் ஆடரவொன் றாட்டி னான்காண்
    அனலாடி காண்அயில்வாய்ச் சூலத் தான்காண்
    எம்மான்காண் ஏழுலகு மாயி னான்காண்
    எரிசுடரோன் காண்இலங்கு மழுவா ளன்காண்
    செம்மானத் தொளியன்ன மேனி யான்காண்
    திருவாரூ ரான்காண்என் சிந்தை யானே. 6.24.1
    243 ஊனேறு படுதலையில் உண்டி யான்காண்
    ஓங்காரன் காண்ஊழி முதலா னான்காண்
    ஆனேறொன் றூர்ந்துழலும் ஐயா றன்காண்
    அண்டன்காண் அண்டத்துக் கப்பா லான்காண்
    மானேறு கரதலத்தெம் மணிகண் டன்காண்
    மாதவன்காண் மாதவத்தின் விளைவா னான்காண்
    தேனேறு மலர்க்கொன்றைக் கண்ணி யான்காண்
    திருவாரூ ரான்காண்என் சிந்தை யானே. 6.24.2
    244 ஏவணத்த சிலையான்முப் புரமெய் தான்காண்
    இறையவன்காண் மறையவன்காண் ஈசன் றான்காண்
    தூவணத்த சுடர்ச்சூலப் படையி னான்காண்
    சுடர்மூன்றுங் கண்மூன்றாக் கொண்டான் றான்காண்
    ஆவணத்தால் என்றன்னை ஆட்கொண் டான்காண்
    அனலாடி காண்அடியார்க் கமிர்தா னான்காண்
    தீவணத்த திருவுருவிற் கரியுரு வன்காண்
    திருவாரூ ரான்காண்என் சிந்தை யானே. 6.24.3
    245 கொங்குவார் மலர்க்கண்ணிக் குற்றா லன்காண்
    கொடுமழுவன் காண்கொல்லை வெள்ளேற் றான்காண்
    எங்கள்பாற் றுயர்கெடுக்கு மெம்பி ரான்காண்
    ஏழ்கடலும் ஏழ்மலையு மாயி னான்காண்
    பொங்குமா கருங்கடல்நஞ் சுண்டான் றான்காண்
    பொற்றூண்காண் செம்பவளத் திரள்போல் வான்காண்
    செங்கண்வா ளராமதியோ டுடன்வைத் தான்காண்
    திருவாரூ ரான்காண்என் சிந்தை யானே. 6.24.4
    246 காரேறு நெடுங்குடுமிக் கயிலா யன்காண்
    கறைக்கண்டன் காண்கண்ணார் நெற்றி யான்காண்
    போரேறு நெடுங்கொடிமே லுயர்த்தி னான்காண்
    புண்ணியன்காண் எண்ணரும்பல் குணத்தி னான்காண்
    நீரேறு சுடர்ச்சூலப் படையி னான்காண்
    நின்மலன்காண் நிகரேது மில்லா தான்காண்
    சீரேறு திருமாலோர் பாகத் தான்காண்
    திருவாரூ ரான்காண்என் சிந்தை யானே. 6.24.5
    247 பிறையரவக் குறுங்கண்ணிச் சடையி னான்காண்
    பிறப்பிலிகாண் பெண்ணோடா ணாயி னான்காண்
    கறையுருவ மணிமிடற்று வெண்ணீற் றான்காண்
    கழல்தொழுவார் பிறப்பறுக்குங் காபா லிகாண்
    இறையுருவக் கனவளையாள் இடப்பா கன்காண்
    இருநிலன்காண் இருநிலத்துக் கியல்பா னான்காண்
    சிறையுருவக் களிவண்டார் செம்மை யான்காண்
    திருவாரூ ரான்காண்என் சிந்தை யானே. 6.24.6
    248 தலையுருவச் சிரமாலை சூடி னான்காண்
    தமருலகந் தலைகலனாப் பலிகொள் வான்காண்
    அலையுருவச் சுடராழி ஆக்கி னான்காண்
    அவ்வாழி நெடுமாலுக் கருளி னான்காண்
    கொலையுருவக் கூற்றுதைத்த கொள்கை யான்காண்
    கூரெரிநீர் மண்ணொடுகாற் றாயி னான்காண்
    சிலையுருவச் சரந்துரந்த திறத்தி னான்காண்
    திருவாரூ ரான்காண்என் சிந்தை யானே. 6.24.7
    249 ஐயன்காண் குமரன்காண் ஆதி யான்காண்
    அடல்மழுவாள் தானொன்று பியன்மே லேந்து
    கையன்காண் கடற்பூதப் படையி னான்காண்
    கண்ணெரியால் ஐங்கணையோ னுடல்காய்ந் தான்காண்
    வெய்யன்காண் தண்புனல்சூழ் செஞ்சடை யான்காண்
    வெண்ணீற்றான் காண்விசயற் கருள்செய் தான்காண்
    செய்யன்காண் கரியன்காண் வெளியோன் றான்காண்
    திருவாரூ ரான்காண்என் சிந்தை யானே. 6.24.8
    250 மலைவளர்த்த மடமங்கை பாகத் தான்காண்
    மயானத்தான் காண்மதியஞ் சூடி னான்காண்
    இலைவளர்த்த மலர்க்கொன்றை மாலை யான்காண்
    இறையவன்காண் எறிதிரைநீர் நஞ்சுண் டான்காண்
    கொலைவளர்த்த மூவிலைய சூலத் தான்காண்
    கொடுங்குன்றன் காண்கொல்லை யேற்றி னான்காண்
    சிலைவளர்த்த சரந்துரந்த திறத்தி னான்காண்
    திருவாரூ ரான்காண்என் சிந்தை யானே. 6.24.9
    251 பொற்றாது மலர்க்கொன்றை சூடி னான்காண்
    புரிநூலன் காண்பொடியார் மேனி யான்காண்
    மற்றாருந் தன்னொப்பா ரில்லா தான்காண்
    மறையோதி காண்எறிநீர் நஞ்சுண் டான்காண்
    எற்றாலுங் குறைவொன்று மில்லா தான்காண்
    இறையவன்காண் மறையவன்காண் ஈசன் றான்காண்
    செற்றார்கள் புரமூன்றுஞ் செற்றான் றான்காண்
    திருவாரூ ரான்காண்என் சிந்தை யானே. 6.24.10

    திருச்சிற்றம்பலம்


    6.25 திருவாரூர் - திருத்தாண்டகம்



    திருச்சிற்றம்பலம்

    252 உயிரா வணமிருந் துற்று நோக்கி
    உள்ளக் கிழியி னுரு வெழுதி
    உயிரா வணஞ்செய்திட் டுன்கைத் தந்தால்
    உணரப் படுவாரோ டொட்டி வாழ்தி
    அயிரா வணமேறா தானே றேறி
    அமரர்நா டாளாதே ஆரூ ராண்ட
    அயிரா வணமேயென் னம்மா னேநின்
    அருட்கண்ணால் நோக்காதார் அல்லா தாரே. 6.25.1
    253 எழுது கொடியிடையார் ஏழை மென்றோள்
    இளையார்கள் நம்மை இகழா முன்னம்
    பழுது படநினையேல் பாவி நெஞ்சே
    பண்டுதான் என்னோடு பகைதா னுண்டோ
    முழுதுலகில் வானவர்கள் முற்றுங் கூடி
    முடியா லுறவணங்கி முற்றம் பற்றி
    அழுது திருவடிக்கே பூசை செய்ய
    இருக்கின்றான் ஊர்போலும் ஆரூர் தானே. 6.25.2
    254 தேரூரார் மாவூரார் திங்க ளூரார்
    திகழ்புன் சடைமுடிமேற் றிங்கள் சூடிக்
    காரூரா நின்ற கழனிச் சாயற்
    கண்ணார்ந்த மாடங் கலந்து தோன்றும்
    ஓரூரா உலகெலா மொப்பக் கூடி
    உமையாள் மணவாளா என்று வாழ்த்தி
    ஆரூரா ஆரூரா என்கின் றார்கள்
    அமரர்கள்தம் பெருமானே எங்குற் றாயே. 6.25.3
    255 கோவணமோ தோலோ உடை யாவது
    கொல்லேறோ வேழமோ ஊர்வ துதான்
    பூவணமோ புறம்பயமோ அன்றா யிற்றான்
    பொருந்தாதார் வாழ்க்கை திருந்தா மையோ
    தீவணத்த செஞ்சடைமேற் றிங்கள் சூடித்
    திசைநான்கும் வைத்துகந்த செந்தீ வண்ணர்
    ஆவணமோ ஒற்றியோ அம்மா னார்தாம்
    அறியேன்மற் றூராமா றாரூர் தானே. 6.25.4
    256 ஏந்து மழுவாளர் இன்னம் பரார்
    எரிபவள வண்ணர் குடமூக் கிலார்
    வாய்ந்த வளைக்கையாள் பாக மாக
    வார்சடையார் வந்து வலஞ்சு ழியார்
    போந்தா ரடிகள் புறம்ப யத்தே
    புகலூர்க்கே போயினார் போரே றேறி
    ஆய்ந்தே யிருப்பார்போய் ஆரூர் புக்கார்
    அண்ணலார் செய்கின்ற கண்மா யமே. 6.25.5
    257 கருவாகிக் குழம்பிருந்து கலித்து மூளை
    கருநரம்பும் வெள்ளெலும்புஞ் சேர்ந்தொன் றாகி
    உருவாகிப் புறப்பட்டிங் கொருத்தி தன்னால்
    வளர்க்கப்பட் டுயிராருங் கடைபோ காரால்
    மருவாகி நின்னடியே மறவே னம்மான்
    மறித்தொருகாற் பிறப்புண்டேல் மறவா வண்ணந்
    திருவாரூர் மணவாளா திருத்தெங் கூராய்
    செம்பொனே கம்பனே திகைத்திட் டேனே. 6.25.6
    258 முன்னம் அவனுடைய நாமங் கேட்டாள்
    மூர்த்தி யவனிருக்கும் வண்ணங் கேட்டாள்
    பின்னை அவனுடைய ஆரூர் கேட்டாள்
    பெயர்த்து மவனுக்கே பிச்சி யானாள்
    அன்னையையும் அத்தனையும் அன்றே நீத்தாள்
    அகன்றாள் அகலிடத்தார் ஆசா ரத்தை
    தன்னை மறந்தாள்தன் நாமங் கெட்டாள்
    தலைப்பட்டாள் நங்கை தலைவன் றாளே. 6.25.7
    259 ஆடுவாய் நீநட்டம் அளவிற் குன்றா
    அவியடுவார் அருமறையோ ரறிந்தே னுன்னைப்
    பாடுவார் தும்புருவும் நார தாதி
    பரவுவார் அமரர்களு மமரர் கோனுந்
    தேடுவார் திருமாலும் நான்மு கனுந்
    தீண்டுவார் மலைமகளுங் கங்கை யாளுங்
    கூடுமே நாயடியேன் செய்குற் றேவல்
    குறையுண்டே திருவாரூர் குடிகொண் டீர்க்கே. 6.25.8
    260 நீரூருஞ் செஞ்சடையாய் நெற்றிக் கண்ணாய்
    நிலாத்திங்கள் துண்டத்தாய் நின்னைத் தேடி
    ஓரூரு மொழியாமே ஒற்றித் தெங்கும்
    உலகமெலாந் திரிதந்து நின்னைக் காண்பான்
    தேரூரும் நெடுவீதி பற்றி நின்று
    திருமாலும் நான்முகனுந் தேர்ந்துங் காணா
    தாரூரா ஆரூரா என்கின் றார்கள்
    அமரர்கள்தம் பெருமானே ஆரூ ராயே. 6.25.9
    261 நல்லூரே நன்றாக நட்ட மிட்டு
    நரையேற்றைப் பழையாறே பாய ஏறிப்
    பல்லூரும் பலிதிரிந்து சேற்றூர் மீதே
    பலர்காணத் தலையாலங் காட்டி னூடே
    இல்லார்ந்த பெருவேளூர்த் தளியே பேணி
    இராப்பட்டீச் சரங்கடந்து மணற்கால் புக்கு
    எல்லாருந் தளிச்சாத்தங் குடியிற் காண
    இறைப்பொழுதில் திருவாரூர் புக்கார் தாமே. 6.25.10
    262 கருத்துத்திக் கதநாகங் கையி லேந்திக்
    கருவரைபோற் களியானை கதறக் கையால்
    உரித்தெடுத்துச் சிவந்ததன்றோல் பொருந்த மூடி
    உமையவளை அச்சுறுத்தும் ஒளிகொள் மேனித்
    திருத்துருத்தி திருப்பழனந் திருநெய்த்தானம்
    திருவையா றிடங்கொண்ட செல்வர் இந்நாள்
    அரிப்பெருத்த வெள்ளேற்றை அடர ஏறி
    அப்பனார் இப்பருவ மாரூ ராரே. 6.25.11

    திருச்சிற்றம்பலம்


    6.26 திருவாரூர் - திருத்தாண்டகம்



    திருச்சிற்றம்பலம்

    263 பாதித்தன் திருவுருவிற் பெண்கொண் டானைப்
    பண்டொருகால் தசமுகனை அழுவித் தானை
    வாதித்துத் தடமலரான் சிரங்கொண் டானை
    வன்கருப்புச் சிலைக்காமன் உடலட் டானைச்
    சோதிச்சந் திரன்மேனி மறுச்செய்தானைச்
    சுடரங்கி தேவனையோர் கைக்கொண் டானை
    ஆதித்தன் பற்கொண்ட அம்மான் றன்னை
    ஆரூரிற் கண்டடியேன் அயர்த்த வாறே. 6.26.1
    264 வெற்புறுத்த திருவடியாற் கூற்றட் டானை
    விளக்கினொளி மின்னினொளி முத்தின் சோதி
    ஒப்புறுத்த திருவுருவத் தொருவன் றன்னை
    ஓதாதே வேத முணர்ந்தான் றன்னை
    அப்புறுத்த கடல்நஞ்ச முண்டான் றன்னை
    அமுதுண்டார் உலந்தாலு முலவா தானை
    அப்புறுத்த நீரகத்தே அழலா னானை
    ஆரூரிற் கண்டடியேன் அயர்த்த வாறே. 6.26.2
    265 ஒருகாலத் தொருதேவர் கண்கொண் டானை
    ஊழிதோ றூழி உயர்ந்தான் றன்னை
    வருகாலஞ் செல்கால மாயி னானை
    வன்கருப்புச் சிலைக்காமன் உடலட் டானைப்
    பொருவேழக் களிற்றுரிவைப் போர்வை யானைப்
    புள்ளரைய னுடல்தன்னைப் பொடிசெய் தானை
    அருவேள்வி தகர்த்தெச்சன் றலைகொண் டானை
    ஆரூரிற் கண்டடியேன் அயர்த்த வாறே. 6.26.3
    266 மெய்ப்பால்வெண் ணீறணிந்த மேனி யானை
    வெண்பளிங்கி னுட்பதித்த சோதி யானை
    ஒப்பானை ஒப்பிலா ஒருவன் றன்னை
    உத்தமனை நித்திலத்தை உலக மெல்லாம்
    வைப்பானைக் களைவானை வருவிப் பானை
    வல்வினையேன் மனத்தகத்தே மன்னி னானை
    அப்பாலைக் கப்பாலைக் கப்பா லானை
    ஆரூரிற் கண்டடியேன் அயர்த்த வாறே. 6.26.4
    267 பிண்டத்திற் பிறந்ததொரு பொருளை மற்றைப்
    பிண்டத்தைப் படைத்ததனைப் பெரிய வேதத்
    துண்டத்தின் துணிபொருளைச் சுடுதீ யாகிச்
    சுழல்காலாய் நீராகிப் பாரா யிற்றைக்
    கண்டத்தில் தீதினஞ் சமுது செய்து
    கண்மூன்று படைத்ததொரு கரும்பைப் பாலை
    அண்டத்துக் கப்புறத்தார் தமக்கு வித்தை
    ஆரூரிற் கண்டடியேன் அயர்த்த வாறே. 6.26.5
    268 நீதியாய் நிலனாகி நெருப்பாய் நீராய்
    நிறைகாலாய் இவையிற்றின் நியம மாகிப்
    பாதியாய் ஒன்றாகி இரண்டாய் மூன்றாய்
    பரமாணு வாய்ப்பழுத்த பண்க ளாகிச்
    சோதியாய் இருளாகிச் சுவைக ளாகிச்
    சுவைகலந்த அப்பாலாய் வீடாய் வீட்டின்
    ஆதியாய் அந்தமாய் நின்றான் றன்னை
    ஆரூரிற் கண்டடியேன் அயர்த்த வாறே. 6.26.6
    இப்பதிகத்தில் 7,8,9,10-ம் செய்யுட்கள் 6.26.7-10
    திருச்சிற்றம்பலம்


    6.27 திருவாரூர் - திருத்தாண்டகம்



    திருச்சிற்றம்பலம்

    269 பொய்ம்மாயப் பெருங்கடலிற் புலம்பா நின்ற
    புண்ணியங்காள் தீவினைகாள் திருவே நீங்கள்
    இம்மாயப் பெருங்கடலை அரித்துத் தின்பீர்க்
    கில்லையே கிடந்துதான் யானேல் வானோர்
    தம்மானைத் தலைமகனைத் தண்ண லாரூர்த்
    தடங்கடலைத் தொடர்ந்தோரை யடங்கச் செய்யும்
    எம்மான்ற னடித்தொடர்வான் உழிதர் கின்றேன்
    இடையிலேன் கெடுவீர்காள் இடறேன் மின்னே. 6.27.1
    270 ஐம்பெருமா பூதங்காள் ஒருவீர் வேண்டிற்
    றொருவீர்வேண் டீர்ஈண்டிவ் வவனி யெல்லாம்
    உம்பரமே உம்வசமே ஆக்க வல்லீர்க்
    கில்லையே னுகர்போகம் யானேல் வானோர்
    உம்பருமாய் ஊழியுமாய் உலகே ழாகி
    ஒள்ளாரூர் நள்ளமிர்தாம் வள்ளல் வானோர்
    தம்பெருமா னார்நின்ற அரனைக் காண்பேன்
    தடைப்படுவே னாக்கருதித் தருக்கேன் மின்னே. 6.27.2
    271 சில்லுருவிற் குறியிருத்தி நித்தல் பற்றிச்
    செழுங்கணால் நோக்குமிது வூக்க மன்று
    பல்லுருவிற் றொழில்பூண்ட பஞ்ச பூதப்
    பளகீரும் வசமன்றே பாரே லெல்லாஞ்
    சொல்லுருவிற் சுடர்மூன்றாய் உருவம் மூன்றாய்த்
    தூநயன மூன்றாகி ஆண்ட ஆரூர்
    நல்லுருவிற் சிவனடியே அடைவேன் நும்மால்
    நமைப்புண்ணேன் கமைத்துநீர் நடமின் களே. 6.27.3
    272 உன்னுருவிற் சுவையொளியூ றோசை நாற்றத்
    துறுப்பினது குறிப்பாகும் ஐவீர் நுங்கள்
    மன்னுருவத் தியற்கைளால் வைப்பீர்க் கையோ
    வையகமே போதாதே யானேல் வானோர்
    பொன்னுருவைத் தென்னாரூர் மன்னு குன்றைப்
    புவிக்கெழிலாஞ் சிவக்கொழுந்தைப் புகுந்தென் சிந்தை
    தன்னுருவைத் தந்தவனை எந்தை தன்னைத்
    தலைப்படுவேன் துலைப்படுப்பான் தருக்கேன் மின்னே. 6.27.4
    273 துப்பினைமுன் பற்றறா விறலே மிக்க
    சோர்வுபடு சூட்சியமே சுகமே நீங்கள்
    ஒப்பினையைப் பாவித்திவ் வுலக மெல்லாம்
    உழறுமிது குறைமுடிப்பீர்க் கரிதே என்றன்
    வைப்பினைப்பொன் மதிலாரூர் மணியை வைகல்
    மணாளனையெம் பெருமானை வானோர் தங்கள்
    அப்பனைச்செப் பிடவடைவேன் நும்மால் நானும்
    ஆட்டுணேன் ஓட்டந்தீங் கலையேன் மின்னே. 6.27.5
    274 பொங்குமத மானமே ஆர்வச் செற்றக்
    குரோதமே உலோபமே பொறையே நீங்கள்
    உங்கள்பெரு மாநிலத்தின் எல்லை யெல்லாம்
    உழறுமிது குறைமுடிப்பீர்க் கரிதே யானேல்
    அங்கமலத் தயனொடுமா லாகி மற்றும்
    அதற்கப்பா லொன்றாகி அறிய வொண்ணாச்
    செங்கனகத் தனிக்குன்றைச் சிவனை ஆரூர்ச்
    செல்வனைச்சேர் வேனும்மாற் செலுத்து ணேனே. 6.27.6
    275 இடர்பாவ மெனமிக்க துக்க வேட்கை
    வெறுப்பேயென் றனைவீரும் உலகை யோடிக்
    குடைகின்றீர்க் குலகங்கள் குலுங்கி நுங்கள்
    குறிநின்ற தமையாதே யானேல் வானோர்
    அடையார்தம் புரமூன்று மெரிசெய் தானை
    அமரர்கள்தம் பெருமானை அரனை ஆரூர்
    உடையானைக் கடுகச்சென் றடைவேன் நும்மால்
    ஆட்டுணேன் ஓட்டந்தீங் கலையேன் மின்னே. 6.27.7
    276 விரைந்தாளும் நல்குரவே செல்வே பொல்லா
    வெகுட்சியே மகிழ்ச்சியே வெறுப்பே நீங்கள்
    நிரந்தோடி மாநிலத்தை அரித்துத் தின்பீர்க்
    கில்லையே நுகர்போகம் யானேல் வானோர்
    கரைந்தோட வருநஞ்சை அமுது செய்த
    கற்பகத்தைத் தற்பரத்தைத் திருவா ரூரிற்
    பரஞ்சோதி தனைக்காண்பேன் படேனும் பண்பிற்
    பரிந்தோடி யோட்டந்து பகட்டேன் மின்னே. 6.27.8
    277 மூள்வாய தொழிற்பஞ்சேந் திரிய வஞ்ச
    முகரிகாண் முழுதுமிவ் வுலகை யோடி
    நாள்வாயு நும்முடைய மம்ம ராணை
    நடாத்துகின்றீர்க் கமையாதே யானேல் வானோர்
    நீள்வான முகடதனைத் தாங்கி நின்ற
    நெடுந்தூணைப் பாதாளக் கருவை ஆரூர்
    ஆள்வானைக் கடுகச்சென் றடைவேன் நும்மால்
    ஆட்டுணேன் ஓட்டந்தீங் கலையேன் மின்னே. 6.27.9
    278 சுருக்கமொடு பெருக்கநிலை நீத்தல் பற்றித்
    துப்பறையென் றனைவீரிவ் வுலகை யோடிச்
    செருக்கிமிகை செலுத்தியும் செய்கை வைகல்
    செய்கின்றீர்க் கமையாதே யானேல் மிக்க
    தருக்கிமிக வரையெடுத்த அரக்க னாகந்
    தளரவடி எடுத்தவன்றன் பாடல் கேட்டு
    இரக்கமெழுந் தருளியவெம் பெருமான் பாதத்
    திடையிலேன் கெடுவீர்காள் இடறேன் மின்னே. 6.27.10

    திருச்சிற்றம்பலம்


    6.28 திருவாரூர் - திருத்தாண்டகம்



    திருச்சிற்றம்பலம்

    279 நீற்றினையும் நெற்றிமே லிட்டார் போலும்
    நீங்காமே வெள்ளெலும்பு பூண்டார் போலுங்
    காற்றினையுங் கடிதாக நடந்தார் போலுங்
    கண்ணின்மேற் கண்ணொன் றுடையார் போலுங்
    கூற்றினையுங் குரைகழலா லுதைத்தார் போலுங்
    கொல்புலித்தோ லாடைக் குழகர் போலும்
    ஆற்றினையுஞ் செஞ்சடைமேல் வைத்தார் போலும்
    அணியாரூர்த் திருமூலத் தான னாரே. 6.28.1
    280 பரியதோர் பாம்பரைமே லார்த்தார் போலும்
    பாசுபதம் பார்த்தற் களித்தார் போலுங்
    கரியதோர் களிற்றுரிவை போர்த்தார் போலுங்
    காபாலங் கட்டங்கக் கொடியார் போலும்
    பெரியதோர் மலைவில்லா எய்தார் போலும்
    பேர்நந்தி யென்னும் பெயரார் போலும்
    அரியதோர் அரணங்க ளட்டார் போலும்
    அணியாரூர்த் திருமூலத் தான னாரே. 6.28.2
    281 துணியுடையர் தோலுடைய ரென்பார் போலுந்
    தூய திருமேனிச் செல்வர் போலும்
    பிணியுடைய அடியாரைத் தீர்ப்பார் போலும்
    பேசுவார்க் கெல்லாம் பெரியார் போலும்
    மணியுடைய மாநாக மார்ப்பார் போலும்
    வாசுகிமா நாணாக வைத்தார் போலும்
    அணியுடைய நெடுவீதி நடப்பார் போலும்
    அணியாரூர்த் திருமூலத் தான னாரே. 6.28.3
    282 ஓட்டகத்தே ஊணாக உகந்தார் போலும்
    ஓருருவாய்த் தோன்றி உயர்ந்தார் போலும்
    நாட்டகத்தே நடைபலவும் நவின்றார் போலும்
    ஞானப் பெருங்கடற்கோர் நாதர் போலுங்
    காட்டகத்தே ஆட லுடையார் போலுங்
    காமரங்கள் பாடித் திரிவார் போலும்
    ஆட்டகத்தில் ஆனைந் துகந்தார் போலும்
    அணியாரூர்த் திருமூலத் தான னாரே. 6.28.4
    283 ஏனத் திளமருப்புப் பூண்டார் போலும்
    இமையவர்க ளேத்த இருந்தார் போலுங்
    கானக்கல் லாற்கீழ் நிழலார் போலுங்
    கடல்நஞ்ச முண்டிருண்ட கண்டர் போலும்
    வானத் திளமதிசேர் சடையார் போலும்
    வான்கயிலை வெற்பின் மகிழ்ந்தார் போலும்
    ஆனத்து முன்னெழுந்தாய் நின்றார் போலும்
    அணியாரூர்த் திருமூலத் தான னாரே. 6.28.5
    284 காமனையுங் கரியாகக் காய்ந்தார் போலுங்
    கடல்நஞ்ச முண்டிருண்ட கண்டர் போலுஞ்
    சோமனையுஞ் செஞ்சடைமேல் வைத்தார் போலுஞ்
    சொல்லாகிச் சொற்பொருளாய் நின்றார் போலும்
    நாமனையும் வேதத்தார் தாமே போலும்
    நங்கையோர் பால்மகிழ்ந்த நம்பர் போலும்
    ஆமனையுந் திருமுடியார் தாமே போலும்
    அணியாரூர்த் திருமூலத் தான னாரே. 6.28.6
    285 முடியார் மதியரவம் வைத்தார் போலும்
    மூவுலகுந் தாமேயாய் நின்றார் போலுஞ்
    செடியார் தலைப்பலிகொண் டுழல்வார் போலுஞ்
    செல்கதி தான்கண்ட சிவனார் போலுங்
    கடியார்நஞ் சுண்டிருண்ட கண்டர் போலுங்
    கங்காள வேடக் கருத்தர் போலும்
    அடியார் அடிமை உகப்பார் போலும்
    அணியாரூர்த் திருமூலத் தான னாரே. 6.28.7
    286 இந்திரத்தை இனிதாக ஈந்தார் போலும்
    இமையவர்கள் வந்திறைஞ்சு மிறைவர் போலுஞ்
    சுந்தரத்த பொடிதன்னைத் துதைந்தார் போலுந்
    தூத்தூய திருமேனித் தோன்றல் போலும்
    மந்திரத்தை மனத்துள்ளே வைத்தார் போலும்
    மாநாகம் நாணாக வளைத்தார் போலும்
    அந்திரத்தே அணியாநஞ் சுண்டார் போலும்
    அணியாரூர்த் திருமூலத் தான னாரே. 6.28.8
    287 பிண்டத்தைக் காக்கும் பிரானார் போலும்
    பிறவி யிறவி இலாதார் போலும்
    முண்டத்து முக்கண் ணுடையார் போலும்
    முழுநீறு பூசு முதல்வர் போலுங்
    கண்டத் திறையே கறுத்தார் போலுங்
    காளத்தி காரோணம் மேயார் போலும்
    அண்டத்துக் கப்புறமாய் நின்றார் போலும்
    அணியாரூர்த் திருமூலத் தான னாரே. 6.28.9
    288 ஒருகாலத் தொன்றாகி நின்றார் போலும்
    ஊழி பலகண் டிருந்தார் போலும்
    பெருகாமே வெள்ளந் தவிர்த்தார் போலும்
    பிறப்பிடும்பை சாக்காடொன் றில்லார் போலும்
    உருகாதார் உள்ளத்து நில்லார் போலும்
    உகப்பார்தம் மனத்தென்றும் நீங்கார் போலும்
    அருகாக வந்தென்னை அஞ்ச லென்பார்
    அணியாரூர்த் திருமூலத் தான னாரே. 6.28.10
    289 நன்றாக நடைபலவும் நவின்றார் போலும்
    ஞானப் பெருங்கடற்கோர் நாதர் போலுங்
    கொன்றாகிக் கொன்றதொன் றுண்டார் போலுங்
    கோளரக்கர் கோன்றலைகள் குறைத்தார் போலுஞ்
    சென்றார் திரிபுரங்க ளெய்தார் போலுந்
    திசையனைத்து மாயனைத்து மானார் போலும்
    அன்றாகில் ஆயிரம் பேரார் போலும்
    அணியாரூர்த் திருமூலத் தான னாரே. 6.28.11

    திருச்சிற்றம்பலம்


    6.29 திருவாரூர் - திருத்தாண்டகம்



    திருச்சிற்றம்பலம்

    290 திருமணியைத் தித்திக்குந் தேனைப் பாலைத்
    தீங்கரும்பின் இன்சுவையைத் தெளிந்த தேறற்
    குருமணியைக் குழல்மொந்தை தாளம் வீணை
    கொக்கரையின் சச்சரியின் பாணி யானைப்
    பருமணியைப் பவளத்தைப் பசும்பொன் முத்தைப்
    பருப்பதத்தி லருங்கலத்தைப் பாவந் தீர்க்கும்
    அருமணியை ஆரூரி லம்மான் றன்னை
    அறியா தடிநாயேன் அயர்த்த வாறே. 6.29.1
    291 பொன்னேபோற் றிருமேனி உடையான் றன்னைப்
    பொங்குவெண் ணூலானைப் புனிதன் றன்னை
    மின்னானை மின்னிடையாள் பாகன் றன்னை
    வேழத்தி னுரிவிரும்பிப் போர்த்தான் றன்னைத்
    தன்னானைத் தன்னொப்பா ரில்லா தானைத்
    தத்துவனை உத்தமனைத் தழல்போல் மேனி
    அன்னானை ஆரூரி லம்மான் றன்னை
    அறியா தடிநாயேன் அயர்த்த வாறே. 6.29.2
    292 ஏற்றானை ஏழுலகு மானான் றன்னை
    ஏழ்கடலு மேழ்மலையு மானான் றன்னைக்
    கூற்றானைக் கூற்ற முதைத்தான் றன்னைக்
    கொடுமழுவாள் கொண்டதோர் கையான் றன்னைக்
    காற்றானைத் தீயானை நீரு மாகிக்
    கடிகமழும் புன்சடைமேற் கங்கை வெள்ள
    ஆற்றானை ஆரூரி லம்மான் றன்னை
    அறியா தடிநாயேன் அயர்த்த வாறே. 6.29.3
    293 முந்திய வல்வினைகள் தீர்ப்பான் றன்னை
    மூவாத மேனிமுக் கண்ணி னானைச்
    சந்திரனும் வெங்கதிரு மாயி னானைச்
    சங்கரனைச் சங்கக் குழையான் றன்னை
    மந்திரமும் மறைப்பொருளு மானான் றன்னை
    மறுமையு மிம்மையு மானான் றன்னை
    அந்திரனை ஆரூரி லம்மான் றன்னை
    அறியா தடிநாயேன் அயர்த்த வாறே. 6.29.4
    294 பிறநெறியாய்ப் பீடாகிப் பிஞ்ஞ கனுமாய்ப்
    பித்தனாய்ப் பத்தர் மனத்தி னுள்ளே
    உறநெறியாய் ஓமமாய் ஈமக் காட்டில்
    ஓரிபல விடநட்ட மாடி னானைத்
    துறநெறியாய்த் தூபமாய்த் தோற்ற மாகி
    நாற்றமாய் நன்மலர்மே லுறையா நின்ற
    அறநெறியை ஆரூரி லம்மான் றன்னை
    அறியா தடிநாயேன் அயர்த்த வாறே. 6.29.5
    295 பழகிய வல்வினைகள் பாற்று வானைப்
    பசுபதியைப் பாவகனைப் பாவந் தீர்க்குங்
    குழகனைக் கோளரவொன் றாட்டு வானைக்
    கொடுகொட்டி கொண்டதோர் கையான் றன்னை
    விழவனை வீரட்ட மேவி னானை
    விண்ணவர்க ளேத்தி விரும்பு வானை
    அழகனை ஆரூரி லம்மான் றன்னை
    அறியா தடிநாயேன் அயர்த்த வாறே. 6.29.6
    296 சூளா மணிசேர் முடியான் றன்னைச்
    சுண்ணவெண் ணீறணிந்த சோதி யானைக்
    கோள்வா யரவ மசைத்தான் றன்னைக்
    கொல்புலித்தோ லாடைக் குழகன் றன்னை
    நாள்வாயும் பத்தர் மனத்து ளானை
    நம்பனை நக்கனை முக்க ணானை
    ஆள்வானை ஆரூரி லம்மான் றன்னை
    அறியா தடிநாயேன் அயர்த்த வாறே. 6.29.7
    297 முத்தினை மணிதன்னை மாணிக் கத்தை
    மூவாத கற்பகத்தின் கொழுந்து தன்னைக்
    கொத்தினை வயிரத்தைக் கொல்லே றூர்ந்து
    கோளரவொன் றாட்டுங் குழகன் றன்னைப்
    பத்தனைப் பத்தர் மனத்து ளானைப்
    பரிதிபோற் றிருமேனி உடையான் றன்னை
    அத்தனை ஆரூரி லம்மான் றன்னை
    அறியா தடிநாயேன் அயர்த்த வாறே. 6.29.8
    298 பையா டரவங்கை யேந்தி னானைப்
    பரிதிபோற் றிருமேனிப் பால்நீற் றானை
    நெய்யாடு திருமேனி நிமலன் றன்னை
    நெற்றிமேல் மற்றொருகண் நிறைவித் தானைச்
    செய்யானைச் செழும்பவளத் திரளொப் பானைச்
    செஞ்சடைமேல் வெண்டிங்கள் சேர்த்தி னானை
    ஐயாறு மேயானை ஆரூ ரானை
    அறியா தடிநாயேன் அயர்த்த வாறே. 6.29.9
    299 சீரார் முடிபத் துடையான் றன்னைத்
    தேசழியத் திருவிரலாற் சிதைய நூக்கிப்
    பேரார் பெருமை கொடுத்தான் றன்னைப்
    பெண்ணிரண்டு மாணுமாய் நின்றான் றன்னைப்
    போரார் புரங்கள் புரள நூறும்
    புண்ணியனை வெண்ணீ றணிந்தான் றன்னை
    ஆரானை ஆரூரி லம்மான் றன்னை
    அறியா தடிநாயேன் அயர்த்த வாறே. 6.29.10

    திருச்சிற்றம்பலம்


    6.30 திருவாரூர் - திருத்தாண்டகம்



    திருச்சிற்றம்பலம்

    300 எம்பந்த வல்வினைநோய் தீர்த்திட் டான்காண்
    ஏழ்கடலு மேழுலகு மாயி னான்காண்
    வம்புந்து கொன்றையந்தார் மாலை யான்காண்
    வளர்மதிசேர் கண்ணியன்காண் வானோர் வேண்ட
    அம்பொன்றால் மூவெயிலு மெரிசெய் தான்காண்
    அனலாடி யானஞ்சு மாடி னான்காண்
    செம்பொன்செய் மணிமாடத் திருவா ரூரிற்
    றிருமூலத் தானத்தெஞ் செல்வன் றானே. 6.30.1
    301 அக்குலாம் அரையினன்காண் அடியார்க் கென்றும்
    ஆரமுதாய் அண்ணிக்கும் ஐயாற் றான்காண்
    கொக்குலாம் பீலியொடு கொன்றை மாலை
    குளிர்மதியுங் கூரரவும் நீருஞ் சென்னித்
    தொக்குலாஞ் சடையினன்காண் தொண்டர் சொல்லுந்
    தூநெறிகாண் வானவர்கள் துதிசெய் தேத்துந்
    திக்கெலாம் நிறைந்தபுகழ்த் திருவா ரூரிற்
    றிருமூலத் தானத்தெஞ் செல்வன் றானே. 6.30.2
    302 நீரேறு சடைமுடியெந் நிமலன் றான்காண்
    நெற்றிமே லொற்றைக்கண் நிறைவித் தான்காண்
    வாரேறு வனமுலையாள் பாகத் தான்காண்
    வளர்மதிசேர் சடையான்காண் மாதே வன்காண்
    காரேறு முகிலனைய கண்டத் தான்காண்
    கல்லாலின் கீழறங்கள் சொல்லி னான்காண்
    சீரேறு மணிமாடத் திருவா ரூரிற்
    றிருமூலத் தானத்தெஞ் செல்வன் றானே. 6.30.3
    303 கானேறு களிற்றுரிவைப் போர்வை யான்காண்
    கற்பகங்காண் காலனையன் றுதைசெய் தான்காண்
    ஊனேறு முடைதலையிற் பலிகொள் வான்காண்
    உத்தமன்காண் ஒற்றியூர் மேவி னான்காண்
    ஆனேறொன் றதுவேறும் அண்ணல் தான்காண்
    ஆதித்தன் பல்லிறுத்த ஆதி தான்காண்
    தேனேறு மலர்ச்சோலைத் திருவா ரூரிற்
    றிருமூலத் தானத்தெஞ் செல்வன் றானே. 6.30.4
    304 பிறப்போ டிறப்பென்று மில்லா தான்காண்
    பெண்ணுருவோ டாணுருவ மாயி னான்காண்
    மறப்படுமென் சிந்தைமருள் நீக்கி னான்காண்
    வானவரு மறியாத நெறிதந் தான்காண்
    நறப்படுபூ மலர்தூபந் தீப நல்ல
    நறுஞ்சாந்தங் கொண்டேத்தி நாளும் வானோர்
    சிறப்போடு பூசிக்குந் திருவா ரூரிற்
    றிருமூலத் தானத்தெஞ் செல்வன் றானே. 6.30.5
    305 சங்கரன்காண் சக்கரமாற் கருள்செய் தான்காண்
    தருணேந்து சேகரன்காண் தலைவன் றான்காண்
    அங்கமலத் தயன்சிரங்கள் ஐந்தி லொன்றை
    அறுத்தவன்காண் அணிபொழில்சூழ் ஐயாற் றான்காண்
    எங்கள்பெரு மான்காணென் னிடர்கள் போக
    அருள்செய்யும் இறைவன்காண் இமையோ ரேத்துஞ்
    செங்கமல வயல்புடைசூழ் திருவா ரூரிற்
    றிருமூலத் தானத்தெஞ் செல்வன் றானே. 6.30.6
    306 நன்றருளித் தீதகற்றும் நம்பி ரான்காண்
    நான்மறையோ டாறங்க மாயி னான்காண்
    மின்றிகழுஞ் சோதியன்காண் ஆதி தான்காண்
    வெள்ளேறு நின்றுலவு கொடியி னான்காண்
    துன்றுபொழிற் கச்சியே கம்பன் றான்காண்
    சோற்றுத் துறையான்காண் சோலை சூழ்ந்த
    தென்றலார் மணங்கமழுந் திருவா ரூரிற்
    றிருமூலத் தானத்தெஞ் செல்வன் றானே. 6.30.7
    307 பொன்னலத்த நறுங்கொன்றைச் சடையி னான்காண்
    புகலூரும் பூவணமும் பொருந்தி னான்காண்
    மின்னலத்த நுண்ணிடையாள் பாகத் தான்காண்
    வேதியன்காண் வெண்புரிநூல் மார்பி னான்காண்
    கொன்னலத்த மூவிலைவேல் ஏந்தி னான்காண்
    கோலமா நீறணிந்த மேனி யான்காண்
    செந்நலத்த வயல்புடைசூழ் திருவா ரூரிற்
    றிருமூலத் தானத்தெஞ் செல்வன் றானே. 6.30.8
    308 விண்டவர்தம் புரமூன்று மெரிசெய் தான்காண்
    வேலைவிட முண்டிருண்ட கண்டத் தான்காண்
    மண்டலத்தி லொளிவளர விளங்கி னான்காண்
    வாய்மூரும் மறைக்காடும் மருவி னான்காண்
    புண்டரிகக் கண்ணானும் பூவின் மேலைப்
    புத்தேளுங் காண்பரிய புராணன் றான்காண்
    தெண்டிரைநீர் வயற்புடைசூழ் திருவா ரூரிற்
    றிருமூலத் தானத்தெஞ் செல்வன் றானே. 6.30.9
    309 செருவளருஞ் செங்கண்மா லேற்றி னான்காண்
    தென்னானைக் காவன்காண் தீயில் வீழ
    மருவலர்தம் புரமூன்று மெரிசெய் தான்காண்
    வஞ்சகர்பா லணுகாத மைந்தன் றான்காண்
    அருவரையை எடுத்தவன்றன் சிரங்கள் பத்தும்
    ஐந்நான்கு தோளுநெரிந் தலற வன்று
    திருவிரலா லடர்த்தவன்காண் திருவா ரூரிற்
    றிருமூலத் தானத்தெஞ் செல்வன் றானே. 6.30.10

    திருச்சிற்றம்பலம்


    6.31 திருவாரூர் - திருத்தாண்டகம்



    திருச்சிற்றம்பலம்

    310 இடர்கெடுமா றெண்ணுதியேல் நெஞ்சே நீவா
    ஈண்டொளிசேர் கங்கைச் சடையா யென்றுஞ்
    சுடரொளியா யுள்விளங்கு சோதி யென்றுந்
    தூநீறு சேர்ந்திலங்கு தோளா வென்றுங்
    கடல்விடம துண்டிருண்ட கண்டா வென்றுங்
    கலைமான் மறியேந்து கையா வென்றும்
    அடல்விடையாய் ஆரமுதே ஆதி யென்றும்
    ஆரூரா வென்றென்றே அலறா நில்லே. 6.31.1
    311 செடியேறு தீவினைகள் தீரும் வண்ணஞ்
    சிந்தித்தே நெஞ்சமே திண்ண மாகப்
    பொடியேறு திருமேனி யுடையா யென்றும்
    புரந்தரன்றன் தோள்துணித்த புனிதா வென்றும்
    அடியேனை யாளாகக் கொண்டா யென்றும்
    அம்மானே ஆரூரெம் மரசே யென்றுங்
    கடிநாறு பொழிற்கச்சிக் கம்பா வென்றுங்
    கற்பகமே யென்றென்றே கதறா நில்லே. 6.31.2
    312 நிலைபெறுமா றெண்ணுதியேல் நெஞ்சே நீவா
    நித்தலுமெம் பிரானுடைய கோயில் புக்குக்
    புலர்வதன்முன் னலகிட்டு மெழுக்கு மிட்டுப்
    பூமாலை புனைந்தேத்திப் புகழ்ந்து பாடித்
    தலையாரக் கும்பிட்டுக் கூத்து மாடிச்
    சங்கரா சயபோற்றி போற்றி யென்றும்
    அலைபுனல்சேர் செஞ்சடையெம் ஆதி யென்றும்
    ஆரூரா வென்றென்றே அலறா நில்லே. 6.31.3
    313 புண்ணியமும் நன்னெறியு மாவ தெல்லாம்
    நெஞ்சமே இதுகண்டாய் பொருந்தக் கேள்நீ
    நுண்ணியவெண் ணூல்கிடந்த மார்பா வென்றும்
    நுந்தாத வொண்சுடரே யென்று நாளும்
    விண்ணியங்கு தேவர்களும் வேதம் நான்கும்
    விரைமலர்மேல் நான்முகனும் மாலுங் கூடி
    எண்ணரிய திருநாம முடையா யென்றும்
    எழிலாரூ ராவென்றே ஏத்தா நில்லே. 6.31.4
    314 இழைத்தநாள் எல்லை கடப்ப தென்றால்
    இரவினொடு நண்பகலு மேத்தி வாழ்த்திப்
    பிழைத்ததெலாம் பொறுத்தருள்செய் பெரியோ யென்றும்
    பிஞ்ஞகனே மைஞ்ஞவிலுங் கண்டா வென்றும்
    அழைத்தலறி அடியேனுன் னரணங் கண்டாய்
    அணியாரூர் இடங்கொண்ட அழகா வென்றுங்
    குழற்சடையெங் கோனென்றுங் கூறு நெஞ்சே
    குற்றமில்லை யென்மேல்நான் கூறி னேனே. 6.31.5
    315 நீப்பரிய பல்பிறவி நீக்கும் வண்ணம்
    நினைந்திருந்தேன் காண்நெஞ்சே நித்த மாகச்
    சேப்பிரியா வெல்கொடியி னானே யென்றுஞ்
    சிவலோக நெறிதந்த சிவனே யென்றும்
    பூப்பிரியா நான்முகனும் புள்ளின் மேலைப்
    புண்டரிகக் கண்ணானும் போற்றி யென்னத்
    தீப்பிழம்பாய் நின்றவனே செல்வ மல்குந்
    திருவாரூ ராவென்றே சிந்தி நெஞ்சே. 6.31.6
    316 பற்றிநின்ற பாவங்கள் பாற்ற வேண்டிற்
    பரகதிக்குச் செல்வதொரு பரிசு வேண்டிற்
    சுற்றிநின்ற சூழ்வினைகள் வீழ்க்க வேண்டிற்
    சொல்லுகேன் கேள்நெஞ்சே துஞ்சா வண்ணம்
    உற்றவரும் உறுதுணையும் நீயே யென்றும்
    உன்னையல்லால் ஒருதெய்வம் உள்கே னென்றும்
    புற்றரவக் கச்சார்த்த புனிதா வென்றும்
    பொழிலாரூ ராவென்றே போற்றா நில்லே. 6.31.7
    317 மதிதருவன் நெஞ்சமே உஞ்சு போக
    வழியாவ திதுகண்டாய் வானோர்க் கெல்லாம்
    அதிபதியே ஆரமுதே ஆதி யென்றும்
    அம்மானே ஆரூரெம் மையா வென்றுந்
    துதிசெய்து துன்றுமலர் கொண்டு தூவிச்
    சூழும் வலஞ்செய்து தொண்டு பாடிக்
    கதிர்மதிசேர் சென்னியனே கால காலா
    கற்பகமே யென்றென்றே கதறா நில்லே. 6.31.8
    318 பாசத்தைப் பற்றறுக்க லாகு நெஞ்சே
    பரஞ்சோதி பண்டரங்கா பாவ நாசா
    தேசத் தொளிவிளக்கே தேவ தேவே
    திருவாரூர்த் திருமூலத் தானா வென்றும்
    நேசத்தை நீபெருக்கி நேர்நின் றுள்கி

    நித்தலுஞ் சென்றடிமேல் வீழ்ந்து நின்று
    ஏசற்று நின்றிமையோ ரேறே வென்றும்
    எம்பெருமா னென்றென்றே ஏத்தா நில்லே. 6.31.9
    319 புலன்களைந்தால் ஆட்டுண்டு போது போக்கிப்
    புறம்புறமே திரியாதே போது நெஞ்சே
    சலங்கொள்சடை முடியுடைய தலைவா வென்றுந்
    தக்கன்செய் பெருவேள்வி தகர்த்தா யென்றும்
    இலங்கையர்கோன் சிரநெரித்த இறைவா வென்றும்
    எழிலாரூ ரிடங்கொண்ட எந்தா யென்றும்
    நலங்கொளடி என்றலைமேல் வைத்தா யென்றும்
    நாடோ றும் நவின்றேத்தாய் நன்மை யாமே. 6.31.10

    திருச்சிற்றம்பலம்


    6.32 திருவாரூர் - போற்றித்திருத்தாண்டகம்



    திருச்சிற்றம்பலம்

    320 கற்றவர்க ளுண்ணுங் கனியே போற்றி
    கழலடைந்தார் செல்லுங் கதியே போற்றி
    அற்றவர்கட் காரமுத மானாய் போற்றி
    அல்லலறுத் தடியேனை ஆண்டாய் போற்றி
    மற்றொருவ ரொப்பில்லா மைந்தா போற்றி
    வானவர்கள் போற்றும் மருந்தே போற்றி
    செற்றவர்தம் புரமெரித்த சிவனே போற்றி
    திருமூலத் தானனே போற்றி போற்றி. 6.32.1
    321 வங்கமலி கடல்நஞ்ச முண்டாய் போற்றி
    மதயானை ஈருரிவை போர்த்தாய் போற்றி
    கொங்கலரும் நறுங்கொன்றைத் தாராய் போற்றி
    கொல்புலித்தோ லாடைக் குழகா போற்றி
    அங்கணனே அமரர்கள்தம் இறைவா போற்றி
    ஆலமர நீழலறஞ் சொன்னாய் போற்றி
    செங்கனகத் தனிக்குன்றே சிவனே போற்றி
    திருமூலத் தானனே போற்றி போற்றி. 6.32.2
    322 மலையான் மடந்தை மணாளா போற்றி
    மழவிடையாய் நின்பாதம் போற்றி போற்றி
    நிலையாக என்னெஞ்சில் நின்றாய் போற்றி
    நெற்றிமே லொற்றைக்கண் ணுடையாய் போற்றி
    இலையார்ந்த மூவிலைவே லேந்தி போற்றி
    ஏழ்கடலு மேழ்பொழிலு மானாய் போற்றி
    சிலையாலன் றெயிலெரித்த சிவனே போற்றி
    திருமூலத் தானனே போற்றி போற்றி. 6.32.3
    323 பொன்னியலும் மேனியனே போற்றி போற்றி
    பூதப் படையுடையாய் போற்றி போற்றி
    மன்னியசீர் மறைநான்கு மானாய் போற்றி
    மறியேந்து கையானே போற்றி போற்றி
    உன்னுமவர்க் குண்மையனே போற்றி போற்றி
    உலகுக் கொருவனே போற்றி போற்றி
    சென்னிமிசை வெண்பிறையாய் போற்றி போற்றி
    திருமூலத் தானனே போற்றி போற்றி. 6.32.4
    324 நஞ்சுடைய கண்டனே போற்றி போற்றி
    நற்றவனே நின்பாதம் போற்றி போற்றி
    வெஞ்சுடரோன் பல்லிறுத்த வேந்தே போற்றி
    வெண்மதியங் கண்ணி விகிர்தா போற்றி
    துஞ்சிருளி லாட லுகந்தாய் போற்றி
    தூநீறு மெய்க்கணிந்த சோதி போற்றி
    செஞ்சடையாய் நின்பாதம் போற்றி போற்றி
    திருமூலத் தானனே போற்றி போற்றி. 6.32.5
    325 சங்கரனே நின்பாதம் போற்றி போற்றி
    சதாசிவனே நின்பாதம் போற்றி போற்றி
    பொங்கரவா நின்பாதம் போற்றி போற்றி
    புண்ணியனே நின்பாதம் போற்றி போற்றி
    அங்கமலத் தயனோடு மாலுங் காணா
    அனலுருவா நின்பாதம் போற்றி போற்றி
    செங்கமலத் திருப்பாதம் போற்றி போற்றி
    திருமூலத் தானனே போற்றி போற்றி. 6.32.6
    326 வம்புலவு கொன்றைச் சடையாய் போற்றி
    வான்பிறையும் வாளரவும் வைத்தாய் போற்றி
    கொம்பனைய நுண்ணிடையாள் கூறா போற்றி
    குரைகழலாற் கூற்றுதைத்த கோவே போற்றி
    நம்புமவர்க் கரும்பொருளே போற்றி போற்றி
    நால்வேத மாறங்க மானாய் போற்றி
    செம்பொனே மரகதமே மணியே போற்றி
    திருமூலத் தானனே போற்றி போற்றி. 6.32.7
    327 உள்ளமாய் உள்ளத்தே நின்றாய் போற்றி
    உகப்பார் மனத்தென்றும் நீங்காய் போற்றி
    வள்ளலே போற்றி மணாளா போற்றி
    வானவர்கோன் தோள்துணித்த மைந்தா போற்றி
    வெள்ளையே றேறும் விகிர்தா போற்றி
    மேலோர்க்கு மேலோர்க்கு மேலாய் போற்றி
    தெள்ளுநீர்க் கங்கைச் சடையாய் போற்றி
    திருமூலத் தானனே போற்றி போற்றி. 6.32.8
    328 பூவார்ந்த சென்னிப் புனிதா போற்றி
    புத்தேளிர் போற்றும் பொருளே போற்றி
    தேவார்ந்த தேவர்க்குந் தேவே போற்றி
    திருமாலுக் காழி யளித்தாய் போற்றி
    சாவாமே காத்தென்னை யாண்டாய் போற்றி
    சங்கொத்த நீற்றெஞ் சதுரா போற்றி
    சேவார்ந்த வெல்கொடியாய் போற்றி போற்றி
    திருமூலத் தானனே போற்றி போற்றி. 6.32.9
    329 பிரமன்றன் சிரமரிந்த பெரியோய் போற்றி
    பெண்ணுருவோ டாணுருவாய் நின்றாய் போற்றி
    கரநான்கும் முக்கண்ணு முடையாய் போற்றி
    காதலிப்பார்க் காற்ற எளியாய் போற்றி
    அருமந்த தேவர்க் கரசே போற்றி
    அன்றரக்கன் ஐந்நான்கு தோளுந் தாளுஞ்
    சிரம்நெரித்த சேவடியாய் போற்றி போற்றி
    திருமூலத் தானனே போற்றி போற்றி. 6.32.10

    திருச்சிற்றம்பலம்


    6.33 திருவாரூர் - அரநெறிதிருத்தாண்டகம்



    திருச்சிற்றம்பலம்

    330 பொருங்கைமதக் கரியுரிவைப் போர்வை யானைப்
    பூவணமும் வலஞ்சுழியும் பொருந்தி னானைக்
    கரும்புதரு கட்டியையின் னமிர்தைத் தேனைக்
    காண்பரிய செழுஞ்சுடரைக் கனகக் குன்றை
    இருங்கனக மதிலாரூர் மூலத் தானத்
    தெழுந்தருளி யிருந்தானை இமையோ ரேத்தும்
    அருந்தவனை அரநெறியி லப்பன் றன்னை
    அடைந்தடியேன் அருவினைநோய் அறுத்த வாறே. 6.33.1
    331 கற்பகமும் இருசுடரு மாயி னானைக்
    காளத்தி கயிலாய மலையு ளானை
    விற்பயிலும் மதனழிய விழித்தான் றன்னை
    விசயனுக்கு வேடுவனாய் நின்றான் றன்னைப்
    பொற்பமரும் பொழிலாரூர் மூலத் தானம்
    பொருந்தியவெம் பெருமானைப் பொருந்தார் சிந்தை
    அற்புதனை அரநெறியி லப்பன் றன்னை
    அடைந்தடியேன் அருவினைநோய் அறுத்த வாறே. 6.33.2
    332 பாதியொரு பெண்முடிமேற் கங்கை யானைப்
    பாசூரும் பரங்குன்றும் மேயான் றன்னை
    வேதியனைத் தன்னடியார்க் கெளியான் றன்னை
    மெய்ஞ்ஞான விளக்கானை விரையே நாறும்
    போதியலும் பொழிலாரூர் மூலத் தானம்
    புற்றிடங்கொண் டிருந்தானைப் போற்றுவார்கள்
    ஆதியனை அரநெறியி லப்பன் றன்னை
    அடைந்தடியேன் அருவினைநோய் அறுத்த வாறே. 6.33.3
    333 நந்திபணி கொண்டருளும் நம்பன் றன்னை
    நாகேச் சரமிடமா நண்ணி னானைச்
    சந்திமல ரிட்டணிந்து வானோ ரேத்துந்
    தத்துவனைச் சக்கரமாற் கீந்தான் றன்னை
    இந்துநுழை பொழிலாரூர் மூலத் தானம்
    இடங்கொண்ட பெருமானை இமையோர் போற்றும்
    அந்தணனை அரநெறியி லப்பன் றன்னை
    அடைந்தடியேன் அருவினைநோய் அறுத்த வாறே. 6.33.4
    334 சுடர்ப்பவளத் திருமேனி வெண்ணீற் றானைச்
    சோதிலிங்கத் தூங்கானை மாடத் தானை
    விடக்கிடுகா டிடமாக உடையான் றன்னை
    மிக்கரண மெரியூட்ட வல்லான் றன்னை
    மடற்குலவு பொழிலாரூர் மூலத் தானம்
    மன்னியவெம் பெருமானை மதியார் வேள்வி
    அடர்த்தவனை அரநெறியி லப்பன் றன்னை
    அடைந்தடியேன் அருவினைநோய் அறுத்த வாறே. 6.33.5
    335 தாயவனை எவ்வுயிர்க்குந் தன்னொப் பில்லாத்
    தகுதில்லை நடம்பயிலுந் தலைவன் றன்னை
    மாயவனும் மலரவனும் வானோ ரேத்த
    மறிகடல்நஞ் சுண்டுகந்த மைந்தன் றன்னை
    மேயவனைப் பொழிலாரூர் மூலத் தானம்
    விரும்பியஎம் பெருமானை யெல்லாம் முன்னே
    ஆயவனை அரநெறியி லப்பன் றன்னை
    அடைந்தடியேன் அருவினைநோய் அறுத்த வாறே. 6.33.6
    336 பொருளியல்நற் சொற்பதங்க ளாயி னானைப்
    புகலூரும் புறம்பயமும் மேயான் றன்னை
    மருளியலுஞ் சிந்தையர்க்கு மருந்து தன்னை
    மறைக்காடுஞ் சாய்க்காடும் மன்னி னானை
    இருளியல்நற் பொழிலாரூர் மூலத் தானத்
    தினிதமரும் பெருமானை இமையோ ரேத்த
    அருளியனை அரநெறியி லப்பன் றன்னை
    அடைந்தடியேன் அருவினைநோய் அறுத்த வாறே. 6.33.7
    337 காலனைக்கா லாற்காய்ந்த கடவுள் தன்னைக்
    காரோணங் கழிப்பாலை மேயான் றன்னைப்
    பாலனுக்குப் பாற்கடலன் றீந்தான் றன்னைப்
    பணியுகந்த அடியார்கட் கினியான் றன்னைச்
    சேலுகளும் வயலாரூர் மூலத் தானஞ்
    சேர்ந்திருந்த பெருமானைப் பவள மீன்ற
    ஆலவனை அரநெறியி லப்பன் றன்னை
    அடைந்தடியேன் அருவினைநோய் அறுத்த வாறே. 6.33.8
    338 ஒப்பொருவ ரில்லாத ஒருவன் றன்னை
    ஓத்தூரும் உறையூரும் மேவி னானை
    வைப்பவனை மாணிக்கச் சோதி யானை
    மாருதமுந் தீவெளிநீர் மண்ணா னானை
    மெய்ப்பொருளாய் அடியேன துள்ளே நின்ற
    வினையிலியைத் திருமூலத் தானம் மேய
    அப்பொன்னை அரநெறியி லப்பன் றன்னை
    அடைந்தடியேன் அருவினைநோய் அறுத்த வாறே.
    இச்செய்யுளின் பின்னிரு அடிகள் பிற பதிப்புகளில்
    காணப்படவில்லை. 6.33.9
    339 பகலவன்றன் பல்லுகுத்த படிறன் றன்னைப்
    பராய்த்துறைபைஞ் ஞீலியிடம் பாவித் தானை
    இகலவனை இராவணனை இடர்செய் தானை
    ஏத்தாதார் மனத்தகத்துள் இருளா னானைப்
    புகழ்நிலவு பொழிலாரூர் மூலத் தானம்
    பொருந்தியவெம் பெருமானைப் போற்றார் சிந்தை
    அகலவனை அரநெறியி லப்பன் றன்னை
    அடைந்தடியேன் அருவினைநோய் அறுத்த வாறே. 6.33.10

    திருச்சிற்றம்பலம்


    6.34 திருவாரூர் - திருத்தாண்டகம்


    திருச்சிற்றம்பலம்

    340 ஒருவனாய் உலகேத்த நின்ற நாளோ
    ஓருருவே மூவுருவ மான நாளோ
    கருவனாய்க் காலனைமுன் காய்ந்த நாளோ
    காமனையுங் கண்ணழலால் விழித்த நாளோ
    மருவனாய் மண்ணும்விண்ணுந் தெரித்த நாளோ
    மான்மறிக்கை யேந்தியோர் மாதோர் பாகந்
    திருவினாள் சேர்வதற்கு முன்னோ பின்னோ
    திருவாரூர் கோயிலாக் கொண்ட நாளே. 6.34.1
    341 மலையார்பொற் பாவையொடு மகிழ்ந்த நாளோ
    வானவரை வலியமுத மூட்டி யந்நாள்
    நிலைபேறு பெறுவித்து நின்ற நாளோ
    நினைப்பரிய தழற்பிழம்பாய் நிமிர்ந்த நாளோ
    அலைசாமே அலைகடல்நஞ் சுண்ட நாளோ
    அமரர்கணம் புடைசூழ இருந்த நாளோ
    சிலையால்முப் புரமெரித்த முன்னோ பின்னோ
    திருவாரூர் கோயிலாக் கொண்ட நாளே. 6.34.2
    342 பாடகஞ்சேர் மெல்லடிநற் பாவை யாளும்
    நீயும்போய்ப் பார்த்தனது பலத்தைக் காண்பான்
    வேடனாய் வில்வாங்கி யெய்த நாளோ
    விண்ணவர்க்குங் கண்ணவனாய் நின்ற நாளோ
    மாடமொடு மாளிகைகள் மல்கு தில்லை
    மணிதிகழும் அம்பலத்தே மன்னிக் கூத்தை
    ஆடுவான் புகுவதற்கு முன்னோ பின்னோ
    அணியாரூர் கோயிலாக் கொண்ட நாளே. 6.34.3
    343 ஓங்கி யுயர்ந்தெழுந்து நின்ற நாளோ
    ஓருகம்போல் ஏழுகமாய் நின்ற நாளோ
    தாங்கியசீர்த் தலையான வானோர் செய்த
    தக்கன்றன் பெருவேள்வி தகர்த்த நாளோ
    நீங்கியநீர்த் தாமரையான் நெடுமா லோடு
    நில்லாயெம் பெருமானே யென்றங் கேத்தி
    வாங்கிமதி வைப்பதற்கு முன்னோ பின்னோ
    வளராரூர் கோயிலாக் கொண்ட நாளே. 6.34.4
    344 பாலனாய் வளர்ந்திலாப் பான்மை யானே
    பணிவார்கட் கங்கங்கே பற்றா னானே
    நீலமா மணிகண்டத் தெண்டோ ளானே
    நெருநலையாய் இன்றாகி நாளை யாகுஞ்
    சீலமே சிவலோக நெறியே யாகுஞ்
    சீர்மையே கூர்மையே குணமே நல்ல
    கோலம்நீ கொள்வதற்கு முன்னோ பின்னோ
    குளிராரூர் கோயிலாக் கொண்ட நாளே. 6.34.5
    345 திறம்பலவும் வழிகாட்டிச் செய்கை காட்டிச்
    சிறியையாய்ப் பெரியையாய் நின்ற நாளோ
    மறம்பலவு முடையாரை மயக்கந் தீர்த்து
    மாமுனிவர்க் கருள்செய்தங் கிருந்த நாளோ
    பிறங்கியசீர்ப் பிரமன்றன் தலைகை யேந்திப்
    பிச்சையேற் றுண்டுழன்று நின்ற நாளோ
    அறம்பலவு முரைப்பதற்கு முன்னோ பின்னோ
    அணியாரூர் கோயிலாக் கொண்ட நாளே. 6.34.6
    346 நிலந்தரத்து நீண்டுருவ மான நாளோ
    நிற்பனவும் நடப்பனவும் நீயே யாகிக்
    கலந்துரைக்கக் கற்பகமாய் நின்ற நாளோ
    காரணத்தால் நாரணனைக் கற்பித் தன்று
    வலஞ்சுருக்கி வல்லசுரர் மாண்டு வீழ
    வாசுகியை வாய்மடுத்து வானோ ருய்யச்
    சலந்தரனைக் கொல்வதற்கு முன்னோ பின்னோ
    தண்ணாரூர் கோயிலாக் கொண்ட நாளே. 6.34.7
    347 பாதத்தால் முயலகனைப் பாது காத்துப்
    பாரகத்தே பரஞ்சுடராய் நின்ற நாளோ
    கீதத்தை மிகப்பாடும் அடியார்க் கென்றுங்
    கேடிலா வானுலகங் கொடுத்த நாளோ
    பூதத்தான் பொருநீலி புனிதன் மேவிப்
    பொய்யுரையா மறைநால்வர் விண்ணோர்க் கென்றும்
    வேதத்தை விரிப்பதற்கு முன்னோ பின்னோ
    விழவாரூர் கோயிலாக் கொண்ட நாளே. 6.34.8
    348 புகையெட்டும் போக்கெட்டும் புலன்க ளெட்டும்
    பூதலங்க ளவையெட்டும் பொழில்க ளெட்டுங்
    கலையெட்டுங் காப்பெட்டுங் காட்சி யெட்டுங்
    கழற்சே வடியடைந்தார் களைக ணெட்டும்
    நகையெட்டும் நாளெட்டும் நன்மை யெட்டும்
    நலஞ்சிறந்தார் மனத்தகத்து மலர்க ளெட்டுந்
    திகையெட்டுந் தெரிப்பதற்கு முன்னோ பின்னோ
    திருவாரூர் கோயிலாக் கொண்ட நாளே. 6.34.9
    349 ஈசனா யுலகேழும் மலையு மாகி
    இராவணனை ஈடழித்திட் டிருந்த நாளோ
    வாசமலர் மகிழ்தென்ற லான நாளோ
    மதயானை யுரிபோர்த்து மகிழ்ந்த நாளோ
    தாதுமலர் சண்டிக்குக் கொடுத்த நாளோ
    சகரர்களை மறித்திட்டாட் கொண்ட நாளோ
    தேசமுமை யறிவதற்கு முன்னோ பின்னோ
    திருவாரூர் கோயிலாக் கொண்ட நாளே. 6.34.10

    திருச்சிற்றம்பலம்


    6.35 திருவெண்காடு - திருத்தாண்டகம்


    திருச்சிற்றம்பலம்

    350 தூண்டு சுடர்மேனித் தூநீ றாடிச்
    சூலங்கை யேந்தியோர் சுழல்வாய் நாகம்
    பூண்டு பொறியரவங் காதிற் பெய்து
    பொற்சடைக ளவைதாழப் புரிவெண் ணூலர்
    நீண்டு கிடந்திலங்கு திங்கள் சூடி
    நெடுந்தெருவே வந்தெனது நெஞ்சங் கொண்டார்
    வேண்டு நடைநடக்கும் வெள்ளே றேறி
    வெண்காடு மேவிய விகிர்த னாரே. 6.35.1
    351 பாதந் தனிப்பார்மேல் வைத்த பாதர்
    பாதாள மேழுருவப் பாய்ந்த பாதர்
    ஏதம் படாவண்ணம் நின்ற பாதர்
    ஏழுலகு மாய்நின்ற ஏக பாதர்
    ஓதத் தொலிமடங்கி யூருண் டேறி
    ஒத்துலக மெல்லா மொடுங்கி யபின்
    வேதத் தொலிகொண்டு வீணை கேட்பார்
    வெண்காடு மேவிய விகிர்த னாரே. 6.35.2
    352 நென்னலையோர் ஓடேத்திப் பிச்சைக் கென்று
    வந்தார்க்கு வந்தேனென் றில்லே புக்கேன்
    அந்நிலையே நிற்கின்றார் ஐயங் கொள்ளார்
    அருகே வருவார்போல் நோக்கு கின்றார்
    நுந்நிலைமை யேதோநும் மூர்தா னேதோ
    என்றேனுக் கொன்றாகச் சொல்ல மாட்டார்
    மென்முலையார் கூடி விரும்பி யாடும்
    வெண்காடு மேவிய விகிர்த னாரே. 6.35.3
    353 ஆகத் துமையடக்கி ஆறு சூடி
    ஐவா யரவசைத்தங் கானே றேறிப்
    போகம் பலவுடைத்தாய்ப் பூதஞ் சூழப்
    புலித்தோ லுடையாப் புகுந்து நின்றார்
    பாகிடுவான் சென்றேனைப் பற்றி நோக்கிப்
    பரிசழித்தென் வளைகவர்ந்தார் பாவி யேனை
    மேக முகிலுரிஞ்சு சோலை சூழ்ந்த
    வெண்காடு மேவிய விகிர்த னாரே. 6.35.4
    354 கொள்ளைக் குழைக்காதிற் குண்டைப் பூதங்
    கொடுகொட்டி கொட்டிக் குனித்துப் பாட
    உள்ளங் கவர்ந்திட்டுப் போவார் போல
    உழிதருவர் நான்தெரிய மாட்டேன் மீண்டேன்
    கள்ள விழிவிழிப்பார் காணாக் கண்ணாற்
    கண்ணுளார் போலே கரந்து நிற்பர்
    வெள்ளச் சடைமுடியர் வேத நாவர்
    வெண்காடு மேவிய விகிர்த னாரே. 6.35.5
    355 தொட்டிலங்கு சூலத்தர் மழுவா ளேந்திச்
    சுடர்க்கொன்றைத் தாரணிந்து சுவைகள் பேசிப்
    பட்டிவெள் ளேறேறிப் பலியுங் கொள்ளார்
    பார்ப்பாரைப் பரிசழிப்பா ரொக்கின் றாராற்
    கட்டிலங்கு வெண்ணீற்றர் கனலப் பேசிக்
    கருத்தழித்து வளைகவர்ந்தார் காலை மாலை
    விட்டிலங்கு சடைமுடியர் வேத நாவர்
    வெண்காடு மேவிய விகிர்த னாரே. 6.35.6
    356 பெண்பா லொருபாகம் பேணா வாழ்க்கைக்
    கோள்நாகம் பூண்பனவும் நாணாஞ் சொல்லார்
    உண்பா ருறங்குவார் ஒவ்வா நங்காய்
    உண்பதுவும் நஞ்சன்றே லோபி யுண்ணார்
    பண்பா லவிர்சடையர் பற்றி நோக்கிப்
    பாலைப் பரிசழியப் பேசு கின்றார்
    விண்பால் மதிசூடி வேத மோதி
    வெண்காடு மேவிய விகிர்த னாரே. 6.35.7
    357 மருதங்க ளாமொழிவர் மங்கை யோடு
    வானவரும் மாலயனுங் கூடித் தங்கள்
    சுருதங்க ளாற்றுதித்துத் தூநீ ராட்டித்
    தோத்திரங்கள் பலசொல்லித் தூபங் காட்டிக்
    கருதுங்கொல் எம்பெருமான் செய்குற் றேவல்
    என்பார்க்கு வேண்டும் வரங் கொடுத்து
    விகிர்தங்க ளாநடப்பர் வெள்ளே றேறி
    வெண்காடு மேவிய விகிர்த னாரே. 6.35.8
    358 புள்ளானும் நான்முகனும் புக்கும் போந்துங்
    காணார் பொறியழலாய் நின்றான் றன்னை
    உள்ளானை யொன்றலா உருவி னானை
    உலகுக் கொருவிளக்காய் நின்றான் றன்னைக்
    கள்ளேந்து கொன்றைதூய்க் காலை மூன்றும்
    ஓவாமே நின்று தவங்கள் செய்த
    வெள்ளானை வேண்டும் வரங் கொடுப்பார்
    வெண்காடு மேவிய விகிர்த னாரே. 6.35.9
    359 மாக்குன் றெடுத்தோன்றன் மைந்த னாகி
    மாவேழம் வில்லா மதித்தான் றன்னை
    நோக்குந் துணைத்தேவ ரெல்லாம் நிற்க
    நொடிவரையில் நோவ விழித்தான் றன்னைக்
    காக்குங் கடலிலங்கைக் கோமான் றன்னைக்
    கதிர்முடியுங் கண்ணும் பிதுங்க வூன்றி
    வீக்கந் தவிர்த்த விரலார் போலும்
    வெண்காடு மேவிய விகிர்த னாரே. 6.35.10

    திருச்சிற்றம்பலம்


    6.36 திருப்பழனம் - திருத்தாண்டகம்


    திருச்சிற்றம்பலம்

    360 அலையார் கடல்நஞ்ச முண்டார் தாமே
    அமரர்களுக் கருள்செய்யு மாதி தாமே
    கொலையாய கூற்ற முதைத்தார் தாமே
    கொல்வேங்கைத் தோலொன் றசைத்தார் தாமே
    சிலையாற் புரமூன் றெரித்தார் தாமே
    தீநோய் களைந்தென்னை யாண்டார் தாமே
    பலிதேர்ந் தழகாய பண்பர் தாமே
    பழன நகரெம் பிரானார் தாமே. 6.36.1
    361 வெள்ள மொருசடைமே லேற்றார் தாமே
    மேலார்கண் மேலார்கண் மேலார் தாமே
    கள்ளங் கடிந்தென்னை யாண்டார் தாமே
    கருத்துடைய பூதப் படையார் தாமே
    உள்ளத் துவகை தருவார் தாமே
    உறுநோய் சிறுபிணிகள் தீர்ப்பார் தாமே
    பள்ளப் பரவைநஞ் சுண்டார் தாமே
    பழன நகரெம் பிரானார் தாமே. 6.36.2
    362 இரவும் பகலுமாய் நின்றார் தாமே
    எப்போது மென்னெஞ்சத் துள்ளார் தாமே
    அரவ மரையி லசைத்தார் தாமே
    அனலாடி யங்கை மறித்தார் தாமே
    குரவங் கமழுங்குற் றாலர் தாமே
    கோலங்கள் மேன்மே லுகப்பார் தாமே
    பரவு மடியார்க்குப் பாங்கர் தாமே
    பழன நகரெம் பிரானார் தாமே. 6.36.3
    363 மாறின் மதின்மூன்று மெய்தார் தாமே
    வரியரவங் கச்சாக ஆர்த்தார் தாமே
    நீறுசேர் திருமேனி நிமலர் தாமே
    நெற்றி நெருப்புக்கண் வைத்தார் தாமே
    ஏறு கொடுஞ்சூலக் கையார் தாமே
    என்பா பரண மணிந்தார் தாமே
    பாறுண் தலையிற் பலியார் தாமே
    பழன நகரெம் பிரானார் தாமே. 6.364
    364 சீரால் வணங்கப் படுவார் தாமே
    திசைக்கெல்லாந் தேவாகி நின்றார் தாமே
    ஆரா வமுதமு மானார் தாமே
    அளவில் பெருமை யுடையார் தாமே
    நீரார் நியம முடையார் தாமே
    நீள்வரை வில்லாக வளைத்தார் தாமே
    பாரார் பரவப் படுவார் தாமே
    பழன நகரெம் பிரானார் தாமே. 6.36.5
    365 கால னுயிர்வௌவ வல்லார் தாமே
    கடிதோடும் வெள்ளை விடையார் தாமே
    கோலம் பலவு முகப்பார் தாமே
    கோள்நாக நாணாகப் பூண்டார் தாமே
    நீலம் பொலிந்த மிடற்றார் தாமே
    நீள்வரையி னுச்சி யிருப்பார் தாமே
    பால விருத்தரு மானார் தாமே
    பழன நகரெம் பிரானார் தாமே. 6.36.6
    366 ஏய்ந்த வுமைநங்கை பங்கர் தாமே
    ஏழூழிக் கப்புறமாய் நின்றார் தாமே
    ஆய்ந்து மலர்தூவ நின்றார் தாமே
    அளவில் பெருமை யுடையார் தாமே
    தேய்ந்த பிறைசடைமேல் வைத்தார் தாமே
    தீவா யரவதனை யார்த்தார் தாமே
    பாய்ந்த படர்கங்கை யேற்றார் தாமே
    பழன நகரெம் பிரானார் தாமே. 6.36.7
    367 ஓராதார் உள்ளத்தில் நில்லார் தாமே
    உள்ளூறு மன்பர் மனத்தார் தாமே
    பேராதென் சிந்தை யிருந்தார் தாமே
    பிறர்க்கென்றுங் காட்சிக் கரியார் தாமே
    ஊராரு மூவுலகத் துள்ளார் தாமே
    உலகை நடுங்காமற் காப்பார் தாமே
    பாரார் முழவத் திடையார் தாமே
    பழன நகரெம் பிரானார் தாமே. 6.36.8
    368 நீண்டவர்க்கோர் நெருப்புருவ மானார் தாமே
    நேரிழையை யொருபாகம் வைத்தார் தாமே
    பூண்டரவைப் புலித்தோல்மே லார்த்தார் தாமே
    பொன்னிறத்த வெள்ளச் சடையார் தாமே
    ஆண்டுலகே ழனைத்தினையும் வைத்தார் தாமே
    அங்கங்கே சிவமாகி நின்றார் தாமே
    பாண்டவரிற் பார்த்தனுக்குப் பரிந்தார் தாமே
    பழன நகரெம் பிரானார் தாமே. 6.36.9
    369 விடையேறி வேண்டுலகத் திருப்பார் தாமே
    விரிகதிரோன் சோற்றுத் துறையார் தாமே
    புடைசூழத் தேவர் குழாத்தார் தாமே
    பூந்துருத்தி நெய்த்தான மேயார் தாமே
    அடைவே புனல்சூழ்ஐ யாற்றார் தாமே
    அரக்கனையு மாற்ற லழித்தார் தாமே
    படையாப் பல்பூத முடையார் தாமே
    பழன நகரெம் பிரானார் தாமே. 6.36.10

    திருச்சிற்றம்பலம்


    6.37 திருவையாறு - திருத்தாண்டகம்



    திருச்சிற்றம்பலம்

    370 ஆரார் திரிபுரங்கள் நீறா நோக்கும்
    அனலாடி ஆரமுதே யென்றேன் நானே
    கூரார் மழுவாட் படையொன் றேந்திக்
    குறட்பூதப் பல்படையா யென்றேன் நானே
    பேரா யிரமுடையா யென்றேன் நானே
    பிறைசூடும் பிஞ்ஞகனே யென்றேன் நானே
    ஆரா வமுதேயென் ஐயா றனே
    என்றென்றே நானரற்றி நைகின் றேனே. 6.37.1
    371 தீவாயின் முப்புரங்கள் நீறா நோக்குந்
    தீர்த்தா புராணனே யென்றேன் நானே
    மூவா மதிசூடி யென்றேன் நானே
    முதல்வாமுக் கண்ணனே யென்றேன் நானே
    ஏவார் சிலையானே யென்றேன் நானே
    இடும்பைக் கடல்நின்று மேற வாங்கி
    ஆவாவென் றருள்புரியும் ஐயா றனே
    என்றென்றே நானரற்றி நைகின் றேனே. 6.37.2
    372 அஞ்சுண்ண வண்ணனே யென்றேன் நானே
    அடியார்கட் காரமுதே யென்றேன் நானே
    நஞ்சணி கண்டனே யென்றேன் நானே
    நாவலர்கள் நான்மறையே யென்றேன் நானே
    நெஞ்சுணர வுள்புக் கிருந்த போது
    நிறையு மமுதமே யென்றேன் நானே
    அஞ்சாதே ஆள்வானே ஐயா றனே
    என்றென்றே நானரற்றி நைகின் றேனே. 6.37.3
    373 தொல்லைத் தொடுகடலே யென்றேன் நானே
    துலங்கும் இளம்பிறையா யென்றேன் நானே
    எல்லை நிறைந்தானே யென்றேன் நானே
    ஏழ்நரம்பி னின்னிசையா யென்றேன் நானே
    அல்லற் கடல்புக் கழுந்து வேனை
    வாங்கி யருள்செய்தா யென்றேன் நானே
    எல்லையாம் ஐயாறா வென்றேன் நானே
    என்றென்றே நானரற்றி நைகின் றேனே. 6.37.4
    374 இண்டைச் சடைமுடியா யென்றேன் நானே
    இருசுடர் வானத்தா யென்றேன் நானே
    தொண்டர் தொழப்படுவா யென்றேன் நானே
    துருத்திநெய்த் தானத்தா யென்றேன் நானே
    கண்டங் கறுத்தானே யென்றேன் நானே
    கனலாகுங் கண்ணானே யென்றேன் நானே
    அண்டத்துக் கப்பாலாம் ஐயா றனே
    என்றென்றே நானரற்றி நைகின் றேனே. 6.37.5
    375 பற்றார் புரமெரித்தா யென்றேன் நானே
    பசுபதி பண்டரங்கா வென்றேன் நானே
    கற்றார்கள் நாவினா யென்றேன் நானே
    கடுவிடையொன் றூர்தியா யென்றேன் நானே
    பற்றானார் நெஞ்சுளா யென்றேன் நானே
    பார்த்தற் கருள்செய்தா யென்றேன் நானே
    அற்றார்க் கருள்செய்யும் ஐயா றனே
    என்றென்றே நானரற்றி நைகின் றேனே. 6.37.6
    376 விண்ணோர் தலைவனே யென்றேன் நானே
    விளங்கும் இளம்பிறையா யென்றேன் நானே
    எண்ணா ரெயிலெரித்தா யென்றேன் நானே
    ஏகம்பம் மேயானே யென்றேன் நானே
    பண்ணார் மறைபாடி யென்றேன் நானே
    பசுபதி பால்நீற்றா யென்றேன் நானே
    அண்ணாஐ யாறனே யென்றேன் நானே
    என்றென்றே நானரற்றி நைகின் றேனே. 6.37.7
    377 அவனென்று நானுன்னை அஞ்சா தேனை
    அல்ல லறுப்பானே யென்றேன் நானே
    சிவனென்று நானுன்னை யெல்லாஞ் சொல்லச்
    செல்வந் தருவானே யென்றேன் நானே
    பவனாகி யென்னுள்ளத் துள்ளே நின்று
    பண்டை வினையறுப்பா யென்றேன் நானே
    அவனென்றே யாதியே ஐயா றனே
    என்றென்றே நானரற்றி நைகின் றேனே. 6.37.8
    378 கச்சியே கம்பனே யென்றேன் நானே
    கயிலாயா காரோணா வென்றேன் நானே
    நிச்சன் மணாளனே யென்றேன் நானே
    நினைப்பார் மனத்துளா யென்றேன் நானே
    உச்சம்போ தேறேறீ யென்றேன் நானே
    உள்குவா ருள்ளத்தா யென்றேன் நானே
    அச்சம் பிணிதீர்க்கும் ஐயா றனே
    என்றென்றே நானரற்றி நைகின் றேனே. 6.37.9
    379 வில்லாடி வேடனே யென்றேன் நானே
    வெண்ணீறு மெய்க்கணிந்தா யென்றேன் நானே
    சொல்லாய சூழலா யென்றேன் நானே
    சுலாவாய தொன்னெறியே யென்றேன் நானே
    எல்லாமா யென்னுயிரே யென்றேன் நானே
    இலங்கையர்கோன் தோளிறுத்தா யென்றேன் நானே
    அல்லா வினைதீர்க்கும் ஐயா றனே
    என்றென்றே நானரற்றி நைகின் றேனே. 6.37.10
    திருச்சிற்றம்பலம்


    6.38 திருவையாறு - திருத்தாண்டகம்



    திருச்சிற்றம்பலம்

    380 ஓசை ஒலியெலா மானாய் நீயே
    உலகுக் கொருவனாய் நின்றாய் நீயே
    வாச மலரெலா மானாய் நீயே
    மலையான் மருகனாய் நின்றாய் நீயே
    பேசப் பெரிது மினியாய் நீயே
    பிரானாய் அடியென்மேல் வைத்தாய் நீயே
    தேச விளக்கெலா மானாய் நீயே
    திருவையா றகலாத செம்பொற் சோதீ. 6.38.1
    381 நோக்கரிய திருமேனி யுடையாய் நீயே
    நோவாமே நோக்கருள வல்லாய் நீயே
    காப்பரிய ஐம்புலனுங் காத்தாய் நீயே
    காமனையுங் கண்ணழலாற் காய்ந்தாய் நீயே
    ஆர்ப்பரிய மாநாக மார்த்தாய் நீயே
    அடியானென் றடியென்மேல் வைத்தாய் நீயே
    தீர்ப்பரிய வல்வினைநோய் தீர்ப்பாய் நீயே
    திருவையா றகலாத செம்பொற் சோதீ. 6.38.2
    382 கனத்தகத்துக் கடுஞ்சுடராய் நின்றாய் நீயே
    கடல்வரைவான் ஆகாய மானாய் நீயே
    தனத்தகத்துத் தலைகலனாக் கொண்டாய் நீயே
    சார்ந்தாரைத் தகைந்தாள வல்லாய் நீயே
    மனத்திருந்த கருத்தறிந்து முடிப்பாய் நீயே
    மலர்ச்சே வடியென்மேல் வைத்தாய் நீயே
    சினத்திருந்த திருநீல கண்டன் நீயே
    திருவையா றகலாத செம்பொற் சோதீ 6.38.3
    383 வானுற்ற மாமலைக ளானாய் நீயே
    வடகயிலை மன்னி யிருந்தாய் நீயே
    ஊனுற்ற ஒளிமழுவாட் படையாய் நீயே
    ஒளிமதியோ டரவுபுனல் வைத்தாய் நீயே
    ஆனுற்ற ஐந்து மமர்ந்தாய் நீயே
    அடியானென் றடியென்மேல் வைத்தாய் நீயே
    தேனுற்ற சொன்மடவாள் பங்கன் நீயே
    திருவையா றகலாத செம்பொற் சோதீ. 6.38.4
    384 பெண்ணாண் பிறப்பிலியாய் நின்றாய் நீயே
    பெரியார்கட் கெல்லாம் பெரியாய் நீயே
    உண்ணா வருநஞ்ச முண்டாய் நீயே
    ஊழி முதல்வனாய் நின்றாய் நீயே
    கண்ணா யுலகெலாங் காத்தாய் நீயே
    கழற்சே வடியென்மேல் வைத்தாய் நீயே
    திண்ணார் மழுவாட் படையாய் நீயே
    திருவையா றகலாத செம்பொற் சோதீ. 6.38.5
    385 உற்றிருந்த உணர்வெலா மானாய் நீயே
    உற்றவர்க்கோர் சுற்றமாய் நின்றாய் நீயே
    கற்றிருந்த கலைஞான மானாய் நீயே
    கற்றவர்க்கோர் கற்பகமாய் நின்றாய் நீயே
    பெற்றிருந்த தாயவளின் நல்லாய் நீயே
    பிரானா யடியென்மேல் வைத்தாய் நீயே
    செற்றிருந்த திருநீல கண்டன் நீயே
    திருவையா றகலாத செம்பொற் சோதீ. 6.38.6
    386 எல்லா வுலகமு மானாய் நீயே
    ஏகம்ப மேவி யிருந்தாய் நீயே
    நல்லாரை நன்மை யறிவாய் நீயே
    ஞானச் சுடர்விளக்காய் நின்றாய் நீயே
    பொல்லா வினைக ளறுப்பாய் நீயே
    புகழ்ச்சே வடியென்மேல் வைத்தாய் நீயே
    செல்வாய செல்வந் தருவாய் நீயே
    திருவையா றகலாத செம்பொற் சோதீ. 6.38.7
    387 ஆவினில் ஐந்து மமர்ந்தாய் நீயே
    அளவில் பெருமை யுடையாய் நீயே
    பூவினில் நாற்றமாய் நின்றாய் நீயே
    போர்க்கோலங் கொண்டெயி லெய்தாய் நீயே
    நாவில் நடுவுரையாய் நின்றாய் நீயே
    நண்ணி யடியென்மேல் வைத்தாய் நீயே
    தேவ ரறியாத தேவன் நீயே
    திருவையா றகலாத செம்பொற் சோதீ. 6.38.8
    388 எண்டிசைக்கும் ஒண்சுடராய் நின்றாய் நீயே
    ஏகம்ப மேய இறைவன் நீயே
    வண்டிசைக்கும் நறுங்கொன்றைத் தாராய் நீயே
    வாரா வுலகருள வல்லாய் நீயே
    தொண்டிசைத்துன் னடிபரவ நின்றாய் நீயே
    தூமலர்ச்சே வடியென்மேல் வைத்தாய் நீயே
    திண்சிலைக்கோர் சரங்கூட்ட வல்லாய் நீயே
    திருவையா றகலாத செம்பொற் சோதீ. 6.38.9
    389 விண்டார் புரமூன்று மெய்தாய் நீயே
    விண்ணவர்க்கும் மேலாகி நின்றாய் நீயே
    கண்டாரைக் கொல்லும்நஞ் சுண்டாய் நீயே
    காலங்கள் ஊழியாய் நின்றாய் நீயே
    தொண்டாய் அடியேனை ஆண்டாய் நீயே
    தூமலர்ச்சே வடியென்மேல் வைத்தாய் நீயே
    திண்டோ ள்விட் டெரியாட லுகந்தாய் நீயே
    திருவையா றகலாத செம்பொற் சோதீ. 6.38.10
    390 ஆரு மறியா இடத்தாய் நீயே
    ஆகாயந் தேரூர வல்லாய் நீயே
    பேரும் பெரிய இலங்கை வேந்தன்
    பெரிய முடிபத் திறுத்தாய் நீயே
    ஊரும் புரமூன்று மட்டாய் நீயே
    ஒண்டா மரையானும் மாலுங் கூடித்
    தேரும் அடியென்மேல் வைத்தாய் நீயே
    திருவையா றகலாத செம்பொற் சோதீ. 6.38.11

    திருச்சிற்றம்பலம்


    6.39 திருமழபாடி - திருத்தாண்டகம்



    திருச்சிற்றம்பலம்

    391 நீறேறு திருமேனி யுடையான் கண்டாய்
    நெற்றிமேல் ஒற்றைக்கண் நிறைந்தான் கண்டாய்
    கூறாக உமைபாகங் கொண்டான் கண்டாய்
    கொடியவிட முண்டிருண்ட கண்டன் கண்டாய்
    ஏறேறி யெங்குந் திரிவான் கண்டாய்
    ஏழுலகும் ஏழ்மலையு மானான் கண்டாய்
    மாறானார் தம்மரண மட்டான் கண்டாய்
    மழபாடி மன்னும் மணாளன் றானே. 6.39.1
    392 கொக்கிறகு சென்னி யுடையான் கண்டாய்
    கொல்லை விடையேறுங் கூத்தன் கண்டாய்
    அக்கரைமே லாட லுடையான் கண்டாய்
    அனலங்கை யேந்திய ஆதி கண்டாய்
    அக்கோ டரவ மணிந்தான் கண்டாய்
    அடியார்கட் காரமுத மானான் கண்டாய்
    மற்றிருந்த கங்கைச் சடையான் கண்டாய்
    மழபாடி மன்னும் மணாளன் றானே. 6.39.2
    393 நெற்றித் தனிக்கண் ணுடையான் கண்டாய்
    நேரிழையோர் பாகமாய் நின்றான் கண்டாய்
    பற்றிப்பாம் பாட்டும் படிறன் கண்டாய்
    பல்லூர் பலிதேர் பரமன் கண்டாய்
    செற்றார் புரமூன்றுஞ் செற்றான் கண்டாய்
    செழுமா மதிசென்னி வைத்தான் கண்டாய்
    மற்றொரு குற்ற மிலாதான் கண்டாய்
    மழபாடி மன்னும் மணாளன் றானே. 6.39.3
    394 அலையார்ந்த புனற்கங்கைச் சடையான் கண்டாய்
    அண்டத்துக் கப்பாலாய் நின்றான் கண்டாய்
    கொலையான கூற்றங் குமைத்தான் கண்டாய்
    கொல்வேங்கைத் தோலொன் றுடுத்தான் கண்டாய்
    சிலையாற் றிரிபுரங்கள் செற்றான் கண்டாய்
    செழுமா மதிசென்னி வைத்தான் கண்டாய்
    மலையார் மடந்தை மணாளன் கண்டாய்
    மழபாடி மன்னும் மணாளன் றானே. 6.39.4
    395 உலந்தார்தம் அங்க மணிந்தான் கண்டாய்
    உவகையோ டின்னருள்கள் செய்தான் கண்டாய்
    நலந்திகழுங் கொன்றைச் சடையான் கண்டாய்
    நால்வேத மாறங்க மானான் கண்டாய்
    உலந்தார் தலைகலனாக் கொண்டான் கண்டாய்
    உம்பரார் தங்கள் பெருமான் கண்டாய்
    மலர்ந்தார் திருவடியென் தலைமேல் வைத்த
    மழபாடி மன்னும் மணாளன் றானே. 6.39.5
    396 தாமரையான் தன்றலையைச் சாய்த்தான் கண்டாய்
    தகவுடையார் நெஞ்சிருக்கை கொண்டான் கண்டாய்
    பூமலரா னேத்தும் புனிதன் கண்டாய்
    புணர்ச்சிப் பொருளாகி நின்றான் கண்டாய்
    ஏமருவு வெஞ்சிலையொன் றேந்தி கண்டாய்
    இருளார்ந்த கண்டத் திறைவன் கண்டாய்
    மாமருவுங் கலைகையி லேந்தி கண்டாய்
    மழபாடி மன்னும் மணாளன் றானே. 6.39.6
    397 நீராகி நெடுவரைக ளானான் கண்டாய்
    நிழலாகி நீள்விசும்பு மானான் கண்டாய்
    பாராகிப் பௌவமே ழானான் கண்டாய்
    பகலாகி வானாகி நின்றான் கண்டாய்
    ஆரேனுந் தன்னடியார்க் கன்பன் கண்டாய்
    அணுவாகி ஆதியாய் நின்றான் கண்டாய்
    வாரார்ந்த வனமுலையாள் பங்கன் கண்டாய்
    மழபாடி மன்னும் மணாளன் றானே. 6.39.7
    398 பொன்னியலுந் திருமேனி யுடையான் கண்டாய்
    பூங்கொன்றைத் தாரொன் றணிந்தான் கண்டாய்
    மின்னியலும் வார்சடையெம் பெருமான் கண்டாய்
    வேழத்தி னுரிவிரும்பிப் போர்த்தான் கண்டாய்
    தன்னியல்பார் மற்றொருவ ரில்லான் கண்டாய்
    தாங்கரிய சிவந்தானாய் நின்றான் கண்டாய்
    மன்னிய மங்கையோர் கூறன் கண்டாய்
    மழபாடி மன்னும் மணாளன் றானே. 6.39.8
    399 ஆலால முண்டுகந்த ஆதி கண்டாய்
    அடையலர்தம் புரமூன்று மெய்தான் கண்டாய்
    காலாலக் காலனையுங் காய்ந்தான் கண்டாய்
    கண்ணப்பர்க் கருள்செய்த காளை கண்டாய்
    பாலாரும் மொழிமடவாள் பாகன் கண்டாய்
    பசுவேறிப் பலிதிரியும் பண்பன் கண்டாய்
    மாலாலு மறிவரிய மைந்தன் கண்டாய்
    மழபாடி மன்னும் மணாளன் றானே. 6.39.9
    400 ஒருசுடரா யுலகேழு மானான் கண்டாய்
    ஓங்காரத் துட்பொருளாய் நின்றான் கண்டாய்
    விரிசுடராய் விளங்கொளியாய் நின்றான் கண்டாய்
    விழவொலியும் வேள்வொலியு மானான் கண்டாய்
    இருசுடர் மீதோடா இலங்கைக் கோனை
    ஈடழிய இருபதுதோ ளிறுத்தான் கண்டாய்
    மருசுடரின் மாணிக்கக் குன்று கண்டாய்
    மழபாடி மன்னும் மணாளன் றானே. 6.39.10

    இத்தலம் சோழநாட்டிலுள்ளது.
    சுவாமிபெயர் - வச்சிரத்தம்பேசுவரர்,
    தேவியார் - அழகாம்பிகையம்மை.

    திருச்சிற்றம்பலம்


    6.40 திருமழபாடி - திருத்தாண்டகம்



    திருச்சிற்றம்பலம்

    401 அலையடுத்த பெருங்கடல்நஞ் சமுதா வுண்டு
    அமரர்கள்தந் தலைகாத்த ஐயர் செம்பொற்
    சிலையெடுத்து மாநாக நெருப்புக் கோத்துத்
    திரிபுரங்கள் தீயிட்ட செல்வர் போலும்
    நிலையடுத்த பசும்பொன்னால் முத்தால் நீண்ட
    நிரைவயிரப் பலகையாற் குவையார்த் துற்ற
    மலையடுத்த மழபாடி வயிரத் தூணே
    என்றென்றே நானரற்றி நைகின் றேனே. 6.40.1
    402 அறைகலந்த குழல்மொந்தை வீணை யாழும்
    அந்தரத்திற் கந்தருவர் அமர ரேத்த
    மறைகலந்த மந்திரமும் நீருங் கொண்டு
    வழிபட்டார் வானாளக் கொடுத்தி யன்றே
    கறைகலந்த பொழிற்கச்சிக் கம்ப மேயக்
    கனவயிரத் திரள்தூணே கலிசூழ் மாடம்
    மறைகலந்த மழபாடி வயிரத் தூணே
    என்றென்றே நானரற்றி நைகின் றேனே. 6.40.2
    403 உரங்கொடுக்கு மிருண்மெய்யர் மூர்க்கர் பொல்லா
    ஊத்தைவாய்ச் சமணர்தமை யுறவாக் கொண்ட
    பரங்கெடுத்திங் கடியேனை ஆண்டு கொண்ட
    பவளத்தின் திரள்தூணே பசும்பொன் முத்தே
    புரங்கெடுத்துப் பொல்லாத காம னாகம்
    பொடியாக விழித்தருளிப் புவியோர்க் கென்றும்
    வரங்கொடுக்கும் மழபாடி வயிரத் தூணே
    என்றென்றே நானரற்றி நைகின் றேனே. 6.40.3
    404 ஊனிகந்தூ ணுறிகையர் குண்டர் பொல்லா
    ஊத்தைவாய்ச் சமணருற வாகக் கொண்டு
    ஞானகஞ்சேர்ந் துள்ளவயி ரத்தை நண்ணா
    நாயேனைப் பொருளாக ஆண்டு கொண்ட
    மீனகஞ்சேர் வெள்ளநீர் விதியாற் சூடும்
    வேந்தனே விண்ணவர்தம் பெருமான் மேக
    வானகஞ்சேர் மழபாடி வயிரத் தூணே
    என்றென்றே நானரற்றி நைகின் றேனே. 6.40.4
    405 சிரமேற்ற நான்முகன்றன் றலையும் மற்றைத்
    திருமால்தன் செழுந்தலையும் பொன்றச் சிந்தி
    உரமேற்ற இரவிபல் தகர்த்துச் சோமன்
    ஒளிர்கலைகள் படவுழக்கி உயிரை நல்கி
    நரையேற்ற விடையேறி நாகம் பூண்ட
    நம்பியையே மறைநான்கும் ஓல மிட்டு
    வரமேற்கும் மழபாடி வயிரத் தூணே
    என்றென்றே நானரற்றி நைகின் றேனே. 6.40.5
    406 சினந்திருத்துஞ் சிறுப்பெரியார் குண்டர் தங்கள்
    செதுமதியார் தீவினைக்கே விழுந்தேன் தேடிப்
    புனந்திருத்தும் பொல்லாத பிண்டி பேணும்
    பொறியிலியேன் றனைப்பொருளா வாண்டு கொண்டு
    தனந்திருத்து மவர்திறத்தை யொழியப் பாற்றித்
    தயாமூல தன்மவழி யெனக்கு நல்கி
    மனந்திருத்தும் மழபாடி வயிரத் தூணே
    என்றென்றே நானரற்றி நைகின் றேனே. 6.40.6
    407 சுழித்துணையாம் பிறவிவழித் துக்கம் நீக்குஞ்
    சுருள்சடையெம் பெருமானே தூய தெண்ணீர்
    இழிப்பரிய பசுபாசப் பிறப்பை நீக்கும்
    என்றுணையே என்னுடைய பெம்மான் தம்மான்
    பழிப்பரிய திருமாலும் அயனுங் காணாப்
    பரிதியே சுருதிமுடிக் கணியாய் வாய்த்த
    வழித்துணையாம் மழபாடி வயிரத் தூணே
    என்றென்றே நானரற்றி நைகின் றேனே. 6.40.7
    இப்பதிகத்தில் 8,9,10-ம் செய்யுட்கள்
    சிதைந்து போயின. 6.40.8-10

    திருச்சிற்றம்பலம்


    6.41 திருநெய்த்தானம் - திருத்தாண்டகம்



    திருச்சிற்றம்பலம்

    408 வகையெலா முடையாயும் நீயே யென்றும்
    வான்கயிலை மேவினாய் நீயே யென்றும்
    மிகையெலாம் மிக்காயும் நீயே யென்றும்
    வெண்காடு மேவினாய் நீயே யென்றும்
    பகையெலாந் தீர்த்தாண்டாய் நீயே யென்றும்
    பாசூர் அமர்ந்தாயும் நீயே யென்றும்
    திகையெலாந் தொழச்செல்வாய் நீயே யென்றும்
    நின்றநெய்த் தானாவென் னெஞ்சு ளாயே. 6.41.1
    409 ஆர்த்த எனக்கன்பன் நீயே யென்றும்
    ஆதிக் கயிலாயன் நீயே யென்றுங்
    கூர்த்த நடமாடி நீயே யென்றுங்
    கோடிகா மேய குழகா வென்றும்
    பார்த்தற் கருள்செய்தாய் நீயே யென்றும்
    பழையனூர் மேவிய பண்பா வென்றுந்
    தீர்த்தன் சிவலோகன் நீயே யென்றும்

    6.042 திருநெய்த்தானம் (418-427)


    6.043 திருப்பூந்துருத்தி (428-437)


    6.044 திருச்சோற்றுத்துறை (438-447)


    6.045 திருவொற்றியூர் (448-457)


    6.046 திருஆவடுதுறை (458-468)


    6.047 திருஆவடுதுறை (469-478)


    6.048 திருவலிவலம் (479-488)


    6.049 திருக்கோகரணம் (489-498)


    6.050 திருவீழிமிழலை (499-508)




    6.51 திருவீழிமிழலை - திருத்தாண்டகம்


    திருச்சிற்றம்பலம்

    509 கயிலாய மலையுள்ளார் காரோ ணத்தார்
    கந்தமா தனத்துளார் காளத் தியார்
    மயிலாடு துறையுளார் மாகா ளத்தார்
    வக்கரையார் சக்கரமாற் கீந்தார் வாய்ந்த
    அயில்வாய சூலமுங் காபா லமும்
    அமருந் திருக்கரத்தார் ஆனே றேறி
    வெயிலாய சோதி விளங்கு நீற்றார்
    வீழி மிழலையே மேவி னாரே. 6.51.1
    510 பூதியணி பொன்னிறத்தர் பூண நூலர்
    பொங்கரவர் சங்கரர்வெண் குழையோர் காதர்
    கேதிசர மேவினார் கேதா ரத்தார்
    கெடில வடவதிகை வீரட் டத்தார்
    மாதுயரந் தீர்த்தென்னை உய்யக் கொண்டார்
    மழபாடி மேய மழுவா ளனார்
    வேதி குடியுளார் மீயச் சூரார்
    வீழி மிழலையே மேவி னாரே. 6.51.2
    511 அண்ணா மலையமர்ந்தார் ஆரூ ருள்ளார்
    அளப்பூரார் அந்தணர்கள் மாடக் கோயில்
    உண்ணாழி கையார் உமையா ளோடும்
    இமையோர் பெருமானார் ஒற்றி யூரார்
    பெண்ணா கடத்துப் பெருந்தூங் கானை
    மாடத்தார் கூடத்தார் பேரா வூரார்
    விண்ணோர்க ளெல்லாம் விரும்பி யேத்த
    வீழி மிழலையே மேவி னாரே. 6.51.3
    512 வெண்காட்டார் செங்காட்டங் குடியார் வெண்ணி
    நன்னகரார் வேட்களத்தார் வேத நாவார்
    பண்காட்டும் வண்டார் பழனத் துள்ளார்
    பராய்த்துறையார் சிராப்பள்ளி யுள்ளார் பண்டோ ர்
    வெண்கோட்டுக் கருங்களிற்றைப் பிளிறப் பற்றி
    உரித்துரிவை போர்த்த விடலை வேடம்
    விண்காட்டும் பிறைநுதலி யஞ்சக் காட்டி
    வீழி மிழலையே மேவி னாரே. 6.51.4
    513 புடைசூழ்ந்த பூதங்கள் வேதம் பாடப்
    புலியூர்ச்சிற் றம்பலத்தே நடமா டுவார்
    உடைசூழ்ந்த புலித்தோலர் கலிக்கச் சிமேற்
    றளியுளார் குளிர்சோலை யேகம் பத்தார்
    கடைசூழ்ந்து பலிதேருங் கங்கா ளனார்
    கழுமலத்தார் செழுமலர்த்தார்க் குழலி யோடும்
    விடைசூழ்ந்த வெல்கொடியர் மல்கு செல்வ
    வீழி மிழலையே மேவி னாரே. 6.51.5
    514 பெரும்புலியூர் விரும்பினார் பெரும்பா ழியார்
    பெரும்பற்றப் புலியூர்மூ லட்டா னத்தார்
    இரும்புதலார் இரும்பூளை யுள்ளா ரேரார்
    இன்னம்ப ரார்ஈங்கோய் மலையார் இன்சொற்
    கரும்பனையாள் உமையோடுங் கருகா வூரார்
    கருப்பறிய லூரார் கரவீ ரத்தார்
    விரும்பமரர் இரவுபகல் பரவி யேத்த
    வீழி மிழலையே மேவி னாரே. 6.51.6
    515 மறைக்காட்டார் வலிவலத்தார் வாய்மூர் மேயார்
    வாழ்கொளி புத்தூரார் மாகா ளத்தார்
    கறைக்காட்டுங் கண்டனார் காபா லியார்
    கற்குடியார் விற்குடியார் கானப் பேரார்
    பறைக்காட்டுங் குழிவிழிகட் பல்பேய் சூழப்
    பழையனூர் ஆலங்காட் டடிகள் பண்டோ ர்
    மிறைக்காட்டுங் கொடுங்காலன் வீடப் பாய்ந்தார்
    வீழி மிழலையே மேவி னாரே. 6.51.7
    516 அஞ்சைக் களத்துள்ளார் ஐயாற் றுள்ளார்
    ஆரூரார் பேரூரார் அழுந்தூ ருள்ளார்
    தஞ்சைத் தளிக்குளத்தார் தக்க ளூரார்
    சாந்தை அயவந்தி தங்கி னார்தாம்
    நஞ்சைத் தமக்கமுதா உண்ட நம்பர்
    நாகேச் சரத்துள்ளார் நாரை யூரார்
    வெஞ்சொdr சமண்சிறையி லென்னை மீட்டார்
    வீழி மிழலையே மேவி னாரே. 6.51.8
    517 கொண்டலுள்ளார் கொண்டீச் சரத்தி னுள்ளார்
    கோவலூர் வீரட்டங் கோயில் கொண்டார்
    தண்டலையார் தலையாலங் காட்டி னுள்ளார்
    தலைச்சங்கைப் பெருங்கோயில் தங்கி னார்தாம்
    வண்டலொடு மணற்கொணரும் பொன்னி நன்னீர்
    வலஞ்சுழியார் வைகலின்மேன் மாடத் துள்ளார்
    வெண்டலைமான் கைக்கொண்ட விகிர்த வேடர்
    வீழி மிழலையே மேவி னாரே. 6.51.9
    518 அரிச்சந் திரத்துள்ளார் அம்ப ருள்ளார்
    அரிபிரமர் இந்திரர்க்கு மரிய ரானார்
    புரிச்சந் திரத்துள்ளார் போகத் துள்ளார்
    பொருப்பரையன் மகளோடு விருப்ப ராகி
    எரிச்சந்தி வேட்கு மிடத்தா ரேமக்
    கூடத்தார் பாடத்தே னிசையார் கீதர்
    விரிச்சங்கை யெரிக்கொண்டங் காடும் வேடர்
    வீழி மிழலையே மேவி னாரே. 6.51.10
    519 புன்கூரார் புறம்பயத்தார் புத்தூ ருள்ளார்
    பூவணத்தார் புலிவலத்தார் வலியின் மிக்க
    தன்கூர்மை கருதிவரை யெடுக்க லுற்றான்
    தலைகளொடு மலைகளன தாளுந் தோளும்
    பொன்கூருங் கழலடியோர் விரலா லூன்றிப்
    பொருப்பதன்கீழ் நெரித்தருள்செய் புவன நாதர்
    மின்கூருஞ் சடைமுடியார் விடையின் பாகர்
    வீழி மிழலையே மேவி னாரே. 6.51.11
    திருச்சிற்றம்பலம்


    6.52 திருவீழிமிழலை - திருத்தாண்டகம்


    திருச்சிற்றம்பலம்

    520 கண்ணவன்காண் கண்ணொளிசேர் காட்சி யான்காண்
    கந்திருவம் பாட்டிசையிற் காட்டு கின்ற
    பண்ணவன்காண் பண்ணவற்றின் றிறலா னான்காண்
    பழமாகிச் சுவையாகிப் பயக்கின் றான்காண்
    மண்ணவன்காண் தீயவன்காண் நீரா னான்காண்
    வந்தலைக்கும் மாருதன்காண் மழைமே கஞ்சேர்
    விண்ணவன்காண் விண்ணவர்க்கு மேலா னான்காண்
    விண்ணிழிதண் வீழி மிழலை யானே. 6.52.1
    521 ஆலைப் படுகரும்பின் சாறு போல
    அண்ணிக்கும் அஞ்செழுத்தின் நாமத் தான்காண்
    சீல முடையடியார் சிந்தை யான்காண்
    திரிபுரமூன் றெரிபடுத்த சிலையி னான்காண்
    பாலினொடு தயிர்நறுநெய் யாடி னான்காண்
    பண்டரங்க வேடன்காண் பலிதேர் வான்காண்
    வேலை விடமுண்ட மிடற்றி னான்காண்
    விண்ணிழிதண் வீழி மிழலை யானே. 6.52.2
    522 தண்மையொடு வெம்மைதா னாயி னான்காண்
    சக்கரம் புட்பாகற் கருள்செய் தான்காண்
    கண்ணுமொரு மூன்றுடைய காபா லிகாண்
    காமனுடல் வேவித்த கண்ணி னான்காண்
    எண்ணில்சமண் தீர்த்தென்னை யாட்கொண் டான்காண்
    இருவர்க் கெரியா யருளி னான்காண்
    விண்ணவர்கள் போற்ற இருக்கின் றான்காண்
    விண்ணிழிதண் வீழி மிழலை யானே. 6.52.3
    523 காதிசைந்த சங்கக் குழையி னான்காண்
    கனக மலையனைய காட்சி யான்காண்
    மாதிசைந்த மாதவமுஞ் சோதித் தான்காண்
    வல்லேன வெள்ளெயிற்றா பரணத் தான்காண்
    ஆதியன்காண் அண்டத்துக் கப்பா லான்காண்
    ஐந்தலைமா நாகம்நா ணாக்கி னான்காண்
    வேதியன்காண் வேதவிதி காட்டி னான்காண்
    விண்ணிழிதண் வீழி மிழலை யானே. 6.52.4
    524 நெய்யினொடு பாலிளநீ ராடி னான்காண்
    நித்தமண வாளனென நிற்கின் றான்காண்
    கையின்மழு வாளொடுமான் ஏந்தி னான்காண்
    காலனுயிர் காலாற் கழிவித் தான்காண்
    செய்யதிரு மேனிவெண் ணீற்றி னான்காண்
    செஞ்சடைமேல் வெண்மதியஞ் சேர்த்தி னான்காண்
    வெய்ய கனல்விளையாட் டாடி னான்காண்
    விண்ணிழிதண் வீழி மிழலை யானே. 6.52.5
    525 கண்டுஞ்சுங் கருநெடுமால் ஆழி வேண்டிக்
    கண்ணிடந்து சூட்டக்கண் டருளு வான்காண்
    வண்டுண்ணும் மதுக்கொன்றை வன்னி மத்தம்
    வான்கங்கைச் சடைக்கரந்த மாதே வன்காண்
    பண்டங்கு மொழிமடவாள் பாகத் தான்காண்
    பரமன்காண் பரமேட்டி யாயி னான்காண்
    வெண்டிங்கள் அரவொடுசெஞ் சடைவைத் தான்காண்
    விண்ணிழிதண் வீழி மிழலை யானே. 6.52.6
    526 கற்பொலிதோள் சலந்தரனைப் பிளந்த ஆழி
    கருமாலுக் கருள்செய்த கருணை யான்காண்
    விற்பொலிதோள் விசயன்வலி தேய்வித் தான்காண்
    வேடுவனாய்ப் போர்பொருது காட்டி னான்காண்
    தற்பரமாந் தற்பரமாய் நிற்கின் றான்காண்
    சதாசிவன்காண் தன்னொப்பா ரில்லா தான்காண்
    வெற்பரையன் பாவை விருப்பு ளான்காண்
    விண்ணிழிதண் வீழி மிழலை யானே. 6.52.7
    527 மெய்த்தவன்காண் மெய்த்தவத்தில் நிற்பார்க் கெல்லாம்
    விருப்பிலா இருப்புமன வினையர்க் கென்றும்
    பொய்த்தவன்காண் புத்தன் மறவா தோடி
    எறிசல்லி புதுமலர்க ளாக்கி னான்காண்
    உய்த்தவன்காண் உயர்கதிக்கே உள்கி னாரை
    உலகனைத்தும் ஒளித்தளித்திட் டுய்யச் செய்யும்
    வித்தகன்காண் வித்தகர்தாம் விரும்பி யேத்தும்
    விண்ணிழிதண் வீழி மிழலை யானே. 6.52.8
    528 சந்திரனைத் திருவடியாற் தளர்வித் தான்காண்
    தக்கனையும் முனிந்தெச்சன் தலைகொண் டான்காண்
    இந்திரனைத் தோள்முறிவித் தருள்செய் தான்காண்
    ஈசன்காண் நேசன்காண் நினைவோர்க் கெல்லாம்
    மந்திரமும் மறைப்பொருளு மாயி னான்காண்
    மாலொடயன் மேலொடுகீழ் அறியா வண்ணம்
    வெந்தழலின் விரிசுடரா யோங்கி னான்காண்
    விண்ணிழிதண் வீழி மிழலை யானே. 6.52.9
    529 ஈங்கைப்பேர் ஈமவனத் திருக்கின் றான்காண்
    எம்மான்காண் கைம்மாவி னுரிபோர்த் தான்காண்
    ஓங்குமலைக் கரையன்றன் பாவை யோடும்
    ஓருருவாய் நின்றான்காண் ஓங்கா ரன்காண்
    கோங்குமலர்க் கொன்றையந்தார்க் கண்ணி யான்காண்
    கொல்லேறு வெல்கொடிமேற் கூட்டி னான்காண்
    வேங்கைவரிப் புலித்தோல்மே லாடை யான்காண்
    விண்ணிழிதண்வீழி மிழலை யானே. 6.52.10

    திருச்சிற்றம்பலம்


    6.53 திருவீழிமிழலை - திருத்தாண்டகம்



    திருச்சிற்றம்பலம்

    530 மானேறு கரமுடைய வரதர் போலும்
    மால்வரைகால் வளைவில்லா வளைத்தார் போலும்
    கானேறு கரிகதற வுரித்தார் போலுங்
    கட்டங்கங் கொடிதுடிகைக் கொண்டார் போலுந்
    தேனேறு திருஇதழித் தாரார் போலுந்
    திருவீழி மிழலையமர் செல்வர் போலும்
    ஆனேற தேறும் அழகர் போலும்
    அடியேனை ஆளுடைய அடிகள் தாமே. 6.53.1
    531 சமரமிகு சலந்தரன்போர் வேண்டி னானைச்
    சக்கரத்தாற் பிளப்பித்த சதுரர் போலும்
    நமனையொரு கால்குறைத்த நாதர் போலும்
    நாரணனை இடப்பாகத் தடைத்தார் போலுங்
    குமரனையும் மகனாக வுடையார் போலுங்
    குளிர்வீழி மிழலையமர் குழகர் போலும்
    அமரர்கள்பின் அமுதுணநஞ் சுண்டார் போலும்
    அடியேனை ஆளுடைய அடிகள் தாமே. 6.53.2
    532 நீறணிந்த திருமேனி நிமலர் போலும்
    நேமிநெடு மாற்கருளிச் செய்தார் போலும்
    ஏறணிந்த கொடியுடையெம் மிறைவர் போலும்
    எயில்மூன்று மெரிசரத்தா லெய்தார் போலும்
    வேறணிந்த கோலமுடை வேடர் போலும்
    வியன்வீழி மிழலையுறை விகிர்தர் போலும்
    ஆறணிந்த சடாமகுடத் தழகர் போலும்
    அடியேனை ஆளுடைய அடிகள் தாமே. 6.53.3
    533 கைவேழ முகத்தவனைப் படைத்தார் போலுங்
    கயாசுரனை அவனாற்கொல் வித்தார் போலுஞ்
    செய்வேள்வித் தக்கனைமுன் சிதைத்தார் போலுந்
    திசைமுகன்றன் சிரமொன்று சிதைத்தார் போலும்
    மெய்வேள்வி மூர்த்திதலை யறுத்தார் போலும்
    வியன்வீழி மிழலையிடங் கொண்டார் போலும்
    ஐவேள்வி ஆறங்க மானார் போலும்
    அடியேனை ஆளுடைய அடிகள் தாமே. 6.53.4
    534 துன்னத்தின் கோவணமொன் றுடையார் போலுஞ்
    சுடர்மூன்றுஞ் சோதியுமாய்த் தூயார் போலும்
    பொன்னொத்த திருமேனிப் புனிதர் போலும்
    பூதகணம் புடைசூழ வருவார் போலும்
    மின்னொத்த செஞ்சடைவெண் பிறையார் போலும்
    வியன்வீழி மிழலைசேர் விமலர் போலும்
    அன்னத்தேர் அயன்முடிசேர் அடிகள் போலும்
    அடியேனை ஆளுடைய அடிகள் தாமே. 6.53.5
    535 மாலாலும் அறிவரிய வரதர் போலும்
    மறவாதார் பிறப்பறுக்க வல்லார் போலும்
    நாலாய மறைக்கிறைவ ரானார் போலும்
    நாமவெழுத் தஞ்சாய நம்பர் போலும்
    வேலார்கை வீரியைமுன் படைத்தார் போலும்
    வியன்வீழி மிழலையமர் விகிர்தர் போலும்
    ஆலாலம் மிடற்றடக்கி அளித்தார் போலும்
    அடியேனை ஆளுடைய அடிகள் தாமே. 6.53.6
    536 பஞ்சடுத்த மெல்விரலாள் பங்கர் போலும்
    பைந்நாகம் அரைக்கசைத்த பரமர் போலும்
    மஞ்சடுத்த மணிநீல கண்டர் போலும்
    வடகயிலை மலையுடைய மணாளர் போலுஞ்
    செஞ்சடைக்கண் வெண்பிறைகொண் டணிந்தார் போலுந்
    திருவீழி மிழலையமர் சிவனார் போலும்
    அஞ்சடக்கும் அடியவர்கட் கணியார் போலும்
    அடியேனை ஆளுடைய அடிகள் தாமே. 6.53.7
    537 குண்டரொடு பிரித்தெனையாட் கொண்டார் போலுங்
    குடமூக்கி லிடமாக்கிக் கொண்டார் போலும்
    புண்டரிகப் புதுமலரா தனத்தார் போலும்
    புள்ளரசைக் கொன்றுயிர்பின் கொடுத்தார் போலும்
    வெண்டலையிற் பலிகொண்ட விகிர்தர் போலும்
    வியன்வீழி மிழலைநக ருடையார் போலும்
    அண்டத்துப் புறத்தப்பா லானார் போலும்
    அடியேனை ஆளுடைய அடிகள் தாமே. 6.53.8
    538 முத்தனைய முகிழ்முறுவ லுடையார் போலும்
    மொய்பவளக் கொடியனைய சடையார் போலும்
    எத்தனையும் பத்திசெய்வார்க் கினியார் போலும்
    இருநான்கு மூர்த்திகளு மானார் போலும்
    மித்திரவச் சிரவணற்கு விருப்பர் போலும்
    வியன்வீழி மிழலையமர் விகிர்தர் போலும்
    அத்தனொடும் அம்மையெனக் கானார் போலும்
    அடியேனை ஆளுடைய அடிகள் தாமே. 6.53.9
    539 கரியுரிசெய் துமைவெருவக் கண்டார் போலுங்
    கங்கையையுஞ் செஞ்சடைமேற் கரந்தார் போலும்
    எரியதொரு கைதரித்த இறைவர் போலும்
    ஏனத்தின் கூனெயிறு பூண்டார் போலும்
    விரிகதிரோ ரிருவரைமுன் வெகுண்டார் போலும்
    வியன்வீழி மிழலையமர் விமலர் போலும்
    அரிபிரமர் துதிசெயநின் றளித்தார் போலும்
    அடியேனை ஆளுடைய அடிகள் தாமே. 6.53.10
    540 கயிலாய மலையெடுத்தான் கதறி வீழக்
    கால்விரலால் அடர்த்தருளிச் செய்தார் போலுங்
    குயிலாய மென்மொழியாள் குளிர்ந்து நோக்கக்
    கூத்தாட வல்ல குழகர் போலும்
    வெயிலாய சோதிவிளக் கானார் போலும்
    வியன்வீழி மிழலையமர் விகிர்தர் போலும்
    அயிலாய மூவிலைவேற் படையார் போலும்
    அடியேனை ஆளுடைய அடிகள் தாமே. 6.53.11

    திருச்சிற்றம்பலம்


    6.54 திருப்புள்ளிருக்குவேளூர் - திருத்தாண்டகம்


    திருச்சிற்றம்பலம்

    541 ஆண்டானை அடியேனை ஆளாக் கொண்டு
    அடியோடு முடியயன்மா லறியா வண்ணம்
    நீண்டானை நெடுங்களமா நகரான் றன்னை
    நேமிவான் படையால்நீ ளுரவோ னாகங்
    கீண்டானைக் கேதாரம் மேவி னானைக்
    கேடிலியைக் கிளர்பொறிவாள் அரவோ டென்பு
    பூண்டானைப் புள்ளிருக்கு வேளூ ரானைப்
    போற்றாதே ஆற்றநாள் போக்கி னேனே. 6.54.1
    542 சீர்த்தானைச் சிறந்தடியேன் சிந்தை யுள்ளே
    திகழ்ந்தானைச் சிவன்றன்னைத் தேவ தேவைக்
    கூர்த்தானைக் கொடுநெடுவேற் கூற்றந் தன்னைக்
    குரைகழலாற் குமைத்துமுனி கொண்ட அச்சம்
    பேர்த்தானைப் பிறப்பிலியை இறப்பொன் றில்லாப்
    பெம்மானைக் கைம்மாவி னுரிவை பேணிப்
    போர்த்தானைப் புள்ளிருக்கு வேளூ ரானைப்
    போற்றாதே ஆற்றநாள் போக்கி னேனே. 6.54.2
    543 பத்திமையாற் பணிந்தடியேன் றன்னைப் பன்னாட்
    பாமாலை பாடப் பயில்வித் தானை
    எத்தேவு மேத்தும் இறைவன் றன்னை
    எம்மானை என்னுள்ளத் துள்ளே யூறும்
    அத்தேனை அமுதத்தை ஆவின் பாலை
    அண்ணிக்குந் தீங்கரும்பை அரனை ஆதிப்
    புத்தேளைப் புள்ளிருக்கு வேளூ ரானைப்
    போற்றாதே ஆற்றநாள் போக்கி னேனே. 6.54.3
    544 இருளாய உள்ளத்தி னிருளை நீக்கி
    இடர்பாவங் கெடுத்தேழை யேனை யுய்யத்
    தெருளாத சிந்தைதனைத் தெருட்டித் தன்போற்
    சிவலோக நெறியறியச் சிந்தை தந்த
    அருளானை ஆதிமா தவத்து ளானை
    ஆறங்கம் நால்வேதத் தப்பால் நின்ற
    பொருளானைப் புள்ளிருக்கு வேளூ ரானைப்
    போற்றாதே ஆற்றநாள் போக்கி னேனே. 6.54.4
    545 மின்னுருவை விண்ணகத்தி லொன்றாய் மிக்கு
    வீசுங்கால் தன்னகத்தில் இரண்டாய்ச் செந்தீத்
    தன்னுருவின் மூன்றாய்த்தாழ் புனலின் நான்காய்த்
    தரணிதலத் தஞ்சாகி யெஞ்சாத் தஞ்ச
    மன்னுருவை வான்பவளக் கொழுந்தை முத்தை
    வளரொளியை வயிரத்தை மாசொன் றில்லாப்
    பொன்னுருவைப் புள்ளிருக்கு வேளூ ரானைப்
    போற்றாதே ஆற்றநாள் போக்கி னேனே. 6.54.5
    546 அறையார்பொற் கழலார்ப்ப அணியார் தில்லை
    அம்பலத்துள் நடமாடும் அழகன் றன்னைக்
    கறையார்மூ விலைநெடுவேற் கடவுள் தன்னைக்
    கடல்நாகைக் காரோணங் கருதி னானை
    இறையானை என்னுள்ளத் துள்ளே விள்ளா
    திருந்தானை ஏழ்பொழிலுந் தாங்கி நின்ற
    பொறையானைப் புள்ளிருக்கு வேளூ ரானைப்
    போற்றாதே ஆற்றநாள் போக்கி னேனே. 6.54.6
    547 நெருப்பனைய திருமேனி வெண்ணீற் றானை
    நீங்காதென் னுள்ளத்தி னுள்ளே நின்ற
    விருப்பவனை வேதியனை வேத வித்தை
    வெண்காடும் வியன்துருத்தி நகரும் மேவி
    இருப்பவனை இடைமருதோ டீங்கோய் நீங்கா
    இறையவனை எனையாலுங் கயிலை யென்னும்
    பொருப்பவனைப் புள்ளிருக்கு வேளூ ரானைப்
    போற்றாதே ஆற்றநாள் போக்கி னேனே. 6.54.7
    548 பேரா யிரம்பரவி வானோ ரேத்தும்
    பெம்மானைப் பிரிவிலா அடியார்க் கென்றும்
    வாராத செல்வம் வருவிப் பானை
    மந்திரமுந் தந்திரமும் மருந்து மாகித்
    தீராநோய் தீர்த்தருள வல்லான் றன்னைத்
    திரிபுரங்கள் தீயெழத்திண் சிலைகைக் கொண்ட
    போரானைப் புள்ளிருக்கு வேளூ ரானைப்
    போற்றாதே ஆற்றநாள் போக்கி னேனே. 6.54.8
    549 பண்ணியனைப் பைங்கொடியாள் பாகன் றன்னைப்
    படர்சடைமேற் புனல்கரந்த படிறன் றன்னை
    நண்ணியனை யென்னாக்கித் தன்னா னானை
    நான்மறையின் நற்பொருளை நளிர்வெண் டிங்கள்
    கண்ணியனைக் கடியநடை விடையொன் றேறுங்
    காரணனை நாரணனைக் கமலத் தோங்கும்
    புண்ணியனைப் புள்ளிருக்கு வேளூ ரானைப்
    போற்றாதே ஆற்றநாள் போக்கி னேனே. 6.54.9
    550 இறுத்தானை இலங்கையர்கோன் சிரங்கள் பத்தும்
    எழுநரம்பின் இன்னிசைகேட் டின்புற் றானை
    அறுத்தானை அடியார்தம் அருநோய் பாவம்
    அலைகடலில் ஆலால முண்டு கண்டங்
    கறுத்தானைக் கண்ணழலாற் காம னாகங்
    காய்ந்தானைக் கனன்மழுவுங் கலையு மங்கை
    பொறுத்தானைப் புள்ளிருக்கு வேளூ ரானைப்
    போற்றாதே ஆற்றநாள் போக்கி னேனே. 6.54.10

    திருச்சிற்றம்பலம்


    6.55 திருக்கயிலாயம் - போற்றித்திருத்தாண்டகம்


    திருச்சிற்றம்பலம்

    551 வேற்றாகி விண்ணாகி நின்றாய் போற்றி
    மீளாமே ஆளென்னைக் கொண்டாய் போற்றி
    ஊற்றாகி உள்ளே ஒளித்தாய் போற்றி
    ஓவாத சத்தத் தொலியே போற்றி
    ஆற்றாகி யங்கே அமர்ந்தாய் போற்றி
    ஆறங்கம் நால்வேத மானாய் போற்றி
    காற்றாகி யெங்குங் கலந்தாய் போற்றி
    கயிலை மலையானே போற்றி போற்றி. 6.55.1
    552 பிச்சாடல் பேயோ டுகந்தாய் போற்றி
    பிறவி யறுக்கும் பிரானே போற்றி
    வைச்சாடல் நன்று மகிழ்ந்தாய் போற்றி
    மருவியென் சிந்தை புகுந்தாய் போற்றி
    பொய்ச்சார் புரமூன்று மெய்தாய் போற்றி
    போகாதென் சிந்தை புகுந்தாய் போற்றி
    கச்சாக நாக மசைத்தாய் போற்றி
    கயிலை மலையானே போற்றி போற்றி. 6.55.2
    553 மருவார் புரமூன்று மெய்தாய் போற்றி
    மருவியென் சிந்தை புகுந்தாய் போற்றி
    உருவாகி யென்னைப் படைத்தாய் போற்றி
    உள்ளாவி வாங்கி யொளித்தாய் போற்றி
    திருவாகி நின்ற திறமே போற்றி
    தேசம் பரவப் படுவாய் போற்றி
    கருவாகி யோடு முகிலே போற்றி
    கயிலை மலையானே போற்றி போற்றி. 6.55.3
    554 வானத்தார் போற்றும் மருந்தே போற்றி
    வந்தென்றன் சிந்தை புகுந்தாய் போற்றி
    ஊனத்தை நீக்கு முடலே போற்றி
    ஓங்கி அழலாய் நிமிர்ந்தாய் போற்றி
    தேனத்தை வார்த்த தெளிவே போற்றி
    தேவர்க்குந் தேவனாய் நின்றாய் போற்றி
    கானத்தீ யாட லுகந்தாய் போற்றி
    கயிலை மலையானே போற்றி போற்றி. 6.55.4
    555 ஊராகி நின்ற உலகே போற்றி
    ஓங்கி அழலாய் நிமிர்ந்தாய் போற்றி
    பேராகி யெங்கும் பரந்தாய் போற்றி
    பெயராதென் சிந்தை புகுந்தாய் போற்றி
    நீராவி யான நிழலே போற்றி
    நேர்வா ரொருவரையு மில்லாய் போற்றி
    காராகி நின்ற முகிலே போற்றி
    கயிலை மலையானே போற்றி போற்றி. 6.55.5
    556 சில்லுருவாய்ச் சென்று திரண்டாய் போற்றி
    தேவ ரறியாத தேவே போற்றி
    புல்லுயிர்க்கும் பூட்சி புணர்த்தாய் போற்றி
    போகாதென் சிந்தை புகுந்தாய் போற்றி
    பல்லுயிராய்ப் பார்தோறும் நின்றாய் போற்றி
    பற்றி உலகை விடாதாய் போற்றி
    கல்லுயிராய் நின்ற கனலே போற்றி
    கயிலை மலையானே போற்றி போற்றி. 6.55.6
    557 பண்ணின் இசையாகி நின்றாய் போற்றி
    பாவிப்பார் பாவ மறுப்பாய் போற்றி
    எண்ணு மெழுத்துஞ்சொல் லானாய் போற்றி
    என்சிந்தை நீங்கா இறைவா போற்றி
    விண்ணும் நிலனுந்தீ யானாய் போற்றி
    மேலவர்க்கும் மேலாகி நின்றாய் போற்றி
    கண்ணின் மணியாகி நின்றாய் போற்றி
    கயிலை மலையானே போற்றி போற்றி. 6.55.7
    558 இமையா துயிரா திருந்தாய் போற்றி
    என்சிந்தை நீங்கா இறைவா போற்றி
    உமைபாக மாகத் தணைத்தாய் போற்றி
    ஊழியே ழான ஒருவா போற்றி
    அமையா அருநஞ்ச மார்ந்தாய் போற்றி
    ஆதி புராணனாய் நின்றாய் போற்றி
    கமையாகி நின்ற கனலே போற்றி
    கயிலை மலையானே போற்றி போற்றி. 6.55.8
    559 மூவாய் பிறவாய் இறவாய் போற்றி
    முன்னமே தோன்றி முளைத்தாய் போற்றி
    தேவாதி தேவர்தொழுந் தேவே போற்றி
    சென்றேறி யெங்கும் பரந்தாய் போற்றி
    ஆவா அடியேனுக் கெல்லாம் போற்றி
    அல்லல் நலிய அலந்தேன் போற்றி
    காவாய் கனகத் திரளே போற்றி
    கயிலை மலையானே போற்றி போற்றி. 6.55.9
    560 நெடிய விசும்போடு கண்ணே போற்றி
    நீள அகல முடையாய் போற்றி
    அடியும் முடியும் இகலி போற்றி
    அங்கொன் றறியாமை நின்றாய் போற்றி
    கொடிய வன்கூற்ற முதைத்தாய் போற்றி
    கோயிலா என்சிந்தை கொண்டாய் போற்றி
    கடிய உருமொடு மின்னே போற்றி
    கயிலை மலையானே போற்றி போற்றி. 6.55.10
    561 உண்ணா துறங்கா திருந்தாய் போற்றி
    ஓதாதே வேத முணர்ந்தாய் போற்றி
    எண்ணா இலங்கைக்கோன் றன்னைப் போற்றி
    இறைவிரலால் வைத்துகந்த ஈசா போற்றி
    பண்ணா ரிசையின்சொற் கேட்டாய் போற்றி
    பண்டேயென் சிந்தை புகுந்தாய் போற்றி
    கண்ணா யுலகுக்கு நின்றாய் போற்றி
    கயிலை மலையானே போற்றி போற்றி. 6.55.11

    இத்தலம் வடநாட்டிலுள்ளது.
    சுவாமிபெயர் - கைலாயநாதர், தேவியார் - பார்வதியம்மை.

    திருச்சிற்றம்பலம்


    6.56 திருக்கயிலாயம் - போற்றித்திருத்தாண்டகம்



    திருச்சிற்றம்பலம்

    562 பொறையுடைய பூமிநீ ரானாய் போற்றி
    பூதப் படையாள் புனிதா போற்றி
    நிறையுடைய நெஞ்சின் இடையாய் போற்றி
    நீங்காதென் னுள்ளத் திருந்தாய் போற்றி
    மறையுடைய வேதம் விரித்தாய் போற்றி
    வானோர் வணங்கப் படுவாய் போற்றி
    கறையுடைய கண்ட முடையாய் போற்றி
    கயிலை மலையானே போற்றி போற்றி. 6.56.1
    563 முன்பாகி நின்ற முதலே போற்றி
    மூவாத மேனிமுக் கண்ணா போற்றி
    அன்பாகி நின்றார்க் கணியாய் போற்றி
    ஆறேறு சென்னிச் சடையாய் போற்றி
    என்பாக வெங்கு மணிந்தாய் போற்றி
    என்சிந்தை நீங்கா இறைவா போற்றி
    கண்பாவி நின்ற கனலே போற்றி
    கயிலை மலையானே போற்றி போற்றி. 6.56.2
    564 மாலை யெழுந்த மதியே போற்றி
    மன்னியென் சிந்தை யிருந்தாய் போற்றி
    மேலை வினைக ளறுப்பாய் போற்றி
    மேலாடு திங்கள் முடியாய் போற்றி
    ஆலைக் கரும்பின் தெளிவே போற்றி
    அடியார்கட் காரமுத மானாய் போற்றி
    காலை முளைத்த கதிரே போற்றி
    கயிலை மலையானே போற்றி போற்றி. 6.56.3
    565 உடலின் வினைக ளறுப்பாய் போற்றி
    ஒள்ளெரி வீசும் பிரானே போற்றி
    படருஞ் சடைமேல் மதியாய் போற்றி
    பல்கணக் கூத்தப் பிரானே போற்றி
    சுடரிற் றிகழ்கின்ற சோதி போற்றி
    தோன்றியென் னுள்ளத் திருந்தாய் போற்றி
    கடலி லொளியாய முத்தே போற்றி
    கயிலை மலையானே போற்றி போற்றி. 6.56.4
    566 மைசேர்ந்த கண்ட முடையாய் போற்றி
    மாலுக்கும் ஓராழி ஈந்தாய் போற்றி
    பொய்சேர்ந்த சிந்தை புகாதாய் போற்றி
    போகாதென் னுள்ளத் திருந்தாய் போற்றி
    மெய்சேரப் பால்வெண்ணீ றாடி போற்றி
    மிக்கார்க ளேத்தும் விளக்கே போற்றி
    கைசேர் அனலேந்தி யாடீ போற்றி
    கயிலை மலையானே போற்றி போற்றி. 6.56.5
    567 ஆறேறு சென்னி முடியாய் போற்றி
    அடியார்கட் காரமுதாய் நின்றாய் போற்றி
    நீறேறு மேனி யுடையாய் போற்றி
    நீங்காதென் னுள்ளத் திருந்தாய் போற்றி
    கூறேறு மங்கை மழுவா போற்றி
    கொள்ளுங் கிழமையே ழானாய் போற்றி
    காறேறு கண்ட மிடற்றாய் போற்றி
    கயிலை மலையானே போற்றி போற்றி. 6.56.6
    568 அண்டமே ழன்று கடந்தாய் போற்றி
    ஆதி புராணனாய் நின்றாய் போற்றி
    பண்டை வினைக ளறுப்பாய் போற்றி
    பாரோர்விண் ணேத்தப் படுவாய் போற்றி
    தொண்டர் பரவு மிடத்தாய் போற்றி
    தொழில்நோக்கி யாளுஞ் சுடரே போற்றி
    கண்டங் கறுக்கவும் வல்லாய் போற்றி
    கயிலை மலையானே போற்றி போற்றி. 6.56.7
    569 பெருகி யலைக்கின்ற ஆறே போற்றி
    பேராநோய் பேர விடுப்பாய் போற்றி
    உருகி நினைவார்தம் முள்ளாய் போற்றி
    ஊனந் தவிர்க்கும் பிரானே போற்றி
    அருகி மிளிர்கின்ற பொன்னே போற்றி
    ஆரு மிகழப் படாதாய் போற்றி
    கருகிப் பொழிந்தோடு நீரே போற்றி
    கயிலை மலையானே போற்றி போற்றி. 6.56.8
    570 செய்ய மலர்மேலான் கண்ணன் போற்றி
    தேடி யுணராமை நின்றாய் போற்றி
    பொய்யாநஞ் சுண்ட பொறையே போற்றி
    பொருளாக என்னையாட் கொண்டாய் போற்றி
    மெய்யாக ஆனஞ் சுகந்தாய் போற்றி
    மிக்கார்க ளேத்துங் குணத்தாய் போற்றி
    கையானை மெய்த்தோ லுரித்தாய் போற்றி
    கயிலை மலையானே போற்றி போற்றி. 6.56.9
    571 மேல்வைத்த வானோர் பெருமான் போற்றி
    மேலாடு புரமூன்று மெய்தாய் போற்றி
    சீலத்தான் தென்னிலங்கை மன்னன் போற்றி
    சிலையெடுக்க வாயலற வைத்தாய் போற்றி
    கோலத்தாற் குறைவில்லான் றன்னை யன்று
    கொடிதாகக் காய்ந்த குழகா போற்றி
    காலத்தாற் காலனையுங் காய்ந்தாய் போற்றி
    கயிலை மலையானே போற்றி போற்றி. 6.56.10

    திருச்சிற்றம்பலம்


    6.57 திருக்கயிலாயத்திருமலை - போற்றித்திருத்தாண்டகம்


    திருச்சிற்றம்பலம்

    572 பாட்டான நல்ல தொடையாய் போற்றி
    பரிசை யறியாமை நின்றாய் போற்றி
    சூட்டான திங்கள் முடியாய் போற்றி
    தூமாலை மத்த மணிந்தாய் போற்றி
    ஆட்டான தஞ்சு மமர்ந்தாய் போற்றி
    அடங்கார் புரமெரிய நக்காய் போற்றி
    காட்டானை மெய்த்தோ லுரித்தாய் போற்றி
    கயிலை மலையானே போற்றி போற்றி. 6.57.1
    573 அதிரா வினைக ளறுப்பாய் போற்றி
    ஆல நிழற்கீழ் அமர்ந்தாய் போற்றி
    சதுரா சதுரக் குழையாய் போற்றி
    சாம்பர் மெய்பூசுந் தலைவா போற்றி
    எதிரா உலக மமைப்பாய் போற்றி
    என்றுமீ ளாவருள் செய்வாய் போற்றி
    கதிரார் கதிருக்கோர் கண்ணே போற்றி
    கயிலை மலையானே போற்றி போற்றி. 6.57.2
    574 செய்யாய் கரியாய் வெளியாய் போற்றி
    செல்லாத செல்வ முடையாய் போற்றி
    ஐயாய் பெரியாய் சிறியாய் போற்றி
    ஆகாச வண்ண முடியாய் போற்றி
    வெய்யாய் தணியா யணியாய் போற்றி
    வேளாத வேள்வி யுடையாய் போற்றி
    கையார் தழலார் விடங்கா போற்றி
    கயிலை மலையானே போற்றி போற்றி. 6.57.3
    575 ஆட்சி யுலகை யுடையாய் போற்றி
    அடியார்க் கமுதெலாம் ஈவாய் போற்றி
    சூட்சி சிறிது மிலாதாய் போற்றி
    சூழ்ந்த கடல்நஞ்ச முண்டாய் போற்றி
    மாட்சி பெரிது முடையாய் போற்றி
    மன்னியென் சிந்தை மகிழ்ந்தாய் போற்றி
    காட்சி பெரிது மரியாய் போற்றி
    கயிலை மலையானே போற்றி போற்றி. 6.57.4
    576 முன்னியா நின்ற முதல்வா போற்றி
    மூவாத மேனி யுடையாய் போற்றி
    என்னியா யெந்தை பிரானே போற்றி
    ஏழி னிசையே யுகப்பாய் போற்றி
    மன்னிய மங்கை மணாளா போற்றி
    மந்திரமுந் தந்திரமு மானாய் போற்றி
    கன்னியார் கங்கைத் தலைவா போற்றி
    கயிலை மலையானே போற்றி போற்றி. 6.57.5
    577 உரியாய் உலகினுக் கெல்லாம் போற்றி
    உணர்வென்னு மூர்வ துடையாய் போற்றி
    எரியாய தெய்வச் சுடரே போற்றி
    ஏசுமா முண்டி யுடையாய் போற்றி
    அரியாய் அமரர்கட் கெல்லாம் போற்றி
    அறிவே அடக்க முடையாய் போற்றி
    கரியானுக் காழியன் றீந்தாய் போற்றி
    கயிலை மலையானே போற்றி போற்றி. 6.57.6
    578 எண்மேலும் எண்ண முடையாய் போற்றி
    ஏறரிய வேறுங் குணத்தாய் போற்றி
    பண்மேலே பாவித் திருந்தாய் போற்றி
    பண்ணொடுயாழ் வீணை பயின்றாய் போற்றி
    விண்மேலு மேலும் நிமிர்ந்தாய் போற்றி
    மேலார்கண் மேலார்கண் மேலாய் போற்றி
    கண்மேலுங் கண்ணொன் றுடையாய் போற்றி
    கயிலை மலையானே போற்றி போற்றி. 6.57.7
    579 முடியார் சடையின் மதியாய் போற்றி
    முழுநீறு சண்ணித்த மூர்த்தி போற்றி
    துடியா ரிடையுமையாள் பங்கா போற்றி
    சோதித்தார் காணாமை நின்றாய் போற்றி
    அடியா ரடிமை அறிவாய் போற்றி
    அமரர் பதியாள வைத்தாய் போற்றி
    கடியார் புரமூன்று மெய்தாய் போற்றி
    கயிலை மலையானே போற்றி போற்றி. 6.57.8
    580 போற்றிசைத்துன் னடிபரவ நின்றாய் போற்றி
    புண்ணியனே நண்ண லரியாய் போற்றி
    ஏற்றிசைக்கும் வான்மே லிருந்தாய் போற்றி
    எண்ணா யிரநூறு பேராய் போற்றி
    நாற்றிசைக்கும் விளக்காய நாதா போற்றி
    நான்முகற்கும் மாற்கு மரியாய் போற்றி
    காற்றிசைக்குந் திசைக்கெல்லாம் வித்தே போற்றி
    கயிலை மலையானே போற்றி போற்றி. 6.57.9
    இப்பதிகத்தில் 10-ம் செய்யுள் சிதைந்து போயிற்று. 6.57.10

    திருச்சிற்றம்பலம்


    6.58 திருவலம்புரம் - திருத்தாண்டகம்


    திருச்சிற்றம்பலம்

    581 மண்ணளந்த மணிவண்ணர் தாமும் மற்றை
    மறையவனும் வானவருஞ் சூழ நின்று
    கண்மலிந்த திருநெற்றி யுடையா ரொற்றைக்
    கதநாகங் கையுடையார் காணீ ரன்றே
    பண்மலிந்த மொழியவரு மியானு மெல்லாம்
    பணிந்திறைஞ்சித் தம்முடைய பின்பின் செல்ல
    மண்மலிந்த வயல்புடைசூழ் மாட வீதி
    வலம்புரமே புக்கங்கே மன்னி னாரே. 6.58.1
    582 சிலைநவின்ற தொருகணையாற் புரமூன் றெய்த
    தீவண்ணர் சிறந்திமையோர் இறைஞ்சி யேத்தக்
    கொலைநவின்ற களியானை யுரிவை போர்த்துக்
    கூத்தாடித் திரிதருமக் கூத்தர் நல்ல
    கலைநவின்ற மறையவர்கள் காணக் காணக்
    கடுவிடைமேற் பாரிடங்கள் சூழக் காதல்
    மலைமகளுங் கங்கையுந் தாமு மெல்லாம்
    வலம்புரமே புக்கங்கே மன்னி னாரே. 6.58.2
    583 தீக்கூருந் திருமேனி யொருபால் மற்றை
    யொருபாலும் அரியுருவந் திகழ்ந்த செல்வர்
    ஆக்கூரில் தான்தோன்றி புகுவார் போல
    அருவினையேன் செல்வதுமே யப்பா லெங்கும்
    நோக்கா ரொருவிடத்து நூலுந் தோலுந்
    துதைந்திலங்குந் திருமேனி வெண்ணீ றாடி
    வாக்கால் மறைவிரித்து மாயம் பேசி
    வலம்புரமே புக்கிங்கே மன்னி னாரே. 6.58.3
    584 மூவாத மூக்கப்பாம் பரையிற் சாத்தி
    மூவர் உருவாய முதல்வ ரிந்நாள்
    கோவாத எரிகணையைச் சிலைமேற் கோத்த
    குழகனார் குளிர்கொன்றை சூடி யிங்கே
    போவாரைக் கண்டடியேன் பின்பின் செல்லப்
    புறக்கணித்துத் தம்முடைய பூதஞ் சூழ
    வாவா வெனவுரைத்து மாயம் பேசி
    வலம்புரமே புக்கங்கே மன்னி னாரே. 6.58.4
    585 அனலொருகை யதுவேந்தி அதளி னோடே
    ஐந்தலைய மாநாகம் அரையிற் சாத்திப்
    புனல்பொதிந்த சடைக்கற்றைப் பொன்போல் மேனிப்
    புனிதனார் புரிந்தமரர் இறைஞ்சி யேத்தச்
    சினவிடையை மேற்கொண்டு திருவா ரூருஞ்
    சிரபுரமும் இடைமருதுஞ் சேர்வார் போல
    மனமுருக வளைகழல மாயம் பேசி
    வலம்புரமே புக்கங்கே மன்னி னாரே. 6.58.5
    586 கறுத்ததொரு கண்டத்தர் காலன் வீழக்
    காலினாற் காய்ந்துகந்த காபா லியார்
    முறித்ததொரு தோலுடுத்து முண்டஞ் சாத்தி
    முனிகணங்கள் புடைசூழ முற்றந் தோறுந்
    தெறித்ததொரு வீணையராய்ச் செல்வார் தம்வாய்ச்
    சிறுமுறுவல் வந்தெனது சிந்தை வௌவ
    மறித்தொருகால் நோக்காதே மாயம் பேசி
    வலம்புரமே புக்கங்கே மன்னி னாரே. 6.58.6
    587 பட்டுடுத்துப் பவளம்போல் மேனி யெல்லாம்
    பசுஞ்சாந்தங் கொண்டணிந்து பாதம் நோவ
    இட்டெடுத்து நடமாடி யிங்கே வந்தார்க்
    கெவ்வூரீர் எம்பெருமா னென்றேன் ஆவி
    விட்டிடுமா றதுசெய்து விரைந்து நோக்கி
    வேறோர் பதிபுகப் போவார் போல
    வட்டணைகள் படநடந்து மாயம் பேசி
    வலம்புரமே புக்கங்கே மன்னி னாரே. 6.58.7
    588 பல்லார் பயில்பழனப் பாசூ ரென்றும்
    பழனம் பதிபழமை சொல்லி நின்றார்
    நல்லார் நனிபள்ளி யின்று வைகி
    நாளைப்போய் நள்ளாறு சேர்து மென்றார்
    சொல்லார் ஒருவிடமாத் தோள்கை வீசிச்
    சுந்தரராய் வெந்தநீ றாடி யெங்கும்
    மல்லார் வயல்புடைசூழ் மாடவீதி
    வலம்புரமே புக்கங்கே மன்னி னாரே. 6.58.8
    589 பொங்கா டரவொன்று கையிற் கொண்டு
    போர்வெண் மழுவேந்திப் போகா நிற்பர்
    தங்கா ரொருவிடத்துந் தம்மேல் ஆர்வந்
    தவிர்த்தருளார் தத்துவத்தே நின்றே னென்பர்
    எங்கே யிவர்செய்கை யொன்றொன் றொவ்வா
    என்கண்ணில் நின்றகலா வேடங் காட்டி
    மங்குல் மதிதவழும் மாட வீதி
    வலம்புரமே புக்கங்கே மன்னி னாரே. 6.58.9
    590 செங்கண்மால் சிலைபிடித்துச் சேனை யோடுஞ்
    சேதுபந் தனஞ்செய்து சென்று புக்குப்
    பொங்குபோர் பலசெய்து புகலால் வென்ற
    போரரக்கன் நெடுமுடிகள் பொடியாய் வீழ
    அங்கொருதன் றிருவிரலால் இறையே யூன்றி
    அடர்த்தவற்கே அருள்புரிந்த அடிக ளிந்நாள்
    வங்கமலி கடல்புடைசூழ் மாட வீதி
    வலம்புரமே புக்கங்கே மன்னி னாரே. 6.58.10

    திருச்சிற்றம்பலம்


    6.59 திருவெண்ணி - திருத்தாண்டகம்


    திருச்சிற்றம்பலம்

    591 தொண்டிலங்கும் அடியவர்க்கோர் நெறியி னாருந்
    தூநீறு துதைந்திலங்கு மார்பி னாரும்
    புண்டரிகத் தயனொடுமால் காணா வண்ணம்
    பொங்குதழற் பிழம்பாய புராண னாரும்
    வண்டமரும் மலர்க்கொன்றை மாலை யாரும்
    வானவர்க்காய் நஞ்சுண்ட மைந்த னாரும்
    விண்டவர்தம் புரமூன்று மெரிசெய் தாரும்
    வெண்ணியமர்ந் துறைகின்ற விகிர்த னாரே. 6.59.1
    592 நெருப்பனைய மேனிமேல் வெண்ணீற் றாரும்
    நெற்றிமே லொற்றைக்கண் நிறைவித் தாரும்
    பொருப்பரையன் மடப்பாவை இடப்பா லாரும்
    பூந்துருத்தி நகர்மேய புராண னாரும்
    மருப்பனைய வெண்மதியக் கண்ணி யாரும்
    வளைகுளமும் மறைக்காடும் மன்னி னாரும்
    விருப்புடைய அடியவர்தம் முள்ளத் தாரும்
    வெண்ணியமர்ந் துறைகின்ற விகிர்த னாரே. 6.59.2
    593 கையுலாம் மூவிலைவே லேந்தி னாருங்
    கரிகாட்டி லெரியாடுங் கடவு ளாரும்
    பையுலாம் நாகங்கொண் டாட்டு வாரும்
    பரவுவார் பாவங்கள் பாற்று வாருஞ்
    செய்யுலாங் கயல்பாய வயல்கள் சூழ்ந்த
    திருப்புன்கூர் மேவிய செல்வ னாரும்
    மெய்யுலாம் வெண்ணீறு சண்ணித் தாரும்
    வெண்ணியமர்ந் துறைகின்ற விகிர்த னாரே. 6.59.3
    594 சடையேறு புனல்வைத்த சதுர னாருந்
    தக்கன்றன் பெருவேள்வி தடைசெய் தாரும்
    உடையேறு புலியதள்மேல் நாகங் கட்டி
    உண்பலிக்கென் றூரூரி னுழிதர் வாரும்
    மடையேறிக் கயல்பாய வயல்கள் சூழ்ந்த
    மயிலாடு துறையுறையும் மணாள னாரும்
    விடையேறு வெல்கொடியெம் விமல னாரும்
    வெண்ணியமர்ந் துறைகின்ற விகிர்த னாரே. 6.59.4
    595 மண்ணிலங்கு நீரனல்கால் வானு மாகி
    மற்றவற்றின் குணமெலா மாய்நின் றாரும்
    பண்ணிலங்கு பாடலோ டாட லாரும்
    பருப்பதமும் பாசூரும் மன்னி னாருங்
    கண்ணிலங்கு நுதலாருங் கபால மேந்திக்
    கடைதோறும் பலிகொள்ளுங் காட்சி யாரும்
    விண்ணிலங்கு வெண்மதியக் கண்ணி யாரும்
    வெண்ணியமர்ந் துறைகின்ற விகிர்த னாரே. 6.59.5
    596 வீடுதனை மெய்யடியார்க் கருள்செய் வாரும்
    வேலைவிட முண்டிருண்ட கண்டத் தாருங்
    கூடலர்தம் மூவெயிலு மெரிசெய் தாருங்
    குரைகழலாற் கூற்றுவனைக் குமைசெய் தாரும்
    ஆடுமர வரைக்கசைத்தங் காடு வாரும்
    ஆலமர நீழலிருந் தறஞ்சொன் னாரும்
    வேடுவனாய் மேல்விசயற் கருள்செய் தாரும்
    வெண்ணியமர்ந் துறைகின்ற விகிர்த னாரே. 6.59.6
    597 மட்டிலங்கு கொன்றையந்தார் மாலை சூடி
    மடவா ளவளோடு மானொன் றேந்திச்
    சிட்டிலங்கு வேடத்தா ராகி நாளுஞ்
    சில்பலிக்கென் றூரூர் திரிதர் வாருங்
    கட்டிலங்கு பாசத்தால் வீச வந்த
    காலன்றன் கால மறுப்பார் தாமும்
    விட்டிலங்கு வெண்குழைசேர் காதி னாரும்
    வெண்ணியமர்ந் துறைகின்ற விகிர்த னாரே. 6.59.7
    598 செஞ்சடைக்கோர் வெண்டிங்கள் சூடி னாருந்
    திருவால வாயுறையுஞ் செல்வ னாரும்
    அஞ்சனக்கண் அரிவையொரு பாகத் தாரும்
    ஆறங்கம் நால்வேத மாய்நின் றாரும்
    மஞ்சடுத்த நீள்சோலை மாட வீதி
    மதிலாரூர் புக்கங்கே மன்னி னாரும்
    வெஞ்சினத்த வேழமது வுரிசெய் தாரும்
    வெண்ணியமர்ந் துறைகின்ற விகிர்த னாரே. 6.59.8
    599 வளங்கிளர்மா மதிசூடும் வேணி யாரும்
    வானவர்க்கா நஞ்சுண்ட மைந்த னாருங்
    களங்கொளவென் சிந்தையுள்ளே மன்னி னாருங்
    கச்சியே கம்பத்தெங் கடவு ளாரும்
    உளங்குளிர அமுதூறி அண்ணிப் பாரும்
    உத்தமராய் எத்திசையும் மன்னி னாரும்
    விளங்கிளரும் வெண்மழுவொன் றேந்தி னாரும்
    வெண்ணியமர்ந் துறைகின்ற விகிர்த னாரே. 6.59.9
    600 பொன்னிலங்கு கொன்றையந்தார் மாலை சூடிப்
    புகலூரும் பூவணமும் பொருந்தி னாருங்
    கொன்னிலங்கு மூவிலைவே லேந்தி னாருங்
    குளிரார்ந்த செஞ்சடையெங் குழக னாருந்
    தென்னிலங்கை மன்னவர்கோன் சிரங்கள் பத்துந்
    திருவிரலா லடர்த்தவனுக் கருள்செய் தாரும்
    மின்னிலங்கு நுண்ணிடையாள் பாகத் தாரும்
    வெண்ணியமர்ந் துறைகின்ற விகிர்த னாரே. 6.59.10

    இத்தலம் சோழநாட்டிலுள்ளது.
    சுவாமிபெயர் - வெண்ணிநாயகர்,
    தேவியார் - அழகியநாயகியம்மை.

    திருச்சிற்றம்பலம்


    6.60 திருக்கற்குடி - திருத்தாண்டகம்



    திருச்சிற்றம்பலம்

    601 மூத்தவனை வானவர்க்கு மூவா மேனி
    முதலவனைத் திருவரையின் மூக்கப் பாம்பொன்
    றார்த்தவனை அக்கரவம் ஆர மாக
    அணிந்தவனைப் பணிந்தடியா ரடைந்த வன்போ
    டேத்தவனை இறுவரையிற் றேனை ஏனோர்க்
    கின்னமுதம் அளித்தவனை யிடரை யெல்லாங்
    காத்தவனைக் கற்குடியில் விழுமி யானைக்
    கற்பகத்தைக் கண்ணாரக் கண்டேன் நானே. 6.60.1
    602 செய்யானை வெளியானைக் கரியான் றன்னைத்
    திசைமுகனைத் திசையெட்டுஞ் செறிந்தான் றன்னை
    ஐயானை நொய்யானைச் சீரி யானை
    அணியானைச் சேயானை ஆனஞ் சாடும்
    மெய்யானைப் பொய்யாது மில்லான் றன்னை
    விடையானைச் சடையானை வெறித்த மான்கொள்
    கையானைக் கற்குடியில் விழுமி யானைக்
    கற்பகத்தைக் கண்ணாரக் கண்டேன் நானே. 6.60.2
    603 மண்ணதனில் ஐந்தைமா நீரில் நான்கை
    வயங்கெரியில் மூன்றைமா ருதத்தி ரண்டை
    விண்ணதனி லொன்றை விரிக திரைத்
    தண்மதியைத் தாரகைகள் தம்மின் மிக்க
    எண்ணதனில் எழுத்தையே ழிசையைக் காமன்
    எழிலழிய எரியுமிழ்ந்த இமையா நெற்றிக்
    கண்ணவனைக் கற்குடியில் விழுமி யானைக்
    கற்பகத்தைக் கண்ணாரக் கண்டேன் நானே. 6.60.3
    604 நற்றவனைப் புற்றரவ நாணி னானை
    நாணாது நகுதலையூண் நயந்தான் றன்னை
    முற்றவனை மூவாத மேனி யானை
    முந்நீரின் நஞ்சமுகந் துண்டான் றன்னைப்
    பற்றவனைப் பற்றார்தம் பதிகள் செற்ற
    படையானை அடைவார்தம் பாவம் போக்கக்
    கற்றவனைக் கற்குடியில் விழுமி யானைக்
    கற்பகத்தைக் கண்ணாரக் கண்டேன் நானே. 6.60.4
    605 சங்கைதனைத் தவிர்த்தாண்ட தலைவன் றன்னைச்
    சங்கரனைத் தழலுறுதாள் மழுவாள் தாங்கும்
    அங்கையனை அங்கமணி ஆகத் தானை
    ஆகத்தோர் பாகத்தே அமர வைத்த
    மங்கையனை மதியொடுமா சுணமுந் தம்மின்
    மருவவிரி சடைமுடிமேல் வைத்த வானீர்க்
    கங்கையனைக் கற்குடியில் விழுமி யானைக்
    கற்பகத்தைக் கண்ணாரக் கண்டேன் நானே. 6.60.5
    606 பெண்ணவனை ஆணவனைப் பேடா னானைப்
    பிறப்பிலியை இறப்பிலியைப் பேரா வாணி
    விண்ணவனை விண்ணவர்க்கு மேலா னானை
    வேதியனை வேதத்தின் கீதம் பாடும்
    பண்ணவனைப் பண்ணில்வரு பயனா னானைப்
    பாரவனைப் பாரில்வாழ் உயிர்கட் கெல்லாங்
    கண்ணவனைக் கற்குடியில் விழுமி யானைக்
    கற்பகத்தைக் கண்ணாரக் கண்டேன் நானே. 6.60.6
    607 பண்டானைப் பரந்தானைக் குவிந்தான் றன்னைப்
    பாரானை விண்ணாயிவ் வுலக மெல்லாம்
    உண்டானை உமிழ்ந்தானை உடையான் றன்னை
    ஒருவருந்தன் பெருமைதனை அறிய வொண்ணா
    விண்டானை விண்டார்தம் புரங்கள் மூன்றும்
    வெவ்வழலில் வெந்துபொடி யாகி வீழக்
    கண்டானைக் கற்குடியில் விழுமி யானைக்
    கற்பகத்தைக் கண்ணாரக் கண்டேன் நானே. 6.60.7
    608 வானவனை வானவர்க்கு மேலா னானை
    வணங்குமடி யார்மனத்துள் மருவிப் புக்க
    தேனவனைத் தேவர்தொழு கழலான் றன்னைச்
    செய்குணங்கள் பலவாகி நின்ற வென்றிக்
    கோனவனைக் கொல்லைவிடை யேற்றி னானைக்
    குழல்முழவம் இயம்பக்கூத் தாட வல்ல
    கானவனைக் கற்குடியில் விழுமி யானைக்
    கற்பகத்தைக் கண்ணாரக் கண்டேன் நானே. 6.60.8
    609 கொலையானை யுரிபோர்த்த கொள்கை யானைக்
    கோளரியைக் கூரம்பா வரைமேற் கோத்த
    சிலையானைச் செம்மைதரு பொருளான் றன்னைத்
    திரிபுரத்தோர் மூவர்க்குச் செம்மை செய்த
    தலையானைத் தத்துவங்க ளானான் றன்னைத்
    தையலோர் பங்கினனைத் தன்கை யேந்து
    கலையானைக் கற்குடியில் விழுமி யானைக்
    கற்பகத்தைக் கண்ணாரக் கண்டேன் நானே. 6.60.9
    610 பொழிலானைப் பொழிலாரும் புன்கூ ரானைப்
    புறம்பயனை அறம்புரிந்த புகலூ ரானை
    எழிலானை இடைமருதி னிடங்கொண் டானை
    ஈங்கோய்நீங் காதுறையும் இறைவன் றன்னை
    அழலாடு மேனியனை அன்று சென்றக்
    குன்றெடுத்த அரக்கன்றோள் நெரிய வூன்றுங்
    கழலானைக் கற்குடியில் விழுமி யானைக்
    கற்பகத்தைக் கண்ணாரக் கண்டேன் நானே. 6.60.10

    இத்தலம் சோழநாட்டிலுள்ளது.
    சுவாமிபெயர் - முத்தீசர்,
    தேவியார் - அஞ்சனாட்சியம்மை.

    திருச்சிற்றம்பலம்


    6.61 திருக்கன்றாப்பூர் - திருத்தாண்டகம்


    திருச்சிற்றம்பலம்

    611 மாதினையோர் கூறுகந்தாய் மறைகொள் நாவா
    மதிசூடி வானவர்கள் தங்கட் கெல்லாம்
    நாதனே யென்றென்று பரவி நாளும்
    நைந்துருகி வஞ்சகமற் றன்பு கூர்ந்து
    வாதனையால் முப்பொழுதும் பூநீர் கொண்டு
    வைகல் மறவாது வாழ்த்தி யேத்திக்
    காதன்மையாற் றொழுமடியார் நெஞ்சி னுள்ளே
    கன்றாப்பூர் நடுதறியைக் காண லாமே. 6.61.1
    612 விடிவதுமே வெண்ணீற்றை மெய்யிற் பூசி
    வெளுத்தமைந்த கீளொடுகோ வணமுந் தற்றுச்
    செடியுடைய வல்வினைநோய் தீர்ப்பா யென்றுஞ்
    செல்கதிக்கு வழிகாட்டுஞ் சிவனே யென்றுந்
    துடியனைய இடைமடவாள் பங்கா வென்றுஞ்
    சுடலைதனில் நடமாடுஞ் சோதி யென்றுங்
    கடிமலர்தூய்த் தொழுமடியார் நெஞ்சி னுள்ளே
    கன்றாப்பூர் நடுதறியைக் காண லாமே. 6.61.2
    613 எவரேனுந் தாமாக விலாடத் திட்ட
    திருநீறுஞ் சாதனமுங் கண்டா லுள்கி
    உவராதே அவரவரைக் கண்ட போது
    உகந்தடிமைத் திறநினைந்தங் குவந்து நோக்கி
    இவர்தேவ ரவர்தேவ ரென்று சொல்லி
    இரண்டாட்டா தொழிந்தீசன் றிறமே பேணிக்
    கவராதே தொழுமடியார் நெஞ்சி னுள்ளே
    கன்றாப்பூர் நடுதறியைக் காண லாமே. 6.61.3
    614 இலங்காலஞ் செல்லாநா ளென்று நெஞ்சத்
    திடையாதே யாவர்க்கும் பிச்சை யிட்டு
    விலங்காதே நெறிநின்றங் கறிவே மிக்கு
    மெய்யன்பு மிகப்பெய்து பொய்யை நீக்கித்
    துலங்காமெய் வானவரைக் காத்து நஞ்சம்
    உண்டபிரா னடியிணைக்கே சித்தம் வைத்துக்
    கலங்காதே தொழுமடியார் நெஞ்சி னுள்ளே
    கன்றாப்பூர் நடுதறியைக் காண லாமே. 6.61.4
    615 விருத்தனே வேலைவிட முண்ட கண்டா
    விரிசடைமேல் வெண்டிங்கள் விளங்கச் சூடும்
    ஒருத்தனே உமைகணவா உலக மூர்த்தி
    நுந்தாத வொண்சுடரே அடியார் தங்கள்
    பொருத்தனே யென்றென்று புலம்பி நாளும்
    புலனைந்தும் அகத்தடக்கிப் புலம்பி நோக்கிக்
    கருத்தினாற் றொழுமடியார் நெஞ்சி னுள்ளே
    கன்றாப்பூர் நடுதறியைக் காண லாமே. 6.61.5
    616 பொசியினால் மிடைந்துபுழுப் பொதிந்த போர்வைப்
    பொல்லாத புலாலுடம்பை நிலாசு மென்று
    பசியினால் மீதூரப் பட்டே யீட்டிப்
    பலர்க்குதவ லதுவொழிந்து பவள வாயார்
    வசியினா லகப்பட்டு வீழா முன்னம்
    வானவர்கோன் திருநாமம் அஞ்சுஞ் சொல்லிக்
    கசிவினாற் றொழுமடியார் நெஞ்சி னுள்ளே
    கன்றாப்பூர் நடுதறியைக் காண லாமே. 6.61.6
    617 ஐயினால் மிடறடைப்புண் டாக்கை விட்டு
    ஆவியார் போவதுமே அகத்தார் கூடி
    மையினாற் கண்ணெழுதி மாலை சூட்டி
    மயானத்தி லிடுவதன்முன் மதியஞ் சூடும்
    ஐயனார்க் காளாகி அன்பு மிக்கு
    அகங்குழைந்து மெய்யரும்பி அடிகள் பாதங்
    கையினாற் றொழுமடியார் நெஞ்சி னுள்ளே
    கன்றாப்பூர் நடுதறியைக் காண லாமே. 6.61.7
    618 திருதிமையால் ஐவரையுங் காவ லேவித்
    திகையாதே சிவாயநம என்னுஞ் சிந்தைச்
    சுருதிதனைத் துயக்கறுத்துத் துன்ப வெள்ளக்
    கடல்நீந்திக் கரையேறுங் கருத்தே மிக்குப்
    பருதிதனைப் பற்பறித்த பாவ நாசா
    பரஞ்சுடரே யென்றென்று பரவி நாளுங்
    கருதிமிகத் தொழுமடியார் நெஞ்சி னுள்ளே
    கன்றாப்பூர் நடுதறியைக் காண லாமே. 6.61.8
    இப்பதிகத்தில் 9-ம் செய்யுள் சிதைந்து போயிற்று. 6.61.9
    619 குனிந்தசிலை யாற்புரமூன் றெரித்தா யென்றுங்
    கூற்றுதைத்த குரைகழற்சே வடியா யென்றுந்
    தனஞ்சயற்குப் பாசுபத மீந்தா யென்றுந்
    தசக்கிரிவன் மலையெடுக்க விரலா லூன்றி
    முனிந்தவன்றன் சிரம்பத்துந் தாளுந் தோளும்
    முரணழித்திட் டருள்கொடுத்த மூர்த்தி யென்றுங்
    கனிந்துமிகத் தொழுமடியார் நெஞ்சி னுள்ளே
    கன்றாப்பூர் நடுதறியைக் காண லாமே. 6.61.10

    இத்தலம் சோழநாட்டிலுள்ளது.
    சுவாமிபெயர் - நடுதறிநன்னாயகர்,
    தேவியார் - மாதுமைநாயகியம்மை.

    திருச்சிற்றம்பலம்


    6.62 திருவானைக்கா - திருத்தாண்டகம்


    திருச்சிற்றம்பலம்

    620 எத்தாயர் எத்தந்தை எச்சுற் றத்தார்
    எம்மாடு சும்மாடாம் ஏவர் நல்லார்
    செத்தால்வந் துதவுவார் ஒருவ ரில்லை
    சிறுவிறகால் தீமூட்டிச் செல்லா நிற்பர்
    சித்தாய வேடத்தாய் நீடு பொன்னித்
    திருவானைக் காவுடைய செல்வா என்றன்
    அத்தாவுன் பொற்பாத மடையப் பெற்றால்
    அல்லகண்டங் கொண்டடியேன் என்செய் கேனே. 6.62.1
    621 ஊனாகி உயிராகி யதனுள் நின்ற
    உணர்வாகிப் பிறவனைத்தும் நீயாய் நின்றாய்
    நானேதும் அறியாமே யென்னுள் வந்து
    நல்லனவுந் தீயனவுங் காட்டா நின்றாய்
    தேனாருங் கொன்றையனே நின்றி யூராய்
    திருவானைக் காவிலுறை சிவனே ஞானம்
    ஆனாயுன் பொற்பாத மடையப் பெற்றால்
    அல்லகண்டங் கொண்டடியேன் என்செய் கேனே. 6.62.2
    622 ஒப்பாயிவ் வுலகத்தோ டொட்டி வாழ்வான்
    ஒன்றலாத் தவத்தாரோ டுடனே நின்று
    துப்பாருங் குறையடிசில் துற்றி நற்றுன்
    திறமறந்து திரிவேனைக் காத்து நீவந்
    தெப்பாலும் நுண்ணுணர்வே யாக்கி யென்னை
    ஆண்டவனே எழிலானைக் காவா வானோர்
    அப்பாவுன் பொற்பாத மடையப் பெற்றால்
    அல்லகண்டங் கொண்டடியேன் என்செய் கேனே. 6.62.3
    623 நினைத்தவர்கள் நெஞ்சுளாய் வஞ்சக் கள்வா
    நிறைமதியஞ் சடைவைத்தாய் அடையா துன்பால்
    முனைத்தவர்கள் புரமூன்று மெரியச் செற்றாய்
    முன்னானைத் தோல்போர்த்த முதல்வா வென்றுங்
    கனைத்துவரும் எருதேறுங் காள கண்டா
    கயிலாய மலையாநின் கழலே சேர்ந்தேன்
    அனைத்துலகும் ஆள்வானே ஆனைக் காவா
    அல்லகண்டங் கொண்டடியேன் என்செய் கேனே. 6.62.4
    624 இம்மாயப் பிறப்பென்னுங் கடலாந் துன்பத்
    திடைச்சுழிப்பட் டிளைப்பேனை இளையா வண்ணங்
    கைம்மான மனத்துதவிக் கருணை செய்து
    காதலரு ளவைவைத்தாய் காண நில்லாய்
    வெம்மான மதகரியி னுரிவை போர்த்த
    வேதியனே தென்னானைக் காவுள் மேய
    அம்மான்நின் பொற்பாத மடையப் பெற்றால்
    அல்லகண்டங் கொண்டடியேன் என்செய் கேனே. 6.62.5
    625 உரையாரும் புகழானே ஒற்றி யூராய்
    கச்சியே கம்பனே காரோ ணத்தாய்
    விரையாரும் மலர்தூவி வணங்கு வார்பால்
    மிக்கானே அக்கரவம் ஆரம் பூண்டாய்
    திரையாரும் புனற்பொன்னித் தீர்த்த மல்கு
    திருவானைக் காவிலுறை தேனே வானோர்
    அரையாவுன் பொற்பாத மடையப் பெற்றால்
    அல்லகண்டங் கொண்டடியேன் என்செய் கேனே. 6.62.6
    626 மையாரும் மணிமிடற்றாய் மாதோர் கூறாய்
    மான்மறியு மாமழுவும் அனலு மேந்துங்
    கையானே காலனுடல் மாளச் செற்ற
    கங்காளா முன்கோளும் விளைவு மானாய்
    செய்யானே திருமேனி யரியாய் தேவர்
    குலக்கொழுந்தே தென்னானைக் காவுள் மேய
    ஐயாவுன் பொற்பாத மடையப் பெற்றால்
    அல்லகண்டங் கொண்டடியேன் என்செய் கேனே. 6.62.7
    627 இலையாருஞ் சூலத்தாய் எண்தோ ளானே
    எவ்விடத்தும் நீயலா தில்லை யென்று
    தலையாரக் கும்பிடுவார் தன்மை யானே
    தழல்மடுத்த மாமேரு கையில் வைத்த
    சிலையானே திருவானைக் காவுள் மேய
    தீயாடீ சிறுநோயால் நலிவுண் டுள்ளம்
    அலையாதே நின்னடியே அடையப் பெற்றால்
    அல்லகண்டங் கொண்டடியேன் என்செய் கேனே. 6.62.8
    628 விண்ணாரும் புனல்பொதிசெஞ் சடையாய் வேத
    நெறியானே எறிகடலின் நஞ்ச முண்டாய்
    எண்ணாரும் புகழானே உன்னை யெம்மான்
    என்றென்றே நாவினிலெப் பொழுதும் உன்னிக்
    கண்ணாரக் கண்டிருக்கக் களித்தெப் போதுங்
    கடிபொழில்சூழ் தென்னானைக் காவுள் மேய
    அண்ணாநின் பொற்பாத மடையப் பெற்றால்
    அல்லகண்டங் கொண்டடியேன் என்செய் கேனே. 6.62.9
    629 கொடியேயும் வெள்ளேற்றாய் கூளி பாடக்
    குறட்பூதங் கூத்தாட நீயு மாடி
    வடிவேயும் மங்கைதனை வைத்த மைந்தா
    மதிலானைக் காவுளாய் மாகா ளத்தாய்
    படியேயுங் கடலிலங்கைக் கோமான் றன்னைப்
    பருமுடியுந் திரள்தோளு மடர்த்து கந்த
    அடியேவந் தடைந்தடிமை யாகப் பெற்றால்
    அல்லகண்டங் கொண்டடியேன் என்செய் கேனே. 6.62.10

    திருச்சிற்றம்பலம்


    6.63 திருவானைக்கா - திருத்தாண்டகம்


    திருச்சிற்றம்பலம்

    630 முன்னானைத் தோல்போர்த்த மூர்த்தி தன்னை
    மூவாத சிந்தையே மனமே வாக்கே
    தன்னானை யாப்பண்ணி யேறி னானைச்
    சார்தற் கரியானைத் தாதை தன்னை
    என்னானைக் கன்றினையென் ஈசன் றன்னை
    எறிநீர்த் திரையுகளுங் காவி ரிசூழ்
    தென்னானைக் காவானைத் தேனைப் பாலைச்
    செழுநீர்த் திரளைச்சென் றாடி னேனே. 6.63.1
    631 மருந்தானை மந்திரிப்பார் மனத்து ளானை
    வளர்மதியஞ் சடையானை மகிழ்ந்தென் னுள்ளத்
    திருந்தானை இறப்பிலியைப் பிறப்பி லானை
    இமையவர்தம் பெருமானை உமையா ளஞ்சக்
    கருந்தான மதகளிற்றி னுரிபோர்த் தானைக்
    கனமழுவாட் படையானைப் பலிகொண் டூரூர்
    திரிந்தானைத் திருவானைக் காவு ளானைச்
    செழுநீர்த் திரளைச்சென் றாடி னேனே. 6.63.2
    632 முற்றாத வெண்டிங்கட் கண்ணி யானை
    முந்நீர்நஞ் சுண்டிமையோர்க் கமுதம் நல்கும்
    உற்றானைப் பல்லுயிர்க்குந் துணையா னானை
    ஓங்காரத் துட்பொருளை உலக மெல்லாம்
    பெற்றானைப் பின்னிறக்கஞ் செய்வான் றன்னைப்
    பிரானென்று போற்றாதார் புரங்கள் மூன்றுஞ்
    செற்றானைத் திருவானைக் காவு ளானைச்
    செழுநீர்த் திரளைச்சென் றாடி னேனே. 6.63.3
    633 காராரு மணிமிடற்றெம் பெருமான் றன்னைக்
    காதில்வெண் குழையானைக் கமழ்பூங் கொன்றைத்
    தாரானைப் புலியதளி னாடை யானைத்
    தானன்றி வேறொன்று மில்லா ஞானப்
    பேரானை மணியார மார்பி னானைப்
    பிஞ்ஞகனைத் தெய்வநான் மறைகள் பூண்ட
    தேரானைத் திருவானைக் காவு ளானைச்
    செழுநீர்த் திரளைச்சென் றாடி னேனே. 6.63.4
    634 பொய்யேது மில்லாத மெய்யன் றன்னைப்
    புண்ணியனை நண்ணாதார் புரநீ றாக
    எய்தானைச் செய்தவத்தின் மிக்கான் றன்னை
    ஏறமரும் பெருமானை இடமா னேந்து
    கையானைக் கங்காள வேடத் தானைக்
    கட்டங்கக் கொடியானைக் கனல்போல் மேனிச்
    செய்யானைத் திருவானைக் காவு ளானைச்
    செழுநீர்த் திரளைச்சென் றாடி னேனே. 6.63.5
    635 கலையானைப் பாசுபதப் பாணி யானைக்
    கனவயிரத் திரளானை மணிமா ணிக்க
    மலையானை யென்றலையி னுச்சி யானை
    வார்தருபுன் சடையானை மயான மன்னும்
    நிலையானை வரியரவு நாணாக் கோத்து
    நினையாதார் புரமெரிய வளைத்த மேருச்
    சிலையானைத் திருவானைக் காவு ளானைச்
    செழுநீர்த் திரளைச்சென் றாடி னேனே. 6.63.6
    636 ஆதியனை எறிமணியின் ஓசை யானை
    அண்டத்தார்க் கறிவொண்ணா தப்பால் மிக்க
    சோதியனைத் தூமறையின் பொருளான் றன்னைச்
    சுரும்பமரும் மலர்க்கொன்றைத் தொன்னூல் பூண்ட
    வேதியனை அறமுரைத்த பட்டன் றன்னை
    விளங்குமல ரயன்சிரங்கள் ஐந்தி லொன்றைச்
    சேதியனைத் திருவானைக் காவு ளானைச்
    செழுநீர்த் திரளைச்சென் றாடி னேனே. 6.63.7
    637 மகிழ்ந்தானைக் கச்சியே கம்பன் றன்னை
    மறவாது கழல்நினைந்து வாழ்த்தி யேத்திப்
    புகழ்ந்தாரைப் பொன்னுலகம் ஆள்விப் பானைப்
    பூதகணப் படையானைப் புறங்காட் டாடல்
    உகந்தானைப் பிச்சையே யிச்சிப் பானை
    ஒண்பவளத் திரளையென் னுள்ளத் துள்ளே
    திகழ்ந்தானைத் திருவானைக் காவு ளானைச்
    செழுநீர்த் திரளைச்சென் றாடி னேனே. 6.63.8
    638 நசையானை நால்வேதத் தப்பா லானை
    நல்குரவுந் தீப்பிணிநோய் காப்பான் றன்னை
    இசையானை எண்ணிறந்த குணத்தான் றன்னை
    இடைமருதும் ஈங்கோயும் நீங்கா தேற்றின்
    மிசையானை விரிகடலும் மண்ணும் விண்ணும்
    மிகுதீயும் புனலெறிகாற் றாகி யெட்டுத்
    திசையானைத் திருவானைக் காவு ளானைச்
    செழுநீர்த் திரளைச்சென் றாடி னேனே. 6.63.9
    639 பார்த்தானைக் காமனுடல் பொடியாய் வீழப்
    பண்டயன்மா லிருவர்க்கும் அறியா வண்ணஞ்
    சீர்த்தானைச் செந்தழல்போ லுருவி னானைத்
    தேவர்கள்தம் பெருமானைத் திறமுன் னாதே
    ஆர்த்தோடி மலையெடுத்த இலங்கை வேந்தன்
    ஆண்மையெலாங் கெடுத்தவன்றன் இடரப் போதே
    தீர்த்தானைத் திருவானைக் காவு ளானைச்
    செழுநீர்த் திரளைச்சென் றாடி னேனே. 6.63.10

    திருச்சிற்றம்பலம்


    6.64 திருவேகம்பம் - திருத்தாண்டகம்


    திருச்சிற்றம்பலம்

    640 கூற்றுவன்காண் கூற்றுவனைக் குமைத்த கோன்காண்
    குவலயன்காண் குவலயத்தின் நீரா னான்காண்
    காற்றவன்காண் கனலவன்காண் கலிக்கும் மின்காண்
    கனபவளச் செம்மேனி கலந்த வெள்ளை
    நீற்றவன்காண் நிலாவூருஞ் சென்னி யான்காண்
    நிறையார்ந்த புனற்கங்கை நிமிர்ச டைமேல்
    ஏற்றவன்காண் எழிலாறும் பொழிலார் கச்சி
    ஏகம்பன் காணவனென் எண்ணத் தானே. 6.64.1
    641 பரந்தவன்காண் பல்லுயிர்க ளாகி யெங்கும்
    பணிந்தெழுவார் பாவமும் வினையும் போகத்
    துரந்தவன்காண் தூமலரங் கண்ணி யான்காண்
    தோற்ற நிலையிறுதிப் பொருளாய் வந்த
    மருந்தவன்காண் வையங்கள் பொறைதீர்ப் பான்காண்
    மலர்தூவி நினைந்தெழுவா ருள்ளம் நீங்கா
    திருந்தவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.64.2
    642 நீற்றவன்காண் நீராகித் தீயா னான்காண்
    நிறைமழுவுந் தமருகமும் எரியுங் கையில்
    தோற்றவன்காண் தோற்றக்கே டில்லா தான்காண்
    துணையிலிகாண் துணையென்று தொழுவா ருள்ளம்
    போற்றவன்காண் புகழ்கள்தமைப் படைத்தான் றான்காண்
    பொறியரவும் விரிசடைமேற் புனலுங் கங்கை
    ஏற்றவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.64.3
    643 தாயவன்காண் உலகிற்குத் தன்னொப் பில்லாத்
    தத்துவன்காண் மலைமங்கை பங்கா வென்பார்
    வாயவன்காண் வரும்பிறவி நோய்தீர்ப் பான்காண்
    வானவர்க்குந் தானவர்க்கும் மண்ணு ளோர்க்குஞ்
    சேயவன்காண் நினைவார்க்குச் சித்த மாரத்
    திருவடியே உள்கிநினைந் தெழுவா ருள்ளம்
    ஏயவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.64.4
    644 அடுத்தானை யுரித்தான் காண் .. ..
    .. .. .. ..

    இச்செய்யுளில் எஞ்சிய பாகம் சிதைந்து போயிற்று. 6.64.5
    645 அழித்தவன்காண் எயில்மூன்றும் அயில்வா யம்பால்
    ஐயாறும் இடைமருதும் ஆள்வான் றான்காண்
    பழித்தவன்காண் அடையாரை அடைவார் தங்கள்
    பற்றவன்காண் புற்றரவ நாணி னான்காண்
    சுழித்தவன்காண் முடிக்கங்கை அடியே போற்றுந்
    தூயமா முனிவர்க்காப் பார்மேல் நிற்க
    இழித்தவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.64.6
    646 அசைந்தவன்காண் நடமாடிப் பாடல் பேணி
    அழல்வண்ணத் தில்லடியும் முடியுந் தேடப்
    பசைந்தவன்காண் பேய்க்கணங்கள் பரவி யேத்தும்
    பான்மையன்காண் பரவிநினைந் தெழுவார் தம்பால்
    கசிந்தவன்காண் கரியினுரி போர்த்தான் றான்காண்
    கடலில்விட முண்டமரர்க் கமுத மீய
    இசைந்தவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.64.7
    647 முடித்தவன்காண் வன்கூற்றைச் சீற்றத் தீயால்
    வலியார்தம் புரமூன்றும் வேவச் சாபம்
    பிடித்தவன்காண் பிஞ்ஞகனாம் வேடத் தான்காண்
    பிணையல்வெறி கமழ்கொன்றை அரவு சென்னி
    முடித்தவன்காண் மூவிலைநல் வேலி னான்காண்
    முழங்கியுரு மெனத்தோன்று மழையாய் மின்னி
    இடித்தவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.64.8
    648 வருந்தான்காண் மனமுருகி நினையா தார்க்கு
    வஞ்சகன்காண் அஞ்செழுத்து நினைவார்க் கென்றும்
    மருந்தவன்காண் வான்பிணிகள் தீரும் வண்ணம்
    வானகமும் மண்ணகமு மற்று மாகிப்
    பரந்தவன்காண் படர்சடையெட் டுடையான் றான்காண்
    பங்கயத்தோன் றன்சிரத்தை யேந்தி யூரூர்
    இரந்தவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.64.9
    649 வெம்மான உழுவையத ளுரிபோர்த் தான்காண்
    வேதத்தின் பொருளான்காண் என்றி யம்பி
    விம்மாநின் றழுவார்கட் களிப்பான் றான்காண்
    விடையேறித் திரிவான்காண் நடஞ்செய் பூதத்
    தம்மான்காண் அகலிடங்கள் தாங்கி னான்காண்
    அற்புதன்காண் சொற்பதமுங் கடந்து நின்ற
    எம்மான்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.64.10
    650 அறுத்தான்காண் அயன்சிரத்தை அமரர் வேண்ட
    ஆழ்கடலின் நஞ்சுண்டங் கணிநீர்க் கங்கை
    செறுத்தான்காண் தேவர்க்குந் தேவன் றான்காண்
    திசையனைத்துந் தொழுதேத்தக் கலைமான் கையிற்
    பொறுத்தான்காண் புகலிடத்தை நலிய வந்து
    பொருகயிலை யெடுத்தவன்றன் முடிதோள் நாலஞ்
    சிறுத்தான்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.64.11

    திருச்சிற்றம்பலம்


    6.65 திருவேகம்பம் - திருத்தாண்டகம்


    திருச்சிற்றம்பலம்

    651 உரித்தவன்காண் உரக்களிற்றை உமையாள் ஒல்க
    ஓங்காரத் தொருவன்காண் உணர்மெய்ஞ் ஞானம்
    விரித்தவன்காண் விரித்தநால் வேதத் தான்காண்
    வியனுலகிற் பல்லுயிரை விதியி னாலே
    தெரித்தவன்காண் சில்லுருவாய்த் தோன்றி யெங்குந்
    திரண்டவன்காண் திரிபுரத்தை வேவ வில்லால்
    எரித்தவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.65.1
    652 நேசன்காண் நேசர்க்கு நேசந் தன்பால்
    இல்லாத நெஞ்சத்து நீசர் தம்மைக்
    கூசன்காண் கூசாதார் நெஞ்சு தஞ்சே
    குடிகொண்ட குழகன்காண் அழகார் கொன்றை
    வாசன்காண் மலைமங்கை பங்கன் றான்காண்
    வானவர்கள் எப்பொழுதும் வணங்கி யேத்தும்
    ஈசன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.65.2
    653 பொறையவன்காண் பூமியேழ் தாங்கி யோங்கும்
    புண்ணியன்காண் நண்ணியபுண் டரிகப் போதின்
    மறையவன்காண் மறையவனைப் பயந்தோன் றான்காண்
    வார்சடைமா சுணமணிந்து வளரும் பிள்ளைப்
    பிறையவன்காண் பிறைதிகழும் எயிற்றுப் பேழ்வாய்ப்
    பேயோடங் கிடுகாட்டில் எல்லி யாடும்
    இறையவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.65.3
    654 பாரவன்காண் விசும்பவன்காண் பவ்வந் தான்காண்
    பனிவரைகள் இரவினொடு பகலாய் நின்ற
    சீரவன்காண் திசையவன்காண் திசைக ளெட்டுஞ்
    செறிந்தவன்காண் சிறந்தடியார் சிந்தை செய்யும்
    பேரவன்காண் பேராயி ரங்க ளேத்தும்
    பெரியவன்காண் அரியவன்காண் பெற்ற மூர்ந்த
    ஏரவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.65.4
    655 பெருந்தவத்தெம் பிஞ்ஞகன்காண் பிறைசூ டிகாண்
    பேதையேன் வாதையுறு பிணியைத் தீர்க்கும்
    மருந்தவன்காண் மந்திரங்க ளாயி னான்காண்
    வானவர்கள் தாம்வணங்கும் மாதே வன்காண்
    அருந்தவத்தான் ஆயிழையாள் உமையாள் பாகம்
    அமர்ந்தவன்காண் அமரர்கள்தாம் அர்ச்சித் தேத்த
    இருந்தவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.65.5
    656 ஆய்ந்தவன்காண் அருமறையோ டங்க மாறும்
    அணிந்தவன்காண் ஆடரவோ டென்பு மாமை
    காய்ந்தவன்காண் கண்ணழலாற் காம னாகங்
    கனன்றெழுந்த காலனுடல் பொடியாய் வீழப்
    பாய்ந்தவன்காண் பண்டுபல சருகாற் பந்தர்
    பயின்றநூற் சிலந்திக்குப் பாராள் செல்வம்
    ஈந்தவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.65.6
    657 உமையவளை யொருபாகஞ் சேர்த்தி னான்காண்
    உகந்தொலிநீர்க் கங்கைசடை யொழுக்கி னான்காண்
    இமய வடகயிலைச் செல்வன் றான்காண்
    இல்பலிக்குச் சென்றுழலும் நல்கூர்ந் தான்காண்
    சமயமவை ஆறினுக்குந் தலைவன் றான்காண்
    தத்துவன்காண் உத்தமன்காண் தானே யாய
    இமையவன்காண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.65.7
    658 தொண்டுபடு தொண்டர்துயர் தீர்ப்பான் றான்காண்
    தூமலர்ச்சே வடியிணையெஞ் சோதி யான்காண்
    உண்டுபடு விடங்கண்டத் தொடுக்கி னான்காண்
    ஒலிகடலி லமுதமரர்க் குதவி னான்காண்
    வண்டுபடு மலர்க்கொன்றை மாலை யான்காண்
    வாண்மதியாய் நாண்மீனு மாயி னான்காண்
    எண்டிசையும் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.65.8
    659 முந்தைகாண் மூவரினு முதலா னான்காண்
    மூவிலைவேல் மூர்த்திகாண் முருக வேட்குத்
    தந்தைகாண் தண்கடமா முகத்தி னாற்குத்
    தாதைகாண் தாழ்ந்தடியே வணங்கு வார்க்குச்
    சிந்தைகாண் சிந்தாத சித்தத் தார்க்குச்
    சிவனவன்காண் செங்கண்மால் விடையொன் றேறும்
    எந்தைகாண் எழிலாரும் பொழிலார் கச்சி
    ஏகம்பன் காணவனென் எண்ணத் தானே. 6.65.9
    660 பொன்னிசையும் புரிசடையெம் புனிதன் றான்காண்
    பூதகண நாதன்காண் புலித்தோ லாடை
    தன்னிசைய வைத்தவெழி லரவி னான்காண்
    சங்கவெண் குழைக்காதிற் சதுரன் றான்காண்
    மின்னிசையும் வெள்ளெயிற்றோன் வெகுண்டு வெற்பை
    எடுக்கவடி அடர்ப்பமீண் டவன்றன் வாயில்
    இன்னிசைகேட் டிலங்கொளிவாள் ஈந்தோன் கச்சி
    ஏகம்பன் காணவனென் எண்ணத் தானே. 6.65.10

    திருச்சிற்றம்பலம்


    6.66 திருநாகேச்சரம் - திருத்தாண்டகம்


    திருச்சிற்றம்பலம்

    661 தாயவனை வானோர்க்கும் ஏனோ ருக்குந்
    தலையவனை மலையவனை உலக மெல்லாம்
    ஆயவனைச் சேயவனை அணியான் றன்னை
    அழலவனை நிழலவனை அறிய வொண்ணா
    மாயவனை மறையவனை மறையோர் தங்கள்
    மந்திரனைத் தந்திரனை வளரா நின்ற
    தீயவனைத் திருநாகேச் சரத்து ளானைச்
    சேராதார் நன்னெறிக்கட் சேரா தாரே. 6.66.1
    662 உரித்தானை மதவேழந் தன்னை மின்னார்
    ஒளிமுடியெம் பெருமானை உமையோர் பாகந்
    தரித்தானைத் தரியலர்தம் புரமெய் தானைத்
    தன்னடைந்தார் தம்வினைநோய் பாவ மெல்லாம்
    அரித்தானை ஆலதன்கீழ் இருந்து நால்வர்க்
    கறம்பொருள்வீ டின்பமா றங்கம் வேதந்
    தெரித்தானைத் திருநாகேச் சரத்து ளானைச்
    சேராதார் நன்னெறிக்கட் சேரா தாரே. 6.66.2
    663 காரானை உரிபோர்த்த கடவுள் தன்னைக்
    காதலித்து நினையாத கயவர் நெஞ்சில்
    வாரானை மதிப்பவர்தம் மனத்து ளனை
    மற்றொருவர் தன்னொப்பா ரொப்பி லாத
    ஏரானை இமையவர்தம் பெருமான் றன்னை
    இயல்பாகி உலகெலாம் நிறைந்து மிக்க
    சீரானைத் திருநாகேச் சரத்து ளானைச்
    சேராதார் நன்னெறிக்கட் சேரா தாரே. 6.66.3
    664 தலையானை எவ்வுலகுந் தானா னானைத்
    தன்னுருவம் யாவர்க்கு மறிய வொண்ணா
    நிலையானை நேசர்க்கு நேசன் றன்னை
    நீள்வான முகடதனைத் தாங்கி நின்ற
    மலையானை வரியரவு நாணாக் கோத்து
    வல்லசுரர் புரமூன்று மடிய வெய்த
    சிலையானைத் திருநாகேச் சரத்து ளானைச்
    சேராதார் நன்னெறிக்கட் சேரா தாரே. 6.66.4
    665 மெய்யானைத் தன்பக்கல் விரும்பு வார்க்கு
    விரும்பாத அரும்பாவி யவர்கட் கென்றும்
    பொய்யானைப் புறங்காட்டி லாட லானைப்
    பொன்பொலிந்த சடையானைப் பொடிகொள் பூதிப்
    பையானைப் பையரவ மசைத்தான் றன்னைப்
    பரந்தானைப் பவளமால் வரைபோல் மேனிச்
    செய்யானைத் திருநாகேச் சரத்து ளானைச்
    சேராதார் நன்னெறிக்கட் சேரா தாரே. 6.66.5
    666 துறந்தானை அறம்புரியாத் துரிசர் தம்மைத்
    தோத்திரங்கள் பலசொல்லி வானோ ரேத்த
    நிறைந்தானை நீர்நிலந்தீ வெளிகாற் றாகி
    நிற்பனவும் நடப்பனவு மாயி னானை
    மறந்தானைத் தன்னினையா வஞ்சர் தம்மை
    அஞ்செழுத்தும் வாய்நவில வல்லோர்க் கென்றுஞ்
    சிறந்தானைத் திருநாகேச் சரத்து ளானைச்
    சேராதார் நன்னெறிக்கட் சேரா தாரே. 6.66.6
    667 மறையானை மால்விடையொன் றூர்தி யானை
    மால்கடல்நஞ் சுண்டானை வானோர் தங்கள்
    இறையானை என்பிறவித் துயர்தீர்ப் பானை
    இன்னமுதை மன்னியசீர் ஏகம் பத்தில்
    உறைவானை ஒருவருமீங் கறியா வண்ணம்
    என்னுள்ளத் துள்ளே யொளித்து வைத்த
    சிறையானைத் திருநாகேச் சரத்து ளானைச்
    சேராதார் நன்னெறிக்கட் சேரா தாரே. 6.66.7
    668 எய்தானைப் புரமூன்றும் இமைக்கும் போதில்
    இருவிசும்பில் வருபுனலைத் திருவார் சென்னிப்
    பெய்தானைப் பிறப்பிலியை அறத்தில் நில்லாப்
    பிரமன்றன் சிரமொன்றைக் கரமொன் றினாற்
    கொய்தானைக் கூத்தாட வல்லான் றன்னைக்
    குறியிலாக் கொடியேனை அடியே னாகச்
    செய்தானைத் திருநாகேச் சரத்து ளானைச்
    சேராதார் நன்னெறிக்கட் சேரா தாரே. 6.66.8
    669 அளியானை அண்ணிக்கும் ஆன்பால் தன்னை
    வான்பயிரை அப்பயிரின் வாட்டந் தீர்க்குந்
    துளியானை அயன்மாலுந் தேடிக் காணாச்
    சுடரானைத் துரிசறத் தொண்டு பட்டார்க்
    கெளியானை யாவர்க்கு மரியான் றன்னை
    இன்கரும்பின் தன்னுள்ளா லிருந்த தேறற்
    தெளியானைத் திருநாகேச் சரத்து ளானைச்
    சேராதார் நன்னெறிக்கட் சேரா தாரே. 6.66.9
    670 சீர்த்தானை உலகேழுஞ் சிறந்து போற்றச்
    சிறந்தானை நிறைந்தோங்கு செல்வன் றன்னைப்
    பார்த்தானை மதனவேள் பொடியாய் வீழப்
    பனிமதியஞ் சடையானைப் புனிதன் றன்னை
    ஆர்த்தோடி மலையெடுத்த அரக்க னஞ்ச
    அருவிரலா லடர்த்தானை அடைந்தோர் பாவந்
    தீர்த்தானைத் திருநாகேச் சரத்து ளானைச்
    சேராதார் நன்னெறிக்கட் சேரா தாரே. 6.66.10

    திருச்சிற்றம்பலம்


    6.67 திருக்கீழ்வேளூர் - திருத்தாண்டகம்


    திருச்சிற்றம்பலம்

    671 ஆளான அடியவர்கட் கன்பன் றன்னை
    ஆனஞ்சு மாடியைநான் அபயம் புக்க
    தாளானைத் தன்னொப்பா ரில்லா தானைச்
    சந்தனமுங் குங்குமமுஞ் சாந்துந் தோய்ந்த
    தோளானைத் தோளாத முத்தொப் பானைத்
    தூவெளுத்த கோவணத்தை அரையி லார்த்த
    கீளானைக் கீழ்வேளூ ராளுங் கோவைக்
    கேடிலியை நாடுமவர் கேடி லாரே. 6.67.1
    672 சொற்பாவும் பொருள்தெரிந்து தூய்மை நோக்கித்
    தூங்காதார் மனத்திருளை வாங்கா தானை
    நற்பான்மை அறியாத நாயி னேனை
    நன்னெறிக்கே செலும்வண்ணம் நல்கி னானைப்
    பற்பாவும் வாயாரப் பாடி யாடிப்
    பணிந்தெழுந்து குறைந்தடைந்தார் பாவம் போக்கக்
    கிற்பானைக் கீழ்வேளூ ராளுங் கோவைக்
    கேடிலியை நாடுமவர் கேடி லாரே. 6.67.2
    673 அளைவாயில் அரவசைத்த அழகன் றன்னை
    ஆதரிக்கு மடியவர்கட் கன்பே யென்றும்
    விளைவானை மெய்ஞ்ஞானப் பொருளா னானை
    வித்தகனை எத்தனையும் பத்தர் பத்திக்
    குளைவானை அல்லாதார்க் குளையா தானை
    உலப்பிலியை உள்புக்கென் மனத்து மாசு
    கிளைவானைக் கீழ்வேளூ ராளுங் கோவைக்
    கேடிலியை நாடுமவர் கேடி லாரே. 6.67.3
    674 தாட்பாவு கமலமலர் தயங்கு வானைத்
    தலையறுத்து மாவிரதந் தரித்தான் றன்னைக்
    கோட்பாவு நாளெல்லா மானான் றன்னைக்
    கொடுவினையேன் கொடுநரகக் குழியில் நின்றால்
    மீட்பானை வித்துருவின் கொத்தொப் பானை
    வேதியனை வேதத்தின் பொருள்கொள் வீணை
    கேட்பானைக் கீழ்வேளூ ராளுங் கோவைக்
    கேடிலியை நாடுமவர் கேடி லாரே. 6.67.4
    675 நல்லானை நரைவிடையொன் றூர்தி யானை
    நால்வேதத் தாறங்கம் நணுக மாட்டாச்
    சொல்லானைச் சுடர்மூன்று மானான் றன்னைத்
    தொண்டாகிப் பணிவார்கட் கணியான் றன்னை
    வில்லானை மெல்லியலோர் பங்கன் றன்னை
    மெய்யராய் நினையாதார் வினைகள் தீர்க்க
    கில்லானைக் கீழ்வேளூ ராளுங் கோவைக்
    கேடிலியை நாடுமவர் கேடி லாரே. 6.67.5
    676 சுழித்தானைக் கங்கைமலர் வன்னி கொன்றை
    தூமத்தம் வாளரவஞ் சூடி னானை
    அழித்தானை அரணங்கள் மூன்றும் வேவ
    ஆலால நஞ்சதனை யுண்டான் றன்னை
    விழித்தானைக் காமனுடல் பொடியாய் வீழ
    மெல்லியலோர் பங்கனைமுன் வேனி லானைக்
    கிழித்தானைக் கீழ்வேளூ ராளுங் கோவைக்
    கேடிலியை நாடுமவர் கேடி லாரே. 6.67.6
    677 உளரொளியை உள்ளத்தி னுள்ளே நின்ற
    ஓங்காரத் துட்பொருள்தா னாயி னானை
    விளரொளியை விடுசுடர்கள் இரண்டு மொன்றும்
    விண்ணொடுமண் ஆகாச மாயி னானை
    வளரொளியை மரகதத்தி னுருவி னானை
    வானவர்க ளெப்பொழுதும் வாழ்த்தி யேத்துங்
    கிளரொளியைக் கீழ்வேளூ ராளுங் கோவைக்
    கேடிலியை நாடுமவர் கேடி லாரே. 6.67.7
    678 தடுத்தானைக் காலனைக் காலாற் பொன்றத்
    தன்னடைந்த மாணிக்கன் றருள்செய் தானை
    உடுத்தானைப் புலியதளோ டக்கும் பாம்பும்
    உள்குவார் உள்ளத்தி னுள்ளான் றன்னை
    மடுத்தானை அருநஞ்சம் மிடற்றுள் தங்க
    வானவர்கள் கூடியஅத் தக்கன் வேள்வி
    கெடுத்தானைக் கீழ்வேளூ ராளுங் கோவைக்
    கேடிலியை நாடுமவர் கேடி லாரே. 6.67.8
    679 மாண்டார் எலும்பணிந்த வாழ்க்கை யானை
    மயானத்திற் கூத்தனைவா ளரவோ டென்பு
    பூண்டானைப் புறங்காட்டி லாட லானைப்
    போகாதென் னுட்புகுந் திடங்கொண் டென்னை
    ஆண்டானை அறிவரிய சிந்தை யானை
    அசங்கையனை அமரர்கள்தஞ் சங்கை யெல்லாங்
    கீண்டானைக் கீழ்வேளூ ராளுங் கோவைக்
    கேடிலியை நாடுமவர் கேடி லாரே. 6.67.9
    680 முறிப்பான பேசிமலை யெடுத்தான் றானும்
    முதுகிறமுன் கைந்நரம்பை யெடுத்துப் பாடப்
    பறிப்பான்கைச் சிற்றரிவாள் நீட்டி னானைப்
    பாவியேன் நெஞ்சகத்தே பாதப் போது
    பொறித்தானைப் புரமூன்று மெரிசெய் தானைப்
    பொய்யர்களைப் பொய்செய்து போது போக்கிக்
    கிறிப்பானைக் கீழ்வேளூ ராளுங் கோவைக்
    கேடிலியை நாடுமவர் கேடி லாரே. 6.67.10

    இத்தலம் சோழநாட்டிலுள்ளது.
    சுவாமிபெயர் - கேடிலியப்பர், தேவியார் - வனமுலைநாயகியம்மை.

    திருச்சிற்றம்பலம்


    6.68 திருமுதுகுன்றம் - திருத்தாண்டகம்


    திருச்சிற்றம்பலம்

    681 கருமணியைக் கனகத்தின் குன்றொப் பானைக்
    கருதுவார்க் காற்ற எளியான் றன்னைக்
    குருமணையைக் கோளரவ மாட்டு வானைக்
    கொல்வேங்கை யதளனைக்கோ வணவன் றன்னை
    அருமணியை அடைந்தவர்கட் கமுதொப் பானை
    ஆனஞ்சு மாடியைநான் அபயம் புக்க
    திருமணியைத் திருமுதுகுன் றுடையான் றன்னைத்
    தீவினையேன் அறியாதே திகைத்த வாறே. 6.68.1
    682 காரொளிய கண்டத்தெங் கடவுள் தன்னைக்
    காபாலி கட்டங்க மேந்தி னானைப்
    பாரொளியை விண்ணொளியைப் பாதாளத் தானைப்
    பான்மதியஞ் சூடியோர் பண்பன் றன்னைப்
    பேரொளியைப் பெண்பாகம் வைத்தான் றன்னைப்
    பேணுவார் தம்வினையைப் பேணி வாங்குஞ்
    சீரொளியைத் திருமுதுகுன் றுடையான் றன்னைத்
    தீவினையேன் அறியாதே திகைத்த வாறே. 6.68.2
    683 எத்திசையும் வானவர்கள் தொழ நின்றானை
    ஏறூர்ந்த பெம்மானை யெம்மா னென்று
    பத்தனாய்ப் பணிந்தடியேன் றன்னைப் பன்னாட்
    பாமாலை பாடப் பயில்வித் தானை
    முத்தினை யென்மணியை மாணிக் கத்தை
    முளைத்தெழுந்த செம்பவளக் கொழுந்தொப் பானைச்
    சித்தனையென் திருமுதுகுன் றுடையான் றன்னைத்
    தீவினையேன் அறியாதே திகைத்த வாறே. 6.68.3
    684 ஊன்கருவின் உள்நின்ற சோதி யானை
    உத்தமனைப் பத்தர்மனம் குடிகொண் டானைக்
    கான்றிரிந்து காண்டீப மேந்தி னானைக்
    கார்மேக மிடற்றானைக் கனலைக் காற்றைத்
    தான்றெரிந்தங் கடியேனை யாளாக் கொண்டு
    தன்னுடைய திருவடியென் றலைமேல் வைத்த
    தீன்கரும்பைத் திருமுதுகுன் றுடையான் றன்னைத்
    தீவினையேன் அறியாதே திகைத்த வாறே. 6.68.4
    685 தக்கனது பெருவேள்வி தகர்த்தா னாகித்
    தாமரையான் நான்முகனுந் தானே யாகி
    மிக்கதொரு தீவளிநீர் ஆகா சமாய்
    மேலுலகுக் கப்பாலாய் இப்பா லானை
    அக்கினொடு முத்தினையு மணிந்து தொண்டர்க்
    கங்கங்கே அறுசமய மாகி நின்ற
    திக்கினையென் றிருமுதுகுன் றுடையான் றன்னைத்
    தீவினையேன் அறியாதே திகைத்த வாறே. 6.68.5
    686 புகழொளியைப் புரமெரித்த புனிதன் றன்னைப்
    பொன்பொதிந்த மேனியனைப் புராணன் றன்னை
    விழவொலியும் விண்ணொலியு மானான் றன்னை
    வெண்காடு மேவிய விகிர்தன் றன்னைக்
    கழலொலியுங் கைவளையு மார்ப்ப வார்ப்பக்
    கடைதோறு மிடுபிச்சைக் கென்று செல்லுந்
    திகழொளியைத் திருமுதுகுன் றுடையான் றன்னைத்
    தீவினையேன் அறியாதே திகைத்த வாறே. 6.68.6
    687 போர்த்தானை யின்னுரிதோல் பொங்கப் பொங்கப்
    புலியதளே உடையாகத் திரிவான் றன்னைக்
    காத்தானை ஐம்புலனும் புரங்கள் மூன்றுங்
    காலனையுங் குரைகழலாற் காய்ந்தான் றன்னை
    மாத்தாடிப் பத்தராய் வணங்குந் தொண்டர்
    வல்வினைவே ரறும்வண்ணம் மருந்து மாகித்
    தீர்த்தானைத் திருமுதுகுன் றுடையான் றன்னைத்
    தீவினையேன் அறியாதே திகைத்த வாறே. 6.68.7
    688 துறவாதே யாக்கை துறந்தான் றன்னைச்
    சோதி முழுமுதலாய் நின்றான் றன்னைப்
    பிறவாதே எவ்வுயிர்க்குந் தானே யாகிப்
    பெண்ணினோ டாணுருவாய் நின்றான் றன்னை
    மறவாதே தன்றிறமே வாழ்த்துந் தொண்டர்
    மனத்தகத்தே அனவரதம் மன்னி நின்ற
    திறலானைத் திருமுதுகுன் றுடையான் றன்னைத்
    தீவினையேன் அறியாதே திகைத்த வாறே. 6.68.8
    689 பொற்றூணைப் புலால்நாறு கபால மேந்திப்
    புவலோக மெல்லா முழிதந் தானை
    முற்றாத வெண்டிங்கட் கண்ணி யானை
    முழுமுதலாய் மூவுலகும் முடிவொன் றில்லாக்
    கற்றூணைக் காளத்தி மலையான் றன்னைக்
    கருதாதார் புரமூன்று மெரிய அம்பாற்
    செற்றானைத் திருமுதுகுன் றுடையான் றன்னைத்
    தீவினையேன் அறியாதே திகைத்த வாறே. 6.68.9
    690 இகழ்ந்தானை இருபதுதோள் நெரிய வூன்றி
    எழுநரம்பின் இசைபாட லினிது கேட்டுப்
    புகழ்ந்தானைப் பூந்துருத்தி மேயான் றன்னைப்
    புண்ணியனை விண்ணவர்கள் நிதியந் தன்னை
    மகிழ்ந்தானை மலைமகளோர் பாகம் வைத்து
    வளர்மதியஞ் சடைவைத்து மாலோர் பாகந்
    திகழ்ந்தானைத் திருமுதுகுன் றுடையான் றன்னைத்
    தீவினையேன் அறியாதே திகைத்த வாறே. 6.68.10

    இத்தலம் நடுநாட்டிலுள்ளது. இதுவே விருத்தாசலம்.
    சுவாமிபெயர் - பழமலைநாதர்,
    தேவியார் - பெரியநாயகியம்மை.

    திருச்சிற்றம்பலம்


    6.69 திருப்பள்ளியின்முக்கூடல் - திருத்தாண்டகம்


    திருச்சிற்றம்பலம்

    691 ஆராத இன்னமுதை அம்மான் றன்னை
    அயனொடுமா லறியாத ஆதி யானைத்
    தாராரும் மலர்க்கொன்றைச் சடையான் றன்னைச்
    சங்கரனைத் தன்னொப்பா ரில்லா தானை
    நீரானைக் காற்றானைத் தீயா னானை
    நீள்விசும்பாய் ஆழ்கடல்க ளேழுஞ் சூழ்ந்த
    பாரானைப் பள்ளியின்முக் கூட லானைப்
    பயிலாதே பாழேநான் உழன்ற வாறே. 6.69.1
    692 விடையானை விண்ணவர்கள் எண்ணத் தானை
    வேதியனை வெண்டிங்கள் சூடுஞ் சென்னிச்
    சடையானைச் சாமம்போற் கண்டத் தானைத்
    தத்துவனைத் தன்னொப்பா ரில்லா தானை
    அடையாதார் மும்மதிலுந் தீயில் மூழ்க
    அடுகணைகோத் தெய்தானை அயில்கொள் சூலப்
    படையானைப் பள்ளியின்முக் கூட லானைப்
    பயிலாதே பாழேநான் உழன்ற வாறே. 6.69.2
    693 பூதியனைப் பொன்வரையே போல்வான் றன்னைப்
    புரிசடைமேற் புனல்கரந்த புனிதன் றன்னை
    வேதியனை வெண்காடு மேயான் றன்னை
    வெள்ளேற்றின் மேலானை விண்ணோர்க் கெல்லாம்
    ஆதியனை ஆதிரைநன் னாளான் றன்னை
    அம்மானை மைம்மேவு கண்ணி யாளோர்
    பாதியனைப் பள்ளியின்முக் கூட லானைப்
    பயிலாதே பாழேநான் உழன்ற வாறே. 6.69.3
    694 போர்த்தானை ஆனையின்றோல் புரங்கள் மூன்றும்
    பொடியாக எய்தானைப் புனிதன் றன்னை
    வார்த்தாங்கு வனமுலையாள் பாகன் றன்னை
    மறிகடலுள் நஞ்சுண்டு வானோ ரச்சந்
    தீர்த்தானைத் தென்றிசைக்கே காமன் செல்லச்
    சிறிதளவில் அவனுடலம் பொடியா வங்கே
    பார்த்தானைப் பள்ளியின்முக் கூட லானைப்
    பயிலாதே பாழேநான் உழன்ற வாறே. 6.69.4
    695 அடைந்தார்தம் பாவங்கள் அல்லல் நோய்கள்
    அருவினைகள் நல்குரவு செல்லா வண்ணங்
    கடிந்தானைக் கார்முகில்போற் கண்டத் தானைக்
    கடுஞ்சினத்தோன் றன்னுடலை நேமி யாலே
    தடிந்தானைத் தன்னொப்பா ரில்லா தானைத்
    தத்துவனை உத்தமனை நினைவார் நெஞ்சிற்
    படிந்தானைப் பள்ளியின்முக் கூட லானைப்
    பயிலாதே பாழேநான் உழன்ற வாறே. 6.69.5
    696 கரந்தானைச் செஞ்சடைமேற் கங்கை வெள்ளங்
    கனலாடு திருமேனி கமலத் தோன்றன்
    சிரந்தாங்கு கையானைத் தேவ தேவைத்
    திகழொளியைத் தன்னடியே சிந்தை செய்வார்
    வருந்தாமைக் காப்பானை மண்ணாய் விண்ணாய்
    மறிகடலாய் மால்விசும்பாய் மற்று மாகிப்
    பரந்தானைப் பள்ளியின்முக் கூட லானைப்
    பயிலாதே பாழேநான் உழன்ற வாறே. 6.69.6
    697 நதியாருஞ் சடையானை நல்லூ ரானை
    நள்ளாற்றின் மேயானை நல்லத் தானை
    மதுவாரும் பொழிற்புடைசூழ் வாய்மூ ரானை
    மறைக்காடு மேயானை ஆக்கூ ரானை
    நிதியாளன் றோழனை நீடு ரானை
    நெய்த்தான மேயானை ஆரூ ரென்னும்
    பதியானைப் பள்ளியின்முக் கூட லானைப்
    பயிலாதே பாழேநான் உழன்ற வாறே. 6.69.7
    698 நற்றவனை நான்மறைக ளாயி னானை
    நல்லானை நணுகாதார் புரங்கள் மூன்றுஞ்
    செற்றவனைச் செஞ்சடைமேற் றிங்கள் சூடுந்
    திருவாரூர்த் திருமூலத் தான மேய
    கொற்றவனைக் கூரரவம் பூண்டான் றன்னைக்
    குறைந்தடைந்து தன்றிறமே கொண்டார்க் கென்றும்
    பற்றவனைப் பள்ளியின்முக் கூட லானைப்
    பயிலாதே பாழேநான் உழன்ற வாறே. 6.69.8
    699 ஊனவனை உடலவனை உயிரா னானை
    உலகேழு மானானை உம்பர் கோவை
    வானவனை மதிசூடும் வளவி யானை
    மலைமகள்முன் வராகத்தின் பின்பே சென்ற
    கானவனைக் கயிலாய மலையு ளானைக்
    கலந்துருகி நைவார்தம் நெஞ்சி னுள்ளே
    பானவனைப் பள்ளியின்முக் கூட லானைப்
    பயிலாதே பாழேநான் உழன்ற வாறே. 6.69.9
    700 தடுத்தானைத் தான்முனிந்து தன்றோள் கொட்டித்
    தடவரையை இருபதுதோள் தலையி னாலும்
    எடுத்தானைத் தாள்விரலால் மாள வூன்றி
    எழுநரம்பின் இசைபாடல் இனிது கேட்டுக்
    கொடுத்தானைப் பேரோடுங் கூர்வாள் தன்னைக்
    குரை கழலாற் கூற்றுவனை மாள வன்று
    படுத்தானைப் பள்ளியின்முக் கூட லானைப்
    பயிலாதே பாழேநான் உழன்ற வாறே. 6.69.10

    இத்தலம் சோழநாட்டிலுள்ளது.
    சுவாமிபெயர் - முக்கோணவீசுவரர், தேவியார் - மைமேவுங்கண்ணியம்மை.

    திருச்சிற்றம்பலம்


    6.70 க்ஷேத்திரக்கோவை - திருத்தாண்டகம்


    திருச்சிற்றம்பலம்

    701 தில்லைச் சிற்றம்பலமுஞ் செம்பொன் பள்ளி
    தேவன் குடிசிராப் பள்ளி தெங்கூர்
    கொல்லிக் குளிரறைப் பள்ளி கோவல்
    வீரட்டங் கோகரணங் கோடி காவும்
    முல்லைப் புறவம் முருகன் பூண்டி
    முழையூர் பழையாறை சத்தி முற்றங்
    கல்லிற் றிகழ்சீரார் காளத் தியுங்
    கயிலாய நாதனையே காண லாமே. 6.70.1
    702 ஆரூர்மூ லத்தானம் ஆனைக் காவும்
    ஆக்கூரில் தான்தோன்றி மாடம் ஆவூர்
    பேரூர் பிரமபுரம் பேரா வூரும்
    பெருந்துறை காம்பீலி பிடவூர் பேணுங்
    கூரார் குறுக்கைவீ ரட்டா னமுங்
    கோட்டூர் குடமூக்கு கோழம் பமுங்
    காரார் கழுக்குன்றுங் கானப் பேருங்
    கயிலாய நாதனையே காண லாமே. 6.70.2
    703 இடைமரு தீங்கோ யிராமேச் சுரம்
    இன்னம்பர் ஏரிடவை ஏமப் பேறூர்
    சடைமுடி சாலைக் குடிதக் களூர்
    தலையாலங் காடு தலைச்சங் காடு
    கொடுமுடி குற்றாலங் கொள்ளம் பூதூர்
    கோத்திட்டை கோட்டாறு கோட்டுக் காடு
    கடைமுடி கானூர் கடம்பந் துறை
    கயிலாய நாதனையே காண லாமே. 6.70.3
    704 எச்சில் இளமர் ஏம நல்லூர்
    இலம்பையங் கோட்டூர் இறையான் சேரி
    அச்சிறு பாக்க மளப்பூர் அம்பர்
    ஆவடு தண்டுறை அழுந்தூர் ஆறைக்
    கச்சினங் கற்குடி கச்சூர் ஆலக்
    கோயில் கரவீரங் காட்டுப் பள்ளி
    கச்சிப் பலதளியும் ஏகம் பத்துங்
    கயிலாய நாதனையே காண லாமே. 6.70.4
    705 கொடுங்கோளூர் அஞ்சைக் களஞ்செங் குன்றூர்
    கொங்கணங் குன்றியூர் குரக்குக் காவும்
    நெடுங்களம் நன்னிலம் நெல்லிக் காவும்
    நின்றியூர் நீடூர் நியம நல்லூர்
    இடும்பா வனமெழுமூர் ஏழூர் தோழூர்
    எறும்பியூர் ஏராரும் ஏம கூடங்
    கடம்பை யிளங்கோயில் தன்னி லுள்ளுங்
    கயிலாய நாதனையே காண லாமே. 6.70.5
    706 மண்ணிப் படிக்கரை வாழ்கொளி புத்தூர்
    வக்கரை மந்தாரம் வார ணாசி
    வெண்ணி விளத்தொட்டி வேள்விக் குடி
    விளமர் விராடபுரம் வேட்க ளத்தும்
    பெண்ணை யருட்டுறைதண் பெண்ணா கடம்
    பிரம்பில் பெரும்புலியூர் பெருவே ளூருங்
    கண்ணை களர்க்காறை கழிப்பா லையுங்
    கயிலாய நாதனையே காண லாமே. 6.70.6
    707 வீழி மிழலைவெண் காடு வேங்கூர்
    வேதி குடிவிசய மங்கை வியலூர்
    ஆழியகத் தியான்பள்ளி அண்ணா மலை
    ஆலங் காடும் அரைதைப் பெரும்
    பாழி பழனம்பனந் தாள்பா தாளம்
    பராய்த்துறை பைஞ்ஞீலி பனங்காட் டூர்தண்
    காழி கடல்நாகைக் காரோ ணத்துங்
    கயிலாய நாதனையே காண லாமே. 6.70.7
    708 உஞ்சேனை மாகாளம் ஊறல் ஓத்தூர்
    உரித்திர கோடி மறைக்காட் டுள்ளும்
    மஞ்சார் பொதியின்மலை தஞ்சை வழுவூர்
    வீரட்டம் மாதானங் கேதா ரத்தும்
    வெஞ்சமாக் கூடல்மீ யச்சூர் வைகா
    வேதிச்சுரம் வீவிசுரம் வொற்றி யூருங்
    கஞ்சனூர் கஞ்சாறு பஞ்சாக் கையுங்
    கயிலாய நாதனையே காண லாமே. 6.70.8
    709 திண்டீச்சரஞ் சேய்ஞலூர் செம்பொன் பள்ளி
    தேவூர் சிரபுரஞ்சிற் றேமஞ் சேறை
    கொண்டீச்சரங் கூந்தலூர் கூழையூர் கூடல்
    குருகாவூர் வெள்ளடை குமரி கொங்கு
    அண்டர் தொழுமதிகை வீரட் டானம்
    ஐயா றசோகந்தி ஆமாத் தூருங்
    கண்டியூர் வீரட்டங் கருகா வூருங்
    கயிலாய நாதனையே காண லாமே. 6.70.9
    710 நறையூரிற் சித்தீச் சரம்நள் ளாறு
    நாரையூர் நாகேச்சரம் நல்லூர் நல்ல
    துறையூர் சோற்றுத்துறை சூல மங்கை
    தோணிபுரந் துருத்தி சோமீச் சரம்
    உறையூர் கடலொற்றி யூரூற் றத்தூர்
    ஓமாம் புலியூரோர் ஏட கத்துங்
    கறையூர் கருப்பறியல் கன்றாப் பூருங்
    கயிலாய நாதனையே காண லாமே. 6.70.10
    711 புலிவலம் புத்தூர் புகலூர் புன்கூர்
    புறம்பயம் பூவணம் பொய்கை நல்லூர்
    வலிவலம் மாற்பேறு வாய்மூர் வைகல்
    வலஞ்சுழி வாஞ்சியம் மருகல் வன்னி
    நிலமலிநெய்த் தானத்தோ டெத்தா னத்தும்
    நிலவுபெருங் கோயில்பல கண்டாற் றொண்டீர்
    கலிவலிமிக் கோனைக்கால் விரலாற் செற்ற
    கயிலாய நாதனையே காண லாமே. 6.70.11

    திருச்சிற்றம்பலம்


    6.71 திருஅடைவு - திருத்தாண்டகம்


    திருச்சிற்றம்பலம்

    712 பொருப்பள்ளி வரைவில்லாப் புரமூன் றெய்து
    புலந்தழிய சலந்தரனைப் பிளந்தான் பொற்சக்
    கரப்பள்ளி திருக்காட்டுப் பள்ளி கள்ளார்
    கமழ்கொல்லி யறைப்பள்ளி கலவஞ் சாரற்
    சிரப்பள்ளி சிவப்பள்ளி செம்பொன் பள்ளி
    செழுநனி பள்ளிதவப் பள்ளி சீரார்
    பரப்பள்ளி யென்றென்று பகர்வோ ரெல்லாம்
    பரலோகத் தினிதாகப் பாலிப் பாரே. 6.71.1
    713 காவிரியின் கரைக்கண்டி வீரட் டானங்
    கடவூர்வீ ரட்டானங் காமருசீ ரதிகை
    மேவியவீ ரட்டானம் வழுவை வீரட்டம்
    வியன்பறியல் வீரட்டம் விடையூர்திக் கிடமாங்
    கோவல்நகர் வீரட்டங் குறுக்கை வீரட்டங்
    கோத்திட்டைக் குடிவீரட் டானமிவை கூறி
    நாவினவின் றுரைப்பார்க்கு நணுகச் சென்றால்
    நமன்றமருஞ் சிவன்றமரென் றகல்வர் நன்கே. 6.71.2
    714 நற்கொடிமேல் விடையுயர்த்த நம்பன் செம்பங்
    குடிநல்லக் குடிநளிநாட் டியத்தான் குடி
    கற்குடிதென் களக்குடிசெங் காட்டங் குடி
    கருந்திட்டைக் குடிகடையக் குடிகா ணுங்கால்
    விற்குடிவேள் விக்குடிநல் வேட்டக் குடி
    வேதிகுடி மாணிகுடி விடைவாய்க் குடி
    புற்குடி மாகுடி தேவன்குடி நீலக்குடி
    புதுக்குடியும் போற்றவிடர் போகு மன்றே. 6.71.3
    715 பிறையூருஞ் சடைமுடியெம் பெருமா னாரூர்
    பெரும்பற்றப் புலியூரும் பேரா வூரும்
    நறையூரும் நல்லூரும் நல்லாற் றூரும்
    நாலூருஞ் சேற்றூரும் நாரை யூரும்
    உறையூரும் ஓத்தூரும் ஊற்றத் தூரும்
    அளப்பூரோ மாம்புலியூர் ஒற்றி யூருந்
    துறையூருந் துவையூருந் தோழுர் தானுந்
    துடையூருந் தொழவிடர்கள் தொடரா வன்றே. 6.71.4
    716 பெருக்காறு சடைக்கணிந்த பெருமான் சேரும்
    பெருங்கோயில் எழுபதினோ டெட்டும் மற்றுங்
    கரக்கோயில் கடிபொழில்சூழ் ஞாழற் கோயில்
    கருப்பறியல் பொருப்பனைய கொகுடிக் கோயில்
    இருக்கோதி மறையவர்கள் வழிபட் டேத்தும்
    இளங்கோயில் மணிக்கோயில் ஆலக் கோயில்
    திருக்கோயில் சிவனுறையுங் கோயில் சூழ்ந்து
    தாழ்ந்திறைஞ்சத் தீவினைகள் தீரு மன்றே. 6.71.5
    717 மலையார்தம் மகளொடுமா தேவன் சேரும்
    மறைக்காடு வண்பொழில்சூழ் தலைச்சங் காடு
    தலையாலங் காடுதடங் கடல்சூ ழந்தண்
    சாய்க்காடு தெள்ளுபுனற் கொள்ளிக் காடு
    பலர்பாடும் பழையனூர் ஆலங் காடு
    பனங்காடு பாவையர்கள் பாவம் நீங்க
    விலையாடும் வளைதிளைக்கக் குடையும் பொய்கை
    வெண்காடும் அடையவினை வேறா மன்றே. 6.71.6
    718 கடுவாயர் தமைநீக்கி யென்னை யாட்கொள்
    கண்ணுதலோன் நண்ணுமிடம் அண்ணல் வாயில்
    நெடுவாயில் நிறைவயல்சூழ் நெய்தல் வாயில்
    நிகழ்முல்லை வாயிலொடு ஞாழல் வாயில்
    மடுவார்தென் மதுரைநகர் ஆல வாயில்
    மறிகடல்சூழ் புனவாயில் மாடம் நீடு
    குடவாயில் குணவாயி லான வெல்லாம்
    புகுவாரைக் கொடுவினைகள் கூடா வன்றே. 6.71.7
    719 நாடகமா டிடநந்தி கேச்சுரமா காளேச்
    சுரநாகேச் சுரநாகளேச் சுரநன் கான
    கோடீச்சுரங் கொண்டீச் சுரந்திண் டீச்சுரங்
    குக்குடேச் சுரமக்கீச் சுரங்கூ றுங்கால்
    ஆடகேச் சுரமகத்தீச் சுரமய னீச்சுரம்
    அத்தீச்சுரஞ் சித்தீச்சுர மந்தண் கானல்
    ஈடுதிரை இராமேச்சுர மென்றென் றேத்தி
    இறைவனுறை சுரம்பலவும் இயம்பு வோமே. 6.71.8
    720 கந்தமா தனங்கயிலை மலை கேதாரங்
    காளத்தி கழுக்குன்றங் கண்ணார் அண்ணா
    மந்தமாம் பொழிற்சாரல் வடபர்ப் பதம்
    மகேந்திரமா மலைநீலம் ஏம கூடம்
    விந்தமா மலைவேதஞ் சைய மிக்க
    வியன் பொதியின் மலைமேரு வுதய மத்தம்
    இந்துசே கரனுறையும் மலைகள் மற்றும்
    ஏத்துவோம் இடர்கெடநின் றேத்து வோமே. 6.71.9
    721 நள்ளாறும் பழையாறுங் கோட்டாற் றோடு
    நலந்திகழும் நாலாறுந் திருவை யாறுந்
    தெள்ளாறும் வளைகுளமுந் தளிக்கு ளமுநல்
    இடைக்குளமுந் திருக்குளத்தோ டஞ்சைக் களம்
    விள்ளாத நெடுங்களம்வேட் களம்நெல் லிக்கா
    கோலக்கா ஆனைக்கா வியன்கோ டிகா
    கள்ளார்ந்த கொன்றையான் நின்ற ஆறுங்
    குளங்களங்கா எனவனைத்துங் கூறு வோமே. 6.71.10
    722 கயிலாயமலை யெடுத்தான் கரங்க ளோடு
    சிரங்களுரம் நெரியக்கால் விரலாற் செற்றோன்
    பயில்வாய பராய்த்துறைதென் பாலைத் துறை
    பண்டெழுவர் தவத்துறைவெண் டுறைபைம் பொழிற்
    குயிலாலந் துறைசோற்றுத் துறைபூந் துறை
    பெருந்துறையுங் குரங்காடு துறையி னோடு
    மயிலாடு துறைகடம்பந் துறையா வடு
    துறைமற்றுந் துறையனைத்தும் வணங்கு வோமே. 6.71.11

    திருச்சிற்றம்பலம்


    6.72 திருவலஞ்சுழி - திருத்தாண்டகம்


    திருச்சிற்றம்பலம்

    723 அலையார் புனற்கங்கை நங்கை காண
    அம்பலத்தில் அருநட்ட மாடி வேடந்
    தொலையாத வென்றியார் நின்றி யூரும்
    நெடுங்களமும் மேவிவிடை யைமேற் கொண்டு
    இலையார் படைகையி லேந்தி யெங்கும்
    இமையவரும் உமையவளும் இறைஞ்சி யேத்த
    மலையார் திரளருவிப் பொன்னி சூழ்ந்த
    வலஞ்சுழியே புக்கிடமா மருவி னாரே. 6.72.1

    திருச்சிற்றம்பலம்


    6.73 திருவலஞ்சுழியும் - திருக்கொட்டையூர்க்கோடீச்சரமும்



    திருச்சிற்றம்பலம்

    724 கருமணிபோற் கண்டத் தழகன் கண்டாய்
    கல்லால நிழற்கீ ழிருந்தான் கண்டாய்
    பருமணி மாநாகம் பூண்டான் கண்டாய்
    பவளக்குன் றன்ன பரமன் கண்டாய்
    வருமணிநீர்ப் பொன்னிவலஞ் சுழியான் கண்டாய்
    மாதேவன் கண்டாய் வரதன் கண்டாய்
    குருமணிபோல் அழகமருங் கொட்டை யூரிற்
    கோடீச் சரத்துறையுங் கோமான் றானே. 6.73.1
    725 கலைக்கன்று தங்கு கரத்தான் கண்டாய்
    கலைபயில்வோர் ஞானக்கண் ணானான் கண்டாய்
    அலைக்கங்கை செஞ்சடைமே லேற்றான் கண்டாய்
    அண்ட கபாலத்தப் பாலான் கண்டாய்
    மலைப்பண்டங் கொண்டு வருநீர்ப் பொன்னி
    வலஞ்சுழியின் மேவிய மைந்தன் கண்டாய்
    குலைத்தெங்கஞ் சோலைசூழ் கொட்டை யூரிற்
    கோடீச்சரத் துறையுங் கோமான் றானே. 6.73.2
    726 செந்தா மரைப்போ தணிந்தான் கண்டாய்
    சிவன்கண்டாய் தேவர் பெருமான் கண்டாய்
    பந்தாடு மெல்விரலாள் பாகன் கண்டாய்
    பாலோடு நெய் தயிர்தே னாடி கண்டாய்
    மந்தார முந்தி வருநீர்ப் பொன்னி
    வலஞ்சுழியின் மன்னு மணாளன் கண்டாய்
    கொந்தார் பொழிற்புடைசூழ் கொட்டை யூரிற்
    கோடீச் சரத்துறையுங் கோமான் றானே. 6.73.3
    727 பொடியாடு மேனிப் புனிதன் கண்டாய்
    புட்பாகற் காழி கொடுத்தான் கண்டாய்
    இடியார் கடுமுழக்கே றூர்ந்தான் கண்டாய்
    எண்டிசைக்கும் விளக்காகி நின்றான் கண்டாய்
    மடலார் திரைபுரளுங் காவி ரிவாய்
    வலஞ்சுழியின் மேவிய மைந்தன் கண்டாய்
    கொடியாடு நெடுமாடக் கொட்டை யூரிற்
    கோடீச்சரத் துறையுங் கோமான் றானே. 6.73.4
    728 அக்கரவம் அரைக்கசைத்த அம்மான் கண்டாய்
    அருமறைக ளாறங்க மானான் கண்டாய்
    தக்கனது பெருவேள்வி தகர்த்தான் கண்டாய்
    சதாசிவன்காண் சலந்தரனைப் பிளந்தான் கண்டாய்
    மைக்கொண்மயிற் றழைகொண்டு வருநீர்ப் பொன்னி
    வலஞ்சுழியான் கண்டாய் மழுவன் கண்டாய்
    கொக்கமரும் வயற்புடைசூழ் கொட்டை யூரிற்
    கோடீச் சரத்துறையுங் கோமான் றானே. 6.73.5
    729 சண்டனைநல் லண்டர்தொழச் செய்தான் கண்டாய்
    சதாசிவன் கண்டாய்சங் கரன்றான் கண்டாய்
    தொண்டர்பலர் தொழுதேத்துங் கழலான் கண்டாய்
    சுடரொளியாய்த் தொடர்வரிதாய் நின்றான் கண்டாய்
    மண்டுபுனற் பொன்னிவலஞ் சுழியான் கண்டாய்
    மாமுனிவர் தம்முடைய மருந்து கண்டாய்
    கொண்டல்தவழ் கொடிமாடக் கொட்டை யூரிற்
    கோடீச் சரத்துறையுங் கோமான் றானே. 6.73.6
    730 அணவரியான் கண்டாய் அமலன் கண்டாய்
    அவிநாசி கண்டாயண் டத்தான் கண்டாய்
    பணமணிமா நாக முடையான் கண்டாய்
    பண்டரங்கன் கண்டாய் பகவன் கண்டாய்
    மணல்வருநீர்ப் பொன்னிவலஞ் சுழியான் கண்டாய்
    மாதவற்கும் நான்முகற்கும் வரதன் கண்டாய்
    குணமுடைநல் லடியார்வாழ் கொட்டை யூரிற்
    கோடீச் சரத்துறையுங் கோமான் றானே. 6.73.7
    731 விரைகமழு மலர்க்கொன்றைத் தாரான் கண்டாய்
    வேதங்கள் தொழநின்ற நாதன் கண்டாய்
    அரையதனிற் புள்ளியத ளுடையான் கண்டாய்
    அழலாடி கண்டாய் அழகன் கண்டாய்
    வருதிரைநீர்ப் பொன்னிவலஞ் சுழியான் கண்டாய்
    வஞ்சமனத் தவர்க்கரிய மைந்தன் கண்டாய்
    குரவமரும் பொழிற்புடைசூழ் கொட்டை யூரிற்
    கோடீச் சரத்துறையுங் கோமான் றானே. 6.73.8
    732 தளங்கிளருந் தாமரையா தனத்தான் கண்டாய்
    தசரதன்றன் மகனசைவு தவிர்த்தான் கண்டாய்
    இளம்பிறையும் முதிர்சடைமேல் வைத்தான் கண்டாய்
    எட்டெட் டிருங்கலையு மானான் கண்டாய்
    வளங்கிளர்நீர்ப் பொன்னிவலஞ் சுழியான் கண்டாய்
    மாமுனிகள் தொழுதெழுபொற் கழலான் கண்டாய்
    குளங்குளிர்செங் குவளைகிளர் கொட்டை யூரிற்
    கோடீச் சரத்துறையுங் கோமான் றானே. 6.73.9
    733 விண்டார் புரமூன் றெரித்தான் கண்டாய்
    விலங்கலில்வல் லரக்கனுட லடர்த்தான் கண்டாய்
    தண்டா மரையானும் மாலுந் தேடத்
    தழற்பிழம்பாய் நீண்ட கழலான் கண்டாய்
    வண்டார்பூஞ் சோலைவலஞ் சுழியான் கண்டாய்
    மாதேவன் கண்டாய் மறையோ டங்கங்
    கொண்டாடு வேதியர்வாழ் கொட்டை யூரிற்
    கோடீச் சரத்துறையுங் கோமான் றானே. 6.73.10
    இத்தலங்கள் சோழநாட்டிலுள்ளன.
    திருவலஞ்சுழியில்,
    சுவாமிபெயர் - கபர்த்தீசுவரர், தேவியார் - பெரியநாயகியம்மை.
    திருக்கொட்டையூரில்,
    சுவாமிபெயர் - சுந்தரகோடீசுவரர், தேவியார் - பந்தாடுநாயகியம்மை.

    திருச்சிற்றம்பலம்


    6.74 திருநாரையூர் - திருத்தாண்டகம்


    திருச்சிற்றம்பலம்

    734 சொல்லானைப் பொருளானைச் சுருதி யானைச்
    சுடராழி நெடுமாலுக் கருள்செய் தானை
    அல்லானைப் பகலானை அரியான் றன்னை
    அடியார்கட் கெளியானை அரண்மூன் றெய்த
    வில்லானைச் சரம்விசயற் கருள்செய் தானை
    வெங்கதிரோன் மாமுனிவர் விரும்பி யேத்தும்
    நல்லானைத் தீயாடு நம்பன் றன்னை
    நாரையூர் நன்னகரிற் கண்டேன் நானே. 6.74.1
    735 பஞ்சுண்ட மெல்லடியாள் பங்கன் றன்னைப்
    பாரொடுநீர் சுடர்படர்காற் றாயி னானை
    மஞ்சுண்ட வானாகி வானந் தன்னில்
    மதியாகி மதிசடைமேல் வைத்தான் றன்னை
    நெஞ்சுண்டென் நினைவாகி நின்றான் றன்னை
    நெடுங்கடலைக் கடைந்தவர்போய் நீங்க வோங்கும்
    நஞ்சுண்டு தேவர்களுக் கமுதீந் தானை
    நாரையூர் நன்னகரிற் கண்டேன் நானே. 6.74.2
    736 மூவாதி யாவர்க்கும் மூத்தான் றன்னை
    முடியாதே முதல்நடுவு முடிவா னானைத்
    தேவாதி தேவர்கட்குந் தேவன் றன்னைத்
    திசைமுகன்றன் சிரமொன்று சிதைத்தான் றன்னை
    ஆவாத அடலேறொன் றுடையான் றன்னை
    அடியேற்கு நினைதோறும் அண்ணிக் கின்ற
    நாவானை நாவினில்நல் லுரையா னானை
    நாரையூர் நன்னகரிற் கண்டேன் நானே. 6.74.3
    737 செம்பொன்னை நன்பவளந் திகழு முத்தைச்
    செழுமணியைத் தொழுமவர்தஞ் சித்தத் தானை
    வம்பவிழும் மலர்க்கணைவேள் உலக்க நோக்கி
    மகிழ்ந்தானை மதிற்கச்சி மன்னு கின்ற
    கம்பனையெங் கயிலாய மலையான் றன்னைக்
    கழுகினொடு காகுத்தன் கருதி யேத்தும்
    நம்பனையெம் பெருமானை நாதன் றன்னை
    நாரையூர் நன்னகரிற் கண்டேன் நானே. 6.74.4
    738 புரையுடைய கரியுரிவைப் போர்வை யானைப்
    புரிசடைமேற் புனலடைத்த புனிதன் றன்னை
    விரையுடைய வெள்ளெருக்கங் கண்ணி யானை
    வெண்ணீறு செம்மேனி விரவி னானை
    வரையுடைய மகள்தவஞ்செய் மணாளன் றன்னை
    வருபிணிநோய் பிரிவிக்கும் மருந்து தன்னை
    நரைவிடைநற் கொடியுடைய நாதன் றன்னை
    நாரையூர் நன்னகரிற் கண்டேன் நானே. 6.74.5
    739 பிறவாதும் இறவாதும் பெருகி னானைப்
    பேய்பாட நடமாடும் பித்தன் றன்னை
    மறவாத மனத்தகத்து மன்னி னானை
    மலையானைக் கடலானை வனத்து ளானை
    உறவானைப் பகையானை உயிரா னானை
    உள்ளானைப் புறத்தானை ஓசை யானை
    நறவாரும் பூங்கொன்றை சூடி னானை
    நாரையூர் நன்னகரிற் கண்டேன் நானே. 6.74.6
    740 தக்கனது வேள்விகெடச் சாடி னானைத்
    தலைகலனாப் பலியேற்ற தலைவன் றன்னைக்
    கொக்கரைசச் சரிவீணைப் பாணி யானைக்
    கோணாகம் பூணாகக் கொண்டான் றன்னை
    அக்கினொடும் என்பணிந்த அழகன் றன்னை
    அறுமுகனோ டானைமுகற் கப்பன் றன்னை
    நக்கனைவக் கரையானை நள்ளாற் றானை
    நாரையூர் நன்னகரிற் கண்டேன் நானே. 6.74.7
    741 அரிபிரமர் தொழுதேத்தும் அத்தன் றன்னை
    அந்தகனுக் கந்தகனை அளக்க லாகா
    எரிபுரியும் இலிங்கபுரா ணத்து ளானை
    எண்ணாகிப் பண்ணா ரெழுத்தா னானைத்
    திரிபுரஞ்செற் றொருமூவர்க் கருள்செய் தானைச்
    சிலந்திக்கும் அரசளித்த செல்வன் றன்னை
    நரிவிரவு காட்டகத்தி லாட லானை
    நாரையூர் நன்னகரிற் கண்டேன் நானே. 6.74.8
    742 ஆலால மிடற்றணியா அடக்கி னானை
    ஆலதன்கீழ் அறம்நால்வர்க் கருள்செய் தானைப்
    பாலாகித் தேனாகிப் பழமு மாகிப்
    பைங்கரும்பா யங்கருந்துஞ் சுவையா னானை
    மேலாய வேதியர்க்கு வேள்வி யாகி
    வேள்வியினின் பயனாய விமலன் றன்னை
    நாலாய மறைக்கிறைவ னாயி னானை
    நாரையூர் நன்னகரிற் கண்டேன் நானே. 6.74.9
    743 மீளாத ஆளென்னை உடையான் றன்னை
    வெளிசெய்த வழிபாடு மேவி னானை
    மாளாமை மறையவனுக் குயிரும் வைத்து
    வன்கூற்றின் உயிர்மாள உதைத்தான் றன்னைத்
    தோளாண்மை கருதிவரை யெடுத்த தூர்த்தன்
    தோள்வலியுந் தாள்வலியுந் தொலைவித் தாங்கே
    நாளோடு வாள்கொடுத்த நம்பன் றன்னை
    நாரையூர் நன்னகரிற் கண்டேன் நானே. 6.74.10

    திருச்சிற்றம்பலம்


    6.75 திருக்குடந்தைக்கீழ்க்கோட்டம் - திருத்தாண்டகம்


    திருச்சிற்றம்பலம்

    744 சொன்மலிந்த மறைநான்கா றங்க மாகிச்
    சொற்பொருளுங் கடந்தசுடர்ச் சோதி போலுங்
    கன்மலிந்த கயிலைமலை வாணர் போலுங்
    கடல்நஞ்ச முண்டிருண்ட கண்டர் போலும்
    மன்மலிந்த மணிவரைத்திண் டோ ளர் போலும்
    மலையரையன் மடப்பாவை மணாளர் போலுங்
    கொன்மலிந்த மூவிலைவேற் குழகர் போலுங்
    குடந்தைக்கீழ்க் கோட்டத்தெங் கூத்த னாரே. 6.75.1
    745 கானலிளங் கலிமறவ னாகிப் பார்த்தன்
    கருத்தளவு செருத்தொகுதி கண்டார் போலும்
    ஆனவிளங் கடுவிடையொன் றேறி அண்டத்
    தப்பாலும் பலிதிரியும் அழகர் போலுந்
    தேனலிளந் துவலைமலி தென்றல் முன்றிற்
    செழும்பொழிற்பூம் பாளைவிரி தேறல் நாறுங்
    கூனலிளம் பிறைதடவு கொடிகொள் மாடக்
    குடந்தைக்கீழ்க் கோட்டத்தெங் கூத்த னாரே. 6.75.2
    746 நீறலைத்த திருவுருவும் நெற்றிக் கண்ணும்
    நிலாவலைத்த பாம்பினொடு நிறைநீர்க் கங்கை
    ஆறலைத்த சடைமுடியும் அம்பொற் றோளும்
    அடியவர்க்குக் காட்டியருள் புரிவார் போலும்
    ஏறலைத்த நிமிர்கொடியொன் றுடையார் போலும்
    ஏழுலகுந் தொழுகழலெம் மீசர் போலுங்
    கூறலைத்த மலைமடந்தை கொழுநர் போலுங்
    குடந்தைக்கீழ்க் கோட்டத்தெங் கூத்த னாரே. 6.75.3
    747 தக்கனது பெருவேள்வி தகர்த்தார் போலுஞ்
    சந்திரனைக் கலைகவர்ந்து தரித்தார் போலுஞ்
    செக்கரொளி பவளவொளி மின்னின் சோதி
    செழுஞ்சுடர்த்தீ ஞாயிறெனச் செய்யர் போலும்
    மிக்கதிறல் மறையவரால் விளங்கு வேள்வி
    மிகுபுகைபோய் விண்பொழியக் கழனி யெல்லாங்
    கொக்கினிய கனிசிதறித் தேறல் பாயுங்
    குடந்தைக்கீழ்க் கோட்டத்தெங் கூத்த னாரே. 6.75.4
    748 காலன்வலி தொலைத்தகழற் காலர் போலுங்
    காமனெழில் அழல்விழுங்கக் கண்டார் போலும்
    ஆலதனில் அறம்நால்வர்க் களித்தார் போலும்
    ஆணொடுபெண் ணலியல்ல ரானார் போலும்
    நீலவுரு வயிரநிரைப் பச்சை செம்பொன்
    நெடும்பளிங்கென் றறிவரிய நிறத்தார் போலுங்
    கோலமணி கொழித்திழியும் பொன்னி நன்னீர்க்
    குடந்தைக்கீழ்க் கோட்டத்தெங் கூத்த னாரே. 6.75.5
    749 முடிகொண்ட வளர்மதியும் மூன்றாய்த் தோன்றும்
    முளைஞாயி றன்னமலர்க் கண்கள் மூன்றும்
    அடிகொண்ட சிலம்பொலியும் அருளார் சோதி
    அணிமுறுவற் செவ்வாயும் அழகாய்த் தோன்றத்
    துடிகொண்ட இடைமடவாள் பாகங் கொண்டு
    சுடர்ச்சோதிக் கடிச்செம்பொன் மலைபோ லிந்நாள்
    குடிகொண்டென் மனத்தகத்தே புகுந்தார் போலுங்
    குடந்தைக்கீழ்க் கோட்டத்தெங் கூத்த னாரே. 6.75.6
    750 காரிலங்கு திருவுருவத் தவற்கும் மற்றைக்
    கமலத்திற் காரணற்குங் காட்சி யொண்ணாச்
    சீரிலங்கு தழற்பிழம்பிற் சிவந்தார் போலுஞ்
    சிலைவளைவித் தவுணர்புரஞ் சிதைத்தார் போலும்
    பாரிலங்கு புனலனல்கால் பரமா காசம்
    பருதிமதி சுருதியுமாய்ப் பரந்தார் போலுங்
    கூரிலங்கு வேற்குமரன் தாதை போலுங்
    குடந்தைக்கீழ்க் கோட்டத்தெங் கூத்த னாரே. 6.75.7
    751 பூச்சூழ்ந்த பொழில்தழுவு புகலூ ருள்ளார்
    புறம்பயத்தார் அறம்புரிபூந் துருத்தி புக்கு
    மாச்சூழ்ந்த பழனத்தார் நெய்த்தா னத்தார்
    மாதவத்து வளர்சோற்றுத் துறையார் நல்ல
    தீச்சூழ்ந்த திகிரிதிரு மாலுக் கீந்து
    திருவானைக் காவிலோர் சிலந்திக் கந்நாள்
    கோச்சோழர் குலத்தரசு கொடுத்தார் போலுங்
    குடந்தைக்கீழ்க் கோட்டத்தெங் கூத்த னாரே. 6.75.8
    752 பொங்கரவர் புலித்தோலர் புராணர் மார்பிற்
    பொறிகிளர்வெண் பூணநூற் புனிதர் போலுஞ்
    சங்கரவக் கடன்முகடு தட்ட விட்டுச்
    சதுரநட மாட்டுகந்த சைவர் போலும்
    அங்கரவத் திருவடிக்காட் பிழைப்பத் தந்தை
    அந்தணனை அறஎறிந்தார்க் கருளப் போதே
    கொங்கரவச் சடைக்கொன்றை கொடுத்தார் போலுங்
    குடந்தைக்கீழ்க் கோட்டத்தெங் கூத்த னாரே. 6.75.9
    753 ஏவியிடர்க் கடலிடைப்பட் டிளைக்கின் றேனை
    இப்பிறவி யறுத்தேற வாங்கி யாங்கே
    கூவிஅம ருலகனைத்து முருவிப் போகக்
    குறியிலறு குணத்தாண்டு கொண்டார் போலுந்
    தாவிமுதற் காவிரிநல் யமுனை கங்கை
    சரச்வதிபொற் றாமரைப்புட் கரணி தெண்ணீர்க்
    கோவியொடு குமரிவரு தீர்த்தஞ் சூழ்ந்த
    குடந்தைக்கீழ்க் கோட்டத்தெங் கூத்த னாரே. 6.75.10
    754 செறிகொண்ட சிந்தைதனுள் தெளிந்து தேறித்
    தித்திக்குஞ் சிவபுவனத் தமுதம் போலும்
    நெறிகொண்ட குழலியுமை பாக மாக
    நிறைந்தமரர் கணம்வணங்க நின்றார் போலும்
    மறிகொண்ட கரதலத்தெம் மைந்தர் போலும்
    மதிலிலங்கைக் கோன்மலங்க வரைக்கீ ழிட்டுக்
    குறிகொண்ட இன்னிசைகேட் டுகந்தார் போலுங்
    குடந்தைக்கீழ்க் கோட்டத்தெங் கூத்த னாரே. 6.75.11

    இத்தலம் சோழநாட்டிலுள்ளது.
    சுவாமிபெயர் - மடந்தைபாகேசுவரர்,
    தேவியார் - பெரியநாயகியம்மை.

    திருச்சிற்றம்பலம்


    6.76 திருப்புத்தூர் - திருத்தாண்டகம்


    திருச்சிற்றம்பலம்

    755 புரிந்தமரர் தொழுதேத்தும் புகழ்தக் கோன்காண்
    போர்விடையின் பாகன்காண் புவன மேழும்
    விரிந்துபல உயிராகி விளங்கி னான்காண்
    விரைக்கொன்றைக் கண்ணியன்காண் வேத நான்குந்
    தெரிந்துமுதல் படைத்தோனைச் சிரங்கொண் டோ ன்காண்
    தீர்த்தன்காண் திருமாலோர் பங்கத் தான்காண்
    திருந்துவயல் புடைதழுவு திருப்புத் தூரில்
    திருத்தளியான் காணவனென் சிந்தை யானே. 6.76.1
    756 வாராரும் முலைமங்கை பாகத் தான்காண்
    மாமறைக ளாயவன்காண் மண்ணும் விண்ணுங்
    கூரார்வெந் தழலவனுங் காற்றும் நீருங்
    குலவரையும் ஆயவன்காண் கொடுநஞ் சுண்ட
    காராருங் கண்டன்காண் எண்டோ ளன்காண்
    கயிலைமலைப் பொருப்பன்காண் விருப்போ டென்றுந்
    தேராரும் நெடுவீதித் திருப்புத் தூரில்
    திருத்தளியான் காணவனென் சிந்தை யானே. 6.76.2
    757 மின்காட்டுங் கொடிமருங்குல் உமையாட் கென்றும்
    விருப்பவன்காண் பொருப்புவலிச் சிலைக்கை யோன்காண்
    நன்பாட்டுப் புலவனாய்ச் சங்க மேறி
    நற்கனகக் கிழிதருமிக் கருளி னோன்காண்
    பொன்காட்டக் கடிக்கொன்றை மருங்கே நின்ற
    புனக்காந்தட் கைகாட்டக் கண்டு வண்டு
    தென்காட்டுஞ் செழும்புறவின் திருப்புத் தூரில்
    திருத்தளியான் காணவனென் சிந்தை யானே. 6.76.3
    758 ஏடேறு மலர்க்கமலத் தயனும் மாலும்
    இந்திரனும் பணிந்தேத்த இருக்கின் றான்காண்
    தோடேறு மலர்க்கடுக்கை வன்னி மத்தந்
    துன்னியசெஞ் சடையான்காண் துகள்தீர் சங்கம்
    மாடேறி முத்தீனுங் கானல் வேலி
    மறைக்காட்டு மாமணிகாண் வளங்கொள் மேதி
    சேடேறி மடுப்படியுந் திருப்புத் தூரில்
    திருத்தளியான் காணவனென் சிந்தை யானே. 6.76.4
    759 கருமருவு வல்வினைநோய் காற்றி னான்காண்
    காமருபூங் கச்சியே கம்பத் தான்காண்
    பெருமருவு பேருலகிற் பிணிகள் தீர்க்கும்
    பெரும்பற்றத் தண்புலியூர் மன்றா டீகாண்
    தருமருவு கொடைத்தடக்கை அளகைக் கோன்றன்
    சங்காத்தி ஆரூரில் தனியா னைகாண்
    திருமருவு பொழில்புடைசூழ் திருப்புத் தூரில்
    திருத்தளியான் காணவனென் சிந்தை யானே. 6.76.5
    760 காம்பாடு தோளுமையாள் காண நட்டங்
    கலந்தாடல் புரிந்தவன்காண் கையில் வெய்ய
    பாம்பாடப் படுதலையிற் பலிகொள் வான்காண்
    பவளத்தின் பருவரைபோற் படிமத் தான்காண்
    தாம்பாடு சினவிடையே பகடாக் கொண்ட
    சங்கரன்காண் பொங்கரவக் கச்சை யோன்காண்
    சேம்பாடு வயல்புடைசூழ் திருப்புத் தூரில்
    திருத்தளியான் காணவனென் சிந்தை யானே. 6.76.6
    761 வெறிவிரவு மலர்க்கொன்றை விளங்கு திங்கள்
    வன்னியொடு விரிசடைமேல் மிலைச்சி னான்காண்
    பொறிவிரவு கதநாகம் அக்கி னோடு
    பூண்டவன்காண் பொருபுலித்தோ லாடை யான்காண்
    அறிவரிய நுண்பொருள்க ளாயி னான்காண்
    ஆயிரம்பே ருடையவன்காண் அந்தண் கானற்
    செறிபொழில்சூழ் மணிமாடத் திருப்புத் தூரில்
    திருத்தளியான் காணவனென் சிந்தை யானே. 6.76.7
    762 புக்கடைந்த வேதியற்காய்க் காலற் காய்ந்த
    புண்ணியன்காண் வெண்ணகைவெள் வளையா ளஞ்ச
    மிக்கெதிர்ந்த கரிவெருவ உரித்த கோன்காண்
    வெண்மதியைக் கலைசேர்த்த திண்மை யோன்காண்
    அக்கரும்பு பெரும்புன்னை நெருங்கு சோலை
    ஆரூருக் கதிபதிகாண் அந்தண் தென்றல்
    திக்கணைந்து வருமருங்கில் திருப்புத் தூரில்
    திருத்தளியான் காணவனென் சிந்தை யானே. 6.76.8
    763 பற்றவன்காண் ஏனோர்க்கும் வானோ ருக்கும்
    பராபரன்காண் தக்கன்றன் வேள்வி செற்ற
    கொற்றவன்காண் கொடுஞ்சினத்தை யடங்கச் செற்று
    ஞானத்தை மேன்மிகுத்தல் கோளாக் கொண்ட
    பெற்றியன்காண் பிறங்கருவிக் கழுக்குன் றத்தெம்
    பிஞ்ஞகன்காண் பேரெழிலார் காம வேளைச்
    செற்றவன்காண் சீர்மருவு திருப்புத் தூரில்
    திருத்தளியான் காணவனென் சிந்தை யானே. 6.76.9
    764 உரமதித்த சலந்தரன்றன் ஆகங் கீண்ட
    ஓராழி படைத்தவன்காண் உலகு சூழும்
    வரமதித்த கதிரவனைப் பற்கொண் டான்காண்
    வானவர்கோன் புயம்நெரித்த வல்லா ளன்காண்
    அரமதித்துச் செம்பொன்னி னாரம் பூணா
    அணிந்தவன்காண் அலைகடல்சூழ் இலங்கை வேந்தன்
    சிரம்நெரித்த சேவடிகாண் திருப்புத் தூரில்
    திருத்தளியான் காணவனென் சிந்தை யானே. 6.76.10

    இத்தலம் பாண்டிநாட்டிலுள்ளது.
    சுவாமிபெயர் - புத்தூரீசர், தேவியார் - சிவகாமியம்மை.

    திருச்சிற்றம்பலம்


    6.77 திருவாய்மூர் - திருத்தாண்டகம்


    திருச்சிற்றம்பலம்

    765 பாட வடியார் பரவக் கண்டேன்
    பத்தர் கணங்கண்டேன் மொய்த்த பூதம்
    ஆடல் முழவம் அதிரக் கண்டேன்
    அங்கை அனல்கண்டேன் கங்கை யாளைக்
    கோட லரவார் சடையிற் கண்டேன்
    கொக்கி னிதழ்கண்டேன் கொன்றை கண்டேன்
    வாடல் தலையொன்று கையிற் கண்டேன்
    வாய்மூர் அடிகளைநான் கண்ட வாறே. 6.77.1
    766 பாலின் மொழியாளோர் பாகங் கண்டேன்
    பதினெண் கணமும் பயிலக் கண்டேன்
    நீல நிறமுண்ட கண்டங் கண்டேன்
    நெற்றி நுதல்கண்டேன் பெற்றங் கண்டேன்
    காலைக் கதிர்செய் மதியங் கண்டேன்
    கரந்தை திருமுடிமேல் தோன்றக் கண்டேன்
    மாலைச் சடையும் முடியுங் கண்டேன்
    வாய்மூர் அடிகளைநான் கண்ட வாறே. 6.77.2
    767 மண்ணைத் திகழ நடம தாடும்
    வரைசிலம் பார்க்கின்ற பாதங் கண்டேன்
    விண்ணிற் றிகழும் முடியுங் கண்டேன்
    வேடம் பலவாஞ் சரிதை கண்டேன்
    நண்ணிப் பிரியா மழுவுங் கண்டேன்
    நாலு மறையங்க மோதக் கண்டேன்
    வண்ணப் பொலிந்திலங்கு கோலங் கண்டேன்
    வாய்மூர் அடிகளைநான் கண்ட வாறே. 6.77.3
    768 விளைத்த பெரும்பத்தி கூர நின்று
    மெய்யடியார் தம்மை விரும்பக் கண்டேன்
    இளைக்குங் கதநாக மேனி கண்டேன்
    என்பின் கலந்திகழ்ந்து தோன்றக் கண்டேன்
    திளைக்குந் திருமார்பில் நீறு கண்டேன்
    சேணார் மதின்மூன்றும் பொன்ற வன்று
    வளைத்த வரிசிலையுங் கையிற் கண்டேன்
    வாய்மூர் அடிகளைநான் கண்ட வாறே. 6.77.4
    769 கான்மறையும் போதகத்தி னுரிவை கண்டேன்
    காலிற் கழல்கண்டேன் கரியின் றோல்கொண்
    டூன்மறையப் போர்த்த வடிவுங் கண்டேன்
    உள்க மனம்வைத்த உணர்வுங் கண்டேன்
    நான்மறை யானோடு நெடிய மாலும்
    நண்ணி வரக்கண்டேன் திண்ண மாக
    மான்மறி தங்கையின் மருவக் கண்டேன்
    வாய்மூர் அடிகளைநான் கண்ட வாறே. 6.77.5
    770 அடியார் சிலம்பொலிக ளார்ப்பக் கண்டேன்
    அவ்வவர்க்கே ஈந்த கருணை கண்டேன்
    முடியார் சடைமேல் அரவ மூழ்க
    மூரிப் பிறைபோய் மறையக் கண்டேன்
    கொடியா ரதன்மேல் இடபங் கண்டேன்
    கோவணமுங் கீளுங் குலாவக் கண்டேன்
    வடியாரும் மூவிலைவேல் கையிற் கண்டேன்
    வாய்மூர் அடிகளைநான் கண்ட வாறே. 6.77.6
    771 குழையார் திருத்தோடு காதிற் கண்டேன்
    கொக்கரையுஞ் சச்சரியுங் கொள்கை கண்டேன்
    இழையார் புரிநூல் வலத்தே கண்டேன்
    ஏழிசை யாழ்வீணை முரலக் கண்டேன்
    தழையார் சடைகண்டேன் தன்மை கண்டேன்
    தக்கையொடு தாளங் கறங்கக் கண்டேன்
    மழையார் திருமிடறும் மற்றுங் கண்டேன்
    வாய்மூர் அடிகளைநான் கண்ட வாறே. 6.77.7
    772 பொருந்தாத செய்கை பொலியக் கண்டேன்
    போற்றிசைத்து விண்ணோர் புகழக் கண்டேன்
    பரிந்தார்க் கருளும் பரிசுங் கண்டேன்
    பாராகிப் புனலாகி நிற்கை கண்டேன்
    விருந்தாய்ப் பரந்த தொகுதி கண்டேன்
    மெல்லியலும் விநாயகனுந் தோன்றக் கண்டேன்
    மருந்தாய்ப் பிணிதீர்க்கு மாறு கண்டேன்
    வாய்மூர் அடிகளைநான் கண்ட வாறே. 6.77.8
    773 மெய்யன்ப ரானார்க் கருளுங் கண்டேன்
    வேடுவனாய் நின்ற நிலையுங் கண்டேன்
    கையம் பரனெரித்த காட்சி கண்டேன்
    கங்கணமும் அங்கைக் கனலுங் கண்டேன்
    ஐயம் பலவூர் திரியக் கண்டேன்
    அன்றவன் றன்வேள்வி அழித்து கந்து
    வையம் பரவ இருத்தல் கண்டேன்
    வாய்மூர் அடிகளைநான் கண்ட வாறே. 6.77.9
    774 கலங்க இருவர்க் கழலாய் நீண்ட
    காரணமுங் கண்டேன் கருவாய் நின்று
    பலங்கள் தரித்துகந்த பண்புங் கண்டேன்
    பாடல் ஒலியெலாங் கூடக் கண்டேன்
    இலங்கைத் தலைவன் சிரங்கள் பத்தும்
    இறுத்தவனுக் கீந்த பெருமை கண்டேன்
    வலங்கைத் தலத்துள் அனலுங் கண்டேன்
    வாய்மூர் அடிகளைநான் கண்ட வாறே. 6.77.10

    திருச்சிற்றம்பலம்


    6.78 திருவாலங்காடு - திருத்தாண்டகம்


    திருச்சிற்றம்பலம்

    775 ஒன்றா வுலகனைத்து மானார் தாமே
    ஊழிதோ றூழி உயர்ந்தார் தாமே
    நின்றாகி யெங்கும் நிமிர்ந்தார் தாமே
    நீர்வளிதீ யாகாச மானார் தாமே
    கொன்றாடுங் கூற்றை யுதைத்தார் தாமே
    கோலப் பழனை யுடையார் தாமே
    சென்றாடு தீர்த்தங்க ளானார் தாமே
    திருவாலங் காடுறையுஞ் செல்வர் தாமே. 6.78.1
    776 மலைமகளைப் பாக மமர்ந்தார் தாமே
    வானோர் வணங்கப் படுவார் தாமே
    சலமகளைச் செஞ்சடைமேல் வைத்தார் தாமே
    சரணென் றிருப்பார்கட் கன்பர் தாமே
    பலபலவும் வேடங்க ளானார் தாமே
    பழனை பதியா வுடையார் தாமே
    சிலைமலையா மூவெயிலும் அட்டார் தாமே
    திருவாலங் காடுறையுஞ் செல்வர் தாமே. 6.78.2
    777 ஆவுற்ற ஐந்து முகந்தார் தாமே
    அளவில் பெருமை யுடையார் தாமே
    பூவுற்ற நாற்றமாய் நின்றார் தாமே
    புனிதப் பொருளாகி நின்றார் தாமே
    பாவுற்ற பாட லுகப்பார் தாமே
    பழனை பதியா வுடையார் தாமே
    தேவுற் றடிபரவ நின்றார் தாமே
    திருவாலங் காடுறையுஞ் செல்வர் தாமே. 6.78.3
    778 நாறுபூங் கொன்றை முடியார் தாமே
    நான்மறையோ டாறங்கஞ் சொன்னார் தாமே
    மாறிலா மேனி யுடையார் தாமே
    மாமதியஞ் செஞ்சடைமேல் வைத்தார் தாமே
    பாறினார் வெண்டலையி லுண்டார் தாமே
    பழனை பதியா வுடையார் தாமே
    தேறினார் சித்தத் திருந்தார் தாமே
    திருவாலங் காடுறையுஞ் செல்வர் தாமே. 6.78.4
    779 அல்லும் பகலுமாய் நின்றார் தாமே
    அந்தியுஞ் சந்தியு மானார் தாமே
    சொல்லும் பொருளெலா மானார் தாமே
    தோத்திரமுஞ் சாத்திரமு மானார் தாமே
    பல்லுரைக்கும் பாவெலா மானார் தாமே
    பழனை பதியா வுடையார் தாமே
    செல்லும் நெறிகாட்ட வல்லார் தாமே
    திருவாலங் காடுறையுஞ் செல்வர் தாமே. 6.78.5
    780 தொண்டாய்ப் பணிவார்க் கணியார் தாமே
    தூநீ றணியுஞ் சுவண்டர் தாமே
    தண்டா மரையானும் மாலுந் தேடத்
    தழலுருவா யோங்கி நிமிர்ந்தார் தாமே
    பண்டா னிசைபாட நின்றார் தாமே
    பழனை பதியா வுடையார் தாமே
    திண்டோ ள்க ளெட்டு முடையார் தாமே
    திருவாலங் காடுறையுஞ் செல்வர் தாமே. 6.78.6
    781 மையாருங் கண்ட மிடற்றார் தாமே
    மயானத்தி லாடல் மகிழ்ந்தார் தாமே
    ஐயாறும் ஆரூரும் ஆனைக் காவும்
    அம்பலமுங் கோயிலாக் கொண்டார் தாமே
    பையா டரவ மசைத்தார் தாமே
    பழனை பதியா வுடையார் தாமே
    செய்யாள் வழிபட நின்றார் தாமே
    திருவாலங் காடுறையுஞ் செல்வர் தாமே. 6.78.7
    782 விண்முழுதும் மண்முழுது மானார் தாமே
    மிக்கோர்க ளேத்துங் குணத்தார் தாமே
    கண்விழியாற் காமனையுங் காய்ந்தார் தாமே
    காலங்க ளூழி கடந்தார் தாமே
    பண்ணியலும் பாட லுகப்பார் தாமே
    பழனை பதியா வுடையார் தாமே
    திண்மழுவா ளேந்து கரத்தார் தாமே
    திருவாலங் காடுறையுஞ் செல்வர் தாமே. 6.78.8
    783 காரார் கடல்நஞ்சை யுண்டார் தாமே
    கயிலை மலையை யுடையார் தாமே
    ஊரா வேகம்பம் உகந்தார் தாமே
    ஒற்றியூர் பற்றி இருந்தார் தாமே
    பாரார் புகழப் படுவார் தாமே
    பழனை பதியா வுடையார் தாமே
    தீராத வல்வினைநோய் தீர்ப்பார் தாமே
    திருவாலங் காடுறையுஞ் செல்வர் தாமே. 6.78.9
    784 மாலைப் பிறைசென்னி வைத்தார் தாமே
    வண்கயிலை மாமலையை வந்தி யாத
    நீலக் கடல்சூ ழிலங்கைக் கோனை
    நெரிய விரலா லடர்த்தார் தாமே
    பாலொத்த மேனி நிறத்தார் தாமே
    பழனை பதியா வுடையார் தாமே
    சீலத்தா ரேத்துந் திறத்தார் தாமே
    திருவாலங் காடுறையுஞ் செல்வர் தாமே. 6.78.10

    இத்தலம் தொண்டைநாட்டிலுள்ளது.
    சுவாமிபெயர் - ஊர்த்ததாண்டவேசுவரர்,
    தேவியார் - வண்டார்குழலியம்மை.

    திருச்சிற்றம்பலம்


    6.79 திருத்தலையாலங்காடு - திருத்தாண்டகம்


    திருச்சிற்றம்பலம்

    785 தொண்டர்க்குத் தூநெறியாய் நின்றான் றன்னைச்
    சூழ்நரகில் வீழாமே காப்பான் றன்னை
    அண்டத்துக் கப்பாலைக் கப்பா லானை
    ஆதிரைநா ளாதரித்த அம்மான் றன்னை
    முண்டத்தின் முளைத்தெழுந்த தீயா னானை
    மூவுருவத் தோருருவாய் முதலாய் நின்ற
    தண்டத்திற் றலையாலங் காடன் றன்னைச்
    சாராதே சாலநாள் போக்கி னேனே. 6.79.1
    786 அக்கிருந்த அரையானை அம்மான் றன்னை
    அவுணர்புர மொருநொடியி லெரிசெய் தானைக்
    கொக்கிருந்த மகுடத்தெங் கூத்தன் றன்னைக்
    குண்டலஞ்சேர் காதானைக் குழைவார் சிந்தை
    புக்கிருந்து போகாத புனிதன் றன்னைப்
    புண்ணியனை எண்ணருஞ்சீர்ப் போக மெல்லாந்
    தக்கிருந்த தலையாலங் காடன் றன்னைச்
    சாராதே சாலநாள் போக்கி னேனே. 6.79.2
    787 மெய்த்தவத்தை வேதத்தை வேத வித்தை
    விளங்கிளமா மதிசூடும் விகிர்தன் றன்னை
    எய்த்தவமே உழிதந்த ஏழை யேனை
    இடர்க்கடலில் வீழாமே யேற வாங்கிப்
    பொய்த்தவத்தா ரறியாத நெறிநின் றானைப்
    புனல்கரந்திட் டுமையொடொரு பாகம் நின்ற
    தத்துவனைத் தலையாலங் காடன் றன்னைச்
    சாராதே சாலநாள் போக்கி னேனே. 6.79.3
    788 சிவனாகித் திசைமுகனாய்த் திருமா லாகிச்
    செழுஞ்சுடராய்த் தீயாகி நீரு மாகிப்
    புவனாகிப் புவனங்க ளனைத்து மாகிப்
    பொன்னாகி மணியாகி முத்து மாகிப்
    பவனாகிப் பவனங்க ளனைத்து மாகிப்
    பசுவேறித் திரிவானோர் பவனாய் நின்ற
    தவனாய தலையாலங் காடன் றன்னைச்
    சாராதே சாலநாள் போக்கி னேனே. 6.79.4
    789 கங்கையெனுங் கடும்புனலைக் கரந்தான் றன்னைக்
    காமருபூம் பொழிற்கச்சிக் கம்பன் றன்னை
    அங்கையினில் மான்மறியொன் றேந்தி னானை
    ஐயாறு மேயானை ஆரூ ரானைப்
    பங்கமிலா அடியார்க்குப் பரிந்தான் றன்னைப்
    பரிதிநிய மத்தானைப் பாசூ ரானைச்
    சங்கரனைத் தலையாலங் காடன் றன்னைச்
    சாராதே சாலநாள் போக்கி னேனே. 6.79.5
    790 விடந்திகழும் அரவரைமேல் வீக்கி னானை
    விண்ணவர்க்கு மெண்ணரிய அளவி னானை
    அடைந்தவரை அமருலக மாள்விப் பானை
    அம்பொன்னைக் கம்பமா களிறட் டானை
    மடந்தையொரு பாகனை மகுடந் தன்மேல்
    வார்புனலும் வாளரவும் மதியும் வைத்த
    தடங்கடலைத் தலையாலங் காடன் றன்னைச்
    சாராதே சாலநாள் போக்கி னேனே. 6.79.6
    791 விடையேறிக் கடைதோறும் பலிகொள் வானை
    வீரட்டம் மேயானை வெண்ணீற் றானை
    முடைநாறு முதுகாட்டி லாட லானை
    முன்னானைப் பின்னானை அந்நா ளானை
    உடையாடை யுரிதோலே உகந்தான் றன்னை
    உமையிருந்த பாகத்து ளொருவன் றன்னைச்
    சடையானைத் தலையாலங் காடன் றன்னை
    சாராதே சாலநாள் போக்கி னேனே. 6.79.7
    792 கரும்பிருந்த கட்டிதனைக் கனியைத் தேனைக்
    கன்றாப்பின் நடுதறியைக் காறை யானை
    இரும்பமர்ந்த மூவிலைவே லேந்தி னானை
    என்னானைத் தென்னானைக் காவான் றன்னைச்
    சுரும்பமரும் மலர்க்கொன்றை சூடி னானைத்
    தூயானைத் தாயாகி உலகுக் கெல்லாந்
    தரும்பொருளைத் தலையாலங் காடன் றன்னைச்
    சாராதே சாலநாள் போக்கி னேனே. 6.79.8
    793 பண்டளவு நரம்போசைப் பயனைப் பாலைப்
    படுபயனைக் கடுவெளியைக் கனலைக் காற்றைக்
    கண்டளவிற் களிகூர்வார்க் கெளியான் றன்னைக்
    காரணனை நாரணனைக் கமலத் தோனை
    எண்டளவி லென்னெஞ்சத் துள்ளே நின்ற
    எம்மானைக் கைம்மாவி னுரிவை பேணுந்
    தண்டரனைத் தலையாலங் காடன் றன்னைச்
    சாராதே சாலநாள் போக்கி னேனே. 6.79.9
    794 கைத்தலங்கள் இருபதுடை அரக்கர் கோமான்
    கயிலைமலை அதுதன்னைக் கருதா தோடி
    முத்திலங்கு முடிதுளங்க வளைக ளெற்றி
    முடுகுதலுந் திருவிரலொன் றவன்மேல் வைப்பப்
    பத்திலங்கு வாயாலும் பாடல் கேட்டுப்
    பரிந்தவனுக் கிராவணனென் றீந்த நாம
    தத்துவனைத் தலையாலங் காடன் றன்னைச்
    சாராதே சாலநாள் போக்கி னேனே. 6.79.10

    இத்தலம் சோழநாட்டிலுள்ளது.
    சுவாமிபெயர் - ஆடவல்லவீசுவரர், தேவியார் - திருமடந்தையம்மை.

    திருச்சிற்றம்பலம்


    6.80 திருமாற்பேறு - திருத்தாண்டகம்


    திருச்சிற்றம்பலம்

    795 பாரானைப் பாரினது பயனா னானைப்
    படைப்பாகிப் பல்லுயிர்க்கும் பரிவோன் றன்னை
    ஆராத இன்னமுதை அடியார் தங்கட்
    கனைத்துலகு மானானை அமரர் கோனைக்
    காராருங் கண்டனைக் கயிலை வேந்தைக்
    கருதுவார் மனத்தானைக் காலற் செற்ற
    சீரானைச் செல்வனைத் திருமாற் பேற்றெஞ்
    செம்பவளக் குன்றினைச்சென் றடைந்தேன் நானே. 6.80.1
    796 விளைக்கின்ற நீராகி வித்து மாகி
    விண்ணோடு மண்ணாகி விளங்கு செம்பொன்
    துளைக்கின்ற துளையாகிச் சோதி யாகித்
    தூண்டரிய சுடராகித் துளக்கில் வான்மேல்
    முளைக்கின்ற கதிர்மதியு மரவு மொன்றி
    முழங்கொலிநீர்க் கங்கையொடு மூவா தென்றுந்
    திளைக்கின்ற சடையானைத் திருமாற் பேற்றெஞ்
    செம்பவளக் குன்றினைச்சென் றடைந்தேன் நானே. 6.80.2
    797 மலைமகள்தங் கோனவனை மாநீர் முத்தை
    மரகதத்தை மாமணியை மல்கு செல்வக்
    கலைநிலவு கையானைக் கம்பன் றன்னைக்
    காண்பினிய செழுஞ்சுடரைக் கனகக் குன்றை
    விலைபெரிய வெண்ணீற்று மேனி யானை
    மெய்யடியார் வேண்டுவதே வேண்டு வானைச்
    சிலைநிலவு கரத்தானைத் திருமாற் பேற்றெஞ்
    செம்பவளக் குன்றினைச்சென் றடைந்தேன் நானே. 6.80.3
    798 உற்றானை உடல்தனக்கோர் உயிரா னானை
    ஓங்காரத் தொருவனையங் குமையோர் பாகம்
    பெற்றானைப் பிஞ்ஞகனைப் பிறவா தானைப்
    பெரியனவும் அரியனவு மெல்லாம் முன்னே
    கற்றானைக் கற்பனவுந் தானே யாய
    கச்சியே கம்பனைக் காலன் வீழச்
    செற்றானைத் திகழொளியைத் திருமாற் பேற்றெஞ்
    செம்பவளக் குன்றினைச்சென் றடைந்தேன் நானே. 6.80.4
    799 நீறாகி நீறுமிழும் நெருப்பு மாகி
    நினைவாகி நினைவினிய மலையான் மங்கை
    கூறாகிக் கூற்றாகிக் கோளு மாகிக்
    குணமாகிக் குறையாத உவகைக் கண்ணீர்
    ஆறாத ஆனந்தத் தடியார் செய்த
    அனாசாரம் பொறுத்தருளி அவர்மே லென்றுஞ்
    சீறாத பெருமானைத் திருமாற் பேற்றெஞ்
    செம்பவளக் குன்றினைச்சென் றடைந்தேன் நானே. 6.80.5
    800 மருவினிய மறைப்பொருளை மறைக்காட் டானை
    மறப்பிலியை மதியேந்து சடையான் றன்னை
    உருநிலவு மொண்சுடரை உம்ப ரானை
    உரைப்பினிய தவத்தானை உலகின் வித்தைக்
    கருநிலவு கண்டனைக் காளத் தியைக்
    கருதுவார் மனத்தானைக் கல்வி தன்னைச்
    செருநிலவு படையானைத் திருமாற் பேற்றெஞ்
    செம்பவளக் குன்றினைச்சென் றடைந்தேன் நானே. 6.80.6
    801 பிறப்பானைப் பிறவாத பெருமை யானைப்
    பெரியானை அரியானைப் பெண்ணா ணாய
    நிறத்தானை நின்மலனை நினையா தாரை
    நினையானை நினைவோரை நினைவோன் றன்னை
    அறத்தானை அறவோனை ஐயன் றன்னை
    அண்ணல்தனை நண்ணரிய அமர ரேத்துந்
    திறத்தானைத் திகழொளியைத் திருமாற் பேற்றெஞ்
    செம்பவளக் குன்றினைச்சென் றடைந்தேன் நானே. 6.80.7
    802 வானகத்தில் வளர்முகிலை மதியந் தன்னை
    வணங்குவார் மனத்தானை வடிவார் பொன்னை
    ஊனகத்தில் உறுதுணையை உலவா தானை
    ஒற்றியூர் உத்தமனை ஊழிக் கன்றைக்
    கானகத்துக் கருங்களிற்றைக் காளத் தியைக்
    கருதுவார் கருத்தானைக் கருவை மூலத்
    தேனகத்தி லின்சுவையைத் திருமாற் பேற்றெஞ்
    செம்பவளக் குன்றினைச்சென் றடைந்தேன் நானே. 6.80.8
    803 முற்றாத முழுமுதலை முளையை மொட்டை
    முழுமலரின் மூர்த்தியை முனியா தென்றும்
    பற்றாகிப் பல்லுயிர்க்கும் பரிவோன் றன்னைப்
    பராபரனைப் பரஞ்சுடரைப் பரிவோர் நெஞ்சில்
    உற்றானை உயர்கருப்புச் சிலையோன் நீறாய்
    ஒள்ளழல்வாய் வேவவுறு நோக்கத் தானைச்
    செற்றானைத் திரிபுரங்கள் திருமாற் பேற்றெஞ்
    செம்பவளக் குன்றினைச்சென் றடைந்தேன் நானே. 6.80.9
    804 விரித்தானை நான்மறையோ டங்க மாறும்
    வெற்பெடுத்த இராவணனை விரலா லூன்றி
    நெரித்தானை நின்மலனை அம்மான் றன்னை
    நிலாநிலவு செஞ்சடைமேல் நிறைநீர்க் கங்கை
    தரித்தானைச் சங்கரனைச் சம்பு தன்னைத்
    தரியலர்கள் புரமூன்றுந் தழல்வாய் வேவச்
    சிரித்தானைத் திகழொளியைத் திருமாற் பேற்றெஞ்
    செம்பவளக் குன்றினைச்சென் றடைந்தேன் நானே. 6.80.10

    திருச்சிற்றம்பலம்


    6.81 திருக்கோடிகா - திருத்தாண்டகம்


    திருச்சிற்றம்பலம்

    805 கண்டலஞ்சேர் நெற்றியிளங் காளை கண்டாய்
    கன்மதில்சூழ் கந்தமா தனத்தான் கண்டாய்
    மண்டலஞ்சேர் மயக்கறுக்கும் மருந்து கண்டாய்
    மதிற்கச்சி யேகம்ப மேயான் கண்டாய்
    விண்டலஞ்சேர் விளக்கொளியாய் நின்றான் கண்டாய்
    மீயச்சூர் பிரியாத விகிர்தன் கண்டாய்
    கொண்டலஞ்சேர் கண்டத்தெங் கூத்தன் கண்டாய்
    கோடிகா அமர்ந்துறையுங் குழகன் றானே. 6.81.1
    806 வண்டாடு பூங்குழலாள் பாகன் கண்டாய்
    மறைக்காட் டுறையும் மணாளன் கண்டாய்
    பண்டாடு பழவினைநோய் தீர்ப்பான் கண்டாய்
    பரலோக நெறிகாட்டும் பரமன் கண்டாய்
    செண்டாடி அவுணர்புரஞ் செற்றான் கண்டாய்
    திருவாரூர்த் திருமூலத் தானன் கண்டாய்
    கொண்டாடு மடியவர்தம் மனத்தான் கண்டாய்
    கோடிகா அமர்ந்துறையுங் குழகன் றானே. 6.81.2
    807 அலையார்ந்த புனற்கங்கைச் சடையான் கண்டாய்
    அடியார்கட் காரமுத மானான் கண்டாய்
    மலையார்ந்த மடமங்கை பங்கன் கண்டாய்
    வானோர்கள் முடிக்கணியாய் நின்றான் கண்டாய்
    இலையார்ந்த திரிசூலப் படையான் கண்டாய்
    ஏழுலகு மாய்நின்ற எந்தை கண்டாய்
    கொலையார்ந்த குஞ்சரத்தோல் போர்த்தான் கண்டாய்
    கோடிகா அமர்ந்துறையுங் குழகன் றானே. 6.81.3
    808 மற்றாருந் தன்னொப்பா ரில்லான் கண்டாய்
    மயிலாடு துறையிடமா மகிழ்ந்தான் கண்டாய்
    புற்றா டரவணிந்த புனிதன் கண்டாய்
    பூந்துருத்திப் பொய்யிலியாய் நின்றான் கண்டாய்
    அற்றார்கட் கற்றானாய் நின்றான் கண்டாய்
    ஐயா றகலாத ஐயன் கண்டாய்
    குற்றாலத் தமர்ந்துறையுங் கூத்தன் கண்டாய்
    கோடிகா அமர்ந்துறையுங் குழகன் றானே. 6.81.4
    809 வாரார்ந்த வனமுலையாள் பங்கன் கண்டாய்
    மாற்பேறு காப்பா மகிழ்ந்தான் கண்டாய்
    போரார்ந்த மால்விடையொன் றூர்வான் கண்டாய்
    புகலூரை யகலாத புனிதன் கண்டாய்
    நீரார்ந்த நிமிர்சடையொன் றுடையான் கண்டாய்
    நினைப்பார்தம் வினைப்பாரம் இழிப்பான் கண்டாய்
    கூரார்ந்த மூவிலைவேற் படையான் கண்டாய்
    கோடிகா அமர்ந்துறையுங் குழகன் றானே. 6.81.5
    810 கடிமலிந்த மலர்க்கொன்றைச் சடையான் கண்டாய்
    கண்ணப்ப விண்ணப்புக் கொடுத்தான் கண்டாய்
    படிமலிந்த பல்பிறவி யறுப்பான் கண்டாய்
    பற்றற்றார் பற்றவனாய் நின்றான் கண்டாய்
    அடிமலிந்த சிலம்பலம்பத் திரிவான் கண்டாய்
    அமரர்கணந் தொழுதேத்தும் அம்மான் கண்டாய்
    கொடிமலிந்த மதில்தில்லைக் கூத்தன் கண்டாய்
    கோடிகா அமர்ந்துறையுங் குழகன் றானே. 6.81.6
    811 உழையாடு கரதலமொன் றுடையான் கண்டாய்
    ஒற்றியூ ரொற்றியா வுடையான் கண்டாய்
    கழையாடு கழுக்குன்ற மமர்ந்தான் கண்டாய்
    காளத்திக் கற்பகமாய் நின்றான் கண்டாய்
    இழையாடு மெண்புயத்த இறைவன் கண்டாய்
    என்னெஞ்சத் துள்நீங்கா எம்மான் கண்டாய்
    குழையாட நடமாடுங் கூத்தன் கண்டாய்
    கோடிகா அமர்ந்துறையுங் குழகன் றானே. 6.81.7
    812 படமாடு பன்னகக்கச் சசைத்தான் கண்டாய்
    பராய்த்துறையும் பாசூரும் மேயான் கண்டாய்
    நடமாடி ஏழுலகுந் திரிவான் கண்டாய்
    நான்மறையின் பொருள்கண்டாய் நாதன் கண்டாய்
    கடமாடு களிறுரித்த கண்டன் கண்டாய்
    கயிலாயம் மேவி யிருந்தான் கண்டாய்
    குடமாடி யிடமாகக் கொண்டான் கண்டாய்
    கோடிகா அமர்ந்துறையுங் குழகன் றானே. 6.81.8
    இப்பதிகத்தில் 9,10-ம் செய்யுட்கள் சிதைந்து போயின. 6.81.9-10
    திருச்சிற்றம்பலம்


    6.82 திருச்சாய்க்காடு - திருத்தாண்டகம்


    திருச்சிற்றம்பலம்

    813 வானத் திளமதியும் பாம்புந் தன்னில்
    வளர்சடைமேல் ஆதரிப்ப வைத்தார் போலுந்
    தேனைத் திளைத்துண்டு வண்டு பாடுந்
    தில்லை நடமாடுந் தேவர் போலும்
    ஞானத்தின் ஒண்சுடராய் நின்றார் போலும்
    நன்மையுந் தீமையு மானார் போலுந்
    தேனொத் தடியார்க் கினியார் போலுந்
    திருச்சாய்க்காட் டினிதுறையுஞ் செல்வர் தாமே. 6.82.1
    814 விண்ணோர் பரவநஞ் சுண்டார் போலும்
    வியன்துருத்தி வேள்விக் குடியார் போலும்
    அண்ணா மலையுறையும் அண்ணல் போலும்
    அதியரைய மங்கை யமர்ந்தார் போலும்
    பண்ணார் களிவண்டு பாடி யாடும்
    பராய்த்துறையுள் மேய பரமர் போலுந்
    திண்ணார் புகார்முத் தலைக்குந் தெண்ணீர்த்
    திருச்சாய்க்காட் டினிதுறையுஞ் செல்வர் தாமே. 6.82.2
    815 கானிரிய வேழ முரித்தார் போலுங்
    காவிரிப்பூம் பட்டினத் துள்ளார் போலும்
    வானிரிய வருபுரமூன் றெரித்தார் போலும்
    வடகயிலை மலையதுதம் மிருக்கை போலும்
    ஊனிரியத் தலைகலனா வுடையார் போலும்
    உயர்தோணி புரத்துறையு மொருவர் போலுந்
    தேனிரிய மீன்பாயுந் தெண்ணீர்ப் பொய்கைத்
    திருச்சாய்க்காட் டினிதுறையுஞ் செல்வர் தாமே. 6.82.3
    816 ஊனுற்ற வெண்டலைசேர் கையர் போலும்
    ஊழி பலகண் டிருந்தார் போலும்
    மானுற்ற கரதலமொன் றுடையார் போலும்
    மறைக்காட்டுக் கோடி மகிழ்ந்தார் போலுங்
    கானுற்ற ஆட லமர்ந்தார் போலுங்
    காமனையுங் கண்ணழலாற் காய்ந்தார் போலுந்
    தேனுற்ற சோலை திகழ்ந்து தோன்றுந்
    திருச்சாய்க்காட் டினிதுறையுஞ் செல்வர் தாமே. 6.82.4
    817 கார்மல்கு கொன்றையந் தாரார் போலுங்
    காலனையும் ஓருதையாற் கண்டார் போலும்
    பார்மல்கி யேத்தப் படுவார் போலும்
    பருப்பதத்தே பல்லூழி நின்றார் போலும்
    ஊர்மல்கு பிச்சைக் குழன்றார் போலும்
    ஓத்தூர் ஒருநாளும் நீங்கார் போலுஞ்
    சீர்மல்கு பாட லுகந்தார் போலுந்
    திருச்சாய்க்காட் டினிதுறையுஞ் செல்வர் தாமே. 6.82.5
    818 மாவாய்ப் பிளந்துகந்த மாலுஞ் செய்ய
    மலரவனுந் தாமேயாய் நின்றார் போலும்
    மூவாத மேனி முதல்வர் போலும்
    முதுகுன்ற மூதூ ருடையார் போலுங்
    கோவாய முனிதன்மேல் வந்த கூற்றைக்
    குரைகழலா லன்று குமைத்தார் போலுந்
    தேவாதி தேவர்க் கரியார் போலுந்
    திருச்சாய்க்காட் டினிதுறையுஞ் செல்வர் தாமே. 6.82.6
    819 கடுவெளியோ டோ ரைந்து மானார் போலுங்
    காரோணத் தென்று மிருப்பார் போலும்
    இடிகுரல்வாய்ப் பூதப் படையார் போலும்
    ஏகம்பம் மேவி யிருந்தார் போலும்
    படியொருவ ரில்லாப் படியார் போலும்
    பாண்டிக் கொடுமுடியுந் தம்மூர் போலுஞ்
    செடிபடுநோ யடியாரைத் தீர்ப்பார் போலுந்
    திருச்சாய்க்காட் டினிதுறையுஞ் செல்வர் தாமே. 6.82.7
    820 விலையிலா ஆரஞ்சேர் மார்பர் போலும்
    வெண்ணீறு மெய்க்கணிந்த விகிர்தர் போலும்
    மலையினார் மங்கை மணாளர் போலும்
    மாற்பேறு காப்பாய் மகிழ்ந்தார் போலுந்
    தொலைவிலார் புரமூன்றுந் தொலைத்தார் போலுஞ்
    சோற்றுத் துறைதுருத்தி யுள்ளார் போலுஞ்
    சிலையினார் செங்க ணரவர் போலுந்
    திருச்சாய்க்காட் டினிதுறையுஞ் செல்வர் தாமே. 6.82.8
    821 அல்ல லடியார்க் கறுப்பார் போலும்
    அமருலகந் தம்மடைந்தார்க் காட்சி போலும்
    நல்லமும் நல்லூரும் மேயார் போலும்
    நள்ளாறு நாளும் பிரியார் போலும்
    முல்லை முகைநகையாள் பாகர் போலும்
    முன்னமே தோன்றி முளைத்தார் போலுந்
    தில்லை நடமாடுந் தேவர் போலுந்
    திருச்சாய்க்காட் டினிதுறையுஞ் செல்வர் தாமே. 6.82.9
    822 உறைப்புடைய இராவணன்பொன் மலையைக் கையால்
    ஊக்கஞ்செய் தெடுத்தலுமே உமையா ளஞ்ச
    நிறைப்பெருந்தோள் இருபதும்பொன் முடிகள் பத்தும்
    நிலஞ்சேர விரல்வைத்த நிமலர் போலும்
    பிறைப்பிளவு சடைக்கணிந்த பெம்மான் போலும்
    பெண்ணா ணுருவாகி நின்றார் போலுஞ்
    சிறப்புடைய அடியார்கட் கினியார் போலுந்
    திருச்சாய்க்காட் டினிதுறையுஞ் செல்வர் தாமே. 6.82.10

    இத்தலம் சோழநாட்டிலுள்ளது.
    சுவாமிபெயர் - சாயாவனேசுவரர்,
    தேவியார் - குயிலினும்நன்மொழியம்மை.

    திருச்சிற்றம்பலம்


    6.83 திருப்பாசூர் - திருத்தாண்டகம்


    திருச்சிற்றம்பலம்

    823 விண்ணாகி நிலனாகி விசும்பு மாகி
    வேலைசூழ் ஞாலத்தார் விரும்பு கின்ற
    எண்ணாகி எழுத்தாகி இயல்பு மாகி
    ஏழுலகுந் தொழுதேத்திக் காண நின்ற
    கண்ணாகி மணியாகிக் காட்சி யாகிக்
    காதலித்தங் கடியார்கள் பரவ நின்ற
    பண்ணாகி இன்னமுதாம் பாசூர் மேய
    பரஞ்சுடரைக் கண்டடியேன் உய்ந்த வாறே. 6.83.1
    824 வேதமோர் நான்காயா றங்க மாகி
    விரிக்கின்ற பொருட்கெல்லாம் வித்து மாகிக்
    கூதலாய்ப் பொழிகின்ற மாரி யாகிக்
    குவலயங்கள் முழுதுமாய்க் கொண்ட லாகிக்
    காதலால் வானவர்கள் போற்றி யென்று
    கடிமலர்க ளவைதூவி ஏத்த நின்ற
    பாதியோர் மாதினனைப் பாசூர் மேய
    பரஞ்சுடரைக் கண்டடியேன் உய்ந்த வாறே. 6.83.2
    825 தடவரைக ளேழுமாய்க் காற்றாய்த் தீயாய்த்
    தண்விசும்பாய்த் தண்விசும்பி னுச்சி யாகிக்
    கடல்வலயஞ் சூழ்ந்ததொரு ஞால மாகிக்
    காண்கின்ற கதிரவனும் மதியு மாகிக்
    குடமுழவச் சதிவழியே அனல்கை யேந்திக்
    கூத்தாட வல்ல குழக னாகிப்
    படவரவொன் றதுவாட்டிப் பாசூர் மேய
    பரஞ்சுடரைக் கண்டடியேன் உய்ந்த வாறே. 6.83.3
    826 நீராருஞ் செஞ்சடைமேல் அரவங் கொன்றை
    நிறைமதிய முடன்சூடி நீதி யாலே
    சீராரும் மறையோதி உலக முய்யச்
    செழுங்கடலைக் கடைந்தகடல் நஞ்ச முண்ட
    காராருங் கண்டனைக் கச்சி மேய
    கண்ணுதலைக் கடலொற்றி கருதி னானைப்
    பாரோரும் விண்ணோரும் பரசும் பாசூர்ப்
    பரஞ்சுடரைக் கண்டடியேன் உய்ந்த வாறே. 6.83.4
    827 வேடனாய் விசயன்றன் வியப்பைக் காண்பான்
    விற்பிடித்துக் கொம்புடைய ஏனத் தின்பின்
    கூடினார் உமையவளுங் கோலங் கொள்ளக்
    கொலைப்பகழி யுடன்கோத்துக் கோரப் பூசல்
    ஆடினார் பெருங்கூத்துக் காளி காண
    அருமறையோ டாறங்கம் ஆய்ந்து கொண்டு
    பாடினார் நால்வேதம் பாசூர் மேய
    பரஞ்சுடரைக் கண்டடியேன் உய்ந்த வாறே. 6.83.5
    828 புத்தியினாற் சிலந்தியுந்தன் வாயின் நூலாற்
    பொதுப்பந்தர் அதுவிழைத்துச் சருகால் மேய்ந்த
    சித்தியினால் அரசாண்டு சிறப்புச் செய்யச்
    சிவகணத்துப் புகப்பெய்தார் திறலான் மிக்க
    வித்தகத்தால் வெள்ளானை விள்ளா அன்பு
    விரவியவா கண்டதற்கு வீடு காட்டிப்
    பத்தர்களுக் கின்னமுதாம் பாசூர் மேய
    பரஞ்சுடரைக் கண்டடியேன் உய்ந்த வாறே. 6.83.6
    829 இணையொருவர் தாமல்லால் யாரு மில்லார்
    இடைமருதோ டேகம்பத் தென்றும் நீங்கார்
    அணைவரியர் யாவர்க்கும் ஆதி தேவர்
    அருமந்த நன்மையெலாம் அடியார்க் கீவர்
    தணல்முழுகு பொடியாடுஞ் செக்கர் மேனித்
    தத்துவனைச் சாந்தகிலி னளறு தோய்ந்த
    பணைமுலையாள் பாகனையெம் பாசூர் மேய
    பரஞ்சுடரைக் கண்டடியேன் உய்ந்த வாறே. 6.83.7
    830 அண்டவர்கள் கடல்கடைய அதனுட் டோ ன்றி
    அதிர்ந்தெழுந்த ஆலாலம் வேலை ஞாலம்
    எண்டிசையுஞ் சுடுகின்ற ஆற்றைக் கண்டும்
    இமைப்பளவில் உண்டிருண்ட கண்டர் தொண்டர்
    வண்டுபடு மதுமலர்கள் தூவி நின்று
    வானவர்கள் தானவர்கள் வணங்கி யேத்தும்
    பண்டரங்க வேடனையெம் பாசூர் மேய
    பரஞ்சுடரைக் கண்டடியேன் உய்ந்த வாறே. 6.83.8
    831 ஞாலத்தை யுண்டதிரு மாலும் மற்றை
    நான்முகனு மறியாத நெறியான் கையிற்
    சூலத்தால் அந்தகனைச் சுருளக் கோத்துத்
    தொல்லுலகிற் பல்லுயிரைக் கொல்லுங் கூற்றைக்
    காலத்தா லுதைசெய்து காதல் செய்த
    அந்தணனைக் கைக்கொண்ட செவ்வான் வண்ணர்
    பாலொத்த வெண்ணீற்றர் பாசூர் மேய
    பரஞ்சுடரைக் கண்டடியேன் உய்ந்த வாறே. 6.83.9
    832 வேந்தன்நெடு முடியுடைய அரக்கர் கோமான்
    மெல்லியலாள் உமைவெருவ விரைந்திட் டோ டிச்
    சாந்தமென நீறணிந்தான் கயிலை வெற்பைத்
    தடக்கைகளா லெடுத்திடலுந் தாளா லூன்றி
    ஏந்துதிரள் திண்டோ ளுந் தலைகள் பத்தும்
    இறுத்தவன்றன் இசைகேட்டு விரக்கங் கொண்ட
    பாந்தளணி சடைமுடியெம் பாசூர் மேய
    பரஞ்சுடரைக் கண்டடியேன் உய்ந்த வாறே. 6.83.1

    திருச்சிற்றம்பலம்


    6.84 திருச்செங்காட்டங்குடி - திருத்தாண்டகம்


    திருச்சிற்றம்பலம்

    833 பெருந்தகையைப் பெறற்கரிய மாணிக் கத்தைப்
    பேணிநினைந் தெழுவார்தம் மனத்தே மன்னி
    இருந்தமணி விளக்கதனை நின்ற பூமேல்
    எழுந்தருளி இருந்தானை எண்டோ ள் வீசி
    அருந்திறன்மா நடமாடும் அம்மான் றன்னை
    அங்கனகச் சுடர்க்குன்றை அன்றா லின்கீழ்த்
    திருந்துமறைப் பொருள்நால்வர்க் கருள்செய் தானைச்
    செங்காட்டங் குடியதனிற் கண்டேன் நானே. 6.84.1
    834 துங்கநகத் தாலன்றித் தொலையா வென்றித்
    தொகுதிறலவ் விரணியனை ஆகங் கீண்ட
    அங்கனகத் திருமாலும் அயனுந் தேடும்
    ஆரழலை அனங்கனுடல் பொடியாய் வீழ்ந்து
    மங்கநகத் தான்வல்ல மருந்து தன்னை
    வண்கயிலை மாமலைமேல் மன்னி நின்ற
    செங்கனகத் திரள்தோளெஞ் செல்வன் றன்னைச்
    செங்காட்டங் குடியதனிற் கண்டேன் நானே. 6.84.2
    835 உருகுமனத் தடியவர்கட் கூறுந் தேனை
    உம்பர்மணி முடிக்கணியை உண்மை நின்ற
    பெருகுநிலைக் குறியாளர் அறிவு தன்னைப்
    பேணியஅந் தணர்க்குமறைப் பொருளைப் பின்னும்
    முருகுவிரி நறுமலர்மே லயற்கும் மாற்கும்
    முழுமுதலை மெய்த்தவத்தோர் துணையை வாய்த்த
    திருகுகுழல் உமைநங்கை பங்கன் றன்னைச்
    செங்காட்டங் குடியதனிற் கண்டேன் நானே. 6.84.3
    836 கந்தமலர்க் கொன்றையணி சடையான் றன்னைக்
    கதிர்விடுமா மணிபிறங்கு கனகச் சோதிச்
    சந்தமலர்த் தெரிவையொரு பாகத் தானைச்
    சராசரநற் றாயானை நாயேன் முன்னைப்
    பந்தமறுத் தாளாக்கிப் பணிகொண் டாங்கே
    பன்னியநூற் றமிழ்மாலை பாடு வித்தென்
    சிந்தைமயக் கறுத்ததிரு வருளி னானைச்
    செங்காட்டங் குடியதனிற் கண்டேன் நானே. 6.84.4
    837 நஞ்சடைந்த கண்டத்து நாதன் றன்னை
    நளிர்மலர்ப்பூங் கணைவேளை நாச மாக
    வெஞ்சினத்தீ விழித்ததொரு நயனத் தானை
    வியன்கெடில வீரட்டம் மேவி னானை
    மஞ்சடுத்த நீள்சோலை மாட வீதி
    மதிலாரூ ரிடங்கொண்ட மைந்தன் றன்னைச்
    செஞ்சினத்த திரிசூலப் படையான் றன்னைச்
    செங்காட்டங் குடியதனிற் கண்டேன் நானே. 6.84.5
    838 கன்னியையங் கொருசடையிற் கரந்தான் றன்னைக்
    கடவூரில் வீரட்டங் கருதி னானைப்
    பொன்னிசூழ் ஐயாற்றெம் புனிதன் றன்னைப்
    பூந்துருத்தி நெய்த்தானம் பொருந்தி னானைப்
    பன்னியநான் மறைவிரிக்கும் பண்பன் றன்னைப்
    பரிந்திமையோர் தொழுதேத்திப் பரனே யென்று
    சென்னிமிசைக் கொண்டணிசே வடியி னானைச்
    செங்காட்டங் குடியதனிற் கண்டேன் நானே. 6.84.6
    839 எத்திக்கு மாய்நின்ற இறைவன் றன்னை
    ஏகம்பம் மேயானை இல்லாத் தெய்வம்
    பொத்தித்தம் மயிர்பறிக்குஞ் சமணர் பொய்யிற்
    புக்கழுந்தி வீழாமே போத வாங்கிப்
    பத்திக்கே வழிகாட்டிப் பாவந் தீர்த்துப்
    பண்டைவினைப் பயமான எல்லாம் போக்கித்
    தித்தித்தென் மனத்துள்ளே ஊறுந் தேனைச்
    செங்காட்டங் குடியதனிற் கண்டேன் நானே. 6.84.7
    840 கல்லாதார் மனத்தணுகாக் கடவுள் தன்னைக்
    கற்றார்கள் உற்றோருங் காத லானைப்
    பொல்லாத நெறியுகந்தார் புரங்கள் மூன்றும்
    பொன்றிவிழ அன்றுபொரு சரந்தொட் டானை
    நில்லாத நிணக்குரம்பைப் பிணக்கம் நீங்க
    நிறைதவத்தை அடியேற்கு நிறைவித் தென்றுஞ்
    செல்லாத செந்நெறிக்கே செல்விப் பானைச்
    செங்காட்டங் குடியதனிற் கண்டேன் நானே. 6.84.8
    841 அரியபெரும் பொருளாகி நின்றான் றன்னை
    அலைகடலில் ஆலால மமுது செய்த
    கரியதொரு கண்டத்துச் செங்க ணேற்றுக்
    கதிர்விடுமா மணிபிறங்கு காட்சி யானை
    உரியபல தொழிற்செய்யு மடியார் தங்கட்
    குலகமெலாம் முழுதளிக்கும் உலப்பி லானைத்
    தெரிவையொரு பாகத்துச் சேர்த்தி னானைச்
    செங்காட்டங் குடியதனிற் கண்டேன் நானே. 6.84.9
    842 போரரவம் மால்விடையொன் றூர்தி யானைப்
    புறம்பயமும் புகலூரும் மன்னி னானை
    நீரரவச் செஞ்சடைமேல் நிலாவெண் டிங்கள்
    நீங்காமை வைத்தானை நிமலன் றன்னைப்
    பேரரவப் புட்பகத்தே ருடைய வென்றிப்
    பிறங்கொளிவா ளரக்கன்முடி யிடியச் செற்ற
    சீரரவக் கழலானைச் செல்வன் றன்னைச்
    செங்காட்டங் குடியதனிற் கண்டேன் நானே. 6.84.1
    இத்தலம் சோழநாட்டிலுள்ளது.
    சுவாமிபெயர் - கணபதீசுவரர், தேவியார் - திருக்குழல்மாதம்மை.

    திருச்சிற்றம்பலம்


    6.85 திருமுண்டீச்சரம் - திருத்தாண்டகம்


    திருச்சிற்றம்பலம்

    843 ஆர்த்தான்காண் அழல்நாகம் அரைக்கு நாணா
    அடியவர்கட் கன்பன்காண் ஆனைத் தோலைப்
    போர்த்தான்காண் புரிசடைமேற் புனலேற் றான்காண்
    புறங்காட்டி லாடல் புரிந்தான் றான்காண்
    காத்தான்காண் உலகேழுங் கலங்கா வண்ணங்
    கனைகடல்வாய் நஞ்சதனைக் கண்டத் துள்ளே
    சேர்த்தான்காண் திருமுண்டீச் சரத்து மேய
    சிவலோகன் காணவனென் சிந்தை யானே. 6.85.1
    844 கருத்தன்காண் கமலத்தோன் றலையி லொன்றைக்
    காய்ந்தான்காண் பாய்ந்தநீர் பரந்த சென்னி
    ஒருத்தன்காண் உமையவளோர் பாகத் தான்காண்
    ஓருருவின் மூவுருவா யொன்றாய் நின்ற
    விருத்தன்காண் விண்ணவர்க்கும் மேலா னான்காண்
    மெய்யடியா ருள்ளத்தே விரும்பி நின்ற
    திருத்தன்காண் திருமுண்டீச் சரத்து மேய
    சிவலோகன் காணவனென் சிந்தை யானே. 6.85.2
    845 நம்பன்காண் நரைவிடையொன் றேறி னான்காண்
    நாதன்காண் கீதத்தை நவிற்றி னான்காண்
    இன்பன்காண் இமையாமுக் கண்ணி னான்காண்
    ஏசற்று மனமுருகும் அடியார் தங்கட்
    கன்பன்காண் ஆரழல தாடி னான்காண்
    அவனிவனென் றியாவர்க்கும் அறிய வொண்ணாச்
    செம்பொன்காண் திருமுண்டீச் சரத்து மேய
    சிவலோகன் காணவனென் சிந்தை யானே. 6.85.3
    846 மூவன்காண் மூவர்க்கும் முதலா னான்காண்
    முன்னுமாய்ப் பின்னுமாய் முடிவா னான்காண்
    காவன்காண் உலகுக்கோர் கண்ணா னான்காண்
    கங்காளன் காண்கயிலை மலையி னான்காண்
    ஆவன்காண் ஆவகத்தஞ் சாடி னான்காண்
    ஆரழலாய் அயற்கரிக்கும் அறிய வொண்ணாத்
    தேவன்காண் திருமுண்டீச் சரத்து மேய
    சிவலோகன் காணவனென் சிந்தை யானே. 6.85.4
    847 கானவன்காண் கானவனாய்ப் பொருதான் றான்காண்
    கனலாட வல்லான்காண் கையி லேந்தும்
    மானவன்காண் மறைநான்கு மாயி னான்காண்
    வல்லேறொன் றதுவேற வல்லான் றான்காண்
    ஊனவன்காண் உலகத்துக் குயிரா னான்காண்
    உரையவன்காண் உணர்வவன்காண் உணர்ந்தார்க் கென்றுந்
    தேனவன்காண் திருமுண்டீச் சரத்து மேய
    சிவலோகன் காணவனென் சிந்தை யானே. 6.85.5
    848 உற்றவன்காண் உறவெல்லா மாவான் றான்காண்
    ஒழிவற நின்றெங்கு முலப்பி லான்காண்
    புற்றரவே ஆடையுமாய்ப் பூணு மாகிப்
    புறங்காட்டி லெரியாடல் புரிந்தான் றான்காண்
    நற்றவன்காண் அடியடைந்த மாணிக் காக
    நணுகியதோர் பெருங்கூற்றைச் சேவ டியினாற்
    செற்றவன்காண் திருமுண்டீச் சரத்து மேய
    சிவலோகன் காணவனென் சிந்தை யானே. 6.85.6
    849 உதைத்தவன்காண் உணராத தக்கன் வேள்வி
    உருண்டோ டத் தொடர்ந்தருக்கன் பல்லை யெல்லாந்
    தகர்த்தவன்காண் தக்கன்றன் தலையைச் செற்ற
    தலையவன்காண் மலைமகளாம் உமையைச் சால
    மதிப்பொழிந்த வல்லமரர் மாண்டார் வேள்வி
    வந்தவியுண் டவரோடு மதனை யெல்லாஞ்
    சிதைத்தவன்காண் திருமுண்டீச் சரத்து மேய
    சிவலோகன் காணவனென் சிந்தை யானே. 6.85.7
    850 உரிந்தவுடை யார்துவரா லுடம்பை மூடி
    உழிதருமவ் வூமரவர் உணரா வண்ணம்
    பரிந்தவன்காண் பனிவரைமீப் பண்ட மெல்லாம்
    பறித்துடனே நிரந்துவரு பாய்நீர்ப் பெண்ணை
    நிரந்துவரும் இருகரையுந் தடவா வோடி
    நின்மலனை வலங்கொண்டு நீள நோக்கித்
    திரிந்துலவு திருமுண்டீச் சரத்து மேய
    சிவலோகன் காணவனென் சிந்தை யானே. 6.85.8
    இப்பதிகத்தில் 9-ம் செய்யுள் சிதைந்து போயிற்று. 6.85.9
    851 அறுத்தவன்காண் அடியவர்கள் அல்ல லெல்லாம்
    அரும்பொருளாய் நின்றவன்காண் அனங்க னாகம்
    மறுத்தவன்காண் மலைதன்னை மதியா தோடி
    மலைமகள்தன் மனம்நடுங்க வானோ ரஞ்சக்
    கறுத்தவனாய்க் கயிலாய மெடுத்தோன் கையுங்
    கதிர்முடியுங் கண்ணும் பிதுங்கி யோடச்
    செறுத்தவன்காண் திருமுண்டீச் சரத்து மேய
    சிவலோகன் காணவனென் சிந்தை யானே. 6.85.1

    இத்தலம் நடுநாட்டிலுள்ளது.
    சுவாமிபெயர் - முண்டீசுவரர், தேவியார் - கானார்குழலியம்மை.

    திருச்சிற்றம்பலம்


    6.86 திருவாலம்பொழில் - திருத்தாண்டகம்


    திருச்சிற்றம்பலம்

    852 கருவாகிக் கண்ணுதலாய் நின்றான் றன்னைக்
    கமலத்தோன் றலையரிந்த கபா லியை
    உருவார்ந்த மலைமகளோர் பாகத் தானை
    உணர்வெலா மானானை ஓசை யாகி
    வருவானை வலஞ்சுழியெம் பெருமான் றன்னை
    மறைக்காடும் ஆவடுதண் டுறையு மேய
    திருவானைத் தென்பரம்பைக் குடியின் மேய
    திருவாலம் பொழிலானைச் சிந்தி நெஞ்சே. 6.86.1
    853 உரித்தானைக் களிறதன் றோல் போர்வை யாக
    உடையானை உடைபுலியி னதளே யாகத்
    தரித்தானைச் சடையதன்மேற் கங்கை யங்கைத்
    தழலுருவை விடமமுதா வுண்டி தெல்லாம்
    பரித்தானைப் பவளமால் வரையன் னானைப்
    பாம்பணையான் றனக்கன்றங் காழி நல்கிச்
    சிரித்தானைத் தென்பரம்பைக் குடியின் மேய
    திருவாலம் பொழிலானைச் சிந்தி நெஞ்சே. 6.86.2
    854 உருமூன்றாய் உணர்வின்கண் ஒன்றா னானை
    ஓங்கார மெய்ப்பொருளை உடம்பி னுள்ளாற்
    கருவீன்ற வெங்களவை யறிவான் றன்னைக்
    காலனைத்தன் கழலடியாற் காய்ந்து மாணிக்
    கருளீன்ற ஆரமுதை அமரர் கோனை
    அள்ளூறி எம்பெருமா னென்பார்க் கென்றுந்
    திருவீன்ற தென்பரம்பைக் குடியின் மேய
    திருவாலம் பொழிலானைச் சிந்தி நெஞ்சே. 6.86.3
    855 பார்முழுதாய் விசும்பாகிப் பாதா ளமாம்
    பரம்பரனைச் சுரும்பமருங் குழலாள் பாகத்
    தாரமுதாம் அணிதில்லைக் கூத்தன் றன்னை
    வாட்போக்கி யம்மானை எம்மா னென்று
    வாரமதா மடியார்க்கு வார மாகி
    வஞ்சனைசெய் வார்க்கென்றும் வஞ்ச னாகுஞ்
    சீரரசைத் தென்பரம்பைக் குடியின் மேய
    திருவாலம் பொழிலானைச் சிந்தி நெஞ்சே. 6.86.4
    856 வரையார்ந்த மடமங்கை பங்கன் றன்னை
    வானவர்க்கும் வானவனை மணியை முத்தை
    அரையார்ந்த புலித்தோல்மேல் அரவ மார்த்த
    அம்மானைத் தம்மானை அடியார்க் கென்றும்
    புரையார்ந்த கோவணத்தெம் புனிதன் றன்னைப்
    பூந்துருத்தி மேயானைப் புகலூ ரானைத்
    திரையார்ந்த தென்பரம்பைக் குடியின் மேய
    திருவாலம் பொழிலானைச் சிந்தி நெஞ்சே. 6.86.5
    857 விரிந்தானைக் குவிந்தானை வேத வித்தை
    வியன்பிறப்போ டிறப்பாகி நின்றான் றன்னை
    அரிந்தானைச் சலந்தரன்றன் உடலம் வேறா
    ஆழ்கடல்நஞ் சுண்டிமையோ ரெல்லா முய்யப்
    பரிந்தானைப் பல்லசுரர் புரங்கள் மூன்றும்
    பாழ்படுப்பான் சிலைமலைநா ணேற்றி யம்பு
    தெரிந்தானைத் தென்பரம்பைக் குடியின் மேய
    திருவாலம் பொழிலானைச்சிந்தி நெஞ்சே. 6.86.6
    858 பொல்லாத என்னழுக்கிற் புகுவா னென்னைப்
    புறம்புறமே சோதித்த புனிதன் றன்னை
    எல்லாருந் தன்னையே இகழ அந்நாள்
    இடுபலியென் றகந்திரியும் எம்பி ரானைச்
    சொல்லாதா ரவர்தம்மைச் சொல்லா தானைத்
    தொடர்ந்துதன் பொன்னடியே பேணு வாரைச்
    செல்லாத நெறிசெலுத்த வல்லான் றன்னைத்
    திருவாலம் பொழிலானைச் சிந்தி நெஞ்சே. 6.86.7
    859 ஐந்தலைய நாகவணைக் கிடந்த மாலோ
    டயன்தேடி நாடரிய அம்மான் றன்னைப்
    பந்தணவு மெல்விரலாள் பாகத் தானைப்
    பராய்த்துறையும் வெண்காடும் பயின்றான் றன்னைப்
    பொந்துடைய வெண்டலையிற் பலிகொள் வானைப்
    பூவணமும் புறம்பயமும் பொருந்தி னானைச்
    சிந்தியவெந் தீவினைகள் தீர்ப்பான் றன்னைத்
    திருவாலம் பொழிலானைச் சிந்தி நெஞ்சே. 6.86.8
    860 கையிலுண் டுழல்வாருஞ் சாக்கி யருங்
    கல்லாத வன்மூடர்க் கல்லா தானைப்
    பொய்யிலா தவர்க்கென்றும் பொய்யி லானைப்
    பூணாகம் நாணாகப் பொருப்பு வில்லாக்
    கையினார் அம்பெரிகால் ஈர்க்குக் கோலாக்
    கடுந்தவத்தோர் நெடும்புரங்கள் கனல்வாய் வீழ்த்த
    செய்யினார் தென்பரம்பைக் குடியின் மேய
    திருவாலம் பொழிலானைச் சிந்தி நெஞ்சே. 6.86.9
    இப்பதிகத்தில் 10-ம் செய்யுள் மறைந்து போயிற்று. 6.86.1

    இத்தலம் சோழநாட்டிலுள்ளது.
    சுவாமிபெயர் - ஆத்மநாதீசுவரர், தேவியார் - ஞானாம்பிகையம்மை.

    திருச்சிற்றம்பலம்


    6.87 திருச்சிவபுரம் - திருத்தாண்டகம்


    திருச்சிற்றம்பலம்

    861 வானவன்காண் வானவர்க்கும் மேலா னான்காண்
    வடமொழியுந் தென்றமிழும் மறைகள் நான்கும்
    ஆனவன்காண் ஆனைந்து மாடி னான்காண்
    ஐயன்காண் கையிலன லேந்தி யாடுங்
    கானவன்காண் கானவனுக் கருள்செய் தான்காண்
    கருதுவார் இதயத்துக் கமலத் தூறுந்
    தேனவன்காண் சென்றடையாச் செல்வன் றான்காண்
    சிவனவன்காண் சிவபுரத்தெஞ் செல்வன் றானே. 6.87.1
    862 நக்கன்காண் நக்கரவ மரையி லார்த்த
    நாதன்காண் பூதகண மாட ஆடுஞ்
    சொக்கன்காண் கொக்கிறகு சூடி னான்காண்
    துடியிடையாள் துணைமுலைக்குச் சேர்வ தாகும்
    பொக்கன்காண் பொக்கணத்த வெண்ணீற் றான்காண்
    புவனங்கள் மூன்றினுக்கும் பொருளாய் நின்ற
    திக்கன்காண் செக்கரது திகழு மேனிச்
    சிவனவன்காண் சிவபுரத்தெஞ் செல்வன் றானே. 6.87.2
    863 வம்பின்மலர்க் குழலுமையாள் மணவா ளன்காண்
    மலரவன்மால் காண்பரிய மைந்தன் றான்காண்
    கம்பமதக் கரிபிளிற வுரிசெய் தோன்காண்
    கடல்நஞ்ச முண்டிருண்ட கண்டத் தான்காண்
    அம்பர்நகர்ப் பெருங்கோயி லமர்கின் றான்காண்
    அயவந்தி யுள்ளான்காண் ஐயா றன்காண்
    செம்பொனெனத் திகழ்கின்ற உருவத் தான்காண்
    சிவனவன்காண் சிவபுரத்தெஞ் செல்வன் றானே. 6.87.3
    864 பித்தன்காண் தக்கன்றன் வேள்வி யெல்லாம்
    பீடழியச் சாடி யருள்கள் செய்த
    முத்தன்காண் முத்தீயு மாயி னான்காண்
    முனிவர்க்கும் வானவர்க்கும் முதலாய் மிக்க
    அத்தன்காண் புத்தூரி லமர்ந்தான் றான்காண்
    அரிசிற் பெருந்துறையே ஆட்சி கொண்ட
    சித்தன்காண் சித்தீச் சரத்தான் றான்காண்
    சிவனவன்காண் சிவபுரத்தெஞ் செல்வன் றானே. 6.87.4
    865 தூயவன்காண் நீறு துதைந்த மேனி
    துளங்கும் பளிங்கனைய சோதி யான்காண்
    தீயவன்காண் தீயவுணர் புரஞ்செற் றான்காண்
    சிறுமான்கொள் செங்கையெம் பெருமான் றான்காண்
    ஆயவன்காண் ஆரூரி லம்மான் றான்காண்
    அடியார்கட் காரமுத மாயி னான்காண்
    சேயவன்காண் சேமநெறி யாயி னான்காண்
    சிவனவன்காண் சிவபுரத்தெஞ் செல்வன் றானே. 6.87.5
    866 பாரவன்காண் பாரதனிற் பயிரா னான்காண்
    பயிர்வளர்க்குந் துளியவன்காண் துளியில் நின்ற
    நீரவன்காண் நீர்சடைமேல் நிகழ்வித் தான்காண்
    நிலவேந்தர் பரிசாக நினைவுற் றோங்கும்
    பேரவன்காண் பிறையெயிற்று வெள்ளைப் பன்றி
    பிரியாது பலநாளும் வழிபட் டேத்துஞ்
    சீரவன்காண் சீருடைய தேவர்க் கெல்லாஞ்
    சிவனவன்காண் சிவபுரத்தெஞ் செல்வன் றானே. 6.87.6
    867 வெய்யவன்காண் வெய்யகன லேந்தி னான்காண்
    வியன்கெடில வீரட்டம் மேவி னான்காண்
    மெய்யவன்காண் பொய்யர்மனம் விரவா தான்காண்
    வீணையோ டிசைந்துமிகு பாடல் மிக்க
    கையவன்காண் கையில்மழு வேந்தி னான்காண்
    காமரங்கம் பொடிவீழ்த்த கண்ணி னான்காண்
    செய்யவன்காண் செய்யவளை மாலுக் கீந்த
    சிவனவன்காண் சிவபுரத்தெஞ் செல்வன் றானே. 6.87.7
    இப்பதிகத்தில் 8,9-ம் செய்யுட்கள் மறைந்து போயின. 6.87.8-9
    868 கலையாரு நூலங்க மாயி னான்காண்
    கலைபயிலுங் கருத்தன்காண் திருத்த மாகி
    மலையாகி மறிகடலேழ் சூழ்ந்து நின்ற
    மண்ணாகி விண்ணாகி நின்றான் றான்காண்
    தலையாய மலையெடுத்த தகவி லோனைத்
    தகர்ந்துவிழ ஒருவிரலாற் சாதித் தாண்ட
    சிலையாரும் மடமகளோர் கூறன் றான்காண்
    சிவனவன்காண் சிவபுரத்தெஞ் செல்வன் றானே. 6.87.1

    இத்தலம் சோழநாட்டிலுள்ளது.
    சுவாமிபெயர் - பிரமபுரிநாயகர், தேவியார் - பெரியநாயகியம்மை.

    திருச்சிற்றம்பலம்


    6.88 திருவோமாம்புலியூர் - திருத்தாண்டகம்


    திருச்சிற்றம்பலம்

    869 ஆராரும் மூவிலைவேல் அங்கை யானை
    அலைகடல்நஞ் சயின்றானை அமர ரேத்தும்
    ஏராரும் மதிபொதியுஞ் சடையி னானை
    எழுபிறப்பும் எனையாளா வுடையான் றன்னை
    ஊராரும் படநாக மாட்டு வானை
    உயர்புகழ்சேர் தருமோமாம் புலியூர் மன்னுஞ்
    சீராரும் வடதளியெஞ் செல்வன் றன்னைச்
    சேராதே திகைத்துநாள் செலுத்தி னேனே. 6.88.1
    870 ஆதியான் அரிஅயனென் றறிய வொண்ணா
    அமரர்தொழுங் கழலானை அமலன் றன்னைச்
    சோதிமதி கலைதொலையத் தக்க னெச்சன்
    சுடரிரவி அயிலெயிறு தொலைவித் தானை
    ஓதிமிக அந்தணர்கள் எரிமூன் றோம்பும்
    உயர்புகழார் தருமோமாம் புலியூர் மன்னுந்
    தீதிற்றிரு வடதளியெஞ் செல்வன் றன்னைச்
    சேராதே திகைத்துநாள் செலுத்தி னேனே. 6.88.2
    871 வருமிக்க மதயானை யுரித்தான் றன்னை
    வானவர்கோன் தோளனைத்தும் மடிவித் தானைத்
    தருமிக்க குழலுமையாள் பாகன் றன்னைச்
    சங்கரனெம் பெருமானைத் தரணி தன்மேல்
    உருமிக்க மணிமாடம் நிலாவு வீதி
    உத்தமர்வாழ் தருமோமாம் புலியூர் மன்னுந்
    திருமிக்க வடதளியெஞ் செல்வன் றன்னைச்
    சேராதே திகைத்துநாள் செலுத்தி னேனே. 6.88.3
    872 அன்றினவர் புரமூன்றும் பொடியாய் வேவ
    அழல்விழித்த கண்ணானை அமரர் கோனை
    வென்றிமிகு காலனுயிர் பொன்றி வீழ
    விளங்குதிரு வடியெடுத்த விகிர்தன் றன்னை
    ஒன்றியசீர் இருபிறப்பர் முத்தீ யோம்பும்
    உயர்புகழ்நான் மறையோமாம் புலியூர் நாளுந்
    தென்றல்மலி வடதளியெஞ் செல்வன் றன்னைச்
    சேராதே திகைத்துநாள் செலுத்தி னேனே. 6.88.4
    873 பாங்குடைய எழிலங்கி யருச்சனைமுன் விரும்பப்
    பரிந்தவனுக் கருள்செய்த பரமன் றன்னைப்
    பாங்கிலா நரகதனிற் தொண்ட ரானார்
    பாராத வகைபண்ண வல்லான் றன்னை
    ஓங்குமதிற் புடைதழுவும் எழிலோமாம் புலியூர்
    உயர்புகழந் தணரேத்த வுலகர்க் கென்றுந்
    தீங்கில்திரு வடதளியெஞ் செல்வன் றன்னைச்
    சேராதே திகைத்துநாள் செலுத்தி னேனே. 6.88.5
    874 அருந்தவத்தோர் தொழுதேத்தும் அம்மான் றன்னை
    ஆராத இன்னமுதை அடியார் தம்மேல்
    வருந்துயரந் தவிர்ப்பானை உமையாள் நங்கை
    மணவாள நம்பியையென் மருந்து தன்னைப்
    பொருந்துபுனல் தழுவுவயல் நிலவு துங்கப்
    பொழில்கெழுவு தருமோமாம் புலியூர் நாளுந்
    திருந்துதிரு வடதளியெஞ் செல்வன் றன்னைச்
    சேராதே திகைத்துநாள் செலுத்தி னேனே. 6.88.6
    875 மலையானை வருமலையன் றுரிசெய் தானை
    மறையானை மறையாலும் அறிய வொண்ணாக்
    கலையானைக் கலையாருங் கையி னானைக்
    கடிவானை அடியார்கள் துயர மெல்லாம்
    உலையாத அந்தணர்கள் வாழு மோமாம்
    புலியூரெம் உத்தமனைப் புரமூன் றெய்த
    சிலையானை வடதளியெஞ் செல்வன் றன்னைச்
    சேராதே திகைத்துநாள் செலுத்தி னேனே. 6.88.7
    876 சேர்ந்தோடு மணிக்கங்கை சூடி னானைச்
    செழுமதியும் படஅரவும் உடன்வைத் தானைச்
    சார்ந்தோர்கட் கினியானைத் தன்னொப் பில்லாத்
    தழலுருவைத் தலைமகனைத் தகைநால் வேதம்
    ஓர்ந்தோதிப் பயில்வார்வாழ் தருமோமாம் புலியூர்
    உள்ளானைக் கள்ளாத அடியார் நெஞ்சிற்
    சேர்ந்தானை வடதளியெஞ் செல்வன் றன்னைச்
    சேராதே திகைத்துநாள் செலுத்தி னேனே. 6.88.8
    877 வார்கெழுவு முலையுமையாள் வெருவ வன்று
    மலையெடுத்த வாளரக்கன் றோளுந் தாளும்
    ஏர்கெழுவு சிரம்பத்தும் இறுத்து மீண்டே
    இன்னிசைகேட் டிருந்தானை இமையோர் கோனைப்
    பார்கெழுவு புகழ்மறையோர் பயிலும் மாடப்
    பைம்பொழில்சேர் தருமோமாம் புலியூர் மன்னுஞ்
    சீர்கெழுவு வடதளியெஞ் செல்வன் றன்னைச்
    சேராதே திகைத்துநாள் செலுத்தி னேனே. 6.88.9
    இப்பதிகத்தில் 10-ம் செய்யுள் மறைந்து போயிற்று. 6.88.1

    இத்தலம் சோழநாட்டிலுள்ளது.
    சுவாமிபெயர் - துயர்தீர்த்தசெல்வர், தேவியார் - பூங்கொடியம்மை.

    திருச்சிற்றம்பலம்


    6.89 திருவின்னம்பர் - திருத்தாண்டகம்


    திருச்சிற்றம்பலம்

    878 அல்லி மலர்நாற்றத் துள்ளார் போலும்
    அன்புடையார் சிந்தை யகலார் போலுஞ்
    சொல்லின் அருமறைகள் தாமே போலுந்
    தூநெறிக்கு வழிகாட்டுந் தொழிலார் போலும்
    வில்லிற் புரமூன் றெரித்தார் போலும்
    வீங்கிருளும் நல்வெளியு மானார் போலும்
    எல்லி நடமாட வல்லார் போலும்
    இன்னம்பர்த் தான்தோன்றி யீச னாரே. 6.89.1
    879 கோழிக் கொடியோன்றன் தாதை போலுங்
    கொம்பனாள் பாகங் குளிர்ந்தார் போலும்
    ஊழி முதல்வருந் தாமே போலும்
    உள்குவார் உள்ளத்தி னுள்ளார் போலும்
    ஆழித்தேர் வித்தகருந் தாமே போலும்
    அடைந்தவர்கட் கன்பராய் நின்றார் போலும்
    ஏழு பிறவிக்குந் தாமே போலும்
    இன்னம்பர்த் தான்தோன்றி யீச னாரே. 6.89.2
    880 தொண்டர்கள் தந்தகவி னுள்ளார் போலுந்
    தூநெறிக்குந் தூநெறியாய் நின்றார் போலும்
    பண்டிருவர் காணாப் படியார் போலும்
    பத்தர்கள்தஞ் சித்தத் திருந்தார் போலுங்
    கண்ட மிறையே கறுத்தார் போலுங்
    காமனையுங் காலனையுங் காய்ந்தார் போலும்
    இண்டைச் சடைசேர் முடியார் போலும்
    இன்னம்பர்த் தான்தோன்றி யீச னாரே. 6.89.3
    881 வானத் திளந்திங்கட் கண்ணி தன்னை
    வளர்சடைமேல் வைத்துகந்த மைந்தர் போலும்
    ஊனொத்த வேலொன் றுடையார் போலும்
    ஒளிநீறு பூசு மொருவர் போலுந்
    தானத்தின் முப்பொழுதுந் தாமே போலுந்
    தம்மின் பிறர்பெரியா ரில்லை போலும்
    ஏனத் தெயிறிலங்கப் பூண்டார் போலும்
    இன்னம்பர்த் தான்தோன்றி யீச னாரே. 6.89.4
    882 சூழுந் துயர மறுப்பார் போலுந்
    தோற்றம் இறுதியாய் நின்றார் போலும்
    ஆழுங் கடல்நஞ்சை யுண்டார் போலும்
    ஆட லுகந்த அழகர் போலுந்
    தாழ்வின் மனத்தேனை யாளாக் கொண்டு
    தன்மை யளித்த தலைவர் போலும்
    ஏழு பிறப்பு மறுப்பார் போலும்
    இன்னம்பர்த் தான்தோன்றி யீச னாரே. 6.89.5
    883 பாதத் தணையுஞ் சிலம்பர் போலும்
    பாரூர் விடையொன் றுடையார் போலும்
    பூதப் படையாள் புனிதர் போலும்
    பூம்புகலூர் மேய புராணர் போலும்
    வேதப் பொருளாய் விளைவார் போலும்
    வேடம் பரவித் திரியுந் தொண்டர்
    ஏதப் படாவண்ணம் நின்றார் போலும்
    இன்னம்பர்த் தான்தோன்றி யீச னாரே. 6.89.6
    884 பல்லார் தலையோட்டில் ஊணார் போலும்
    பத்தர்கள்தஞ் சித்தத் திருந்தார் போலுங்
    கல்லாதார் காட்சிக் கரியார் போலுங்
    கற்றவர்கள் ஏதங் களைவார் போலும்
    பொல்லாத பூதப் படையார் போலும்
    பொருகடலும் ஏழ்மலையுந் தாமே போலும்
    எல்லாரு மேத்தத் தகுவார் போலும்
    இன்னம்பர்த் தான்தோன்றி யீச னாரே. 6.89.7
    885 மட்டு மலியுஞ் சடையார் போலும்
    மாதையோர் பாக முடையார் போலுங்
    கட்டம் பிணிகள் தவிர்ப்பார் போலுங்
    காலன்றன் வாழ்நாள் கழிப்பார் போலும்
    நட்டம் பயின்றாடும் நம்பர் போலும்
    ஞாலமெரி நீர்வெளிகா லானார் போலும்
    எட்டுத் திசைகளுந் தாமே போலும்
    இன்னம்பர்த் தான்தோன்றி யீச னாரே. 6.89.8
    886 கருவுற்ற காலத்தே என்னை யாண்டு
    கழற்போது தந்தளித்த கள்வர் போலுஞ்
    செருவிற் புரமூன்று மட்டார் போலுந்
    தேவர்க்குந் தேவராஞ் செல்வர் போலும்
    மருவிப் பிரியாத மைந்தர் போலும்
    மலரடிகள் நாடி வணங்க லுற்ற
    இருவர்க் கொருவராய் நின்றார் போலும்
    இன்னம்பர்த் தான்தோன்றி யீச னாரே. 6.89.9
    887 அலங்கற் சடைதாழ ஐய மேற்று
    அரவ மரையார்க்க வல்லார் போலும்
    வலங்கை மழுவொன் றுடையார் போலும்
    வான்றக்கன் வேள்வி சிதைத்தார் போலும்
    விலங்கல் எடுத்துகந்த வெற்றி யானை
    விறலழித்து மெய்ந்நரம்பாற் கீதங் கேட்டன்
    றிலங்கு சுடர்வாள் கொடுத்தார் போலும்
    இன்னம்பர்த் தான்தோன்றி யீச னாரே. 6.89.10

    இத்தலம் சோழநாட்டிலுள்ளது.
    சுவாமிபெயர் - எழுத்தறிந்தவீசுவரர்,
    தேவியார் - கொந்தார்பூங்குழலம்மை.

    திருச்சிற்றம்பலம்


    6.90 திருக்கஞ்சனூர் - திருத்தாண்டகம்


    திருச்சிற்றம்பலம்

    888 மூவிலைவேற் சூலம்வல னேந்தி னானை
    மூன்றுசுடர்க் கண்ணானை மூர்த்தி தன்னை
    நாவலனை நரைவிடையொன் றேறு வானை
    நால்வேத மாறங்க மாயி னானை
    ஆவினிலைந் துகந்தானை அமரர் கோவை
    அயன்றிருமா லானானை அனலோன் போற்றுங்
    காவலனைக் கஞ்சனூ ராண்ட கோவைக்
    கற்பகத்தைக் கண்ணாரக் கண்டுய்ந் தேனே. 6.90.1
    889 தலையேந்து கையானை என்பார்த் தானைச்
    சவந்தாங்கு தோளானைச் சாம்ப லானைக்
    குலையேறு நறுங்கொன்றை முடிமேல் வைத்துக்
    கோணாக மசைத்தானைக் குலமாங் கைலை
    மலையானை மற்றொப்பா ரில்லா தானை
    மதிகதிரும் வானவரும் மாலும் போற்றுங்
    கலையானைக் கஞ்சனூ ராண்ட கோவைக்
    கற்பகத்தைக் கண்ணாரக் கண்டுய்ந் தேனே. 6.90.2
    890 தொண்டர்குழாந் தொழுதேத்த அருள்செய் வானைச்
    சுடர்மழுவாட் படையானைச் சுழிவான் கங்கைத்
    தெண்டிரைகள் பொருதிழிசெஞ் சடையி னானைச்
    செக்கர்வா னொளியானைச் சேரா தெண்ணிப்
    பண்டமரர் கொண்டுகந்த வேள்வி யெல்லாம்
    பாழ்படுத்துத் தலையறுத்துப் பற்கண் கொண்ட
    கண்டகனைக் கஞ்சனூ ராண்ட கோவைக்
    கற்பகத்தைக் கண்ணாரக் கண்டுய்ந் தேனே. 6.90.3
    891 விண்ணவனை மேருவில்லா வுடையான் றன்னை
    மெய்யாகிப் பொய்யாகி விதியா னானைப்
    பெண்ணவனை ஆணவனைப் பித்தன் றன்னைப்
    பிணமிடுகா டுடையானைப் பெருந்தக் கோனை
    எண்ணவனை எண்டிசையுங் கீழு மேலும்
    இருவிசும்பு மிருநிலமு மாகித் தோன்றுங்
    கண்ணவனைக் கஞ்சனூ ராண்ட கோவைக்
    கற்பகத்தைக் கண்ணாரக் கண்டுய்ந் தேனே. 6.90.4
    892 உருத்திரனை உமாபதியை உலகா னானை
    உத்தமனை நித்திலத்தை ஒருவன் றன்னைப்
    பருப்பதத்தைப் பஞ்சவடி மார்பி னானைப்
    பகலிரவாய் நீர்வெளியாய்ப் பரந்து நின்ற
    நெருப்பதனை நித்திலத்தின் தொத்தொப் பானை
    நீறணிந்த மேனியராய் நினைவார் சிந்தைக்
    கருத்தவனைக் கஞ்சனூ ராண்ட கோவைக்
    கற்பகத்தைக் கண்ணாரக் கண்டுய்ந் தேனே. 6.90.5
    893 ஏடேறு மலர்க்கொன்றை அரவு தும்பை
    இளமதியம் எருக்குவா னிழிந்த கங்கைச்
    சேடெறிந்த சடையானைத் தேவர் கோவைச்
    செம்பொன்மால் வரையானைச் சேர்ந்தார் சிந்தைக்
    கேடிலியைக் கீழ்வேளூ ராளுங் கோவைக்
    கிறிபேசி மடவார்பெய் வளைகள் கொள்ளுங்
    காடவனைக் கஞ்சனூ ராண்ட கோவைக்
    கற்பகத்தைக் கண்ணாரக் கண்டுய்ந் தேனே. 6.90.6
    894 நாரணனும் நான்முகனு மறியா தானை
    நால்வேதத் துருவானை நம்பி தன்னைப்
    பாரிடங்கள் பணிசெய்யப் பலிகொண் டுண்ணும்
    பால்வணனைத் தீவணனைப் பகலா னானை
    வார்பொதியும் முலையாளோர் கூறன் றன்னை
    மானிடங்கை யுடையானை மலிவார் கண்டங்
    கார்பொதியுங் கஞ்சனூ ராண்ட கோவைக்
    கற்பகத்தைக் கண்ணாரக் கண்டுய்ந் தேனே. 6.90.7
    895 வானவனை வலிவலமும் மறைக்காட் டானை
    மதிசூடும் பெருமானை மறையோன் றன்னை
    ஏனவனை இமவான்றன் பேதை யோடும்
    இனிதிருந்த பெருமானை ஏத்து வார்க்குத்
    தேனவனைத் தித்திக்கும் பெருமான் றன்னைத்
    தீதிலா மறையவனைத் தேவர் போற்றுங்
    கானவனைக் கஞ்சனூ ராண்ட கோவைக்
    கற்பகத்தைக் கண்ணாரக் கண்டுய்ந் தேனே. 6.90.8
    896 நெருப்புருவு திருமேனி வெண்ணீற் றானை
    நினைப்பார்தம் நெஞ்சானை நிறைவா னானைத்
    தருக்கழிய முயலகன்மேற் றாள்வைத் தானைச்
    சலந்தரனைத் தடிந்தோனைத் தக்கோர் சிந்தை
    விருப்பவனை விதியானை வெண்ணீற் றானை
    விளங்கொளியாய் மெய்யாகி மிக்கோர் போற்றுங்
    கருத்தவனைக் கஞ்சனூ ராண்ட கோவைக்
    கற்பகத்தைக் கண்ணாரக் கண்டுய்ந் தேனே. 6.90.9
    897 மடலாழித் தாமரையா யிரத்தி லொன்று
    மலர்க்கணிடந் திடுதலுமே மலிவான் கோலச்
    சுடராழி நெடுமாலுக் கருள்செய் தானைத்
    தும்பியுரி போர்த்தானைத் தோழன் விட்ட
    அடலாழித் தேருடைய இலங்கைக் கோனை
    அருவரைக்கீழ் அடர்த்தானை அருளார் கருணைக்
    கடலானைக் கஞ்சனூ ராண்ட கோவைக்
    கற்பகத்தைக் கண்ணாரக் கண்டுய்ந் தேனே. 6.90.10

    இத்தலம் சோழநாட்டிலுள்ளது.
    சுவாமிபெயர் - அக்கினீசுவரர், தேவியார் - கற்பகநாயகியம்மை.

    திருச்சிற்றம்பலம்


    6.91 திருவெறும்பியூர் - திருத்தாண்டகம்


    திருச்சிற்றம்பலம்

    898 பன்னியசெந் தமிழறியேன் கவியேன் மாட்டேன்
    எண்ணோடு பண்ணிறைந்த கலைக ளாய
    தன்னையுந்தன் றிறத்தறியாப் பொறியி லேனைத்
    தன்றிறமு மறிவித்து நெறியுங் காட்டி
    அன்னையையும் அத்தனையும் போல அன்பாய்
    அடைந்தேனைத் தொடர்ந்தென்னை யாளாக் கொண்ட
    தென்னெறும்பி யூர்மலைமேன் மாணிக் கத்தைச்
    செழுஞ்சுடரைச் சென்றடையப் பெற்றேன் நானே. 6.91.1
    899 பளிங்கினிழ லுட்பதித்த சோதி யானைப்
    பசுபதியைப் பாசுபத வேடத் தானை
    விளிந்தெழுந்த சலந்தரனை வீட்டி னானை
    வேதியனை விண்ணவனை மேவி வையம்
    அளந்தவனை நான்முகனை அல்லல் தீர்க்கும்
    அருமருந்தை ஆமா றறிந்தென் னுள்ளந்
    தெளிந்தெறும்பி யூர்மலைமேன் மாணிக் கத்தைச்
    செழுஞ்சுடரைச் சென்றடையப் பெற்றேன் நானே. 6.91.2
    900 கருவையென்றன் மனத்திருந்த கருத்தை ஞானக்
    கடுஞ்சுடரைப் படிந்துகிடந் தமர ரேத்தும்
    உருவையண்டத் தொருமுதலை யோத வேலி
    உலகினிறை தொழிலிறுதி நடுவாய் நின்ற
    மருவைவென்ற குழன்மடவாள் பாகம் வைத்த
    மயானத்து மாசிலா மணியை வாசத்
    திருவெறும்பி யூர்மலைமேன் மாணிக் கத்தைச்
    செழுஞ்சுடரைச் சென்றடையப் பெற்றேன் நானே. 6.91.3
    901 பகழிபொழிந் தடலரக்கர் புரங்கள் மூன்றும்
    பாழ்படுத்த பரஞ்சுடரைப் பரிந்து தன்னைப்
    புகழுமன்பர்க் கின்பமரும் அமுதைத் தேனைப்
    புண்ணியனைப் புவனியது முழுதும் போக
    உமிழுமம்பொற் குன்றத்தை முத்தின் றூணை
    உமையவள்தம் பெருமானை இமையோ ரேத்துந்
    திகழெறும்பி யூர்மலைமேன் மாணிக் கத்தைச்
    செழுஞ்சுடரைச் சென்றடையப் பெற்றேன் நானே. 6.91.4
    902 பாரிடங்க ளுடன்பாடப் பயின்று நட்டம்
    பயில்வானை அயில்வாய சூல மேந்தி
    நேரிடும்போர் மிகவல்ல நிமலன் றன்னை
    நின்மலனை அம்மலர்கொண் டயனும் மாலும்
    பாரிடந்தும் மேலுயர்ந்துங் காணா வண்ணம்
    பரந்தானை நிமிர்ந்துமுனி கணங்க ளேத்துஞ்
    சீரெறும்பி யூர்மலைமேன் மாணிக் கத்தைச்
    செழுஞ்சுடரைச் சென்றடையப் பெற்றேன் நானே. 6.91.5
    903 கார்முகிலாய்ப் பொழிவானைப் பொழிந்த முந்நீர்
    கரப்பானைக் கடியநடை விடையொன் றேறி
    ஊர்பலவுந் திரிவானை ஊர தாக
    ஒற்றியூ ருடையனாய் முற்றும் ஆண்டு
    பேரெழுத்தொன் றுடையானைப் பிரம னோடு
    மாலவனும் இந்திரனும் மந்திரத்தா லேத்துஞ்
    சீரெறும்பி யூர்மலைமேன் மாணிக் கத்தைச்
    செழுஞ்சுடரைச் சென்றடையப் பெற்றேன் நானே. 6.91.6
    904 நீணிலவும் அந்தீயும் நீரும் மற்றை
    நெறியிலங்கு மிகுகாலும் ஆகா சமும்
    வாணிலவு தாரகையும் மண்ணும் விண்ணும்
    மன்னுயிரும் என்னுயிருந் தானாஞ் செம்பொன்
    ஆணியென்றும் அஞ்சனமா மலையே யென்றும்
    அம்பவளத் திரளென்றும் அறிந்தோ ரேத்துஞ்
    சேணெறும்பி யூர்மலைமேன் மாணிக் கத்தைச்
    செழுஞ்சுடரைச் சென்றடையப் பெற்றேன் நானே. 6.91.7
    905 அறந்தெரியா ஊத்தைவாய் அறிவில் சிந்தை
    ஆரம்பக் குண்டரோ டயர்த்து நாளும்
    மறந்துமரன் திருவடிகள் நினைய மாட்டா
    மதியிலியேன் வாழ்வெலாம் வாளா மண்மேற்
    பிறந்தநாள் நாளல்ல வாளா வீசன்
    பேர்பிதற்றிச் சீரடிமைத் திறத்து ளன்பு
    செறிந்தெறும்பி யூர்மலைமேன் மாணிக் கத்தைச்
    செழுஞ்சுடரைச் சென்றடையப் பெற்றேன் நானே. 6.91.8
    906 அறிவிலங்கு மனத்தானை அறிவார்க் கன்றி
    அறியாதார் தந்திறத்தொன் றறியா தானைப்
    பொறியிலங்கு வாளரவம் புனைந்து பூண்ட
    புண்ணியனைப் பொருதிரைவாய் நஞ்ச முண்ட
    குறியிலங்கு மிடற்றானை மடற்றேன் கொன்றைச்
    சடையானை மடைதோறுங் கமல மென்பூச்
    செறியெறும்பி யூர்மலைமேன் மாணிக் கத்தைச்
    செழுஞ்சுடரைச் சென்றடையப் பெற்றேன் நானே. 6.91.9
    907 அருந்தவத்தின் பெருவலியா லறிவ தன்றி
    அடலரக்கன் றடவரையை யெடுத்தான் றிண்டோ ள்
    முரிந்துநெரிந் தழிந்துபா தாள முற்று
    முன்கைநரம் பினையெடுத்துக் கீதம் பாட
    இருந்தவனை ஏழுலகு மாக்கி னானை
    எம்மானை கைம்மாவி னுரிவை போர்த்த
    திருந்தெறும்பி யூர்மலைமேன் மாணிக் கத்தைச்
    செழுஞ்சுடரைச் சென்றடையப் பெற்றேன் நானே. 6.91.10

    திருச்சிற்றம்பலம்


    6.92 திருக்கழுக்குன்றம் - திருத்தாண்டகம்


    திருச்சிற்றம்பலம்

    908 மூவிலைவேற் கையானை மூர்த்தி தன்னை
    முதுபிணக்கா டுடையானை முதலா னானை
    ஆவினிலைந் துகந்தானை அமரர் கோனை
    ஆலால முண்டுகந்த ஐயன் றன்னைப்
    பூவினின்மேல் நான்முகனும் மாலும் போற்றப்
    புணர்வரிய பெருமானைப் புனிதன் றன்னைக்
    காவலனைக் கழுக்குன்ற மமர்ந்தான் றன்னைக்
    கற்பகத்தைக் கண்ணாரக் கண்டேன் நானே. 6.92.1
    909 பல்லாடு தலைசடைமே லுடையான் றன்னைப்
    பாய்புலித்தோ லுடையானைப் பகவன் றன்னைச்
    சொல்லோடு பொருளனைத்து மானான் றன்னைச்
    சுடருருவில் என்பறாக் கோலத் தானை
    அல்லாத காலனைமுன் னடர்த்தான் றன்னை
    ஆலின்கீழ் இருந்தானை அமுதா னானைக்
    கல்லாடை புனைந்தருளுங் காபா லியைக்
    கற்பகத்தைக் கண்ணாரக் கண்டேன் நானே. 6.92.2
    இப்பதிகத்தில் முதலிரண்டு செய்யுட்கள் தவிர
    ஏனைய செய்யுட்கள் மறைந்து போயின. 6.92.3-10

    இத்தலம் தொண்டைநாட்டிலுள்ளது.
    சுவாமிபெயர் - வேதகிரீசுவரர்,
    தேவியார் - பெண்ணினல்லாளம்மை.

    திருச்சிற்றம்பலம்


    6.93 பலவகைத் - திருத்தாண்டகம்



    திருச்சிற்றம்பலம்

    910 நேர்ந்தொருத்தி ஒருபாகத் தடங்கக் கண்டு
    நிலைதளர ஆயிரமா முகத்தி னோடு
    பாய்ந்தொருத்தி படர்சடைமேற் பயிலக் கண்டு
    படவரவும் பனிமதியும் வைத்த செல்வர்
    தாந்திருத்தித் தம்மனத்தை ஒருக்காத் தொண்டர்
    தனித்தொருதண் டூன்றிமெய் தளரா முன்னம்
    பூந்துருத்தி பூந்துருத்தி என்பீ ராகிற்
    பொல்லாப் புலாற்றுருத்தி போக்க லாமே. 6.93.1
    911 ஐத்தானத் தகமிடறு சுற்றி யாங்கே
    அகத்தடைந்தால் யாதொன்று மிடுவா ரில்லை
    மைத்தானக் கண்மடவார் தங்க ளோடு
    மாயமனை வாழ்க்கை மகிழ்ந்து வாழ்வீர்
    பைத்தானத் தொண்மதியும் பாம்பும் நீரும்
    படர்சடைமேல் வைத்துகந்த பண்பன் மேய
    நெய்த்தானம் நெய்த்தானம் என்பீ ராகில்
    நிலாவாப் புலாற்றானம் நீக்க லாமே. 6.93.2
    912 பொய்யாறா வாறே புனைந்து பேசிப்
    புலர்ந்தெழுந்த காலைப் பொருளே தேடிக்
    கையாறாக் கரண முடையோ மென்று
    களித்த மனத்தராய்க் கருதி வாழ்வீர்
    நெய்யாறா ஆடிய நீல கண்டர்
    நிமிர்புன் சடைநெற்றிக் கண்ணர் மேய
    ஐயாறே ஐயாறே என்பீ ராகில்
    அல்லல்தீர்ந் தமருலகம் ஆள லாமே. 6.93.3
    913 இழவொன்று தாமொருவர்க் கிட்டொன் றீயார்
    ஈன்றெடுத்த தாய்தந்தை பெண்டீர் மக்கள்
    கழனங்கோ வையாதல் கண்டுந் தேறார்
    களித்த மனத்தராய்க் கருதி வாழ்வீர்
    அழனம்மை நீக்குவிக்கும் அரைய னாக்கும்
    அமருலகம் ஆள்விக்கும் அம்மான் மேய
    பழனம் பழனமே என்பீ ராகிற்
    பயின்றெழுந்த பழவினைநோய் பாற்ற லாமே. 6.93.4
    914 ஊற்றுத் துறையொன்ப துள்நின் றோரீர்
    ஒக்க அடைக்கும்போ துணர மாட்டீர்
    மாற்றுத் துறைவழிகொண் டோ டா முன்னம்
    மாய மனைவாழ்க்கை மகிழ்ந்து வாழ்வீர்
    வேற்றுத் தொழில்பூண்டார் புரங்கள் மூன்றும்
    வெவ்வழல்வாய் வீழ்விக்கும் வேந்தன் மேய
    சோற்றுத்துறை சோற்றுத்துறை என்பீ ராகிற்
    துயர்நீங்கித் தூநெறிக்கண் சேர லாமே. 6.93.5
    915 கலஞ்சுழிக்குங் கருங்கடல்சூழ் வையந் தன்னிற்
    கள்ளக் கடலி லழுந்தி வாளா
    நலஞ்சுழியா எழுநெஞ்சே இன்பம் வேண்டில்
    நம்பன்றன் அடியிணைக்கே நவில்வா யாகில்
    அலஞ்சுழிக்கும் மன்னாகந் தன்னான் மேய
    அருமறையோ டாறங்க மானார் கோயில்
    வலஞ்சுழியே வலஞ்சுழியே என்பீ ராகில்
    வல்வினைகள் தீர்ந்துவா னாள லாமே. 6.93.6
    916 தண்டி குண்டோ தரன்பிங் கிருடி
    சார்ந்த புகழ்நந்தி சங்கு கன்னன்
    பண்டை உலகம் படைத்தான் றானும்
    பாரை யளந்தான்பல் லாண்டி சைப்பத்
    திண்டி வயிற்றுச் சிறுகட் பூதஞ்
    சிலபாடச் செங்கண் விடையொன் றூர்வான்
    கண்டியூர் கண்டியூர் என்பீ ராகிற்
    கடுகநும் வல்வினையைக் கழற்ற லாமே. 6.93.7
    917 விடமூக்கப் பாம்பேபோற் சிந்தி நெஞ்சே
    வெள்ளேற்றான் தன்றமரைக் கண்ட போது
    வடமூக்க மாமுனிவர் போலச் சென்று
    மாதவத்தார் மனத்துளார் மழுவாட் செல்வர்
    படமூக்கப் பாம்பணையிற் பள்ளி யானும்
    பங்கயத்து மேலயனும் பரவிக் காணா
    குடமூக்கே குடமூக்கே என்பீ ராகிற்
    கொடுவினைகள் தீர்ந்தரனைக் குறுக லாமே. 6.93.8
    918 தண்காட்டாச் சந்தனமுந் தவள நீறுந்
    தழையணுகுங் குறுங்கொன்றை மாலை சூடிக்
    கண்காட்டாக் கருவரைபோ லனைய காஞ்சிக்
    கார்மயிலஞ் சாயலார் கலந்து காண
    எண்காட்டாக் காடங் கிடமா நின்று
    எரிவீசி இரவாடும் இறைவர் மேய
    வெண்காடே வெண்காடே என்பீ ராகில்
    வீடாத வல்வினைநோய் வீட்ட லாமே. 6.93.9
    919 தந்தையார் தாயா ருடன் பிறந்தார்
    தாரமார் புத்திரரார் தாந்தா மாரே
    வந்தவா றெங்ஙனே போமா றேதோ
    மாயமா மிதற்கேதும் மகிழ வேண்டா
    சிந்தையீர் உமக்கொன்று சொல்லக் கேண்மின்
    திகழ்மதியும் வாளரவுந் திளைக்குஞ் சென்னி
    எந்தையார் திருநாமம் நமச்சி வாய
    என்றெழுவார்க் கிருவிசும்பி லிருக்க லாமே. 6.93.10

    திருச்சிற்றம்பலம்


    6.94 நின்ற - திருத்தாண்டகம்



    திருச்சிற்றம்பலம்

    920 இருநிலனாய்த் தீயாகி நீரு மாகி
    இயமான னாயெறியுங் காற்று மாகி
    அருநிலைய திங்களாய் ஞாயி றாகி
    ஆகாச மாயட்ட மூர்த்தி யாகிப்
    பெருநலமுங் குற்றமும் பெண்ணு மாணும்
    பிறருருவுந் தம்முருவுந் தாமே யாகி
    நெருநலையாய் இன்றாகி நாளை யாகி
    நிமிர்புன் சடையடிகள் நின்ற வாறே. 6.94.1
    921 மண்ணாகி விண்ணாகி மலையு மாகி
    வயிரமுமாய் மாணிக்கந் தானே யாகிக்
    கண்ணாகிக் கண்ணுக்கோர் மணியு மாகிக்
    கலையாகிக் கலைஞானந் தானே யாகிப்
    பெண்ணாகிப் பெண்ணுக்கோ ராணு மாகிப்
    பிரளயத்துக் கப்பாலோ ரண்ட மாகி
    எண்ணாகி எண்ணுக்கோ ரெழுத்து மாகி
    எழுஞ்சுடரா யெம்மடிகள் நின்ற வாறே. 6.94.2
    922 கல்லாகிக் களறாகிக் கானு மாகிக்
    காவிரியாய்க் காலாறாய்க் கழியு மாகிப்
    புல்லாகிப் புதலாகிப் பூடு மாகிப்
    புரமாகிப் புரமூன்றுங் கெடுத்தா னாகிச்
    சொல்லாகிச் சொல்லுக்கோர் பொருளு மாகிச்
    சுலாவாகிச் சுலாவுக்கோர் சூழ லாகி
    நெல்லாகி நிலனாகி நீரு மாகி
    நெடுஞ்சுடராய் நிமிர்ந்தடிகள் நின்ற வாறே. 6.94.3
    923 காற்றாகிக் கார்முகிலாய்க் காலம் மூன்றாய்க்
    கனவாகி நனவாகிக் கங்கு லாகிக்
    கூற்றாகிக் கூற்றுதைத்தகொல் களிறு மாகிக்
    குரைகடலாய்க் குரைகடற்கோர் கோமா னுமாய்
    நீற்றானாய் நீறேற்ற மேனி யாகி
    நீள்விசும்பாய் நீள்விசும்பி னுச்சி யாகி
    ஏற்றானாய் ஏறூர்ந்த செல்வ னாகி
    எழுஞ்சுடராய் எம்மடிகள் நின்ற வாறே. 6.94.4
    924 தீயாகி நீராகித் திண்மை யாகித்
    திசையாகி அத்திசைக்கோர் தெய்வ மாகித்
    தாயாகித் தந்தையாய்ச் சார்வு மாகித்
    தாரகையும் ஞாயிறுந்தண் மதியு மாகிக்
    காயாகிப் பழமாகிப் பழத்தில் நின்ற
    இரதங்கள் நுகர்வானுந் தானே யாகி
    நீயாகி நானாகி நேர்மை யாகி
    நெடுஞ்சுடராய் நிமிர்ந்தடிகள் நின்ற வாறே. 6.94.5
    925 அங்கமா யாதியாய் வேத மாகி
    அருமறையோ டைம்பூதந் தானே யாகிப்
    பங்கமாய்ப் பலசொல்லுந் தானே யாகிப்
    பான்மதியோ டாதியாய்ப் பான்மை யாகிக்
    கங்கையாய்க் காவிரியாய்க் கன்னி யாகிக்
    கடலாகி மலையாகிக் கழியு மாகி
    எங்குமாய் ஏறூர்ந்த செல்வ னாகி
    எழுஞ்சுடராய் எம்மடிகள் நின்ற வாறே. 6.94.6
    926 மாதா பிதாவாகி மக்க ளாகி
    மறிகடலும் மால்விசும்புந் தானே யாகிக்
    கோதா விரியாய்க் குமரி யாகிக்
    கொல்புலித்தோ லாடைக் குழக னாகிப்
    போதாய மலர்கொண்டு போற்றி நின்று
    புனைவார் பிறப்பறுக்கும் புனித னாகி
    யாதானு மெனநினைந்தார்க் கெளிதே யாகி
    அழல்வண்ண வண்ணர்தாம் நின்ற வாறே. 6.94.7
    927 ஆவாகி ஆவினில் ஐந்து மாகி
    அறிவாகி அழலாகி அவியு மாகி
    நாவாகி நாவுக்கோர் உரையு மாகி
    நாதனாய் வேதத்தி னுள்ளோ னாகிப்
    பூவாகிப் பூவுக்கோர் நாற்ற மாகிப்
    பூக்குளால் வாசமாய் நின்றா னாகித்
    தேவாகித் தேவர் முதலு மாகிச்
    செழுஞ்சுடராய்ச் சென்றடிகள் நின்ற வாறே. 6.94.8
    928 நீராகி நீளகலந் தானே யாகி
    நிழலாகி நீள்விசும்பி னுச்சி யாகிப்
    பேராகிப் பேருக்கோர் பெருமை யாகிப்
    பெருமதில்கள் மூன்றினையு மெய்தா னாகி
    ஆரேனுந் தன்னடைந்தார் தம்மை யெல்லாம்
    ஆட்கொள்ள வல்லவெம் மீச னார்தாம்
    பாராகிப் பண்ணாகிப் பாட லாகிப்
    பரஞ்சுடராய்ச் சென்றடிகள் நின்ற வாறே. 6.94.9
    929 மாலாகி நான்முகனாய் மாபூ தமாய்
    மருக்கமாய் அருக்கமாய் மகிழ்வு மாகிப்
    பாலாகி எண்டிசைக்கும் எல்லை யாகிப்
    பரப்பாகிப் பரலோகந் தானே யாகிப்
    பூலோகப் புவலோக சுவலோ கமாய்ப்
    பூதங்க ளாய்ப்புராணன் றானே யாகி
    ஏலா தனவெலாம் ஏல்விப் பானாய்
    எழுஞ்சுடராய் எம்மடிகள் நின்ற வாறே. 6.94.10

    திருச்சிற்றம்பலம்


    6.95 தனி - திருத்தாண்டகம்



    திருச்சிற்றம்பலம்

    930 அப்பன்நீ அம்மைநீ ஐய னும்நீ
    அன்புடைய மாமனும் மாமி யும்நீ
    ஒப்புடைய மாதரு மொண்பொரு ளும்நீ
    ஒருகுலமுஞ் சுற்றமும் ஓரூ ரும்நீ
    துய்ப்பனவும் உய்ப்பனவுந் தோற்று வாய்நீ
    துணையாயென் நெஞ்சந் துறப்பிப் பாய்நீ
    இப்பொன்நீ இம்மணிநீ இம்முத் தும்நீ
    இறைவன்நீ ஏறூர்ந்த செல்வன் நீயே. 6.95.1
    931 வெம்பவரு கிற்பதன்று கூற்றம் நம்மேல்
    வெய்ய வினைப்பகையும் பைய நையும்
    எம்பரிவு தீர்ந்தோம் இடுக்கண் இல்லோம்
    எங்கெழிலென் ஞாயி றெளியோ மல்லோம்
    அம்பவளச் செஞ்சடைமேல் ஆறு சூடி
    அனலாடி ஆனஞ்சும் ஆட்டு கந்த
    செம்பவள வண்ணர்செங் குன்ற வண்ணர்
    செவ்வான வண்ணரென் சிந்தை யாரே. 6.95.2
    932 ஆட்டுவித்தால் ஆரொருவர் ஆடா தாரே
    அடக்குவித்தால் ஆரொருவர் அடங்கா தாரே
    ஓட்டுவித்தால் ஆரொருவர் ஓடா தாரே
    உருகுவித்தால் ஆரொருவர் உருகா தாரே
    பாட்டுவித்தால் ஆரொருவர் பாடா தாரே
    பணிவித்தால் ஆரொருவர் பணியா தாரே
    காட்டுவித்தால் ஆரொருவர் காணா தாரே
    காண்பாரார் கண்ணுதலாய் காட்டாக் காலே. 6.95.3
    933 நற்பதத்தார் நற்பதமே ஞான மூர்த்தி
    நலஞ்சுடரே நால்வேதத் தப்பால் நின்ற
    சொற்பதத்தார் சொற்பதமுங் கடந்து நின்ற
    சொலற்கரிய சூழலாய் இதுவுன் றன்மை
    நிற்பதொத்து நிலையிலா நெஞ்சந் தன்னுள்
    நிலாவாத புலாலுடம்பே புகுந்து நின்ற
    கற்பகமே யானுன்னை விடுவே னல்லேன்
    கனகமா மணிநிறத்தெங் கடவு ளானே. 6.95.4
    934 திருக்கோயி லில்லாத திருவி லூருந்
    திருவெண்ணீ றணியாத திருவி லூரும்
    பருக்கோடிப் பத்திமையாற் பாடா வூரும்
    பாங்கினொடு பலதளிக ளில்லா வூரும்
    விருப்போடு வெண்சங்க மூதா வூரும்
    விதானமும் வெண்கொடியு மில்லா வூரும்
    அருப்போடு மலர்பறித்திட் டுண்ணா வூரும்
    அவையெல்லாம் ஊரல்ல அடவி காடே. 6.95.5
    935 திருநாமம் அஞ்செழுத்துஞ் செப்பா ராகிற்
    தீவண்ணர் திறமொருகால் பேசா ராகில்
    ஒருகாலுந் திருக்கோயில் சூழா ராகில்
    உண்பதன்முன் மலர்பறித்திட் டுண்ணா ராகில்
    அருநோய்கள் கெடவெண்ணீ றணியா ராகில்
    அளியற்றார் பிறந்தவா றேதோ வென்னிற்
    பெருநோய்கள் மிகநலியப் பெயர்த்துஞ் செத்துப்
    பிறப்பதற்கே தொழிலாகி இறக்கின் றாரே. 6.95.6
    936 நின்னாவார் பிறரின்றி நீயே யானாய்
    நினைப்பார்கள் மனத்துக்கோர் வித்து மானாய்
    மன்னானாய் மன்னவர்க்கோ ரமுத மானாய்
    மறைநான்கு மானாயா றங்க மானாய்
    பொன்னானாய் மணியானாய் போக மானாய்
    பூமிமேற் புகழ்தக்க பொருளே உன்னை
    என்னானாய் என்னானாய் என்னி னல்லால்
    ஏழையேன் என்சொல்லி ஏத்து கேனே. 6.95.7
    937 அத்தாவுன் அடியேனை அன்பா லார்த்தாய்
    அருள்நோக்கில் தீர்த்தநீ ராட்டிக் கொண்டாய்
    எத்தனையும் அரியைநீ எளியை யானாய்
    எனையாண்டு கொண்டிரங்கி யேன்று கொண்டாய்
    பித்தனேன் பேதையேன் பேயேன் நாயேன்
    பிழைத்தனகள் எத்தனையும் பொறுத்தா யன்றே
    இத்தனையும் எம்பரமோ ஐய ஐயோ
    எம்பெருமான் றிருக்கருணை இருந்த வாறே. 6.95.8
    938 குலம்பொல்லேன் குணம்பொல்லேன் குறியும் பொல்லேன்
    குற்றமே பெரிதுடையேன் கோல மாய
    நலம்பொல்லேன் நான்பொல்லேன் ஞானி யல்லேன்
    நல்லாரோ டிசைந்திலேன் நடுவே நின்ற
    விலங்கல்லேன் விலங்கல்லா தொழிந்தே னல்லேன்
    வெறுப்பனவும் மிகப்பெரிதும் பேச வல்லேன்
    இலம்பொல்லேன் இரப்பதே ஈய மாட்டேன்
    என்செய்வான் தோன்றினேன் ஏழை யேனே. 6.95.9
    939 சங்கநிதி பதுமநிதி இரண்டுந் தத்து
    தரணியொடு வானாளத் தருவ ரேனும்
    மங்குவார் அவர்செல்வம் மதிப்போ மல்லோம்
    மாதேவர்க் கேகாந்த ரல்லா ராகில்
    அங்கமெலாங் குறைந்தழுகு தொழுநோ யராய்
    ஆவுரித்துத் தின்றுழலும் புலைய ரேனுங்
    கங்கைவார் சடைக்கரந்தார்க் கன்ப ராகில்
    அவர்கண்டீர் நாம்வணங்குங் கடவு ளாரே. 6.95.10

    திருச்சிற்றம்பலம்


    6.96 தனி - திருத்தாண்டகம்


    திருச்சிற்றம்பலம்

    940 ஆமயந்தீர்த் தடியேனை ஆளாக் கொண்டார்
    அதிகைவீ ரட்டானம் ஆட்சி கொண்டார்
    தாமரையோன் சிரமரிந்து கையிற் கொண்டார்
    தலையதனிற் பலிகொண்டார் நிறைவாந் தன்மை
    வாமனனார் மாகாயத் துதிரங் கொண்டார்
    மானிடங்கொண் டார்வலங்கை மழுவாள் கொண்டார்
    காமனையும் உடல்கொண்டார் கண்ணால் நோக்கிக்
    கண்ணப்பர் பணியுங்கொள் கபாலி யாரே. 6.96.1
    941 முப்புரிநூல் வரைமார்பில் முயங்கக் கொண்டார்
    முதுகேழல் முளைமருப்புங் கொண்டார் பூணாச்
    செப்புருவ முலைமலையாள் பாகங் கொண்டார்
    செம்மேனி வெண்ணீறு திகழக் கொண்டார்
    துப்புரவார் சுரிசங்கின் தோடு கொண்டார்
    சுடர்முடிசூழ்ந் தடியமரர் தொழவுங் கொண்டார்
    அப்பலிகொண் டாயிழையார் அன்புங் கொண்டார்
    அடியேனை ஆளுடைய அடிக ளாரே. 6.96.2
    942 முடிகொண்டார் முளையிளவெண் டிங்க ளோடு
    மூசுமிள நாகமுட னாகக் கொண்டார்
    அடிகொண்டார் சிலம்பலம்பு கழலு மார்ப்ப
    அடங்காத முயலகனை அடிக்கீழ்க் கொண்டார்
    வடிகொண்டார்ந் திலங்குமழு வலங்கைக் கொண்டார்
    மாலையிடப் பாகத்தே மருவக் கொண்டார்
    துடிகொண்டார் கங்காளந் தோள்மேற் கொண்டார்
    சூலைதீர்த் தடியேனை யாட்கொண் டாரே. 6.96.3
    943 பொக்கணமும் புலித்தோலும் புயத்திற் கொண்டார்
    பூதப் படைகள்புடை சூழக் கொண்டார்
    அக்கினொடு படவரவம் அரைமேற் கொண்டார்
    அனைத்துலகும் படைத்தவையும் அடங்கக் கொண்டார்
    கொக்கிறகுங் கூவிளமுங் கொண்டை கொண்டார்
    கொடியானை அடலாழிக் கிரையாக் கொண்டார்
    செக்கர்நிறத் திருமேனி திகழக் கொண்டார்
    செடியேனை யாட்கொண்ட சிவனார் தாமே. 6.96.4
    944 அந்தகனை அயிற்சூலத் தழுத்திக் கொண்டார்
    அருமறையைத் தேர்க்குதிரை யாக்கிக் கொண்டார்
    சுந்தரனைத் துணைக்கவரி வீசக் கொண்டார்
    சுடுகாடு நடமாடு மிடமாக் கொண்டார்
    மந்தரநற் பொருசிலையா வளைத்துக் கொண்டார்
    மாகாளன் வாசற்காப் பாகக் கொண்டார்
    தந்திரமந் திரத்தரா யருளிக் கொண்டார்
    சமண்தீர்த்தென் றன்னையாட் கொண்டார் தாமே. 6.96.5
    945 பாரிடங்கள் பலகருவி பயிலக் கொண்டார்
    பவள நிறங்கொண்டார் பளிங்குங் கொண்டார்
    நீரடங்கு சடைமுடிமேல் நிலாவுங் கொண்டார்
    நீலநிறங் கோலநிறை மிடற்றிற் கொண்டார்
    வாரடங்கு வனமுலையார் மைய லாகி
    வந்திட்ட பலிகொண்டார் வளையுங் கொண்டார்
    ஊரடங்க ஒற்றிநகர் பற்றிக் கொண்டார்
    உடலுறுநோய் தீர்த்தென்னை யாட்கொண் டாரே. 6.96.6
    946 அணிதில்லை அம்பலமா டரங்காக் கொண்டார்
    ஆலால அருநஞ்சம் அமுதாக் கொண்டார்
    கணிவளர்தார்ப் பொன்னிதழிக் கமழ்தார் கொண்டார்
    காதலார் கோடிகலந் திருக்கை கொண்டார்
    மணிபணத்த அரவந்தோள் வளையாக் கொண்டார்
    மால்விடைமேல் நெடுவீதி போதக் கொண்டார்
    துணிபுலித்தோ லினையாடை யுடையாக் கொண்டார்
    சூலங்கைக் கொண்டார்தொண் டெனைக்கொண் டாரே. 6.96.7
    947 படமூக்கப் பாம்பணையா னோடு வானோன்
    பங்கயனென் றங்கவரைப் படைத்துக் கொண்டார்
    குடமூக்கிற் கீழ்க்கோட்டங் கோயில் கொண்டார்
    கூற்றுதைத்தோர் வேதியனை உய்யக் கொண்டார்
    நெடுமூக்கிற் கரியினுரி மூடிக் கொண்டார்
    நினையாத பாவிகளை நீங்கக் கொண்டார்
    இடமாக்கி இடைமருதுங் கொண்டார் பண்டே
    என்னையிந்நா ளாட்கொண்ட இறைவர் தாமே. 6.96.8
    948 எச்சனிணைத் தலைகொண்டார் பகன்கண் கொண்டார்
    இரவிகளி லொருவன்பல் லிறுத்துக் கொண்டார்
    மெச்சன்வியாத் திரன்றலையும் வேறாக் கொண்டார்
    விறலங்கி கரங்கொண்டார் வேள்வி காத்து
    உச்சநமன் றாளறுத்தார் சந்திரனை யுதைத்தார்
    உணர்விலாத் தக்கன்றன் வேள்வி யெல்லாம்
    அச்சமெழ அழித்துக்கொண் டருளுஞ் செய்தார்
    அடியேனை யாட்கொண்ட அமலர் தாமே. 6.96.9
    949 சடையொன்றிற் கங்கையையுந் தரித்துக் கொண்டார்
    சாமத்தின் இசைவீணை தடவிக் கொண்டார்
    உடையொன்றிற் புள்ளியுழைத் தோலுங் கொண்டார்
    உள்குவார் உள்ளத்தை ஒருக்கிக் கொண்டார்
    கடைமுன்றிற் பலிகொண்டார் கனலுங் கொண்டார்
    காபால வேடங் கருதிக் கொண்டார்
    விடைவென்றிக் கொடியதனில் மேவக் கொண்டார்
    வெந்துயரந் தீர்த்தென்னை யாட்கொண் டாரே. 6.96.10
    950 குராமலரோ டராமதியஞ் சடைமேற் கொண்டார்
    குடமுழநந் தீசனைவா சகனாக் கொண்டார்
    சிராமலைதஞ் சேர்விடமாத் திருந்தக் கொண்டார்
    தென்றல்நெடுந் தேரோனைப் பொன்றக் கொண்டார்
    பராபரனென் பதுதமது பேராக் கொண்டார்
    பருப்பதங் கைக்கொண்டார் பயங்கள் பண்ணி
    இராவணனென் றவனைப்பே ரியம்பக் கொண்டார்
    இடருறுநோய் தீர்த்தென்னை யாட்கொண் டாரே. 6.96.11

    திருச்சிற்றம்பலம்


    6.97 திருவினாத் - திருத்தாண்டகம்



    திருச்சிற்றம்பலம்

    951 அண்டங் கடந்த சுவடு முண்டோ
    அனலங்கை யேந்திய ஆட லுண்டோ
    பண்டை யெழுவர் படியு முண்டோ
    பாரிடங்கள் பலசூழப் போந்த துண்டோ
    கண்ட மிறையே கறுத்த துண்டோ
    கண்ணின்மேற் கண்ணொன்று கண்ட துண்டோ
    தொண்டர்கள் சூழத் தொடர்ச்சி யுண்டோ
    சொல்லீரெம் பிரானாரைக் கண்ட வாறே. 6.97.1
    952 எரிகின்ற இளஞாயி றன்ன மேனி
    இலங்கிழையோர் பாலுண்டோ வெள்ளே றுண்டோ
    விரிகின்ற பொறியரவத் தழலு முண்டோ
    வேழத்தி னுரியுண்டோ வெண்ணூ லுண்டோ
    வரிநின்ற பொறியரவச் சடையு முண்டோ
    அச்சடைமேல் இளமதியம் வைத்த துண்டோ
    சொரிகின்ற புனலுண்டோ சூல முண்டோ
    சொல்லீரெம் பிரானாரைக் கண்ட வாறே. 6.97.2
    953 நிலாமாலை செஞ்சடைமேல் வைத்த துண்டோ
    நெற்றிமேற் கண்ணுண்டோ நீறு சாந்தோ
    புலால்நாறு வெள்ளெலும்பு பூண்ட துண்டோ
    பூதந்தற் சூழ்ந்தனவோ போரே றுண்டோ
    கலாமாலை வேற்கண்ணாள் பாகத் துண்டோ
    கார்க்கொன்றை மாலை கலந்த துண்டோ
    சுலாமாலை யாடரவந் தோள்மே லுண்டோ
    சொல்லீரெம் பிரானாரைக் கண்ட வாறே. 6.97.3
    954 பண்ணார்ந்த வீணை பயின்ற துண்டோ
    பாரிடங்கள் பலசூழப் போந்த துண்டோ
    உண்ணா வருநஞ்ச முண்ட துண்டோ
    ஊழித்தீ யன்ன ஒளிதா னுண்டோ
    கண்ணார் கழற்காலற் செற்ற துண்டோ
    காமனையுங் கண்ணழலாற் காய்ந்த துண்டோ
    எண்ணார் திரிபுரங்க ளெய்த துண்டோ
    எவ்வகையெம் பிரானாரைக் கண்ட வாறே. 6.97.4
    955 நீறுடைய திருமேனி பாக முண்டோ
    நெற்றிமே லொற்றைக்கண் முற்று முண்டோ
    கூறுடைய கொடுமழுவாள் கையி லுண்டோ
    கொல்புலித்தோ லுடையுண்டோ கொண்ட வேடம்
    ஆறுடைய சடையுண்டோ அரவ முண்டோ
    அதனருகே பிறையுண்டோ அளவி லாத
    ஏறுடைய கொடியுண்டோ இலய முண்டோ
    எவ்வகையெம் பிரானாரைக் கண்ட வாறே. 6.97.5
    956 பட்டமுந் தோடுமோர் பாகங் கண்டேன்
    பார்திகழப் பலிதிரிந்து போதக் கண்டேன்
    கொட்டிநின் றிலயங்க ளாடக் கண்டேன்
    குழைகாதிற் பிறைசென்னி யிலங்கக் கண்டேன்
    கட்டங்கக் கொடிதிண்டோ ளாடக் கண்டேன்
    கனமழுவாள் வலங்கையி லிலங்கக் கண்டேன்
    சிட்டனைத் திருவால வாயிற் கண்டேன்
    தேவனைக் கனவில்நான் கண்ட வாறே. 6.97.6
    957 அலைத்தோடு புனற்கங்கை சடையிற் கண்டேன்
    அலர்கொன்றைத் தாரணிந்த வாறு கண்டேன்
    பலிக்கோடித் திரிவார்கைப் பாம்பு கண்டேன்
    பழனம் புகுவாரைப் பகலே கண்டேன்
    கலிக்கச்சி மேற்றளியே இருக்கக் கண்டேன்
    கறைமிடறுங் கண்டேன் கனலுங் கண்டேன்
    வலித்துடுத்த மான்றோ லரையிற் கண்டேன்
    மறைவல்ல மாதவனைக் கண்ட வாறே. 6.97.7
    958 நீறேறு திருமேனி நிகழக் கண்டேன்
    நீள்சடைமேல் நிறைகங்கை யேறக் கண்டேன்
    கூறேறு கொடுமழுவாள் கொள்ளக் கண்டேன்
    கொடுகொட்டி கையலகு கையிற் கண்டேன்
    ஆறேறு சென்னியணி மதியுங் கண்டேன்
    அடியார்கட் காரமுத மாகக் கண்டேன்
    ஏறேறி இந்நெறியே போதக் கண்டேன்
    இவ்வகையெம் பெருமானைக் கண்ட வாறே. 6.97.8
    959 விரையுண்ட வெண்ணீறு தானு முண்டு
    வெண்டலைகை யுண்டொருகை வீணை யுண்டு
    சுரையுண்டு சூடும் பிறையொன் றுண்டு
    சூலமுந் தண்டுஞ் சுமந்த துண்டு
    அரையுண்ட கோவண ஆடை யுண்டு
    வலிக்கோலுந் தோலு மழகா வுண்டு
    இரையுண் டறியாத பாம்பு முண்டு
    இமையோர் பெருமா னிலாத தென்னே. 6.97.9
    960 மைப்படிந்த கண்ணாளுந் தானுங் கச்சி
    மயானத்தான் வார்சடையான் என்னி னல்லான்
    ஒப்புடைய னல்லன் ஒருவ னல்லன்
    ஓரூர னல்லனோ ருவம னில்லி
    அப்படியும் அந்நிறமும் அவ்வண் ணமும்
    அவனருளே கண்ணாகக் காணி னல்லால்
    இப்படியன் இந்நிறத்தன் இவ்வண் ணத்தன்
    இவனிறைவன் என்றெழுதிக் காட்டொ ணாதே. 6.97.10
    961 பொன்னொத்த மேனிமேற் பொடியுங் கண்டேன்
    புலித்தோ லுடைகண்டேன் புணரத் தன்மேல்
    மின்னொத்த நுண்ணிடையாள் பாகங் கண்டேன்
    மிளிர்வதொரு பாம்பும் அரைமேற் கண்டேன்
    அன்னத்தே ரூர்ந்த அரக்கன் றன்னை
    அலற அடர்த்திட்ட அடியுங் கண்டேன்
    சின்ன மலர்க்கொன்றைக் கண்ணி கண்டேன்
    சிவனைநான் சிந்தையுட் கண்ட வாறே. 6.97.11

    திருச்சிற்றம்பலம்


    6.98 திருமறுமாற்றத் - திருத்தாண்டகம்


    திருச்சிற்றம்பலம்

    962 நாமார்க்குங் குடியல்லோம் நமனை யஞ்சோம்
    நரகத்தி லிடர்ப்படோ ம் நடலை யில்லோம்
    ஏமாப்போம் பிணியறியோம் பணிவோ மல்லோம்
    இன்பமே எந்நாளுந் துன்ப மில்லை
    தாமார்க்குங் குடியல்லாத் தன்மை யான
    சங்கரனற் சங்கவெண் குழையோர் காதிற்
    கோமாற்கே நாமென்றும் மீளா ஆளாய்க்
    கொய்ம்மலர்ச்சே வடியிணையே குறுகி னோமே. 6.98.1
    963 அகலிடமே இடமாக ஊர்கள் தோறும்
    அட்டுண்பார் இட்டுண்பார் விலக்கார் ஐயம்
    புகலிடமாம் அம்பலங்கள் பூமி தேவி
    உடன்கிடந்தாற் புரட்டாள்பொய் யன்று மெய்யே
    இகலுடைய விடையுடையான் ஏன்று கொண்டான்
    இனியேதுங் குறைவிலோம் இடர்கள் தீர்ந்தோந்
    துகிலுடுத்துப் பொன்பூண்டு திரிவார் சொல்லுஞ்
    சொற்கேட்கக் கடவோமோ துரிசற் றோமே. 6.98.2
    964 வாராண்ட கொங்கையர்சேர் மனையிற் சேரோம்
    மாதேவா மாதேவா என்று வாழ்த்தி
    நீராண்ட புரோதாயம் ஆடப் பெற்றோம்
    நீறணியுங் கோலமே நிகழப் பெற்றோங்
    காராண்ட மழைபோலக் கண்ணீர் சோரக்
    கன்மனமே நன்மனமாக் கரையப் பெற்றோம்
    பாராண்டு பகடேறித் திரிவார் சொல்லும்
    பணிகேட்கக் கடவோமோ பற்றற் றோமே. 6.98.3
    965 உறவாவார் உருத்திரபல் கணத்தி னோர்கள்
    உடுப்பனகோ வணத்தொடுகீ ளுளவா மன்றே
    செறுவாருஞ் செறமாட்டார் தீமை தானும்
    நன்மையாய்ச் சிறப்பதே பிறப்பிற் செல்லோம்
    நறவார்பொன் னிதழிநறுந் தாரோன் சீரார்
    நமச்சிவா யஞ்சொல்ல வல்லோம் நாவாற்
    சுறவாருங் கொடியானைப் பொடியாக் கண்ட
    சுடர்நயனச் சோதியையே தொடர்வுற் றோமே. 6.98.4
    966 என்றும்நாம் யாவர்க்கும் இடைவோ மல்லோம்
    இருநிலத்தில் எமக்கெதிரா வாரு மில்லை
    சென்றுநாஞ் சிறுதெய்வஞ் சேர்வோ மல்லோஞ்
    சிவபெருமான் திருவடியே சேரப் பெற்றோம்
    ஒன்றினாற் குறையுடையோ மல்லோ மன்றே
    உறுபிணியார் செறலொழிந்திட் டோ டிப் போனார்
    பொன்றினார் தலைமாலை யணிந்த சென்னிப்
    புண்ணியனை நண்ணியபுண் ணியத்து ளோமே. 6.98.5
    967 மூவுருவின் முதலுருவாய் இருநான் கான
    மூர்த்தியே யென்றுமுப் பத்து மூவர்
    தேவர்களும் மிக்கோருஞ் சிறந்து வாழ்த்துஞ்
    செம்பவளத் திருமேனிச் சிவனே யென்னும்
    நாவுடையார் நமையாள வுடையா ரன்றே
    நாவலந்தீ வகத்தினுக்கு நாத ரான
    காவலரே யேவி விடுத்தா ரேனுங்
    கடவமலோங் கடுமையொடு களவற் றோமே. 6.98.6
    968 நிற்பனவும் நடப்பனவும் நிலனும் நீரும்
    நெருப்பினொடு காற்றாகி நெடுவா னாகி
    அற்பமொடு பெருமையுமாய் அருமை யாகி
    அன்புடையார்க் கெளிமையதாய் அளக்க லாகாத்
    தற்பரமாய்ச் சதாசிவமாய்த் தானும் யானும்
    ஆகின்ற தன்மையனை நன்மை யோடும்
    பொற்புடைய பேசக் கடவோம் பேயர்
    பேசுவன பேசுதுமோ பிழையற் றோமே. 6.98.7
    969 ஈசனையெவ் வுலகினுக்கும் இறைவன் றன்னை
    இமையவர்தம் பெருமானை எரியாய் மிக்க
    தேசனைச் செம்மேனி வெண்ணீற் றானைச்
    சிலம்பரையன் பொற்பாவை நலஞ்செய் கின்ற
    நேசனை நித்தலும் நினையப் பெற்றோம்
    நின்றுண்பா ரெம்மை நினையச் சொன்ன
    வாசக மெல்லாம் மறந்தோ மன்றே
    வந்தீரார் மன்னவனா வான்றா னாரே. 6.98.8
    970 சடையுடையான் சங்கக் குழையோர் காதன்
    சாம்பலும் பாம்பு மணிந்த மேனி
    விடையுடையான் வேங்கை யதள்மே லாடை
    வெள்ளிபோற் புள்ளியுழை மான்றோல் சார்ந்த
    உடையுடையான் நம்மை யுடையான் கண்டீர்
    உம்மோடு மற்று முளராய் நின்ற
    படையுடையான் பணிகேட்கும் பணியோ மல்லோம்
    பாசமற வீசும் படியோம் நாமே. 6.98.9
    971 நாவார நம்பனையே பாடப் பெற்றோம்
    நாணற்றார் நள்ளாமே விள்ளப் பெற்றோம்
    ஆவாவென் றெமையாள்வான் அமரர் நாதன்
    அயனொடுமாற் கறிவரிய அனலாய் நீண்ட
    தேவாதி தேவன் சிவனென் சிந்தை
    சேர்ந்திருந்தான் தென்றிசைக்கோன் றானே வந்து
    கோவாடிக் குற்றேவல் செய்கென் றாலுங்
    குணமாகக் கொள்ளோமெண் குணத்து ளோமே. 6.98.10

    திருச்சிற்றம்பலம்


    6.99 திருப்புகலூர் - திருத்தாண்டகம்


    திருச்சிற்றம்பலம்

    972 எண்ணுகேன் என்சொல்லி எண்ணு கேனோ
    எம்பெருமான் திருவடியே எண்ணி னல்லாற்
    கண்ணிலேன் மற்றோர் களைக ணில்லேன்
    கழலடியே கைதொழுது காணி னல்லால்
    ஒண்ணுளே ஒன்பது வாசல் வைத்தாய்
    ஒக்க அடைக்கும்போ துணர மாட்டேன்
    புண்ணியா உன்னடிக்கே போது கின்றேன்
    பூம்புகலூர் மேவிய புண்ணி யனே. 6.99.1
    973 அங்கமே பூண்டாய் அனலா டினாய்
    ஆதிரையாய் ஆல்நிழலாய் ஆனே றூர்ந்தாய்
    பங்கமொன் றில்லாத படர்ச டையினாய்
    பாம்பொடு திங்கள் பகைதீர்த் தாண்டாய்
    சங்கையொன் றின்றியே தேவர் வேண்டச்
    சமுத்திரத்தின் நஞ்சுண்டு சாவா மூவாச்
    சிங்கமே உன்னடிக்கே போது கின்றேன்
    திருப்புகலூர் மேவிய தேவ தேவே. 6.99.2
    974 பையரவக் கச்சையாய் பால்வெண் ணீற்றாய்
    பளிக்குக் குழையினாய் பண்ணார் இன்சொல்
    மைவிரவு கண்ணாளைப் பாகங் கொண்டாய்
    மான்மறிகை யேந்தினாய் வஞ்சக் கள்வர்
    ஐவரையும் என்மேற் றரவ றுத்தாய்
    அவர்வேண்டுங் காரியமிங் காவ தில்லை
    பொய்யுரையா துன்னடிக்கே போது கின்றேன்
    பூம்புகலூர் மேவிய புண்ணி யனே. 6.99.3
    975 தெருளாதார் மூவெயிலுந் தீயில் வேவச்
    சிலைவளைத்துச் செங்கணையாற் செற்ற தேவே
    மருளாதார் தம்மனத்தில் வாட்டந் தீர்ப்பாய்
    மருந்தாய்ப் பிணிதீர்ப்பாய் வானோர்க் கென்றும்
    அருளாகி ஆதியாய் வேத மாகி
    அலர்மேலான் நீர்மேலான் ஆய்ந்துங் காணாப்
    பொருளாவாய் உன்னடிக்கே போது கின்றேன்
    பூம்புகலூர் மேவிய புண்ணி யனே. 6.99.4
    976 நீரேறு செஞ்சடைமேல் நிலாவெண் டிங்கள்
    நீங்காமை வைத்துகந்த நீதி யானே
    பாரேறு படுதலையிற் பலிகொள் வானே
    பண்டனங்கற் காய்ந்தானே பாவ நாசா
    காரேறு முகிலனைய கண்டத் தானே
    கருங்கைக் களிற்றுரிவை கதறப் போர்த்த
    போரேறே உன்னடிக்கே போது கின்றேன்
    பூம்புகலூர் மேவிய புண்ணி யனே. 6.99.5
    977 விரிசடையாய் வேதியனே வேத கீதா
    விரிபொழில்சூழ் வெண்காட்டாய் மீயச் சூராய்
    திரிபுரங்க ளெரிசெய்த தேவ தேவே
    திருவாரூர்த் திருமூலத் தான மேயாய்
    மருவினியார் மனத்துளாய் மாகா ளத்தாய்
    வலஞ்சுழியாய் மாமறைக்காட் டெந்தா யென்றும்
    புரிசடையாய் உன்னடிக்கே போது கின்றேன்
    பூம்புகலூர் மேவிய புண்ணி யனே. 6.99.6
    978 தேவார்ந்த தேவனைத் தேவ ரெல்லாந்
    திருவடிமேல் அலரிட்டுத் தேடி நின்று
    நாவார்ந்த மறைபாடி நட்ட மாடி
    நான்முகனும் இந்திரனும் மாலும் போற்றக்
    காவார்ந்த பொழிற்சோலைக் கானப் பேராய்
    கழுக்குன்றத் துச்சியாய் கடவு ளேநின்
    பூவார்ந்த பொன்னடிக்கே போது கின்றேன்
    பூம்புகலூர் மேவிய புண்ணி யனே. 6.99.7
    979 நெய்யாடி நின்மலனே நீல கண்டா
    நிறைவுடையாய் மறைவல்லாய் நீதி யானே
    மையாடு கண்மடவாள் பாகத் தானே
    மான்றோ லுடையாய் மகிழ்ந்து நின்றாய்
    கொய்யாடு கூவிளங் கொன்றை மாலை
    கொண்டடியேன் நானிட்டுக் கூறி நின்று
    பொய்யாத சேவடிக்கே போது கின்றேன்
    பூம்புகலூர் மேவிய புண்ணி யனே. 6.99.8
    980 துன்னஞ்சேர் கோவணத்தாய் தூய நீற்றாய்
    துதைந்திலங்கு வெண்மழுவாள் கையி லேந்தித்
    தன்னணையுந் தண்மதியும் பாம்பும் நீருஞ்
    சடைமுடிமேல் வைத்துகந்த தன்மை யானே
    அன்ன நடைமடவாள் பாகத் தானே
    அக்காரம் பூண்டானே ஆதி யானே
    பொன்னங் கழலடிக்கே போது கின்றேன்
    பூம்புகலூர் மேவிய புண்ணி யனே. 6.99.9
    981 ஒருவனையு மல்லா துணரா துள்ளம்
    உணர்ச்சித் தடுமாற்றத் துள்ளே நின்ற
    இருவரையும் மூவரையும் என்மே லேவி
    இல்லாத தரவறுத்தாய்க் கில்லேன் ஏலக்
    கருவரை சூழ்கானல் இலங்கை வேந்தன்
    கடுந்தேர்மீ தோடாமைக் காலாற் செற்ற
    பொருவரையாய் உன்னடிக்கே போது கின்றேன்
    பூம்புகலூர் மேவிய புண்ணி யனே. 6.99.10

    திருச்சிற்றம்பலம்

    திருநாவுக்கரசுசுவாமிகள் அருளிச்செய்த
    தேவாரப்பதிகங்கள் ஆறாம் திருமுறை முற்றும் .